Mɑɑtieo 22 - Yiesu Lɑbɑmɑnn Muɑl Ni

Puociɑnu jɑɑnm bɑljouk

¹ K Yiesu biɑ din piin k piɑk tien niib mɑnŋ nɑn bɑljokt ɑ:

² «Yennu nɑɑn tie nɑn kpɑnbɑlsuɑ nbɑ din tien siil ɑ wun tien puociɑnu jɑɑnm k tul u bijɑ nɑ e.

³ K u din tɑn tun u tuontunnɑ, ɑ bin sɑɑn k yiin niib nbɑ k u dɑɑn yiin’m nɑ, ɑ bin bɑɑl nɑ, ŋɑɑn k b k luon bin bɑɑl.

⁴ K u ŋɑnm tun tuontunlieb k yet’b ɑ: ‹Ii sɑɑ mɑn k yet niib nbɑ k n dɑɑn yiin’m nɑ, ɑ jɑɑnm jiet tien siil ɑ. N ponŋ kpii nɑɑjɑi nɑn bonkobkpɑnmɑ, k l kul tien siil ɑ. Ii sɑɑ nɑ mɑn k tɑn di jɑɑnm mɑnŋ.›

⁵ Ŋɑɑn wɑɑ din poi bin nbɑ mɑnŋ nɑ, b din k gbiint k tul u tuontunnɑ, ŋɑɑn yɑɑt yɑɑt k sɑɑn b tuonɑ ni: k yenɔ duo u kpɑɑb ni, k luɑ mun sɑɑn u bont kɔiu dɑɑk ni.

⁶ Ŋɑɑn k siɑb mun suol u tuontunnɑ nɑ k buo’b k sɑɑ kpii’b.

⁷ Ŋɑnn e k kpɑnbɑl nɑ wutuol din duo bonciɑnn, k u tun u sejenm, k b sɑɑn k sɑɑ kpii nikpiilɑ mɑnŋ, ŋɑɑn juo b duo muu.

⁸ L puolpo k kpɑnbɑl nɑ ji din yiin u tuontunnɑ k tɑn yet’b ɑ: ‹Puociɑnu jiet nɑ tien siil ɑ, ŋɑɑn niib nbɑ k n ponŋ dɑɑn dɔnŋ yiin’m nɑ, b ji k ŋɑn nɑn’n.

⁹ L pɑɑk, ii sɑɑ mɑn sɑnjɑlɑ pɑɑk, k sɑɑ yiin bin nbɑ kul k i sɑɑ lɑ’b, ɑ bin bɑɑl nɑ k tɑn di jɑɑnm mɑnŋ.›

¹⁰ K u tuontunnɑ nɑ nyii k sɑɑn sɑnjɑlɑ pɑɑk, k sɑɑ yiin bin nbɑ kul k b lɑ’b nɑ, nibiit nɑn niŋɑnm, k b bɑɑl tɑn gbie puociɑnu ŋɑɑk kenken.

¹¹ «Tɔn, k kpɑnbɑl nɑ tɑn kuɑ ɑ wun gɔn puociɑnu niib mɑnŋ, k tɑn got lɑ jɑsuɑ nnɑ k u fuo b sinsuuk ni k k liɑ puociɑnu jɑɑnm tiɑt.

¹² K kpɑnbɑl nɑ boi’ɔ ɑ: ‹N yuɑk, ɑ tien nlee k tɑn kuɑ nnɑ ŋɑɑn k k liɑ puociɑnu jɑɑnm nɑ tiɑt i?› K juɑ nɑ k jiin siɑl.

¹³ K kpɑnbɑl nɑ din yet u ŋɑɑjɑb nɑ: ‹Loln mɑn u nii nɑn u tɑɑ, k nyi sɑɑ lu’u nɑn-yel po bunbɔnn ni. Lenŋ e wɑɑ k niib sii mɔ fɑbn k nyiitl nyɑnɑ.› »

¹⁴ Yiesu din yin bɑljouk mɑnŋ k juont, k yet ɑ: «Yennu yiin niib bonciɑnn e, ŋɑɑn u tɑn sɑɑ gɑnn wɑɑnm-nnɑ e.»

Lɑnpo pɑnu lɑbɑɑl

¹⁵ K Fɑɑliisiɑnnbɑ din sɑɑn k sɑɑ lol suol bɑɑ sɑɑ tien biɑnŋ nbɑ k lɑ Yiesu mɔbonkpetl.

¹⁶ Ŋɑnn e k b din tun b *puolpoweitieb nɑn kpɑnbɑl *Heluod puolpo juɑmu Yiesu buol ni, k b din boi’ɔ ɑ: «Wɑntuɑ, t mi nɑn ɑ tie bɑlmɔnpɑklɔ e, k wɑnt niib Yennu sɔnu nɑn bɑlmɔni, ŋɑɑn k k fiin niib po, k mɑɑn ɑ bɑkɑ kɑɑ nɑn nisɑɑlk nbɑ tie wun nbɑ po.

¹⁷ L pɑɑk, yet’t, ɑ duki nlee k jii jiin lɑnpo pɑnu po? T *senni cɑb’t nɑn tii pɑ lɑnpo kii tien Luonm tinŋ kpɑnbɑl Sesɑɑl, ɑmi t dɑɑ pɑ?»

¹⁸ K Yiesu din mi b dudukbiit mɑnŋ. L pɑɑk, k u din jiin k yet’b ɑ: «Yinm kpinkpɑnni dɑnm nɑ, bee k i luon k yin pii’n bɑluk u?

¹⁹ Wɑnt’n mɑn likbinn nbɑ k t sɑɑ jii pɑ lɑnpo mɑnŋ.» K b jii likbinn k tul’ɔ.

²⁰ K u boi’b ɑ: «Ŋmee nɑɑɔnŋ nɑn sɑnn e be likbinn nɑ pɑɑk i?»

²¹ K b jiin ɑ: «Sesɑɑl nɑ yɑl e.» K Yiesu yet’b ɑ: «Tɔn, i yenn i pɑ mɑn kii tien Sesɑɑl lin nbɑ tie u yɑl, ŋɑɑn kii mun i biɑ pɑ kii tien Yennu lin nbɑ tie Yennu yɑl.»

²² Bɑɑ gbɑt lin nbɑ nɑ k gbenn k l ji bɑkt’b, k b siet nyii, ŋɑɑn nyik’ɔ.

Kpienm fiilu lɑbɑɑl

²³ L dɑɑl mɑnŋ k *Sɑɑdiuseɑnbɑ siɑb din bɑɑl Yiesu buol ni. (Ŋɑnm e din tuu yɑɑ ɑ kpienm tɑn kɑn fiil kuun ni.)

²⁴ K b din yet Yiesu ɑ: «Wɑntuɑ, Muois din wɑnn nɑn l i tie k juɑ kuɑn u puo ŋɑɑn kpo k k mɑl bik, ɑ u bɑɑ bik n fɑɑl u pɑkuɑk mɑnŋ k mɑl wɑɑs tul kpiemɔ nɑ.

²⁵ K jɑb bɑnlole nbɑ tie bɑɑnuɑk din be duo nɑ ni, k sɑɑkuɑ po tɑn kuɑn puo ŋɑɑn kpo k k mɑl bik, k wun nbɑ pɑɑ u pɑɑk fɑɑl puo nɑ.

²⁶ Nnɑ e k l jii nnɑ k tɑn bɑɑl wun nbɑ pukn bɑnle nɑ ni, nɑn wun nbɑ pukn bɑntɑ nɑ ni, k sɑɑ gbenn jɑb bɑnlole mɑnŋ kul pɑɑk.

²⁷ L puolpo k puo nɑ mun din tɑn juont k kpo.

²⁸ L pɑɑk, l i tie k kpienm fiilu dɑɑl tɑn bɑɑl, b ŋmee tɑn sii yen puo mɑnŋ i? K mɑɑn b kul ɑ din kuɑn’ɔ wɑɑ.»

²⁹ K Yiesu din jiin k yet’b ɑ: «I bot ɑ, k mɑɑn i k mi Yennu lolkpel kɑdɑɑɔk k biɑ k mi wɑɑ mɔk yiikuo biɑnŋ nbɑ,

³⁰ k mɑɑn kpienm i tɑnŋ i fiil kuun ni, b tɑn sii tie nɑn *mɑlɑkɑɑnbɑ nbɑ be *Yendɔunŋ ni nɑ e. Puokuɑnt nɑn jɑkunt tɑn sii kɑɑ.

³¹ Gotl, k jii jiin kpienm fiilu po, i k mi lii lin nbɑ k Yennu pɑk k yet’i u lolkpel kɑdɑɑɔk ni nɑ ɑɑ?

³² U din yet ɑ: ‹Min e tie Ablɑɑhɑɑnm Yennu, nɑn Isɑɑk Yennu, nɑn Sɑɑkɔb Yennu.› Yennu k tie kpienm Yennu kɑɑ, ŋɑɑn u tie fuotb Yennu e.»

³³ Niib nɑ nbɑ din gbɑt u wɑnnu mɑnŋ k l bɑkt’b.

Sennu nbɑ gɑl liel lɑbɑɑl

³⁴ Fɑɑliisiɑnnbɑ nɑ nbɑ din gbɑt ɑ Yiesu mɑɑn nɑ nyɑnn Sɑɑdiuseɑnbɑ nɑ, k b tɑɑn lieb k bɑɑl.

³⁵ K b ni yenɔ wun nbɑ din tie *senniwɑntuɑ boi Yiesu buboit ɑ wun jɑnm’ɔ, ɑ:

³⁶ «Wɑntuɑ, sennlɑnu po e tie sennjɑɑnn k gɑl sennliɑ nɑ kul ii?»

³⁷ K Yiesu jiin’ɔ ɑ: «‹Ii luon Yonmdɑɑnɔ Yennu. Kii mɑntk kii luon’ɔ nɑn ɑ pɑl kul ɑ, nɑn ɑ siek kul ɑ, nɑn ɑ dudukt kul ɑ.›

³⁸ Sennu mɑnŋ tie sennjɑɑnn e k biɑ tie sinsinn sennu.

³⁹ Lin nbɑ pukn ŋɑnle ni k kpɑɑ bɑlkpɑnn mun biɑ tie nnɑ e: ‹Ii luon *ɑ luɑ nɑn fɑɑ luon ɑ mɔnŋ biɑnŋ nbɑ nɑ.›

⁴⁰ Muois senni nɑ kul ɑ, nɑn *Yennu sɔkniinbɑ wɑnnu nɑ kul ɑ gɑɑ senni ŋɑnle nɑ pɑɑk e.»

Klistu nɑn Dɑɑfiid lɑbɑɑl

⁴¹ Fɑɑliisiɑnnbɑ nɑ nbɑ din lɑkn lieb yuo nbɑ k Yiesu boi’b ɑ:

⁴² «I dukn nlee k jii jiin *Klistu nɑ po? U tie ŋmee yɑɑbuonn e?» K b jiin ɑ: «U tie * Dɑɑfiid yɑɑbuonn e.»

⁴³ K u ji boi’b ɑ: «K bee k Dɑɑfiid din yiin’ɔ ‹Yonmdɑɑnɔ?› K mɑɑn Foŋɑnm nbɑ din gbie nɑn Dɑɑfiid nɑ k u yet ɑ:

⁴⁴ ‹Yonmdɑɑnɔ Yennu din yet n Yonmdɑɑnɔ ɑ Kɑln n niidiitu po mɔk mɔk nɑn mɑɑ tɑn sɑɑ te fɑn ŋmɑɑ ɑ dɑtɑi ɑ tɑɑpɑɔnŋ ni.›

⁴⁵ L pɑɑk, Dɑɑfiid nbɑ din yiin *Klistu ‹Yonmdɑɑnɔ,› k nlee k Klistu tie ŋuɑ Dɑɑfiid yɑɑbuonn i?»

⁴⁶ K suɑ din k fit jiin u buboit mɑnŋ. L pɑɑk, lɑɑ din nyii l dɑɑl mɑnŋ k jii sɑɑ, suɑ ji din k mɔk pɑl k sɑɑ boi Yiesu buboisiɑt jik