Mɑɑlk 4 - Yiesu Lɑbɑmɑnn Muɑl Ni

Tɑnbultuɑ bɑljouk

¹ Yiesu yɑɑn din piin k tumi niib Gɑɑliile mɔkgbenŋl kpinŋ, k nibulciɑɔnŋ bɑɑl u buol ni. Wɑɑ din lɑ k nigbɑnu nɑ yɑbt nɑ, k u kuɑ bulgbetsiɑl ni, k sik nyun ni, ŋɑɑn k niib nɑ biɑl k sie gbingbɑnn

² U din yiin’m bɑljokt k wɑnt’b mɑɑn bonciɑnn. U din yin ɑ:

³ «Gbiintl mɑn, jɑsuɑ din duo u kpɑɑb ɑ wun sɑɑ bul tɑn.

⁴ Wɑɑ din buul nɑ, k bonbuoli nɑ yenn-nbɑ yɑt k bɑɑ sɑnjouk pɑɑk k nuɑni wei k tɔkl.

⁵ K liel mun din bɑɑ tɑnpuut pɑɑk siɑn nbɑ k tɑnt k yɑb. Tɑnt nbɑ k yɑb nɑ, k l piɑ k kpɑɑt yiɑn ɑ,

⁶ ŋɑɑn yennu nbɑ tɑn tonŋ yuo nbɑ, k l juɑk. Lɑɑ din k fit sikn jiinɑ nɑ pɑɑk, l kul din kpo e.

⁷ K liel mun din bɑɑ kunkoni ni, k tɑn lɑkn piɑ k kpɑɑt nɑn’m, ŋɑɑn k kunkoni ŋmɑbl’l k l k fit nɑn.

⁸ Ŋɑɑn k liel mun din bɑɑ tinŋɑnŋ ni k piɑ, k kpɑɑt fɑnu, k nɑn nɑɑnŋɑɔnŋ, k yenn-nbɑ nɑn dibin piintɑtɑ, k lielnbɑ mun nɑn piinluobluob, k siɑb mun nɑn kobk kobk.»

⁹ Yiesu yet ɑ: «Wun nbɑ mɔk tubɑ k sɑɑ gbɑt, wun gbiint»

Bɑljokt mɑnŋ yinu pɑɑk

¹⁰ L puolpo e k nisiɑb nbɑ din be Yiesu penŋ, nɑn u tuomiinbɑ *piik nɑn bɑnle nɑ, tɑn boi’ɔ bɑljokt nɑ pɑɑk.

¹¹ K u yet’b ɑ: «Yinm ŋɑnin, Yennu fiit wuol ni mɑɑn k jii jiin u nɑɑn po k wɑnn’i wɑɑ, ŋɑɑn bin nbɑ k be i ni nɑ ŋɑnin gbiɑ bonsiɑl kul ɑ nɑn bɑljokt e ɑ:

¹² ‹Bin got ŋɑɑn dɑɑ lɑɑt k biɑ gbiint ŋɑɑn dɑɑ bɑnt l pɑɑk, k mɑɑn b i lɑ k bɑnn b sɑɑ jen k bɑɑl Yennu buol ni k wun nyik cɑb b biit ɑ.› »

Tɑnbultuɑ bɑljouk nɑ pɑɑk

¹³ Ŋɑnn e k Yiesu boi niib nɑn u tuomiinbɑ piik nɑn bɑnle nɑ: «I k bɑnn bɑljouk nɑ pɑɑk ii? K nlee k i sɑɑ mi bɑnn bɑljokt kul ɑ pɑɑk i?

¹⁴ Tɑnbultuɑ buul Yennu mɑɑn nɑ e.

¹⁵ K nisiɑb nɑɑn nɑn sɑnjouk nbɑ k Yennu mɑɑn bɑɑ l pɑɑk nɑ e, k yuo nbɑ k b gbɑt mɑɑn mɑnŋ, *Sɑɑtɑn tuu bɑɑl e k nyinn’l b pɑlɑ ni yiɑn ɑ.

¹⁶ Nisiɑb mun gɑɑl bonbuoli tɑnpuut pɑɑk e. B tie bin nbɑ gɑɑl Yennu mɑɑn nɑn pɑlpienn yiɑn ɑ,

¹⁷ ŋɑɑn mɑɑn mɑnŋ k mɔk jiinɑ b ni k b k diɑ’l k l wei. Yuo nbɑ k niib dint’b fɑlɑ, ɑmi muksuk tɑn bɑɑl’b mɑɑn mɑnŋ pɑɑk, b tuu lu e yiɑn ɑ.

¹⁸ Lieb mun gɑɑl bonbuoli mɑnŋ kunkoni sinsuuk ni. B gbiɑ mɑɑn mɑnŋ,

¹⁹ ŋɑɑn tingbounŋ nɑ fɑlɑ, nɑn mɔktuk lonm, nɑn niɑnbuolu buolu tuu kuɑ k nyɑkn mɑɑn mɑnŋ k l kɑn nɑn.

²⁰ Lieb mun gɑɑl bonbuoli tinŋɑnŋ ni. Ŋɑnm e tie bin nbɑ gbiɑ mɑɑn mɑnŋ k gɑɑn. Siɑb nɑɑn fuunu piintɑtɑ, k siɑb nɑɑn fuunu piinluobluob, k siɑb mun biɑ nɑɑn fuunu kobk kobk.»

Fitl lɑbɑɑl

²¹ Yiesu biɑ din boi’b ɑ: «Suɑ mi k kuɑ ŋɑɑk ni nɑn fitl k cibn bokt l pɑɑk, ɑmi k gul’l gɑdo lɔunŋ ni ii? Aɑi. Sie k u jii’l k tuɑnn bonsiɑl nbɑ fɔk nɑ pɑɑk.

²² Mɑɑn nbɑ kul wuo, sie k l tɑn wuot nyii pɑɑnu ni, k lin nbɑ kul mun be bunbɔnn ni tɑn sɑɑ nyi yentu ni.

²³ Suɑ i mɔk tubɑ k sɑɑ gbɑt, wun gbiint.»

²⁴ «Gotl mɑn, ŋɑɑn kii mi yɑɑ gbiintl lin nbɑ. Yɑɑ gɑɑl Yennu piini k tuun nɑn’n biɑnŋ nbɑ, Yennu tɑn sɑɑ pɑ’i l biɑnŋ k biɑ pukn’i siɑl l pɑɑk.

²⁵ K mɑɑn wun nbɑ mɔk, b biɑ sɑɑ pukn’ɔ, ŋɑɑn wun nbɑ k mɔk nɑ, b biɑ sɑɑ gɑɑl lin nbɑ k u yɑɑ ɑ u mɔk wɑɑn nɑ.»

Tɑnbulu bɑljouk

²⁶ K Yiesu biɑ ŋɑnm yet ɑ: «Yennu nɑɑn nɑɑn nnɑ e: l tie nɑn nilɔ nbɑ tuu bul tɑn u kpɑɑb ni.

²⁷ Wuu lek i guɑnt nyiɑɔk kuo u fiil yennu ni, bonbuoli nɑ tuu pɑ k kpɑɑtl, ŋɑɑn k u k mi lɑɑ tuun biɑnŋ nbɑ k pɑ k kpɑɑtl.

²⁸ Tinŋ nɑ e tuu te k bonbuoli mɑnŋ n pɑ k kpɑɑtl k biɑ nɑɑn. L tuu put kpɑnn e sinsinn, l puolpo k fɑɑt n nyi, k dipukɑ n nyi k wei.

²⁹ Dii mɑnŋ i biel yuo nbɑ, kpɑɑlɔ nɑ ji sɑɑ piin jɑnu e nɑn u dijɑɑnjuk, k mɑɑn jɑɑmu yuo ji bɑɑl e nɑ.»

Bonbuolk bɑljouk

³⁰ Lin nbɑ nɑ puolpo k Yiesu boi’b ɑ: «T dɑɑ sɑɑ bikn Yennu nɑɑn nɑn lɑnn po e? T sɑɑ yin bɑljolɑnn e k wɑnn lɑɑ tie bɑnnu nbɑ?

³¹ L tie nɑn kpint tiik nbɑ k b yi’l *muutɑɑld nɑ e. B i jii k bul tinŋ ni, k l wɑɑl k gɑl tingbounŋ nɑ bonbuoli kul ɑ,

³² ŋɑɑn l i tɑn piɑ k kpɑɑt l ji tuu yɑb kpint tiini kul ɑ, k mɔk yiingbenŋɑ, k nuɑni ji tuu tɑn tiɑ tiɑt l yiini nɑ pɑɑk.»

³³ Yiesu din yiin bɑljokt bonciɑnn nɑn nɑ nɑ e, k nyint Yennu mɑɑn k tien niib nɑn bɑɑ sɑɑ fit bɑnn biɑnŋ nbɑ.

³⁴ U k mi k pɑk nɑn’m mɑɑn sie bɑljokt kuukuɑ. Ŋɑɑn u din tuu tɑn ŋɑnm wɑnn u *puolpoweitieb bɑljokt mɑnŋ kul pɑɑk yuo nbɑ k b tɑn biɑl be b kuukuɑ e.

Wounŋ nɑn nyun sɑɑk Yiesu mɔb

³⁵ L dɑɑl mɑnŋ dɑɑjuouk k Yiesu yet u puolpoweitieb k yɑɑ ɑ: «Ŋɑɑnt mɑn k tin puot mɔkgbenŋl nɑ puotl mɑn »

³⁶ L yuo e k b nyik nibul nɑ, k kuɑ wɑɑ kɑl bulgbetl nbɑ ni nɑ, k ŋɑnm nɑn ŋuɑ lɑkn sɑɑn, k bulgbetliɑ biɑ din be nɑn’ɔ.

³⁷ Bɑɑ be bulgbetl mɑnŋ ni k suɑ wonpɑɑluk fikt, k nyunpɑnɑ piin liɑt kuɑ bulgbetl mɑnŋ ni, k l tɑn yɑɑ lin gbie.

³⁸ L yuo Yiesu din duɑ bulgbetl mɑnŋ puolpo k kpɑɑk yukpɑktl pɑɑk k guɑnt. Ŋɑnn e k u puolpoweitieb fiin’ɔ k yɑɑ ɑ: «Cɑnbɑɑ, tɑɑ yɑɑ t kpo nɑ, ɑ bɑkɑ kɑɑ t po oo?»

³⁹ K u fiil set k tiɑn wonpɑɑluk nɑ pɑɑk k biɑ yet nyunpɑnɑ nɑ mun ɑ: «Duɑt suon nnɑ.» K wonpɑɑluk mɑnŋ gbenn, k nyun nɑ mun ji duɑ k muu dik dik.

⁴⁰ Ŋɑnn e k u boi u puolpoweitieb mɑnŋ ɑ: «Bee k i mɔk gbɑnɑnjeknt i? I biɑ dɑɑ k mɔk yɑdɑ ɑɑ?»

⁴¹ K jɑŋmɑɑni din suol’b bonciɑnn, k b boi b lieb ɑ: «Jɑbuol bee e nɑ? K wounŋ nɑn nyunpɑnɑ wɑɑ sɑɑk u mɔb i?»