Mɑɑtieo 15 - Yiesu Lɑbɑmɑnn Muɑl Ni

B yejɑnm kɑɑl lɑbɑɑl

¹ L yuo nɑ k Fɑɑliisiɑnnbɑ nɑn *senniwɑntieb nyii Selusɑɑlenm k bɑɑl tɑn boi Yiesu ɑ:

² «Bee k ɑ *puolpoweitieb k wɑɑ t yejɑnm kɑɑl i? K mɑɑn b k nit b nii kɑɑ wɑɑ, ŋɑɑn di.»

³ K Yiesu mun boi’b ɑ: «Bee k i mun k sɑk Yennu *senni weiu ŋɑɑn wɑɑ i yejɑnm kɑɑl i?

⁴ Yennu e din yet ɑ: ‹Bɑɑk ɑ bɑɑ nɑn ɑ nɑɑ,› k biɑ yet ɑ: ‹Wun nbɑ tɑn pol u bɑɑ ɑmi u nɑɑ mɔb, bin kpi’u.›

⁵ Ŋɑɑn yinm ŋɑnin yɑɑ ɑ, nilɔ i yet u bɑɑ ɑmi u nɑɑ ɑ: ‹Mɑɑ bo sɑɑ tul’i lin nbɑ nɑ, ŋɑɑn l kpɑnt Yennu yɑl ɑ,› ɑ

⁶ l ji k tie miɑl kɑɑ nɑn wun tul u dɑnm siɑl. Yɑɑ tuun biɑnŋ nbɑ nɑ, i yiin Yennu senni yɑnn ɑ, i yejɑnm kɑɑl pɑɑk.

⁷ Yinm kpinkpɑnni dɑnm nɑ, *Yennu sɔkni Esɑɑyi nbɑ din pɑk i po nɑ, set tie mɔni e, ɑ:

⁸ ‹Niib nɑ tien’n bɑɑkl mɔi ni e, ŋɑɑn b pɑlɑ fɔk nɑn’n sɑɑn ɑ.

⁹ B jiɑntl’n yɑnn e, k mɑɑn b diɑ nisɑɑli kɑɑ e k wɑnt niib nɑn l set tie min Yennu senni e nɑ.› »

Lin nbɑ be nisɑɑlk pɑl ni

¹⁰ Ŋɑnn e k Yiesu yiin nibul nɑ k tɑn yet’b ɑ: «Gbiintl mɑn, k bɑnn lin nbɑ k n yɑɑ n yet’i nɑ pɑɑk.

¹¹ Lin nbɑ kuɑ nisɑɑlk mɔb ni kɑn fit tien’ɔ jɑknt u pɑl ni, ŋɑɑn lin nbɑ nyi u mɔb ni e tien’ɔ jɑknt.»

¹² Ŋɑnn e k u puolpoweitieb bɑɑl u buol ni k tɑn boi’ɔ ɑ: «A mi nɑn Fɑɑliisiɑnnbɑ nɑ nbɑ gbɑt ɑ mɑɑn mɑnŋ nɑ, b dukn nɑn ɑ sukl’b e k l k mɑnŋ’b ii?»

¹³ K u jiin yet’b ɑ: «Tiik nbɑ kul k n Bɑɑ nbɑ be sɑnpɑɑpo nɑ k wuu, sie k b tɑn ŋɑbl e k lu.

¹⁴ L pɑɑk, ŋɑɑnt’b mɑn k bii sɑɑ, k mɑɑn b tie nɑn juɑni nɑ e k dɑɑl b juɑnlei, k l i tie k juɑnŋ dɑɑl u luɑ, sie k b kul ɑ bɑɑ buotuk ni.»

¹⁵ Ŋɑnn e k Piɑl jiin k yet’ɔ ɑ: «Wɑnt’t bɑljouk nɑ pɑɑk.»

¹⁶ K Yiesu jiin ɑ: «I mun biɑ lek dɑɑ k fit bɑnn n mɑɑn nɑ pɑɑk ii?

¹⁷ I k mi nɑn lin nbɑ kuɑ mɔb ni, l yɑɑ lin sik puol ni e, k kpɑnt bint k nyi ii?

¹⁸ Ŋɑɑn bɑlbiit nbɑ k nisɑɑlk piɑk u mɔb ni, l nyii u pɑl ni e, ŋɑnn mun e tien’ɔ jɑknt.

¹⁹ K mɑɑn nilɔ pɑl ni e k dudukbiit nyi, nɑn nikpinu, nɑn boncuncontuonɑ, nɑn nɑn-yukn, nɑn fɑɑk siɑlɑ, nɑn sɑnjɑɑɔnŋ.

²⁰ Lin nbɑ nɑ nbɑ e tien nisɑɑlk jɑknt, ŋɑɑn niijɑknɑ dinu k fit tien nilɔ jɑknt.»

Kɑɑnɑɑn puo tien Yiesu yɑdɑ

²¹ Tɔn, k Yiesu nyii lenŋ k sɑɑn Tiil nɑn Siidɔn bɔkl po.

²² Ŋɑnn e k Kɑɑnɑɑn tinŋ ni puosuɑ nnɑ mun din be bɔkl mɑnŋ po, k tɑn bɑɑl Yiesu buol ni, k yien ɑ: «Yonmdɑɑnɔ, * Dɑɑfiid yɑɑbuonn, tin’n ninbɑɑɔk. Nɑlnbiiuk be n bipuo ni, k muks’ɔ bonciɑnn.»

²³ K Yiesu din k jiin siɑl, ŋɑɑn k u puolpoweitieb yet’ɔ ɑ wun bel puo nɑ, k mɑɑn u mɔk fuut.

²⁴ Ŋɑnn e k Yiesu jiin ɑ: «Islɑɑeltieb nbɑ tie nɑn pei nbɑ bot nɑ, ŋɑnm kuukuɑ e k Yennu tun’n ɑ mɑn sɑɑn b buol ni.»

²⁵ K puo mɑnŋ bɑɑl k tɑn gbɑɑn Yiesu tuɑnn, ŋɑɑn yet’ɔ ɑ: «Yonmdɑɑnɔ, sonmt’n»

²⁶ K Yiesu jiin yet’ɔ ɑ: «L k ŋɑn k nilɔ n jii wɑɑs jiet k tul bɔi.»

²⁷ Ŋɑnn e k puo nɑ jiin ɑ: «Yonmdɑɑnɔ, l set tie mɔni e, ŋɑɑn bɔi nbɑ duɑ b dɑɑnɔ sɑɑŋmɑni buol nɑ k kɔnŋt jebulɑ nbɑ bɑɑ tinŋ ni k tɔki di.»

²⁸ Ŋɑnn e k Yiesu ji yet’ɔ ɑ: «A tien’n yɑdɑ bonciɑnn. Lin nbɑ k ɑ luon nɑ, Yennu n tun nnɑ k tul’ɑ.» K u bipuo mɑnŋ lɑ lɑɑfiɑ l tɑɑkpɑɑk ni.

Yiesu te k bɑɑtb bonciɑnn pɑɑk

²⁹ L puolpo e k Yiesu nyii lenŋ k gɑl Gɑɑliile mɔkgbenŋl kpinŋ, k sɑɑ duo kɑl juɑl pɑɑk.

³⁰ K nibulciɑɔnŋ bɑɑl u buol nɑn wɔbi, nɑn juɑni, nɑn mui, nɑn diɑni, nɑn bin nbɑ yiɑl yiɑlbuolu buolu kul ɑ, k tɑn bil’b u tuɑnn, k u te k b kul ɑ pɑɑk.

³¹ K nibul nɑ nbɑ lɑ k mui piɑk, k diɑni pɑɑk, k wɔbi sonm, k juɑni lɑɑt nɑ, k l yɑɑl ŋɑɑn lit’b, k b piɑk dont Islɑɑeltieb Yennu nɑ sɑnn.

Yiesu dinn jɑb tusɑ ŋɑnnɑ

³² K Yiesu yiin u puolpoweitieb k tɑn yet’b ɑ: «Ninbɑɑɔk mɔk’n nɑn niib nɑ, k mɑɑn dɑɑ ŋɑntɑ e nɑ k b be n buol nnɑ, ŋɑɑn k mɔk jiet k di. N k luon mɑn kunn’b kon, k b tɑn sɑɑ mɑnn fib kon.»

³³ K u puolpoweitieb boi’ɔ ɑ: «Lee k t sɑɑ lɑ jiet muuk nɑ ni k tul nibulciɑɔnŋ nɑ k bin di k gbuo?»

³⁴ K u boi’b ɑ: «I mɔk pɑɑni ŋɑnŋɑ e?» K b jiin ɑ: «Ŋɑnlole, nɑn jɑnbis wɑɑnm-nnɑ.»

³⁵ K u yet niib nɑ ɑ bin kɑl tinŋ ni,

³⁶ ŋɑɑn jii pɑɑni ŋɑnlole nɑn jɑnbis nɑ, k tul Yennu niipuouk l pɑɑk, ŋɑɑn ŋmit ŋmit tul u puolpoweitieb, k b jii tol tol niib mɑnŋ.

³⁷ K niib nɑ kul dii k gbuo ŋɑɑn k l tenn. K u puolpoweitieb lɑkn jiet nbɑ tenn nɑ, k l gbie kpɑncubt ŋɑnlole.

³⁸ K niib nbɑ dii mɑnŋ din tie jɑb tusɑ ŋɑnnɑ, k puob nɑn wɑɑs kɑnn k pukn lenŋ.

³⁹ L puolpo k Yiesu cɑb niib mɑnŋ, ŋɑɑn kuɑ bulgbetl ni k puot kuɑ Mɑɑgɑɑdɑn tinŋ ni.