Mɑɑlk 15 - Yiesu Lɑbɑmɑnn Muɑl Ni

*Suifnbɑ yɑɑ bin kpɑɑ Yiesu

¹ K Yennu jɑɑnti yudɑnm, nɑn tinŋ nɑ ni sɑɑkɑb, nɑn *senniwɑntieb, nɑn *Suifnbɑ sɑɑkɑb kul lɑkn sɑn-nyɑpob ni, k lol lolɑ, k bɑɑn Yiesu bɑnt k jii’u sɑɑn nɑn’ɔ tinŋ yudɑɑnɔ nbɑ k b yi’u *Piilɑɑt nɑ buol.

² K Piilɑɑt boi’ɔ ɑ: «Fin e set tie Suifnbɑ Kpɑnbɑl nɑ ɑɑ?» K Yiesu jiin ɑ: «Fin yɑɑ.»

³ K Yennu jɑɑnti yudɑnm mɑnŋ tɑɑl Yiesu bonɑ bonciɑnn pɑɑk.

⁴ K Piilɑɑt biɑ boi’ɔ ɑ: «A kɑn jiin siɑl ii? Gbiintl bɑɑ wɑɑ’ɑ biɑnŋ nbɑ.»

⁵ Ŋɑɑn k Yiesu k jiin siɑl, k l ji bɑkt Piilɑɑt.

Piilɑɑt cɑb ɑ bin kpi Yiesu

⁶ Tɔn, *yuktgɑltiɑlu jɑɑnm dinu yuo kul, Piilɑɑt tuu nyinn niyenɔ kuɑ e dɑnsɑlk ni, wun nbɑ k niib luon bin ŋɑɑ’u.

⁷ L yuo mɑnŋ k jɑsuɑ din be dɑnsɑlk, k u sɑnn yi Bɑɑlɑɑbɑɑs. Ŋuɑ nɑn nisiɑb din be dɑnsɑlk k mɑɑn b kpikpiluk nbɑ k b dɑɑn tie duo nɑ ni k kpii nilɔ nɑ pɑɑk.

⁸ Ŋɑnn e k nibul mɑnŋ din lɑkn k mei Piilɑɑt ɑ wun tun wɑɑ din tuu tuun bɑnnu nbɑ yɑɑnn.

⁹ K u boi’b ɑ: «I luon k n nyinn Suifnbɑ Kpɑnbɑl nɑ ee?»

¹⁰ K mɑɑn u din mi fɑnu nɑn jɑɑnti yudɑnm *funfunn pɑɑk e te k b jii Yiesu k tien u nuu ni.

¹¹ Ŋɑɑn k Yennu jɑɑnti yudɑnm mɑnŋ din wɑɑ tik nibul nɑ ɑ bin yet’ɔ k wun nyinn Bɑɑlɑɑbɑɑs e k tul’b.

¹² K Piilɑɑt biɑ ŋɑnm boi’b ɑ: «K wun nbɑ k i yi’u Suifnbɑ Kpɑnbɑl nɑ, i luon k n tien’ɔ nlee?»

¹³ K b tiɑn jiin sɑnpɑɑpo wɑɑ ɑ: «Kpɑɑn’mɔ dɑpunpunn pɑɑk.»

¹⁴ K Piilɑɑt boi’b ɑ: «Bee pɑɑk i? U biit mɑntk tie lɑnn po e?» K b biɑ ŋɑnm tiɑn sɑnpɑɑpo wɑɑ ɑ: «Kpɑɑn’mɔ dɑpunpunn pɑɑk.»

¹⁵ K Piilɑɑt luon wun penn nibul mɑnŋ pɑlɑ, l pɑɑk k u nyinn Bɑɑlɑɑbɑɑs tul’b, ŋɑɑn te k b buo Yiesu, k jii’u tul’b ɑ bin kpɑɑ’u dɑpunpunn pɑɑk.

Sejenm suki Yiesu

¹⁶ K sejenm jii Yiesu k kuɑ nɑn’ɔ tinŋ nɑ yudɑɑnɔ Piilɑɑt ŋɑɑdundounŋ ni, k yiin b tɔk-nɑn-lieb kul.

¹⁷ K b jii bɑɑnmunŋ nnɑ k lɑnn’ɔ, ŋɑɑn jii kunkoni k luu nɑɑn foklk k yiln’mɔ,

¹⁸ ŋɑɑn ji fuont’ɔ ɑ: «Suifnbɑ Kpɑnbɑl, fuontu wɑɑ.»

¹⁹ ŋɑɑn jii lɑnbɑnbik k fɑɑ u yul pɑɑk, k siin mɔsɑnt u pɑɑk, k gbɑɑ b dunɑ pɑɑk u tuɑnn ni.

²⁰ Bɑɑ dɑɑn’ɔ nyɑtuk k gbenn yuo nbɑ, k b liɑt bɑɑnmunŋ nɑ, ŋɑɑn jii u mɔnŋ mɔnŋ tiɑt nɑ k lɑnn’ɔ, k jii’u k nyii nɑn’ɔ ɑ bin sɑɑn kpɑɑ’u dɑpunpunn pɑɑk.

B kpɑɑ Yiesu k tɑbn’ɔ dɑpunpunn pɑɑk

²¹ L yuo k Siilenn jɑsuɑ din be, k u sɑnn yi Siimɔn, wun nbɑ tie Aleksɑndl nɑn Lufus bɑɑ nɑ, k u nyii kpɑɑnt ni k gɑɑl lenŋ. K sejenm miɑ’u ɑ wun gɑɑl Yiesu kuun dɑpunpunn nɑ k jii.

²² K b jii Yiesu k sɑɑ nɑn’ɔ siɑn nbɑ k b yi’l Golgotɑ, k l pɑɑk tie: «Yukpɑbuk buol nɑ.»

²³ Lenŋ e k nisiɑb din tul’ɔ dɑmunŋ nbɑ ŋmɑt nɑn nyɔksɑu nbɑ k b yi’l miil nɑ, ŋɑɑn k u yet l nyunu.

²⁴ K sejenm kpɑɑ’u dɑpunpunn nɑ pɑɑk, ŋɑɑn tol b lieb u tiɑt nɑ, ŋɑɑn tɔ tiɑtiɑ k cent u tiɑt mɑnŋ.

²⁵ B din kpɑɑ’u sɑn-nyiɑɔk ni e, kut mun-yiɑ yuo.

²⁶ K b din diɑn lin nbɑ pɑɑk te k b kpɑɑ’u k tɑbn u dɑpunpunn nɑ pɑɑk, k l yɑɑ ɑ: «Suifnbɑ Kpɑnbɑl mɑnŋ e nɑ.»

²⁷ B biɑ din kpɑɑ fɑt-tieb bɑnle dɑpunpunɑ pɑɑk k pukn u po, k yenɔ din be u niidiitu po, k luɑ nɑ mun din be u niigɑnŋ po.

²⁸ (K l gbien lin nbɑ diɑn Yennu lolkpel kɑdɑɑɔk ni ɑ: «B jii’u tien biitdɑnm sinsuuk ni.»)

²⁹ Tɔn, k bin nbɑ sonm gɑɑl lenŋ nɑ gumi yulɑ ŋɑɑn suki’ɔ, k yien ɑ: «Fin. A tuu yɑɑ ɑ sɑɑ fit bet Yennu jɑɑnti ŋɑsɑɑkɑk nɑ ŋɑɑn biɑ mɑɑ’l dɑɑ ŋɑntɑ sinsuuk ni.

³⁰ Tɔn, fɑn nyi dɑpunpunn nɑ pɑɑk k sik k fɑt ɑ mɔnŋ.»

³¹ Nnɑ e k Yennu jɑɑnti yudɑnm nɑn senniwɑntieb mun biɑ lɑɑ’u, ŋɑɑn yien tien b lieb ɑ: «U tuu fɑɑl lieb, ŋɑɑn tɑn kɑn fit k fɑt u mɔnŋ.

³² Ŋɑɑnt k Suifnbɑ Kpɑnbɑl, *Klistu nɑ, n nyi dɑpunpunn nɑ pɑɑk k sik nnɑ mɔtɑɑnɑ, k tin lɑ k tien’ɔ yɑdɑ.» K bin nbɑ k b pukn u po k kpɑɑ’b nɑ mun suki’ɔ.

Yiesu kuun lɑbɑɑl

³³ Lɑɑ din tɑn bɑɑl yensuuk ni yuo nbɑ, k duo nɑ kul ji din bɔnn k sɑɑ bɑɑl kut muntɑ.

³⁴ Kut muntɑ yuo e, k Yiesu yikn sɑnpɑɑpo wɑɑ nɑn kunkɔsɑɑkɑl, k yet ɑ: «Eloi, Eloi, lemɑ sɑɑbɑɑktɑɑni?» k l pɑɑk tie ɑ: «N Yennu n Yennu, bee k ɑ lu’n i?»

³⁵ K bin nbɑ sie lenŋ nɑ nbɑ gbɑt u yiini mɑnŋ, k b siɑb yet ɑ: «Gbiintl mɑn. U yi Elii e.»

³⁶ Ŋɑnn e k b ni yenɔ tin k sɑɑ jii sɑɑpo k suunt dɑmiituk nnɑ ni, k jii sɑkn dɑɑɔk pɑɑk, ŋɑɑn donn k tul’ɔ ɑ wun nyu, k biɑ yet ɑ: «I ŋɑɑn k tii guu k lɑɑn Elii bɑɑt ɑ wun sikn’ɔ dɑpunpunn nɑ pɑɑk.»

³⁷ K Yiesu ŋɑnm yikn nɑn kunkɔsɑɑkɑl, ŋɑɑn nɑk l yuo.

³⁸ L yuo nɑ k cincenn nbɑ tuu juɑn k puun Yennu jɑɑnti ŋɑsɑɑkɑk ni nɑ ji bɔkt l yul pɑɑk k tɑn sik tinŋ ni.

³⁹ K sejenm yudɑɑnɔ nbɑ din sie dɑpunpunn mɑnŋ buol nɑ, wɑɑ lɑ biɑnŋ nbɑ k Yiesu kpo nɑ, k u ji yet ɑ: «Bɑlmɔni e, juɑ nɑ set tie Yennu Bijɑ e.»

⁴⁰ Tɔn, Mɑgdɑɑlɑ puo Mɑɑli nɑn Mɑɑli wun nbɑ din tie Sose nɑn Sɑɑk bik nɑɑ nɑ, nɑn Sɑɑlome din be, k b din pukn puosiɑb po k sie bɑnfɔkl ɑ ŋɑɑn goli.

⁴¹ B ponŋ din wɑɑ Yiesu yuo nbɑ k u din be Gɑɑliile ni e wɑɑ k sonmt’ɔ. Puolieb bonciɑnn nbɑ wei Yiesu k bɑɑl Selusɑɑlenm nɑ mun biɑ din be lenŋ.

Yiesu gbɑnɑnt piinu lɑbɑɑl

^42-43 L dɑɑl dɑɑjuouk k Aliimɑɑte duo ni juɑ nbɑ sɑnn din yi Suosiɑf nɑ din bɑɑl. U din tie Suifnbɑ tintɑɑnkɑɑnu ni sɑɑkɑyenɔ e, k din tie bulcimɔ nɑn bɑlmɔni, k din tuu guu Yennu nɑɑn bɑɑlu. K l dɑɑl din tie dɑɑl nbɑ k Suifnbɑ tuu tie b mɔnŋ siil nɑn *Fuondɑɑl. L pɑɑk, k u din sɑɑn yet Piilɑɑt ɑ wun cɑb’ɔ Yiesu gbɑnɑnt, ŋɑɑn u din k tiin jɑŋmɑɑni.

⁴⁴ Piilɑɑt nbɑ din gbɑt ɑ Yiesu ponŋ kpo wɑɑ nɑ, k l ji yɑɑl ŋɑɑn lit’ɔ, k u yiin sejenm yudɑɑnɔ nɑ k tɑn boi’ɔ ɑ wun lɑɑn Yiesu nbɑ kpo l wei wɑɑ?

⁴⁵ Yuo nbɑ k u gbɑt yudɑɑnɔ mɑnŋ mɔb ni nɑ, k u yiin Suosiɑf mɑnŋ k tɑn cɑb’ɔ ɑ wun jii Yiesu gbɑnɑnt nɑ.

⁴⁶ K Suosiɑf din dɑɑ kɑtinŋ, k kpɑɑt Yiesu gbɑnɑnt dɑpunpunn nɑ pɑɑk, k pɔbn’ɔ lenŋ, k jii’u k pii kɑɑɔk nbɑ k b ponŋ din jiɑl tɑnpiiuk, k bikt kɑtɑnu, k biin l mɔb nɑ.

⁴⁷ K Mɑgdɑɑlɑ puo Mɑɑli nɑn Mɑɑli wun nbɑ din tie Sose nɑɑ nɑ din lɑ siɑn nbɑ k b pii Yiesu gbɑnɑnt mɑnŋ ɑ.