Mɑɑlk 12 - Yiesu Lɑbɑmɑnn Muɑl Ni

Tuontunnɑ bɑljouk

¹ L yuo k Yiesu jɑk bɑljokt yinu ɑ: «Jɑsuɑ din wuu tilonti nbɑ k b yi *fiinyɑ nɑ u kpɑɑb ni, k cɑɑn gungounŋ lint’l, ŋɑɑn gbiil buotuk nbɑ k b tuu sii ŋmɑki tilonti mɑnŋ luɑnɑ nyun lenŋ, k biɑ mɑɑ siɑl k b sii do l pɑɑk k guu kpɑɑb nɑ, k jii kpɑɑb nɑ k tien kpɑɑlɑ nii ni ɑ bii goli, ŋɑɑn yɑɑt sɑɑn duo.

² K luɑnɑ nɑ punpuɑlyuo tɑn bɑɑl, k u tun tuontunnɔ ɑ wun sɑɑn gɑɑl tiluɑnɑ u kpɑɑlɑ nɑ buol ni, k u sɑɑn.

³ K kpɑɑlɑ nɑ suol’ɔ k buo’u fɑnu, ŋɑɑn bel’ɔ, k u kun yɑnn.

⁴ K kpɑdɑɑnɔ mɑnŋ biɑ tun tuontunluɑ, ŋɑɑn k kpɑɑlɑ nɑ biɑ fɑɑ u yul k suki’ɔ.

⁵ K kpɑdɑɑnɔ nɑ biɑ ŋɑnm tun tuontunluɑ b buol ni, ŋɑɑn k b kpii ŋuɑ. L puolpo k u biɑ ŋɑnm tun tuontunlieb bonciɑnn b buol ni, k b biɑ tun nnɑ, k buo siɑb, ŋɑɑn kpii lieb.

⁶ Kpɑdɑɑnɔ mɑnŋ tiɑɔnŋ bilonkɑk kuukuɑ din tɑn biɑl, k u tun’ɔ kpɑɑlɑ mɑnŋ buol ni, k yet ɑ: ‹B sɑɑ bɑɑk n tiɑɔnŋ bijɑ nɑ wɑɑ.›

⁷ Ŋɑɑn k kpɑɑlɑ mɑnŋ yet b lieb ɑ: ‹Wun nbɑ tɑn sii tie kpɑɑb nɑ dɑɑnɔ dɑsiɑl e nɑ. Ŋɑɑnt k tin kpi’u mɑn, ŋɑɑn k kpɑɑb nɑ n kpɑnt t yɑl.›

⁸ K b suol’ɔ k kpii’u k nyii nɑn’ɔ kpɑkpinŋ po k lu.»

⁹ K Yiesu boi’b ɑ: «I dukn k kpɑdɑɑnɔ nɑ sɑɑ tien nlee? U sɑɑ bɑɑl k tɑn kpi kpɑɑlɑ mɑnŋ e, ŋɑɑn jii kpɑɑb nɑ k tien kpɑɑlieb nii ni.

^10-11 I dɑɑ k mi lii lɑɑ diɑn Yennu lolkpel kɑdɑɑɔk ni biɑnŋ nbɑ ɑɑ? L diɑn ɑ: ‹Tɑnn nbɑ k tɑnmɑɑlɑ yet’ɔ nɑ, ŋɑnn e set tien ŋɑɑk nɑ pɑnŋ, k Yonmdɑɑnɔ Yennu tien nnɑ e, k t lɑ nɑn l tie bɑktnɔunŋ nɑ.› »

¹² Ŋɑnn e k *Suifnbɑ yudɑnm yɑbi b mɔnŋ ɑ bin suol’ɔ, k mɑɑn b mi nɑn wɑɑ yin bɑljouk mɑnŋ nɑ, l sɑɑn gɑɑn b pɑɑk e. Ŋɑɑn k b tiin nibul nɑ jɑŋmɑɑni. L pɑɑk k b nyik’ɔ ŋɑɑn yɑɑt.

Lɑnpo pɑnu lɑbɑɑl

¹³ Ŋɑnn e k jɑɑnti yudɑnm, *senniwɑntieb nɑn tinŋ mɑnŋ sɑɑkɑb tun Fɑɑliisiɑnnbɑ siɑb nɑn kpɑnbɑl *Heluod puolpo juɑmu nɑ ni siɑb Yiesu buol ni ɑ bin tɑn boi’ɔ buboit k lɑ u mɔbonkpetl.

¹⁴ K b tɑn bɑɑl k yet’ɔ ɑ: «Wɑntuɑ, t mi nɑn ɑ piɑk bɑlmɔni, k k mɔk jɑŋmɑɑni nɑn niib nbɑ sɑɑ dukn l po biɑnŋ nbɑ, k mɑɑn ɑ k mɔk ningɑnni niib buol ni. Ŋɑɑn ɑ wɑnt niib Yennu sɔnu nɑn bɑlmɔni. Ŋɑnn yet’t, t *senni cɑb’t nɑn tii pɑ lɑnpo kii tien Luonm tinŋ kpɑnbɑl Sesɑɑl, ɑmi t dɑɑ pɑ?»

¹⁵ K Yiesu bɑnn b sel nbɑ k b tie nɑ, k jiin’m ɑ: «Bee k i luon k yin piin’n bɑluk u? Bɑɑt mɑn nɑn liklib k n got.»

¹⁶ K b bɑɑl nɑn’n. Ŋɑnn e k u boi’b ɑ: «Ŋmee nɑɑɔnŋ nɑn sɑnn e be l pɑɑk nɑ?» K b yet’ɔ ɑ: «Luonm tinŋ kpɑnbɑl Sesɑɑl yɑl e.»

¹⁷ K Yiesu yet’b ɑ: «Tɔn, ii yenn i pɑ kii tien Luonm tinŋ kpɑnbɑl Sesɑɑl lin nbɑ tie u yɑl, ŋɑɑn kii mun i pɑ kii tien Yennu lin nbɑ tie Yennu yɑl.» K l yɑɑl ŋɑɑn lit’b bonciɑnn nɑn Yiesu.

Kpienm fiilu lɑbɑɑl

¹⁸ *Sɑɑdiuseɑnbɑ, bin nbɑ din tuu yɑɑ ɑ niib tɑn kɑn fiil kuun ni nɑ, din bɑɑl Yiesu buol ni, k tɑn yet’ɔ ɑ:

¹⁹ «Wɑntuɑ, Muois din diɑn senni k yet ɑ: ‹Juɑ i kpo ŋɑɑn nyik u ŋɑɑpuo, ŋɑɑn k b k mɑl wɑɑs, l ŋɑn k u ninjɑ n fɑɑl pɑkuɑk nɑ k mɑl wɑɑs k tul kpiemɔ nɑ.›

²⁰ Tɔn, jɑb bɑnlole din be k tie ninjɑnn, k sɑɑkuɑ po tɑn kuɑn puo, ŋɑɑn kpo k k mɑl wɑɑs.

²¹ Ŋɑnn e k wun nbɑ wɑɑ u pɑɑk nɑ fɑɑl puo mɑnŋ, ŋɑɑn mun tɑn kpo k wɑɑs kɑɑ, k wun nbɑ wɑɑ bɑntɑ nɑ ni mun fɑɑl puo mɑnŋ biɑk, ŋɑɑn mun tɑn kpo, k k mɑl wɑɑs nɑn’ɔ.

²² Nnɑ e k bin nbɑ wɑɑ nɑ kul ɑ kuɑn puo mɑnŋ, ŋɑɑn tɑn kpo, k b suɑ k mɑl bik nɑn’ɔ. L puolpo, k puo mɑnŋ mun tɑn kpo juont.

²³ Tɔn, k kpienm fiilu dɑɑl, b ŋmee tɑn sii yen puo mɑnŋ i? K mɑɑn b bɑnlole mɑnŋ kul ɑ din kuɑn’ɔ wɑɑ.»

²⁴ K Yiesu yet’b ɑ: «I kpɑnn i mɔnŋ e. I mi l pɑɑk ii? I k mi Yennu lolkpel kɑdɑɑɔk, k biɑ k mi u yiikuo.

²⁵ Kpienm i tɑnŋ i fiil kuun ni, b tɑn sii tie nɑn *mɑlɑkɑɑnbɑ nbɑ be *Yendɔunŋ ni nɑ e. Puokuɑnt nɑn jɑkunt tɑn sii kɑɑ.

²⁶ Nnɑlɑ, k jii jiin kpienm fiilu po, i k mi lii *Yennu sɔkni Muois diɑni ni siɑn nbɑ yien kunkonjɑgotuk tiik nɑ po nɑ ɑɑ? L diɑn k yet ɑ Yennu din yet Muois ɑ: ‹Min e tie Ablɑɑhɑɑnm Yennu, nɑn Isɑɑk Yennu, nɑn Sɑɑkɔb Yennu.›

²⁷ Yennu k tie kpienm Yennu kɑɑ, ŋɑɑn u tie fuotb Yennu e. I k mi e.»

Senni nbɑ gɑl liel lɑbɑɑl

²⁸ Tɔn, senniwɑntɔsuɑ din be lenŋ k gbɑt Yiesu nɑn Sɑɑdiuseɑnbɑ nɑ lɑbɑfɑɑnu mɑnŋ, k lɑ Yiesu nbɑ jiin b buboit mɑnŋ fɑnu biɑnŋ nbɑ. L pɑɑk k u bɑɑl Yiesu buol ni, k mun tɑn boi’ɔ ɑ: «K senlɑnu po e kpɑn tie senjɑɑnn i?»

²⁹ K Yiesu jiin’ɔ ɑ: «Lin nbɑ tie senjɑɑnn tie nnɑ e: ‹Islɑɑeltieb, gbiintl mɑn, Yonmdɑɑnɔ Yennu tie Yen-yenɔ kuɑ e.

³⁰ ‹Ii luon mɑn Yonmdɑɑnɔ Yennu nɑn i pɑlɑ kul, nɑn i sei kul, nɑn i dudukt kul, nɑn i pɑnŋ kul ɑ.›

³¹ Senjɑɑnn nbɑ pukn ŋɑnle tie nnɑ e: ‹Ii luon *ɑ luɑ nɑn fɑɑ luon ɑ mɔnŋ biɑnŋ nbɑ nɑ.› Sensɑu ji kɑɑ k gɑl senni ŋɑnle nbɑ nɑ.»

³² K senniwɑntuɑ mɑnŋ yet Yiesu ɑ: «Wɑntuɑ, ɑ yɑbl ɑ. A yet bɑlmɔni e, Yonmdɑɑnɔ Yennu tie Yen-yenɔ kuɑ e, k yensɑu ji kɑɑ k pukn u po,

³³ ɑ nisɑɑlk i luon Yennu e nɑn u pɑl kul ɑ, nɑn u dudukt kul ɑ, nɑn u pɑnŋ kul ɑ, kii biɑ kii luon u luɑ nɑn wɑɑ luon u mɔnŋ biɑnŋ nbɑ nɑ. L kpɑɑ tɑlɑs bonciɑnn nɑn nilɔ n sɑk senni nbɑ ŋɑnle nɑ k gɑl wun jii bonkobt k mɑnn mɑnnsɑu k tul Yennu.»

³⁴ Yiesu nbɑ lɑ k u jiin nɑn yɑn nɑ, k u yet’ɔ ɑ: «A k fɔk nɑn Yennu nɑɑn.» Lin nbɑ nɑ puolpo k suɑ ji din k mɔk pɑl nɑn wun boi Yiesu buboisiɑt

*Klistu nbɑ tie wun nbɑ

³⁵ Yiesu nbɑ din tumi niib Yennu jɑɑnti ŋɑsɑɑkɑk ni, k u tɑn boi’b buboit ɑ: «Bee k senniwɑntieb yɑɑ ɑ *Klistu tie * Dɑɑfiid yɑɑbuonn i?

³⁶ K mɑɑn Foŋɑnm din ŋmɑktl Dɑɑfiid k u tiɑɔnŋ yet ɑ: ‹Yonmdɑɑnɔ Yennu din yet n Yonmdɑɑnɔ ɑ Kɑln n niidiitu po mɔkmɔk nɑn mɑɑ tɑn sɑɑ te fɑn ŋmɑɑ ɑ dɑtɑi ɑ tɑɑpɑɔnŋ ni.›

³⁷ Dɑɑfiid mɔnŋ mɔnŋ nbɑ din yiin Klistu nɑ ɑ: ‹Yonmdɑɑnɔ,› k nlee k b yien ɑ Klistu nɑ tie ŋuɑ Dɑɑfiid yɑɑbuonn i?» Nibul bonciɑnn din gbiint Yiesu wɑnnu mɑnŋ nɑn pɑlpienn.

Senniwɑntieb binbenŋ po.

³⁸ Wɑɑ wɑnn’b nɑ k u yet’b ɑ: «Ii mi senniwɑntieb nɑ po mɑn. Ŋɑnm e luon bii liɑ bɑɑnt kii lin kii sonm, kii biɑ kii gɑɑn bulcinfuonti dɑi ni nɑ.

³⁹ B i kuɑ Suifnbɑ jɑɑnti diet ni, b luon bii kɑɑl nijɑɑnɑ kɑɑni pɑɑk, k b i sɑɑn jɑɑnm ni, b biɑ luon yudɑnm kinkɑɑni boɑ e.

⁴⁰ Ŋɑnm e biɑ di pɑkɔi fobt, ŋɑɑn ji tuu jen ɑ k mei Yennu k wei, ɑ bin wɑnn b mɔnŋ nɑn b tie niŋɑnm e. B buolu tubdɑtu tɑn sii bi bonciɑnn.»

Pɑkuɑk piini lɑbɑɑl

⁴¹ Tɔn, k Yiesu kɑl Yennu jɑɑnti ŋɑsɑɑkɑk nɑ ni k kpiɑ nɑn Yennu piini lɑkl, ŋɑɑn goli niib nbɑ kpie b likli biɑnŋ nbɑ nɑ. K mɔktɑ bonciɑnn kpie likyulɑ bonciɑnn,

⁴² ŋɑɑn k pɑkɔtɑlɑs-dɑɑnsuɑ mun tɑn bɑɑl kpien jinjennbɑ ŋɑnle. Ŋɑnn e tie kuuk nɑ.

⁴³ K Yiesu yiin u *puolpoweitieb k yet’b ɑ: «Bɑlmɔni e k n yien’i nɑ, pɑkɔtɑlɑs-dɑɑnɔ nɑ kpien piini nbɑ yɑb piini lɑkl nɑ ni k gɑl suɑ kul,

⁴⁴ k mɑɑn b kul pɑɑt b piini b mɔknciɑɔnŋ ni e, ŋɑɑn pɑkɔtɑlɑs-dɑɑnɔ nɑ ŋɑnin tul lin nbɑ kul k u mɔk e.»