Mɑɑlk 14 - Yiesu Lɑbɑmɑnn Muɑl Ni

Yudɑnm lol ɑ bin kpi Yiesu

¹ Tɔn, dɑɑ ŋɑnle din biɑl nɑn *yuktgɑltiɑlu jɑɑnm nɑn dɑɑ nbɑ k b di pɑɑnu nbɑ k b din tuu k tie * dɑtinŋ nɑ n piin, k Yennu jɑɑnti yudɑnm nɑn *senniwɑntieb luon sɔnu ɑ bin bɔl suol Yiesu k kpi’u, k yien ɑ:

² «T dɑɑ so’u jɑɑnm nɑ dɑɑ nɑ ni, k mɑɑn kpikpiluk sɑɑ bɑɑl ɑ.»

Puosuɑ but tulɑɑli Yiesu yul pɑɑk

³ Tɔn, k Yiesu din be Betɑɑni, juɑ nbɑ din tuu tie gbɑɑtl, k b yi’u Siimɔn nɑ ŋɑɑk ni, k di jiet. L yuo k puosuɑ tɑn kuɑ nɑn sɑlenŋɑnn, k l gbie nɑn tulɑɑli nbɑ mɔk nublu bonciɑnn nɑ wɑɑ, k l dɑɑɔk biɑ pɑɑl bonciɑnn, k b yi’l nɑɑl nɑ. K puo mɑnŋ biit sɑlenn nɑ k but tulɑɑli mɑnŋ Yiesu yul pɑɑk.

⁴ K nisiɑb nbɑ din be lenŋ nɑ piɑk nɑn wutuol k yien ɑ: «Bee tien k u biil tulɑɑli nɑ nnɑ?

⁵ B bo sɑɑ fit kɔi’l k lɑ likli k lin gɑl denienbɑ kobi ŋɑntɑ (300) wɑɑ, k bo jii’l sonm tɑlɑs-dɑnm.» K b jii puo mɑnŋ nɑn mɔdunŋ bonciɑnn.

⁶ K Yiesu yet’b ɑ: «Nyikn puo nɑ. Bonŋɑnn e k u tun k tul’n mɑnŋ, k bee k i kpiln’mɔ nnɑ?

⁷ Tɑlɑs-dɑnm sii tun be i buol ni yuo kul ɑ, k i sɑɑ fit sonm’b yuo nbɑ kul k i luon, ŋɑɑn min ŋɑnin kii tun be nnɑ kɑɑ.

⁸ Puo mɑnŋ tun wɑɑ sɑɑ fit tun lin nbɑ e k tul’n. Wɑɑ but tulɑɑli nbɑ n gbɑnɑnt pɑɑk nɑ, u tien n kuun piinu siil e.

⁹ Bɑlmɔni e k n yien’i nɑ, siɑn nbɑ kul k b sɑɑ muɑnt n lɑbɑmɑnn nɑ tingbounŋ nɑ ni, b biɑ sɑɑ muɑnt puo mɑnŋ nbɑ tun lin nbɑ nɑ, k lii tie tiɑlu e k tul’ɔ.»

Suudɑ sɑk kuɑt Yiesu

¹⁰ Ŋɑnn e k Yiesu tuomiinbɑ *piik nɑn bɑnle nɑ yenɔ, wun nbɑ k b yi’u Suudɑ Iskɑɑliɑɔt nɑ, din sɑɑn Yennu jɑɑnti yudɑnm buol ni ɑ wun kɔi Yiesu.

¹¹ Bɑɑ gbɑt nnɑ mɑnŋ yuo nbɑ nɑ, b pɑlɑ penn, k b senn mɔsonn ɑ b sɑɑ tul’ɔ likli l pɑɑk. K u ji piin luon sɔnu nbɑ k u sɑɑ jii Yiesu k kubn’ɔ b nuu ni.

*Yuktgɑltiɑlu jɑɑnm dinu lɑbɑɑl

¹² Tɔn, l dɑɑl nbɑ din tie dɑsinsinn nbɑ k b tuu di pɑɑnu nbɑ k b din tuu k tie dɑtinŋ nɑ, l dɑɑl e k b din tuu kpi pebis k tien *yuktgɑltiɑlu jɑɑnm jiet nɑ, k Yiesu *puolpoweitieb boi’ɔ ɑ: «A luon k tin sɑɑn lee k sɑɑ tien jɑɑnm mɑnŋ jiet siil k tul’ɑ ni i?»

¹³ K u tun b ni bɑnle k yet’b ɑ: «Ii sɑɑ duo nɑ ni mɑn, k i sɑɑ sɑɑ cet jɑsuɑ k u jii nyunsuɑl. Ii wɑɑ’u mɑn

¹⁴ nɑn ŋɑɑk nbɑ k u sɑɑ sɑɑ kuɑ nɑ ni, k yet l ŋɑɑk dɑɑnɔ ɑ: ‹Wɑntuɑ nɑ yɑɑ ɑ tin boi’ɑ ɑ sɑɑnm dieok nbɑ k ŋuɑ nɑn u puolpoweitieb sɑɑ di *yuktgɑltiɑlu jɑɑnm jiet nɑ be lee?›

¹⁵ K u sɑɑ wɑnn’i dituɑtuk nbɑ yɑb k ponŋ tien bonsiɑ kul siil ɑ, k yin tien jiet mɑnŋ lenŋ.»

¹⁶ K Yiesu puolpoweitieb bɑnle mɑnŋ sɑɑn duo mɑnŋ ni, k set sɑɑ lɑ k siɑl kul ɑ tun l biɑnŋ ni nɑn wɑɑ yet’b biɑnŋ nbɑ nɑ. K b tien jɑɑnm mɑnŋ jiet siil.

¹⁷ K Yiesu nɑn u tuomiinbɑ piik nɑn bɑnle nɑ tɑn bɑɑl dɑɑjuouk.

¹⁸ Bɑɑ kɑl k di jiet yuo nbɑ, k u tɑn yet’b ɑ: «Bɑlmɔni e k n yien’i nɑ, min nɑn i yenɔ nbɑ di jiet nɑ, l dɑɑnɔ yɑɑ wun kuɑt’n e.»

¹⁹ K l biil b pɑlɑ ni, k b boi’ɔ yenɔ yenɔ ɑ: «A yien min ee?»

²⁰ K u jiin yet’b ɑ: «L lek tie yinm tuomiinbɑ piik nɑn bɑnle nɑ ni yenɔ nbɑ k min nɑn ŋuɑ lɑki tuun senn-yienŋ ni k di jiet nɑ e.

²¹ *Nisɑɑlk Bijɑ set sɑɑ kpo nɑn lɑɑ diɑn Yennu lolkpel kɑdɑɑɔk ni biɑnŋ nbɑ nɑ e, ŋɑɑn bonbiil sii be dɑɑnɔ nbɑ yɑɑ wun kuɑt’n nɑ pɑɑk. B ii dinŋ ii bo i kii mɑl l dɑɑnɔ gbɑɑ, l bo din sii sɔ u po.»

T Yiesu mɔtɑɑɔk dinu lɑbɑɑl

²² Bɑɑ kɑl k di jiet mɑnŋ yuo nbɑ k Yiesu jii pɑɑnu k tul Yennu niipuouk l pɑɑk, ŋɑɑn ŋmit’l k tul u puolpoweitieb, k yet’b ɑ: «Gɑɑt mɑn. Nɑ e tie n gbɑnɑnt.»

²³ Ŋɑnn e k u biɑ jii *kɔp nɑn dɑmunŋ k tul Yennu niipuouk l pɑɑk, k jii k tul’b. K b kul ɑ nyuu.

²⁴ K u yet’b ɑ: «Lin nbɑ nɑ e tie n sɔn nbɑ sɑɑ nyi n gbɑnɑnt ni niib bonciɑnn pɑɑk, k l wɑnn nɑn Yennu *lol lolpɑɑnn.

²⁵ Bɑlmɔni e k n yien’i nɑ, n ji kɑn mi k nyu dɑmunŋ nɑ sie dɑɑl nbɑ k n tɑn sɑɑ nyu l dɑmunpɑɑnn Yennu nɑɑn ni nɑ.»

²⁶ Ŋɑnn e k b yin Yenjiɑntu *yɑni, ŋɑɑn nyii k sɑɑn *Oliifienbɑ jɑgbɑɑk pɑɑk.

Yiesu yet ɑ Piɑl sɑɑ noi ɑ u k mi’u

²⁷ K Yiesu yet’b ɑ: «I kul ɑ nɑ tɑn sɑɑ tin k nyik’n ɑ, k mɑɑn l diɑn Yennu lolkpel kɑdɑɑɔk ni ɑ: ‹N tɑn sɑɑ kpi pekpɑɑlk nɑ, k pei nɑ tɑn sɑɑ tin yɑt.›

²⁸ Ŋɑɑn mi i tɑnŋ i fiil kuun ni, l puolpo n sɑɑ dɔnŋ k gɑl i tuɑnn k sɑɑn Gɑɑliile.»

²⁹ K Piɑl jiin yet ɑ: «N lieb nɑ kul i lek i nyik’ɑ, ŋɑɑn min ŋɑnin kɑn nyik’ɑ ni.»

³⁰ K Yiesu yet’ɔ ɑ: «Bɑlmɔni e k n yien’ɑ nɑ, nyiɑɔk nɑ, ɑ sɑɑ noi ɑ ɑ k mi’n tɑɑl muntɑ e wɑɑ k kojouk n bui liel tɑɑl munle.»

³¹ K Piɑl ŋɑnm yet nɑn ninmɔnn ɑ: «L i lek i tie ɑ min nɑn fin n lɑkn kpo gbɑɑ, ŋɑɑn n kɑn mi k noi ɑ n k mi’ɑ ni.» K u lieb nɑ mun biɑ yet nnɑ.

Yiesu mei Yennu nɑn ninmɔnn

³² L puolpo k Yiesu nɑn u tuomiinbɑ piik nɑn bɑnle sɑɑn siɑn nbɑ k b yi Getsemɑɑne nɑ. Lenŋ e k u yet’b ɑ: «Kɑln nnɑ mɑn ŋɑɑn k n sɑɑn k sɑɑ miɑl Yennu.»

³³ Ŋɑnn e k u jii Piɑl nɑn Sɑɑk nɑn Sɑn k sɑɑn. K u yɑn put k u pɑl biil bonciɑnn,

³⁴ k u yet’b ɑ: «Pɑlbiil buolu nbɑ suol’n nɑ pel lin kpi’n ɑ. Biɑt nnɑ mɑn kii nyɔi.»

³⁵ Ŋɑnn e k u cɑt k sɑɑn tuɑnn po wɑɑnm-nnɑ, k bɑɑ fɑbn, k mei Yennu ɑ l i bo i sɑɑ fit, Yennu n ŋɑɑn k fɑlɑ nbɑ bɑɑt u pɑɑk nɑ n yɑkl’ɔ, k yet ɑ:

³⁶ «Abbɑ! n Bɑɑ, ɑ sɑɑ fit tun bonsiɑl kul ɑ. Dɑɑ ŋɑɑnt k n kuɑ bonbiil nbɑ bɑɑt n pɑɑk nɑ ni, ŋɑɑn dɑɑ te k l tie mɑɑ luon biɑnŋ nbɑ kɑɑ, ŋɑɑn te k lin tien fɑɑ luon biɑnŋ nbɑ e.»

³⁷ Ŋɑnn e k u tunn k jen u puolpoweitieb bɑntɑ nɑ buol ni, k suɑ k b tɑɑn guɑn ɑ. K u boi Piɑl ɑ: «Siimɔn, ɑ guɑnt ee? A kɑn fit kii nyɔi wɑɑn ii?»

³⁸ ŋɑɑn yet’b ɑ: «Ii nyɔi mɑn ŋɑɑn kii mei Yennu k i tɑn dɑɑ kuɑ jinjɑnmi ni. I sei ŋɑnin luon lin tun lin nbɑ siɑn, ŋɑɑn k i gbɑnɑnt kɑɑ pɑnŋ.»

³⁹ K u biɑ sɑɑn Yenmiɑlu k sɑɑ mei nɑn wɑɑ bo miɑl biɑnŋ nbɑ sinsinn nɑ,

⁴⁰ ŋɑɑn biɑ ŋmɑt k sɑɑ bɑɑl suɑ k u puolpoweitieb nɑ biɑ guɑn ɑ, k mɑɑn guɑn mɔk’b bonciɑnn. K b k mi bɑɑ sɑɑ yet’ɔ lin nbɑ l yuo mɑnŋ.

⁴¹ Wɑɑ tɑn jen tɑɑpɑɔnŋ muntɑ ni, k u boi’b ɑ: «I biɑ lek dɑɑ duɑ guɑnt e k foi ii? L jɑnŋ ɑ mɑn. Yuo mɑnŋ bɑɑl nɑ. Gotl mɑn, b ji kuɑt Nisɑɑlk Bijɑ nɑ k tien’ɔ biitdɑnm nuu ni wɑɑ.

⁴² Fiit mɑn k tin sɑɑn. Wun nbɑ nyii n puol nɑ bɑɑt.»

B suol Yiesu

⁴³ Yiesu nbɑ dɑɑ piɑk nɑ, k u tuomiinbɑ piik nɑn bɑnle nɑ ni yenɔ, wun nbɑ k b din yi’u Suudɑ nɑ, bɑɑl nɑn nibulciɑɔnŋ, k b siɑb diɑ juk-bɑnjɑi, k siɑb mun diɑ gbɑjɑlɑ, k Yennu jɑɑnti yudɑnm nɑn senniwɑntieb nɑn sɑɑkɑb tun’m.

⁴⁴ K mɔlɑnfikdɑɑnɔ Suudɑ mɑnŋ ponŋ wɑnn’b nyinsiɑl ɑ, ɑ: «Mi i sɑi fuont wun nbɑ k muɑt u tɑnkpinn, yi mi nɑn ŋuɑ e nɑ. Yin suol’ɔ kii guu’u kii sɑɑ nɑn’ɔ mɑn.»

⁴⁵ Suudɑ nbɑ tɑn bɑɑl yuo nbɑ, l tɑɑkpɑɑk ni k u sɑɑn Yiesu buol ni k yet’ɔ ɑ: «Cɑnbɑɑ.» ŋɑɑn muɑt u tɑnkpinn.

⁴⁶ K niib nɑ ji suol Yiesu k kub’ɔ kenken.

⁴⁷ Ŋɑnn e k u puolpoweitieb ni yenɔ nbɑ sie lenŋ tɑn nuɑt u juk-bɑnjiɑk k cuɑ Yennu jɑɑnti yudɑɑnɔ dɑɑbl tubl k lu.

⁴⁸ K Yiesu boi’b ɑ: «I bɑɑl nɑn juk-bɑnjɑi nɑn gbɑjɑlɑ nɑ ɑ i tɑn suol’n nɑn n tie fɑt-tuɑ e nɑ ɑɑ?

⁴⁹ N dɑɑn tuu be i buol Yennu jɑɑnti ŋɑsɑɑkɑk ni dɑɑl kul ɑ k wɑnt niib Yennu mɑɑn, k i tuu k so’n, ŋɑɑn l kpɑɑ tɑlɑs nɑn Yennu lolkpel kɑdɑɑɔk diɑni mɑnŋ n tien gbien.»

⁵⁰ K u puolpoweitieb nɑ kul ji ciɑl ŋɑɑn nyik’ɔ.

⁵¹ K nɑɑsinbisuɑ nnɑ din gbɑb cincenn kuukuɑ k wɑɑ Yiesu puolpo K b tɑn bib’ɔ k suol u cincenn,

⁵² k u nyik u cincenn mɑnŋ b nuu ni, ŋɑɑn ciɑl yɑnn.

B suol Yiesu k sɑɑn nɑn’ɔ buut buol ni

⁵³ K b jii Yiesu k sɑɑn nɑn’ɔ Yennu jɑɑnti yudɑɑnɔ ŋɑɑk, siɑn nbɑ k jɑɑnti yudɑnm, nɑn tinŋ nɑ ni sɑɑkɑb, nɑn senniwɑntieb din lɑkn.

⁵⁴ K Piɑl din be Yiesu puolpo k wɑɑ bɑnfɔkl ɑ mɔkmɔk nɑn bɑɑ tɑn kuɑ Yennu jɑɑnti yudɑɑnɔ mɑnŋ ŋɑɑk ni. K Piɑl sɑɑn kɑl k pukn sejebit nɑ po k b nɑni muu.

⁵⁵ Ŋɑnn e k Yennu jɑɑnti yudɑnm nɑn sɑɑkɑb mɑnŋ kul yɑbl b mɔnŋ pɑɑk ɑ bin lɑ siɑlɑɑdɑnm mɔb ni lin nbɑ k b sɑɑ jii Yiesu biit k kpi’u, ŋɑɑn kɔnŋ u bisiɑt.

⁵⁶ Siɑlɑɑdɑnm bonciɑnn din fɑ fɑi k tien’ɔ, ŋɑɑn k b fɑi mɑnŋ din k wei liel.

⁵⁷ L yuo k jɑsiɑb fiil set k fɑɑl fɑɑk tul’ɔ ɑ:

⁵⁸ «T gbɑt k u yet ɑ u sɑɑ bet Yennu jɑɑnti ŋɑsɑɑkɑk nbɑ k niib din mɑɑ nɑn b nii nɑ, ŋɑɑn l dɑɑ ŋɑntɑ sinsuuk ni k u sɑɑ jii k mɑɑ’l, k l tɑn kii tie nilɔ nii kɑɑ mɑɑ’l.»

⁵⁹ Ŋɑɑn l kul yɑnn. B fɑi mɑnŋ lek biɑ din k wei liel.

⁶⁰ Ŋɑnn e k Yennu jɑɑnti yudɑɑnɔ nɑ fiil k boi Yiesu ɑ: «Bɑli nbɑ k jɑb mɑnŋ piɑk k tien’ɑ nɑ po, l pɑɑk tie bee? A k mɔk l jiinu uu?»

⁶¹ Ŋɑɑn k Yiesu lek ŋmin ɑ, k k jiin siɑl. K u biɑ ŋɑnm boi’ɔ ɑ: «Fin e set tie *Klistu wun nbɑ tie ŋuɑ Yennu nbɑ k t dont’ɔ nɑ Bijɑ nɑ ɑɑ?»

⁶² K Yiesu jiin ɑ: «Nnn, min e nɑ. K i tɑn sɑɑ lɑ Nisɑɑlk Bijɑ k u kɑl Yɑbnt Yennu niidiitu po, k biɑ tɑn sɑɑ lɑ’u k u be sɑnpɑgbɑnɑ ni k siik.»

⁶³ Ŋɑnn e k Yennu jɑɑnti yudɑɑnɔ mɑnŋ wutuol duo k u suol u mɔnŋ tiɑt k pɑt, ŋɑɑn yet ɑ: «Bee te k t ji luon siɑlsuɑ.

⁶⁴ I mɔnŋ gbɑt wɑɑ piɑk k biil Yennu biɑnŋ nbɑ. I duki nlee?» K b kul sɑk ɑ u biil ɑ, u kpɑn ŋɑn nɑn kuun e.

⁶⁵ K b siɑb siin mɔsɑnt u pɑɑk, k b piit u nunm po, ŋɑɑn lubn’ɔ nikulɑ k yien’ɔ ɑ: «Buntl wun nbɑ peb’ɑ nɑ.» K sejebit nɑ suol’ɔ, k jɑk’ɔ nɑn tɑnpɑki.

Piɑl noi ɑ u k mi Yiesu

⁶⁶ Tɔn, Piɑl lek dɑɑ din be nɑn-yel po k nɑni muu, k Yennu jɑɑnti yudɑɑnɔ ŋɑɑsɑpɑɑntuontun-yenɔ tɑn bɑɑl lɑ’u,

⁶⁷ k got’ɔ silll, k tɑn yet’ɔ ɑ: «A mun tuu wɑɑ Nɑɑsɑɑlet nilɔ Yiesu mɑnŋ.»

⁶⁸ K Piɑl noi k yet ɑ: «N k mi. N k gbɑt fɑɑ piɑk lin nbɑ nɑ pɑɑk,» ŋɑɑn fiil nyii.

⁶⁹ K sɑpɑɑmɔ nɑ biɑ lɑ’u lenŋ k ŋɑnmt yien nisiɑb nbɑ sie lenŋ nɑ ɑ: «Juɑ nɑ mun tie u puolpoweitieb nɑ yenɔ e.»

⁷⁰ Ŋɑɑn k Piɑl biɑ ŋɑnm noi. K l biɑ yɑnn wɑɑnm-nnɑ k bin nbɑ sie lenŋ mɑnŋ ŋɑnm jɑk Piɑl ɑ: «A set tie niib nɑ ni yenɔ e, k mɑɑn ɑ mun tie Gɑɑliile nilɔ.»

⁷¹ Ŋɑnn e k Piɑl pol ɑ: «L i tie k n fɑɑl fɑɑk i e, Yennu n dɑt n tubl, min k mi juɑ nbɑ k i piɑk u po nɑ.»

⁷² L yuo mɑnŋ k kojouk bui k pukn tɑɑpɑɔnŋ munle ni, k Piɑl ji tiɑl biɑnŋ nbɑ k Yiesu yet’ɔ nɑ ɑ: «A sɑɑ yet ɑ ɑ k mi’n tɑɑl muntɑ e wɑɑ, ɑ k kojouk n tɑn bui tɑɑl munle ni.» L yuo k Piɑl mɔ.