Mɑɑlk 7 - Yiesu Lɑbɑmɑnn Muɑl Ni

B yejɑnm kɑɑl lɑbɑɑl

¹ Tɔn, k Fɑɑliisiɑnnbɑ nɑn *senniwɑntieb din tɑn nyii Selusɑɑlenm k bɑɑl Yiesu buol,

² k b lɑ k u *puolpoweitesiɑb jɑk jiet di, ŋɑɑn dɑɑ k nit b nii.

³ (Fɑɑliisiɑnnbɑ nɑn *Suifnbɑ nilieb kul tuu k gbiɑ b di jiet sie k b nit b nii fɑnu nɑn b yejɑnm kɑɑl nbɑ din wɑnt biɑnŋ nbɑ nɑ.

⁴ L i tie k b nyii dɑɑk ni, b tuu k di sie k b tɑn wul sinsinn. B biɑ din tuu diɑ kɑɑ bonciɑnn k pukn l po. B din tuu diɑ kɑɑl nbɑ senn nyun-nyuŋmɑni soklu nɑn b bobɑ soklu nɑn b dunduɑni wuulu po e.)

⁵ K Fɑɑliisiɑnnbɑ nɑn senniwɑntieb mɑnŋ boi Yiesu ɑ: «Bee k ɑ puolpoweitieb nɑ k diɑ t yejɑnm kɑɑl, ŋɑɑn kpɑn gbiɑ b di jiet k k nit b nii?»

⁶ K Yiesu jiin yet’b ɑ: «*Yennu sɔkni Esɑɑyi din pɑk i po fɑnu, ɑ Yennu yet ɑ: yinm kpinkpɑnni dɑnm nɑ, nɑn lɑɑ diɑn biɑnŋ nbɑ nɑ ɑ: ‹Niib nɑ tien’n nibɑɑkl b mɔi ni kuukuɑ e, ŋɑɑn b pɑlɑ set fɔk nɑn’n bonciɑnn.

⁷ B jiɑntl’n yɑnn e, k mɑɑn b jii nisɑɑlk kɑɑ k wɑnn niib, k l nɑɑn nɑn min Yennu *senni nɑ.› »

⁸ K Yiesu ŋɑnm yet ɑ: «I bɑkn Yennu senni e k bil siɑl po wɑɑ, ŋɑɑn sɑk nisɑɑli kɑɑl nbɑ wɑnt lin nbɑ nɑ.

⁹ Yinm, i lek yet Yennu senni weiu ɑ yin diɑ i mɔnŋ mɔnŋ kɑɑl e,

¹⁰ k mɑɑn Muois din senn k yet ɑ: ‹Suɑ kul n tien u bɑɑ nɑn u nɑɑ nibɑɑkl, k wun nbɑ sukl u bɑɑ ɑmi u nɑɑ, bin kpɑn kpi’u.›

¹¹ Ŋɑɑn yinm ŋɑnin yɑɑ ɑ nilɔ i yet u bɑɑ ɑmi u nɑɑ ɑ: ‹Mɑɑ bo sɑɑ tul’i sonml nbɑ nɑ tie Kolbɑnn k l wɑnt nɑn l tie Yennu yɑl e,›

¹² ɑ u ji mɔk yiikuo k kɑn sonm u bɑɑ ɑmi u nɑɑ.

¹³ Kɑɑl nbɑ k i din gɑɑl nɑ te Yennu mɑɑn tie yɑnn. I biɑ tie bonsiɑ bonciɑnn k l nɑɑn nɑn lin nbɑ nɑ buolu.»

Lin nbɑ be nisɑɑlk pɑl ni lɑbɑɑl

¹⁴ Ŋɑnn e k Yiesu ŋɑnm din yiin nibulciɑɔnŋ nɑ u buol ni, k tɑn yet’b ɑ: «Yinm nbɑ kul be nnɑ nɑ, gbiintl mɑn k bɑnn mɑɑ yɑɑ n pɑk lin nbɑ nɑ pɑɑk.

¹⁵ Bonsiɑl kɑɑ k sɑɑ kuɑ nisɑɑlk mɔb ni k fit tien’ɔ jɑknt u pɑl ni. Ŋɑɑn lin nbɑ nyi nisɑɑlk pɑl ni e fit tien’ɔ jɑknt.

¹⁶ Wun nbɑ kul mɔk tubɑ, wun gbiint»

¹⁷ Wɑɑ yet’b nnɑ gbenn yuo nbɑ k u nyik niib mɑnŋ, ŋɑɑn sɑɑn kuɑ ŋɑsiɑk nnɑ ni. K u puolpoweitieb boi’ɔ ɑ wun wɑnn’b mɑɑn mɑnŋ pɑɑk.

¹⁸ Ŋɑnn e k u boi’b ɑ: «I mun biɑ lek dɑɑ tie yɑnkpienɑ ee? I k mi nɑn lin nbɑ kul kuɑ nisɑɑlk mɔb ni k tien’ɔ jɑknt ii?

¹⁹ K mɑɑn l k kuɑ u pɑl ni kɑɑ, ŋɑɑn u puol ni e k l kuɑ, k biɑ kpɑntl bint k nyi.» Wɑɑ yet biɑnŋ nbɑ mɑnŋ wɑnt nɑn jiet kul ɑ k kuɑ.

²⁰ K u biɑ ŋɑnm yet pukn ɑ: «Lin nbɑ set nyi nisɑɑlk pɑl ni e tien’ɔ jɑknt,

²¹ k mɑɑn u pɑl ni e k dudukbiit bɑɑt nɑn puoweiu nɑn jɑweiu, nɑn nɑn-yuk, nɑn nikpinu,

²² nɑn boncuncontuonɑ, nɑn niɑnciɑɔnŋ nɑn biitbuolu buolu nɑn fɑɑk fɑɑlu, nɑn tuon-yɑnɑ, nɑn *funfunn, nɑn sɑnjɑɑɔnŋ, nɑn kɑlnbɑɑni, nɑn jɑt-tuonɑ.

²³ Lin nbɑ nɑ kul e nyi nilɔ pɑl ni k tien’ɔ jɑknt.»

Puo sɑɑmɔ tien Yiesu yɑdɑ

²⁴ Lin nbɑ nɑ puolpo k Yiesu nyii lenŋ k sɑɑn Tiil bɔkl po, k kuɑ ŋɑsiɑk nnɑ ni, k k luon suɑ n bɑnn nɑn u be lenŋ, ŋɑɑn u din kɑn fit bɔl u mɔnŋ.

²⁵ K puosuɑ nbɑ k nɑlnbiiuk din be u bonpobik ni nɑ gbɑt u po, k u bɑɑl u buol ni k tɑn gbɑɑn u tuɑnn ni.

²⁶ Puo mɑnŋ din tie Glek nilɔ e. B din mɑl’ɔ Feniisi tinŋ ni e, Siili tingbounŋ ni. K puo nɑ bɑln Yiesu ɑ wun nyinn nɑlnbiiuk nɑ u bonpobik mɑnŋ ni.

²⁷ Ŋɑnn e k Yiesu yet’ɔ ɑ: «Ŋɑɑnt k wɑɑs n di sinsinn ɑ, k mɑɑn l k ŋɑn k nilɔ n jii wɑɑs jiet k tul bɔi.»

²⁸ K puo nɑ jiin ɑ: «N Yonmdɑɑnɔ, l set tie mɔni e, ŋɑɑn bɔi nbɑ tuu duɑ tiebul lɔunŋ ni nɑ mun gɑni wɑɑs jebulɑ nbɑ bɑɑ nɑ.»

²⁹ K Yiesu yet’ɔ ɑ: «A jiinu nbɑ nɑ pɑɑk, n ji cɑb’ɑ, ii kun. Nɑlnbiiuk mɑnŋ ponŋ nyii ɑ bonpobik nɑ ni wɑɑ.»

³⁰ K puo mɑnŋ set din fiil yɑɑt kun k sɑɑ bɑɑl k lɑ k u bik nɑ duɑ u dunduɑnu pɑɑk, k nɑlnbiiuk nɑ set nyii wɑɑ.

Yiesu te k bit-tuukpɑɑl pɑɑk

³¹ Tɔn, k Yiesu ji din nyik Tiil yɑkl nɑ, ŋɑɑn tɔkn nyii Siidɔn yɑkl, nɑn tinŋ nbɑ k b din yi Doi-piik nɑ mɔkmɔk k sɑɑ bɑɑl Gɑɑliile mɔkgbenŋl ni.

³² K nisiɑb din bɑɑl nɑn jɑsuɑ k u tie tuukpɑɑl k biɑ k fit k piɑk fɑnu, k b bɑln’mɔ ɑ wun yii u nuu juɑ mɑnŋ pɑɑk.

³³ K Yiesu gɑɑl’ɔ k b nyii kpinŋ po, b kuukuɑ, k u jii u niibilɑ k tun juɑ mɑnŋ tubɑ ni, ŋɑɑn siil mɔsɑnt ŋɑɑn sii juɑ mɑnŋ jeln,

³⁴ k got sɑnpɑɑpo ŋɑɑn kulnt sikn, k yet juɑ mɑnŋ ɑ: «Efɑtɑ,» k l pɑɑk tie: «Lotl ɑ mɔnŋ.»

³⁵ L tɑɑkpɑɑk ni nɑ k juɑ nɑ ji gbiɑ, k u jeln biɑ tɑbt k u ji fit piɑk mɑɑn fɑnu.

³⁶ Ŋɑnn e k Yiesu yɑki nɑn niib nɑ ɑ b i mi k bin yet suɑ lin nbɑ k u tun mɑnŋ po, ŋɑɑn nɑn kpɑyɑɔk mɑnŋ kul b lek din ŋɑmi k yɑln mɑɑn mɑnŋ.

³⁷ K bin nbɑ kul gbɑt lɑbɑɑl mɑnŋ, k l tien’m bɑktnɔunŋ bonciɑnn, k b yet ɑ: «Lin nbɑ kul k u tuu tuun ŋɑn bonciɑnn. U te k tuukpɑɑ gbɑɑ tɑn fit gbiɑ, k te k mui biɑ fit piɑk.»