Mɑɑtieo 26 - Yiesu Lɑbɑmɑnn Muɑl Ni

Yudɑnm lol ɑ bin kpi Yiesu

¹ Yiesu nbɑ din pɑk mɑɑn mɑnŋ kul k gbenn yuo nbɑ k u yet u *puolpoweitieb ɑ:

² «I mi nɑn dɑɑlpo e tie *yuktgɑltiɑlu jɑɑnm, k b dɑɑn sɑɑ jii *Nisɑɑlk Bijɑ k tul niib ɑ bin kpɑɑ’u dɑpunpunn pɑɑk.»

³ L yuo mɑnŋ k Yennu mɑnntieb yudɑnm nɑn *Suifnbɑ sɑɑkɑb din tikl lieb *Kɑɑyiif ŋɑɑk ni, wun nbɑ tie Yennu mɑnntieb yudɑnm sɑɑkuɑ nɑ.

⁴ B din lol bɑɑ sɑɑ tien biɑnŋ nbɑ k bɔl suol Yiesu e k kpi’u.

⁵ Ŋɑɑn b din lol ɑ b kɑn suol’ɔ jɑɑnm dɑɑ ni, k mɑɑn b i tien nnɑ sie k kpikpiluk bɑɑl.

Puosuɑ but tulɑɑli Yiesu yul pɑɑk

⁶ Tɔn, Yiesu nbɑ din tɑn be Betɑɑni duo ni, Siimɔn nbɑ din tuu tie gbɑɑtl nɑ ŋɑɑk,

⁷ k kɑl di jiet, k puosuɑ din kuɑ k diɑ sɑlenŋɑnn, k tulɑɑli nbɑ k l dɑɑɔk pɑɑl bonciɑnn din gbie lenŋ ɑ, k bɑɑl tɑn but Yiesu yul pɑɑk.

⁸ K Yiesu puolpoweitieb nɑ nbɑ din lɑ nnɑ yuo nbɑ k b piɑk buln nɑn wutuol k yien ɑ: «Bee k puo nɑ biil tulɑɑli nɑ nnɑ mɑn i?

⁹ K mɑɑn b bo sɑɑ fit kɔi’l k gɑɑl likli bonciɑnn k sonm tɑlɑs-dɑnm.»

¹⁰ K Yiesu din bɑnn b bunbulmi mɑnŋ, k boi’b ɑ: «Bee tien k i buln k dɑɑmi puo nɑ? Bonŋɑnn e k u tun k tul’n mɑnŋ.

¹¹ Tɑlɑs-dɑnm ŋɑnin sii tun be i buol ni yuo kul e, ŋɑɑn min ŋɑnin kii tun be nnɑ kɑɑ.

¹² Tulɑɑli nbɑ k u but n pɑɑk nɑ, u tien n piinu siil e.

¹³ Bɑlmɔni e k n yien’i nɑ, siɑn nbɑ kul k b sɑɑ muɑnt lɑbɑmɑnn nɑ tingbounŋ nɑ ni, b biɑ sɑɑ muɑnt puo mɑnŋ nbɑ tun lin nbɑ nɑ, k lii tie lin nbɑ k b sii tiɑn u po.»

Suudɑ sɑk kuɑt Yiesu

¹⁴ L yuo nɑ k Yiesu puolpoweitieb nɑ ni yenɔ, wun nbɑ k b yi’u Suudɑ Iskɑɑliɑɔt nɑ, nyii k sɑɑn Yennu mɑnntieb yudɑnm buol ni,

¹⁵ k sɑɑ boi’b ɑ: «I sɑɑ tul’n bee ŋɑɑn k n lon sɔni k Yiesu n kuɑ i nuu ni?» K b kɑn likbin piintɑ k tul’ɔ.

¹⁶ K lɑɑ din nyii l yuo mɑnŋ k jii sɑɑ k u lon sɔni nbɑ k u sɑɑ jii Yiesu k kuɑn’ɔ b nuu ni.

*Yuktgɑltiɑlu jɑɑnm dinu lɑbɑɑl

¹⁷ K pɑɑnu nbɑ k b din k tie * dɑtinŋ nɑ jɑɑnm piinu dɑɑl, k Yiesu puolpoweitieb din bɑɑl u buol ni, k tɑn boi’ɔ ɑ: «A luon k tin sɑɑn lee k sɑɑ tien siil k guun’ɑ *yuktgɑltiɑlu jɑɑnm nɑ dinu?»

¹⁸ K u yet’b ɑ: «Ii sɑɑ mɑn duo nɑ ni jɑsuɑ nnɑ ŋɑɑk ni, k sɑɑ yet’ɔ ɑ: ‹T Wɑntuɑ e tun’t ɑ t tɑn yet’ɑ ɑ u yuo pel nɑ, k u luon ŋuɑ nɑn u puolpoweitieb n di *yuktgɑltiɑlu jɑɑnm ɑ ŋɑɑk nnɑ.› »

¹⁹ K u puolpoweitieb mun din tun nɑn wɑɑ wɑnn’b biɑnŋ nbɑ nɑ, k din tien jɑɑnm mɑnŋ jiet siil.

²⁰ Dɑɑjuouk nbɑ din tɑn bɑɑl, k Yiesu nɑn u tuomiinbɑ *piik nɑn bɑnle nɑ kuɑ k kɑl ɑ bin di.

²¹ Bɑɑ din di yuo nbɑ k Yiesu yet’b ɑ: «Bɑlmɔni e k n yien’i nɑ, i ni yenɔ sɑɑ k kuɑt’n ɑ.»

²² K u puolpoweitieb nɑ pɑlɑ ni din biil bonciɑnn, k b piin k boi’ɔ yenɔ yenɔ ɑ: «N Yonmdɑɑnɔ, bɑlmɔni, ɑ yien min ee?»

²³ K u jiin k yet ɑ: «Wun nbɑ k min nɑn ŋuɑ lɑkn suk kpinsenyenŋ ni nɑ e sɑɑ kuɑt’n.

²⁴ Nisɑɑlk Bijɑ set sɑɑ kpo nɑn Yennu lolkpel kɑdɑɑɔk nbɑ wɑnn biɑnŋ nbɑ nɑ e, ŋɑɑn bonbiil sii be wun nbɑ yɑɑ wun kuɑt’n nɑ pɑɑk. B i bo ii dinŋ ii kii mɑl l dɑɑnɔ, l bo din sɔ.»

²⁵ Ŋɑnn e k Suudɑ wun nbɑ yɑɑ wun kuɑt’ɔ nɑ mun din boi’ɔ ɑ: «Wɑntuɑ, ɑ yien min ee?» Ŋɑnn e k Yiesu jiin k yet’ɔ ɑ: «Nnn, fin e yɑɑ.»

Yiesu mɔtɑɑɔk dinu lɑbɑɑl

²⁶ Bɑɑ tɑn kɑl di jiet yuo nbɑ nɑ k Yiesu jii pɑɑnu, k tul Yennu niipuouk l pɑɑk, ŋɑɑn ŋmit ŋmit, k tul u puolpoweitieb, ŋɑɑn yet’b ɑ: «Gɑɑt mɑn k ŋmɑn. Nɑ e tie n gbɑnɑnt.»

²⁷ K u biɑ din jii *kɔp nɑn dɑmunŋ, k tul Yennu niipuouk l pɑɑk, k jii’l k tul’b ŋɑɑn yet’b ɑ: «Gɑɑt mɑn, k i kul ɑ n nyu.

²⁸ Lin nbɑ nɑ e tie n sɔn nbɑ sɑɑ te k Yennu mɔsonn n set nɑn bɑlmɔni, sɔn nbɑ tɑn sɑɑ nyi n gbɑnɑnt ni, ɑ nisɑɑli bonciɑnn n lɑ nyikcɑbu b biit pɑɑk e nɑ.

²⁹ N yien’i e, n kɑn mi nyu dɑmunŋ mɑnŋ, sie dɑɑl nbɑ k min nɑn yinm tɑn sɑɑ lɑkn ŋɑnm nyu n Bɑɑ nɑɑn ni.»

³⁰ Ŋɑnn e k b din yin Suifnbɑ Yenjiɑntu *yɑni, ŋɑɑn nyii k sɑɑn *Oliifienbɑ jɑgbɑɑk pɑɑk.

Yiesu yet ɑ Piɑl sɑɑ noi ɑ u k mi’u

³¹ L yuo nɑ k Yiesu din yet’b ɑ: «Nyiɑɔk nɑ, i kul ɑ sɑɑ tin ŋɑɑn nyik’n ɑ, k mɑɑn l diɑn Yennu lolkpel kɑdɑɑɔk ni ɑ: ‹N tɑn sɑɑ kpi pekpɑɑlk nɑ, k pei nbɑ k u tuu kpɑɑl’b nɑ sɑɑ tin yɑt.›

³² Ŋɑɑn mi i tɑnŋ i fiil kuun ni, l puolpo, n sɑɑ liit i tuɑnn k sɑɑn Gɑɑliile.»

³³ K Piɑl jiin k yet’ɔ ɑ: «N Yonmdɑɑnɔ, suɑ kul i lek i tɑnŋ i tin k nyik’ɑ, ŋɑɑn min ŋɑnin kɑn mi tin k nyik’ɑ ni.»

³⁴ K Yiesu jiin k yet’ɔ ɑ: «Bɑlmɔni e k n yien’ɑ nɑ, dinnɑ nyiɑɔk nɑ, nɑn kojouk n tɑn bui nɑ, k ɑ noi tɑɑl muntɑ wɑɑ ɑ ɑ k mi’n.»

³⁵ K Piɑl jiin ɑ: «L i lek i bɑɑl ɑ min nɑn fin n lɑkn kpo, n kɑn mi k noi ɑ n k mi’ɑ ni.» K u puolpoweitieb nɑ kul ɑ mun din yet nnɑ.

Yiesu mei Yennu nɑn ninmɔnn

³⁶ Ŋɑnn e k Yiesu nɑn u puolpoweitieb din sɑɑn siɑn nbɑ k b yi Getsemɑɑne nɑ, k u sɑɑ yet’b ɑ: «Ii be nnɑ mɑn, ŋɑɑn k n gɑl i tuɑnn po nɑ k sɑɑ miɑl Yennu»

³⁷ K jii Piɑl nɑn Sebede wɑɑs bɑnle nɑ k pukn u mɔnŋ po. K piin k lɑ pɑlbiil nɑn yɑn-yetuk,

³⁸ k yet’b ɑ: «Pɑlbibuolu nbɑ suol’n nɑ pel lin kpi’n ɑ. Biɑt nnɑ mɑn kii nyɔi nɑn’n.»

³⁹ Ŋɑnn e k u cɑt k sɑɑn wɑɑnm-nnɑ b tuɑnn po, k gbɑɑn tinŋ ni, ŋɑɑn mei Yennu k yien ɑ: «N Bɑɑ, l i bo i sɑɑ fit, fɑn ŋɑɑn k fɑlɑ nbɑ bɑɑt n pɑɑk nɑ n yɑkl’n. Ŋɑɑn ŋɑɑnt k ɑ lonm o n tun, k l dɑɑ tie n lonm u.»

⁴⁰ K u tɑn ŋmɑt u puolpoweitieb bɑntɑ nɑ buol ni, k bɑɑl suɑ k b guɑnt, k u boi Piɑl ɑ: «I lek kɑn fit kii nyɔi nɑn’n yuo wɑɑn ii?

⁴¹ Ii nyɔi mɑn ŋɑɑn kii mei Yennu k i tɑn dɑɑ kuɑ jinjɑnmi ni, k mɑɑn i sei ŋɑnin luon lin tun lin nbɑ ŋɑn, ŋɑɑn k i gbɑnɑnt kɑɑ pɑnŋ.»

⁴² K Yiesu din ŋmɑt tɑɑl munle ni k sɑɑ mei Yennu k yien ɑ: «N Bɑɑ, l i tie k fɑlɑ nbɑ bɑɑt n pɑɑk nɑ kɑn fit gɑl’n ŋɑnn sie k n dii’l, ŋɑɑnt k ɑ lonm n tun.»

⁴³ K u biɑ ŋmɑt k sɑɑ bɑɑl suɑ k u puolpoweitieb nɑ biɑ guɑn ɑ, k mɑɑn guɑn din mɔk’b bonciɑnn.

⁴⁴ K u nyik’b k biɑ ŋmɑt tɑɑl muntɑ ni, k sɑɑ mei Yennu k yien l biɑnŋ nɑn wɑɑ bo miɑl sinsinn nɑ.

⁴⁵ Ŋɑnn e k u ŋmɑt k bɑɑl u puolpoweitieb mɑnŋ buol ni k tɑn boi’b ɑ: «I biɑ lek dɑɑ guɑnt e k foi ii? Gotl mɑn, yuo mɑnŋ pel nɑ. B sɑɑ jii Nisɑɑlk Bijɑ nɑ k tien’ɔ biitdɑnm nuu ni wɑɑ.

⁴⁶ Fiit mɑn k tin sɑɑn. Gotl mɑn, wun nbɑ nyii n puol nɑ pel ɑ.»

B suol Yiesu

⁴⁷ U mɔb dɑɑ din k bɑɑ tinŋ, k Suudɑ wun nbɑ tie u puolpoweitieb nɑ ni yenɔ dɔkt nɑn nibulciɑɔnŋ, k siɑb diɑ juk-bɑnjɑi, k siɑb mun diɑ gbɑjɑlɑ, k nyii Yennu mɑnntieb yudɑnm nɑn Suifnbɑ sɑɑkɑb buol ni.

⁴⁸ Suudɑ wun nbɑ nyii u puol nɑ ponŋ dɑɑn wɑnn niib mɑnŋ nyinsiɑl e ɑ: «Mi i sɑɑ i fuont wun nbɑ k muɑt u tɑnkpinn, ii mi nɑn ŋuɑ e nɑ, k yin suol’ɔ kenken mɑn.»

⁴⁹ Suudɑ nbɑ tɑn bɑɑl yuo nbɑ, l tɑɑkpɑɑk ni k u sɑɑn k sɑɑ set Yiesu penŋ ŋɑɑn yet’ɔ ɑ: «Wɑntuɑ, ɑ nyiɑɔk po,» ŋɑɑn muɑt u tɑnkpinn.

⁵⁰ K Yiesu jiɑnt yet’ɔ ɑ: «N yuɑk, Fɑɑ bɑɑl ɑ tun lin nbɑ nɑ, tumn yiɑn.» L yuo nɑ k niib nɑ ji wuul bɑɑl k tɑn bib Yiesu.

⁵¹ Ŋɑnn e k u puolpoweitieb nɑ ni yenɔ tɑɑn kɑkt nuɑt *juk-bɑnjiɑk ŋɑɑn cuɑ pot Yennu mɑnntieb yudɑɑnɔ tuontunnɔ tubl k lu.

⁵² Ŋɑɑn k Yiesu yet’ɔ ɑ: «Jiint ɑ juk-bɑnjiɑk mɑnŋ k nuɑn l tuok ni, k mɑɑn wun nbɑ kɔn nɑn juk, u kpenn juk kuun e.

⁵³ Nnɑlɑ, n bo sɑɑ fit miɑl n Bɑɑ sonml po, k u bo sɑɑ tun *mɑlɑkɑɑnbɑ yiɑn ɑ, k bin gɑl tusɑ piik nɑn ŋɑnle.

⁵⁴ Ŋɑɑn mi i tien nnɑ, nlee k l sɑɑ tun k gbien lin nbɑ diɑn Yennu lolkpel kɑdɑɑɔk ni k yet ɑ sie k lin nbɑ nɑ n tien i?»

⁵⁵ Ŋɑnn e k u boi nibulciɑɔnŋ nɑ: «I bɑɑl nɑn juki nɑn gbɑjɑlɑ ɑ i tɑn suol’n nɑn n tie fɑt-tuɑ e nɑ ɑɑ? N dɑɑn tuu be Yennu jɑɑnti ŋɑsɑɑkɑk ni dɑɑl kul ɑ k tumi niib, ŋɑɑn k i tuu k so’n.

⁵⁶ Ŋɑɑn lin nbɑ nɑ kul tun, ɑ lin gbien *Yennu sɔkniinbɑ nbɑ din diɑn lin nbɑ nɑ e.» L yuo k u puolpoweitieb nɑ kul ciɑl ŋɑɑn nyik’ɔ.

B jii Yiesu k bɑɑl nɑn’ɔ buut buol ni

⁵⁷ K bin nbɑ suol Yiesu nɑ jii’u k sɑɑn nɑn’ɔ Yennu jɑɑnti yudɑɑnɔ Kɑɑyiif ŋɑɑk, siɑn nbɑ k *senniwɑntieb nɑn tinŋ nɑ ni sɑɑkɑb kɑl k guu nɑ.

⁵⁸ Bɑɑ sɑɑn nɑn Yiesu nɑ, k Piɑl wɑɑ u puolpo bɑnfɔkl ɑ, k sɑɑ bɑɑl sie Yennu mɑnntieb yudɑɑnɔ mɑnŋ ŋɑɑk nɑn-yel po, k tɑn kuɑ dundounŋ ni, k sɑɑn sɑɑ kɑl tuontunnɑ buol ni, ɑ wun lɑ l juontu.

⁵⁹ K Yennu mɑnntieb yudɑnm nɑn sɑɑkɑb mɑnŋ kul yɑbl b mɔnŋ pɑɑk ɑ bin lɑ fɑɑk siɑlɑɑdɑnm mɔb ni lin nbɑ k b sɑɑ jii Yiesu biit k kpi’u.

⁶⁰ K niib bonciɑnn set dii fɑɑk siɑlɑ u pɑɑk, ŋɑɑn kɔnŋ u bisiɑt. L puolpo k jɑb bɑnle nyii set k yet ɑ:

⁶¹ «Juɑ nɑ dɑɑn yet ɑ u mɔk yiikuo k sɑɑ fit bet Yennu jɑɑnti ŋɑsɑɑkɑk nɑ, ŋɑɑn biɑ mɑɑ’l dɑɑ ŋɑntɑ sinsuuk ni.»

⁶² Ŋɑnn e k Yennu mɑnntieb yudɑɑnɔ mɑnŋ fiil set, ŋɑɑn boi Yiesu: «A k mɔk l jiinu uu? Lin nbɑ k jɑb mɑnŋ piɑk ɑ po nɑ, l pɑɑk tie bee?»

⁶³ Ŋɑɑn k Yiesu k jiin siɑl. K Yennu mɑnntieb yudɑɑnɔ mɑnŋ ŋɑnm boi’ɔ ɑ: «Yet’t Yennu nbɑ fo nɑ pɑɑk, fin e set tie *Klistu nɑ k biɑ tie u Bijɑ nɑ ɑɑ?»

⁶⁴ K Yiesu jiin ɑ: «Nnn, fin e yɑɑ. Ŋɑɑn n yien’i e, lɑɑ nyii mɔtɑɑnɑ k jii sɑɑ, i tɑn sɑɑ lɑ Nisɑɑlk Bijɑ k u kɑl Yiikuo Dɑɑnɔ niidiitu po, k biɑ tɑn sɑɑ lɑ’u k u be sɑnpɑgbɑnɑ ni k siik.»

⁶⁵ Ŋɑnn e k Yennu mɑnntieb yudɑɑnɔ mɑnŋ wutuol duo, k u dɑt u mɔnŋ liɑtfuouk pɑt, ŋɑɑn tiɑn ɑ: «U piɑk biil Yennu e. K t ponŋ ji luon siɑlɑɑdɑnm ɑ t tien bee? I kul ɑ nɑ gbɑt wɑɑ piɑk biil Yennu biɑnŋ nbɑ.

⁶⁶ K i lɑ nlee?» K b jiin ɑ: «U ŋɑn nɑn kuun e.»

⁶⁷ L yuo nɑ, k b ji piin k siin mɔsɑnt u pɑɑk, k buo’u, k siɑb pebt’ɔ tɑnpɑki,

⁶⁸ ŋɑɑn yien ɑ: «Fin Klistu, buntl wun nbɑ pebt’ɑ nɑ.»

Piɑl noi ɑ u k mi Yiesu

⁶⁹ Piɑl nbɑ kɑl Yennu mɑnntieb yudɑɑnɔ ŋɑɑdundounŋ ni nɑ, k ŋɑɑk mɑnŋ ni bonposiɑk bɑɑl u buol ni k tɑn yet’ɔ ɑ: «A mun tuu tun be nɑn Yiesu nbɑ nyii Gɑɑliile nɑ.»

⁷⁰ K Piɑl yet niib mɑnŋ kul ɑ buol ɑ: «N k mi fɑɑ piɑk lin nbɑ nɑ pɑɑk.»

⁷¹ L puolpo k u fiil nyii k sɑɑ kɑl nɑn-yel po. K ŋɑɑk mɑnŋ ni bonpoliek biɑ nyii lɑ’u, k yet bin nbɑ be lenŋ nɑ ɑ: «Juɑ nɑ mun tuu tun be Yiesu nbɑ nyii Nɑɑsɑɑlet nɑ buol ni.»

⁷² K Piɑl noi buun nii muu ni, k pol ɑ ŋuɑ tɑɑn k mi juɑ mɑnŋ.

⁷³ K l yɑnn wɑɑnm-nnɑ k bin nbɑ sie lenŋ nɑ bɑɑl k tɑn yet Piɑl ɑ: «A set tie b ni yenɔ e, k mɑɑn ɑ mɑɑn nɑ e wɑnt.»

⁷⁴ K Piɑl pol ɑ: «L i tie k n fɑ i e, Yennu n dɑt n tubl. N k mi juɑ mɑnŋ.» L yuo mɑnŋ k kojouk bui.

⁷⁵ K Piɑl ji tiɑl Yiesu nbɑ bo yet’ɔ nɑ ɑ: «Kojouk dɑɑ tɑn kɑn bui sinsinn dɑɑnn, k ɑ tɑn sɑɑ noi tɑɑl muntɑ, ɑ ɑ k mi’n.» K Piɑl nyii nɑn-yel po k sɑɑ bui k fɑbn bonciɑnn.