Mɑɑlk 3 - Yiesu Lɑbɑmɑnn Muɑl Ni

Niikpienn dɑɑnɔ pɑɑku lɑbɑɑl

¹ Yiesu din biɑ kuɑ *Suifnbɑ jɑɑnti dieok ni, k jɑsuɑ din be lenŋ k u nuu kpo.

² K nisiɑb din be lenŋ k goli Yiesu, ɑ bin lɑɑn u sɑɑ te k niikpienn dɑɑnɔ mɑnŋ n pɑɑk *Fuondɑɑl, k bin tɑɑl’ɔ l po oo?

³ Ŋɑnn e k Yiesu yiin niikpienn dɑɑnɔ nɑ ɑ: «Fiit k set niib nɑ sinsuuk ni,»

⁴ ŋɑɑn boi niib nɑ ɑ: «T *senni cɑb ɑ tii tuun bonŋɑnn Fuondɑɑl ɑmi bonbiil i? A t fɑt nilɔ k lu ɑmi t kpi’u u?» Ŋɑɑn k b ji din ŋmin ɑ.

⁵ K u got k lint’b nɑn wutuol, k mɑɑn u pɑl din biil bonciɑnn nɑn bɑɑ tie kɑngbɑtɑ nɑ pɑɑk, k u ŋmɑnt k yet juɑ mɑnŋ ɑ: «Tɑntl ɑ nuu mɑnŋ.» K u tɑnt u nuu mɑnŋ k l lɑ lɑɑfiɑ.

⁶ L yuo nɑ k Fɑɑliisiɑnnbɑ din ŋmɑt nyii, k ŋɑnm nɑn kpɑnbɑl *Heluod puolpo juɑmu din lol suol nɑn lieb bɑɑ sɑɑ tien biɑnŋ nbɑ k kpi Yiesu.

Niib bonciɑnn wɑɑ Yiesu puol

⁷ K Yiesu nɑn u *puolpoweitieb din fiil k sik mɔkgbenŋl nɑ kpinŋ, k nibulciɑɔnŋ din wɑɑ u puolpo, bin nbɑ din nyii Gɑɑliile nɑn Suude

⁸ nɑn Selusɑɑlenm nɑn Idume nɑn *Suulden mɔk-puotl, nɑn Tiil nɑn Siidɔn tingbounŋ ni, k b yɑb bonciɑnn k tikl u buol. Bɑɑ din gbɑt wɑɑ din tuun lin nbɑ nɑ pɑɑk, k b din bɑɑl u buol ni.

⁹ K u yet u puolpoweitieb ɑ bin lɑ bulgbetl tul’ɔ, ɑ k nibul nɑ tɑn dɑɑ tut’ɔ,

¹⁰ k mɑɑn wɑɑ din te k bɑɑtb bonciɑnn pɑɑk nɑ pɑɑk e din te k bin nbɑ kul yiɑl ji din nɑki ɑ bin sii’u.

¹¹ Nɑlnbiit nbɑ din tuu lɑ’u yuo nbɑ kul ɑ b din tuu bɑɑ u tuɑnn e k fɑɑ wuyikinŋ k yien ɑ: «Fin e tie Yennu Bijɑ.»

¹² K u din kpɑɑn’m nɑn ninmɔnn ɑ b dɑɑ muɑntl wɑɑ tie wun nbɑ.

Yiesu lukt u tuomiinbɑ *piik nɑn bɑnle

¹³ L puolpo k Yiesu duo juɑl pɑɑk ŋɑɑn yiin bin nbɑ k u luon bin bɑɑl nɑ, k b bɑɑl u buol ni.

¹⁴ K u gɑnn niib piik nɑn bɑnle, k yi’b tuomiinbɑ, ɑ bii be u buol ni, ɑ wuu tuun’m k bii muɑntl u lɑbɑmɑnn,

¹⁵ kii biɑ kii mɔk yiikuo kii fit kii nyint nɑlnbiit niib ni.

¹⁶ Wɑɑ din gɑnn niib nbɑ piik nɑn bɑnle nɑ, b sɑnɑ e nɑ: Siimɔn, wun nbɑ k Yiesu din pul’ɔ Piɑl nɑ,

¹⁷ nɑn Sɑɑk nɑn u nɑɑ bik Sɑn, bin nbɑ din tie Sebede wɑɑs nɑ, bin nbɑ k Yiesu din pul’b Boɑneljes, k l pɑɑk tie sɑtiɑni wɑɑs,

¹⁸ nɑn Andle nɑn Fiiliip, nɑn Bɑɑltelemi, nɑn Mɑɑtieo, nɑn Tuomɑ, nɑn Sɑɑk wun nbɑ din tie Alfe bik, nɑn Tɑɑde, nɑn Siimɔn wun nbɑ din luon ŋɑnm *Suifnbɑ i yenn b mɔnŋ,

¹⁹ nɑn Suudɑ wun nbɑ din tɑn nyii Yiesu puol nɑ.

Nɑlnbiit bɑt Beelsebuul lɑbɑɑl

²⁰ L puolpo k Yiesu kun, k nibulciɑɔnŋ din tikl ŋuɑ nɑn u puolpoweitieb buol ni, k b tɑn kɔnŋ yɑɑk nɑn jiet dinu.

²¹ U ŋɑɑtieb nbɑ din gbɑt nnɑ, k b bɑɑl ɑ bin suol’ɔ, k mɑɑn b din yien ɑ u wɑɑt e.

²² K Yennu *senniwɑntieb nbɑ din nyii Selusɑɑlenm nɑ mun din yet ɑ: «Nɑlnbiit bɑt Beelsebuul nɑ e be u ni, k u nyint nɑlnbiit niib ni, ŋuɑ Beelsebuul yiikuo ni.»

²³ K Yiesu din yiin wɑntieb mɑnŋ ɑ bii bɑɑt nɑ, ŋɑɑn yin’m bɑljokt k boi’b ɑ: «*Sɑɑtɑn sɑɑ sɑk nyinn u mɔnŋ ii?

²⁴ Nɑɑn niib i ŋmɑt k kɔn tuokt b lieb, b nɑɑn mɑnŋ kɑn fit set.

²⁵ K ŋɑɑk niib i ŋmɑt kɔn nɑn lieb, b ŋɑɑk mɑnŋ kɑn fit set.

²⁶ K Sɑɑtɑn i ŋmɑt kɔn nɑn u mɔnŋ, u kɑn fit set, u juontu telk e nɑ.

²⁷ «Suɑ kɑn fit kuɑ pɑnŋ dɑɑnɔ ŋɑɑk ni k sɑɑ jɑn u mɔktuk, sie k u dɔnŋ k lol’ɔ ŋɑɑn yen ji fit k jɑn u mɔktuk mɑnŋ.»

²⁸ K Yiesu ŋɑnm yet’b ɑ: «Bɑlmɔni e k n yien’i nɑ, Yennu sɑɑ nyik cɑb nifosɑɑli b biit nɑn b bɑlbiit kul ɑ,

²⁹ ŋɑɑn wun nbɑ kul suki Foŋɑnm, Yennu kɑn mi k nyik cɑb l dɑɑnɔ fɑb ɑ nɑn yuo nbɑ kɑɑ gbennu.»

³⁰ Yiesu din pɑk nnɑ mɑnŋ, k mɑɑn bɑɑ din yet ɑ: «Nɑlnbiiuk be u ni nɑ.»

Yiesu nɑɑ nɑn u ninjɑnm lɑbɑɑl

³¹ L yuo nɑ k Yiesu nɑɑ nɑn u ninjɑnm din bɑɑl k sie nɑn-yel po, ŋɑɑn tun suɑ ɑ wun yiin’ɔ nɑ.

³² K nibulciɑɔnŋ din kɑl k lint’ɔ wɑɑ, k u be sinsuuk ni, k b yet’ɔ ɑ: «Gɑfɑlɑ, ɑ nɑɑ nɑn ɑ ninjɑnm [nɑn ɑ niipuob] be nɑn-yel po k luon’ɑ.»

³³ K Yiesu boi’b ɑ: «Ŋmee dɑɑ tie n nɑɑ, k lɑnm e mun tie n ninjɑnm i?»

³⁴ ŋɑɑn got bin nbɑ kɑl k lint’ɔ nɑ k yet ɑ: «N nɑɑ nɑn n ninjɑnm e be nnɑ nɑ.

³⁵ Wun nbɑ kul tuun Yennu lonm, ŋuɑ e tie n ninjɑ nɑn n niipuo nɑn n nɑɑ.»