Mɑɑtieo 11 - Yiesu Lɑbɑmɑnn Muɑl Ni

Sɑn Nyunwultuɑ lɑbɑɑl

¹ Yiesu nbɑ din wɑnn u tuomiinbɑ *piik nɑn bɑnle nɑ wɑnnu mɑnŋ k gbenn yuo nbɑ, k u nyii lenŋ k sɑɑn b doi ni k muɑntl Yennu mɑɑn k tumi niib.

² Tɔn, Sɑn din be dɑnsɑlk, k tɑn gbɑt *Klistu tuonɑ lɑbɑɑl po, k tun u *puolpoweitieb u buol ni

³ ɑ bin sɑɑ boi’ɔ ɑ: «Fin e tie wun nbɑ yɑɑ wun tɑn bɑɑl nɑ ɑmi tii dɑɑ kii guu luɑ ɑ?»

⁴ K Yiesu ji yet Sɑn tuomiinbɑ mɑnŋ ɑ: «Ii ŋmɑt mɑn k sɑɑ yet Sɑn lin nbɑ k i gbɑt k biɑ lɑ nɑ.

⁵ Juɑni nyuɑntl, k wɔbi tɑɑ nɑɑtl k b sonm, k gbɑɑtɑ ŋɑɑt gbent, k tuukpɑɑ ji gbiɑ, k kpienm fi kuun ni, k tɑlɑs-dɑnm gbiintl lɑbɑmɑnn muɑnti.

⁶ K pɑlpienn be wun nbɑ k bils’n nɑ pɑɑk.»

⁷ Tɔn, Sɑn tuomiinbɑ nɑ nbɑ din nyii lenŋ k ŋmɑt kun yuo nbɑ nɑ, k Yiesu ji din piin k piɑk Sɑn po k boi ɑ: «Yɑɑ dɑɑn sɑɑn Sɑn penŋ muuk ni nɑ, i dɑɑn duki ɑ i sɑɑ sɑɑ lɑ bee? I dɑɑn mi ɑ i sɑɑ lɑ muuk nbɑ k wounŋ dɑnm nɑ ee?

⁸ I mɑntk jiɑ dɑɑn sɑɑn ɑ i sɑɑ lɑ bee? Nilɔ k u liɑ tɑŋɑnt ɑmi ii? Nnɑlɑ, bin nbɑ liɑ tɑŋɑnt be kpɑnbɑlɑ ŋei ni e.

⁹ Ŋɑɑn i mɑntk jiɑ dɑɑn sɑɑn ɑ i sɑɑ lɑ bee? I dɑɑn duki ɑ i sɑɑ lɑ *Yennu sɔkni ee? Bɑlmɔni e k n yien’i nɑ, Sɑn ŋɑnin gɑl sɔkni wɑɑ.

¹⁰ Ŋuɑ po e k Yennu lolkpel kɑdɑɑɔk ponŋ din diɑn wɑnt nɑ, ɑ: ‹Min Yennu, n sɑɑ tun n tuomu k wun liit k gɑl ŋɑnm ɑ bɑɑlu sɔnu.› »

¹¹ K Yiesu biɑ din yet’b ɑ: «Bɑlmɔni e k n yien’i nɑ, b dɑɑ k mi mɑl suɑ k u cie Sɑn nbɑ dɑɑn wuul niib Yennu nyunwulu nɑ, ŋɑɑn wun nbɑ juont tɑlk Yennu nɑɑn ni cie’u.

¹² Lɑɑ dɑɑn nyii Sɑn nbɑ dɑɑn wuul niib Yennu nyunwulu nɑ mɑnŋ yuo k tɑn tuu mɔtɑɑnɑ, bin nbɑ k b ninbinɑ mɔn nɑn bin tɑn kuɑ Yennu nɑɑn ni diɑ ninmɔnn ɑ bin tɑn kuɑ nɑn pɑnŋ.

¹³ Yennu *senni nɑn u sɔkniinbɑ mɑɑn nɑ ponŋ din pɑk u nɑɑn po e wɑɑ, k Sɑn tɑn bɑɑl.

¹⁴ L i tie k i luon yin tien lin nbɑ nɑ yɑdɑ i e, ŋuɑ e tie Yennu sɔkni *Elii wun nbɑ yɑɑ wun tɑn bɑɑl nɑ.

¹⁵ Wun nbɑ mɔk tubɑ, wun gbiint.»

¹⁶ K Yiesu biɑ yet ɑ: «Mɔtɑɑnɑ nigbounŋ nɑ, n sɑɑ bikn’m nɑn bee nɑ? B nɑɑn nɑn wɑɑs nbɑ tuu tikl k kɑl dɑɑk ni k tiɑn lieb pɑɑk nɑ e ɑ:

¹⁷ ‹T pieb yeli k tien’i, ŋɑɑn k i k wɑɑ. T yiin kuyɑni k tien’i, ŋɑɑn k i k mɔ fɑbn.›

¹⁸ Sɑn dɑɑn bɑɑl k k di jemɔnt, k biɑ k nyu dɑɑn, ŋɑɑn k i yɑɑ ɑ u wɑɑt e,

¹⁹ k *Nisɑɑlk Bijɑ mun tɑn bɑɑl k di k nyu, ŋɑɑn k i biɑ yɑɑ ɑ: ‹Gotl juɑ nɑ. u tie podɑɑnɔ nɑn dɑnyuuluk o. U biɑ tie *lɑnpogɑɑltieb nɑn biitdɑnm yuɑk e.› Tɔn, Yennu nbɑ tuun biɑnŋ nbɑ e wɑnt nɑn u mɔk yɑn nbɑ ŋɑn.»

Yɑdɑ-kɑnpuɑnɑ doi po

²⁰ L yuo nɑ k Yiesu din piin k piɑk biil doi nbɑ dɑɑn lɑ u bɑktnɔunŋ tuonjɑɑnɑ nbɑ k u dɑɑn tun lenŋ, ŋɑɑn k b yet nɑn bin mɔ kuɑŋɑɑn k lebt binbenŋ.

²¹ K u din yet ɑ: «L tɑn sii bi yinm Kolɑsen tieb pɑɑk. L tɑn sii bi yinm Betsɑidɑ tieb mun yɑɑ pɑɑk, k mɑɑn mi i bo i tun bɑktnɔunŋ tuonjɑɑnɑ Tiil nɑn Siidɔn doi ni nɑn mɑɑ dɑɑn tun i doi ni nɑ, b dɑɑn bo mɔ kuɑŋɑɑn k lebt binbenŋ yiɑn ɑ, k pɑt fɑɑɔk k puk b mɔnŋ tɑnpent ɑ mɑn.

²² Ŋɑɑn n yien’i e, dɑɑl nbɑ k Yennu tɑn sɑɑ bu niib buut nɑ, i tubdɑtu tɑn sɑɑ gɑl Tiil nɑn Siidɔn tieb yɑl ɑ.

²³ K yinm Kɑpelnɑunm tieb, Yennu tɑn sɑɑ donn’i sɑnpɑɑpo wɑɑ? Aɑi. U tɑn sɑɑ sikn’i muu nbɑ kɑɑ gbennu nɑ ni wɑɑ, k mɑɑn mi i bo i tun bɑktnɔunŋ tuonjɑɑnɑ Suodonm duo ni nɑn mɑɑ dɑɑn tun i duo mɑnŋ ni nɑ, Suodonm duo mɑnŋ din dɑɑ bo sii be nɑn dinnɑ.

²⁴ Ŋɑɑn n yien’i e, Yennu bɑlbunu dɑɑl mɑnŋ, i tubdɑtu tɑn sɑɑ gɑl Suodonm tieb yɑl ɑ.»

Bɑɑt mɑn k tɑn gɑɑl fuon

²⁵ L yuo mɑnŋ k Yiesu din yet ɑ: «N Bɑɑ wun nbɑ tie sɑnpɑɑpo nɑn tingbounŋ nɑ Yonmdɑɑnɔ, n piɑk’ɑ, k mɑɑn ɑ bɔl ɑ mɑɑn nɑ subndɑnm nɑn mitieb, ŋɑɑn fiit wɑnn wɑɑs e,

²⁶ k mɑɑn nnɑ e k ɑ tuun ɑ tuonɑ k l mɑn’ɑ.

²⁷ «Tɔn, n Bɑɑ e wɑnn’n mɑɑn kul ɑ, k suɑ k mi u Bijɑ nbɑ tie wun nbɑ, sie n Bɑɑ mɑnŋ, k suɑ mun biɑ k mi Bɑɑ mɑnŋ, sie u Bijɑ nɑ, nɑn bin nbɑ k u luon k wun fiit wɑnn’b nɑ.

²⁸ «Yinm nbɑ tuun tuonɑ k jii jik-kpiɑtɑ k bɑk nɑ, bɑɑt n buol ni mɑn, k n sɑɑ tul’i fuon.

²⁹ Ii sɑk n weiu mɑn, kii tumi n wɑnnu, k i sɑɑ lɑ fuon k tul i sei, k mɑɑn n tie sikn-n-mɔnŋ dɑɑnɔ e, k n pɑl mei.

³⁰ N weiu biɑ k pɑɑl, k n jikl mun biɑ k kpɑi.»