Mɑɑlk 10 - Yiesu Lɑbɑmɑnn Muɑl Ni

Puoyetu lɑbɑɑl

¹ K Yiesu nyii lenŋ k sɑɑn Suude tinŋ ni nɑn *Suulden kpenpuotl po, k nigbounŋ bonciɑnn ji lɑkn u buol ni, k u yɑɑn wɑnt’b Yennu mɑɑn nɑn wɑɑ ponŋ tuu wɑnt’b biɑnŋ nbɑ nɑ.

² K Fɑɑliisiɑnnbɑ bɑɑl u buol ni, k luon bin bikn’ɔ, k boi’ɔ ɑ: «Senni nɑ cɑb nɑn juɑ n yet u ŋɑɑpuo ɑmi ii?»

³ Ŋɑnn e k u mun jiin k boi’b ɑ: «Muois din tul’i *senni nlee k jiin l po?»

⁴ K b jiin ɑ: «Muois din cɑb yiikuo ɑ juɑ sɑɑ fit diɑn puoyetu kɑdɑɑɔk ŋɑɑn yet u ŋɑɑpuo.»

⁵ K Yiesu yet’b ɑ: «I tubkɑngbɑtɑ pɑɑk e din te k Muois diɑn senni mɑnŋ k tul’i.

⁶ Ŋɑɑn Yennu nbɑ din nɑn *dulnyɑ pinpiik ni: ‹U din nɑn juɑ nɑn puo e.›

⁷ Lin nbɑ nɑ pɑɑk k juɑ tuu sɑɑ nyi u bɑɑ nɑn u nɑɑ buol ni, ŋɑɑn k ŋuɑ nɑn puo n tɑɑn lieb,

⁸ k b bɑnle sɑɑ tɑɑn kii tie niyenɔ kuɑ. Ŋɑnn e sɑɑ te k b ji k tie niib bɑnle, ŋɑɑn b ji tie gbɑnɑn-yent kuɑ e.

⁹ L pɑɑk, lin nbɑ k Yennu jii k tɑɑn nɑn liel, nisɑɑlk i mi k wun bɔkt’l.»

¹⁰ Yiesu nɑn u *puolpoweitieb nbɑ din tɑn jen ŋɑɑk ni yuo nbɑ, k u puolpoweitieb boi’ɔ mɑɑn mɑnŋ pɑɑk nbɑ tie biɑnŋ nbɑ.

¹¹ K u jiin yet’b ɑ: «Juɑ nbɑ yet u ŋɑɑpuo ŋɑɑn kuɑn puogɑnɔ, u tun * boncuncontuonn k jiin puo nbɑ k u bel’ɔ nɑ po e nɑ.

¹² Nnɑ e mun biɑk, puosuɑ i yet u sɔlɔ ŋɑɑn sɑɑn kun jɑgɑnɔ, u mun tun boncuncontuonn ɑ.»

Yiesu yɑt yetŋɑnm wɑɑs pɑɑk

¹³ Tɔn, k nisiɑb din tɑn bɑɑt nɑn b wɑɑs Yiesu buol ni ɑ wun tɑn yii u nii b pɑɑk, ŋɑɑn k u puolpoweitieb tiɑn b pɑɑk.

¹⁴ Ŋɑɑn wɑɑ bɑnn bɑɑ tiɑn b pɑɑk biɑnŋ nbɑ nɑ k u wutuol duo, k u yet’b ɑ: «Ŋɑɑnt mɑn k wɑɑs mɑnŋ i bɑɑt n buol ni nɑ, k dɑɑ tiɑn’m, k mɑɑn b buolu e yen Yennu nɑɑn.

¹⁵ Bɑlmɔni e k n yien’i nɑ, wun nbɑ k gɑɑl Yennu nɑɑn nɑn bik nɑ, u kɑn mi kuɑ l ni fɑb ɑ.»

¹⁶ K u gɑɑl wɑɑs mɑnŋ u nii ni, k yii u nii b pɑɑk, ŋɑɑn yɑt yetŋɑnm b pɑɑk

Jɑkpɑɑtl lɑbɑɑl

¹⁷ Yiesu nbɑ din nyii lenŋ k sɑɑ mɑnŋ, k jɑsuɑ tin k cet’ɔ k tɑn gbɑɑn u tuɑnn, ŋɑɑn boi’ɔ ɑ: «Wɑntɔŋɑnɔ, n sɑɑ tien nlee k tɑn lɑ mɑnfuol nbɑ kɑɑ gbennu?»

¹⁸ K Yiesu jiin boi’ɔ ɑ: «Bee k ɑ yi’n niŋɑnɔ? Niŋɑnsuɑ kɑɑ sie Yennu kuukuɑ.

¹⁹ A ponŋ mi Yennu senni nbɑ wɑnt biɑnŋ nbɑ, ɑ: ‹Dɑɑ kpi nilɔ. Dɑɑ tuun boncuncontuonɑ. Dɑɑ jɑɑn. Dɑɑ fɑ fɑɑk suɑ pɑɑk. Dɑɑ ŋmɑb nilɔ. Ii bɑɑkt ɑ bɑɑ nɑn ɑ nɑɑ.› »

²⁰ K juɑ nɑ yet’ɔ ɑ: «Wɑntuɑ, n ponŋ sɑk lin nbɑ nɑ kul n bisn ni e wɑɑ.»

²¹ K Yiesu got’ɔ silll nɑn lonm, ŋɑɑn yet’ɔ ɑ: «Ŋɑɑn bon-yenn kuɑ e pɔt’ɑ. Ii kun k sɑɑ kɔi lin nbɑ k ɑ mɔk nɑ kul, k jii l likli mɑnŋ k tul tɑlɑs-dɑnm, k ɑ tɑn sɑɑ lɑ mɔktuk sɑnpɑɑpo. L puolpo k ɑ jen ɑ kii wɑɑ’n.»

²² Juɑ nɑ nbɑ din gbɑt lin nbɑ nɑ k u pɑl ni biil bonciɑnn, k u ŋmɑt kun nɑn pɑlbiil, k mɑɑn u din mɔk mɔktuk bonciɑnn.

²³ K Yiesu ŋmɑnt got u puolpoweitieb nɑ k lint, ŋɑɑn yet’b ɑ: «L sii pɑɑl bonciɑnn nɑn mɔktɑ n kuɑ Yennu nɑɑn ni.»

²⁴ K u mɑɑn mɑnŋ yɑɑl ŋɑɑn lit’b, k u biɑ ŋɑnm yet’b ɑ: «N wɑɑs, l lek pɑɑl nɑn nilɔ n kuɑ Yennu nɑɑn ni.

²⁵ L pɑɑl nɑn mɔktɔ n kuɑ Yennu nɑɑn ni k cie lɑɑ pɑɑl nɑn yuyouk n kuɑ kpɑlpienu miɑl ni nɑ.»

²⁶ K mɑɑn mɑnŋ yɑɑl ŋɑɑn lit’b bonciɑnn, k b boi b lieb ɑ: «L i tie nnɑ i e, ŋmee ji sɑɑ fit k lɑ fielu?»

²⁷ K u kpɑɑ u nuni b pɑɑk, ŋɑɑn tɑn yet’b ɑ: «Lin nbɑ nɑ pɑɑl k tul nisɑɑlk e, ŋɑɑn l k pɑɑl Yennu yɑɑ buol ni, k mɑɑn Yennu sɑɑ fit tun bonsiɑl kul ɑ.»

²⁸ Ŋɑnn e k Piɑl tɔl yet’ɔ ɑ: «Gotl, tinm ŋɑnin nyik t bonsiɑl kul e ŋɑɑn wɑɑ’ɑ.»

²⁹ K Yiesu yet’b ɑ: «Bɑlmɔni e k n yien’i nɑ, wun nbɑ kul nyik u ŋɑɑk, ɑmi u ninjɑnm, ɑmi u niipuob, ɑmi u nɑɑ, ɑmi u bɑɑ, ɑmi u wɑɑs, ɑmi u kpɑɑnt, n sɑnn pɑɑk nɑn lɑbɑmɑnn nɑ pɑɑk

³⁰ u tɑn sɑɑ biɑ lɑ bonɑ k lin gɑl wɑɑ nyik lin nbɑ nɑ. U tɑn sɑɑ lɑ ŋei, nɑn ninjɑnm, nɑn niipuob, nɑn nɑɑnbɑ, nɑn wɑɑs, nɑn kpɑɑnt, kobi kobi e tingbounŋ nɑ ni, l i lek i tie k b muks’ɔ, k yuo nbɑ bɑɑt nɑ k u biɑ tɑn sɑɑ lɑ mɑnfuol nbɑ kɑɑ gbennu.

³¹ Niib bonciɑnn nbɑ dɔnŋ tuɑnn mɔtɑɑnɑ nɑ, b tɑn sɑɑ jil puol ɑ, ŋɑɑn bonciɑnn nbɑ mun biɑ juont puol mɔtɑɑnɑ nɑ tɑn sɑɑ dɔnŋ gɑl tuɑnn nɑ.»

Yiesu ŋɑnm pɑk u kuun po tɑɑl muntɑ ni

³² L yuo nɑ k Yiesu nɑn u puolpoweitieb din nyii sɔnu ni k do Selusɑɑlenm, k u gɑl b tuɑnn po, k b yɑn put k jɑŋmɑɑni biɑ suol nibul nbɑ wɑɑ nɑ kul ɑ. Ŋɑnn e k u yɑɑn nyii nɑn u tuomiinbɑ *piik nɑn bɑnle nɑ kpinŋ po, k yet’b lin nbɑ sɑɑ tien’ɔ,

³³ ɑ: «Nnɑlɑ, t do Selusɑɑlenm e, siɑn nbɑ k b sɑɑ jii *Nisɑɑlk Bijɑ k kuɑn Yennu jɑɑnti yudɑnm nɑn *senniwɑntieb nii ni ɑ bin bu u buut ŋɑɑn kpi’u, k jii’u tul bin nbɑ k tie *Suifnbɑ nɑ,

³⁴ k b sɑɑ sɑlk’ɔ, k siin mɔsɑnt u pɑɑk, k buo’u gbɑnn, k biɑ tɑn kpi’u, ŋɑɑn l dɑɑ ŋɑntɑ dɑɑl k u sɑɑ fiil kuun ni.»

Sɑɑk nɑn Sɑn miɑl Yiesu *yudɑnt

³⁵ L yuo k Sɑɑk nɑn Sɑn, bin nbɑ din tie Sebede wɑɑs nɑ, bɑɑl Yiesu buol ni k tɑn yet’ɔ ɑ: «Wɑntuɑ, t luon k ɑ tun lin nbɑ k t sɑɑ boi’ɑ nɑ po k tul’t.»

³⁶ K u boi’b ɑ: «I luon k n tun bee k tul’i ni?»

³⁷ K b jiin ɑ: «Yuo nbɑ k ɑ tɑn sɑɑ lɑ ɑ nɑɑn yudɑnt nɑ, ɑ tɑn ŋɑɑn k t yenɔ n kɑl ɑ niidiitu po, k luɑ mun n kɑl ɑ niigɑnŋ po.»

³⁸ K u jiin yet’b ɑ: «I k mi yɑɑ mei lin nbɑ po. I tɑn sɑɑ fit nyu n wɑhɑlɑ *kɔp nɑ ni wɑɑ ɑɑ? Kuo i sɑɑ fit gɑɑl n fɑlɑ Yennu nyunwulu nɑ wɑɑ ɑɑ?»

³⁹ K b jiin ɑ: «T sɑɑ fit ɑ.» K u yet’b ɑ: «I set tɑn sɑɑ nyu kɔp nbɑ k n tɑn sɑɑ nyu lenŋ nɑ wɑɑ, k biɑ tɑn sɑɑ gɑɑl Yennu nyunwulu nbɑ k n tɑn sɑɑ gɑɑl nɑ wɑɑ.

⁴⁰ Ŋɑɑn n k mɔk yiikuo nbɑ sɑɑ gɑnn wun nbɑ tɑn sɑɑ kɑl n niidiitu po nɑn n niigɑnŋ po. Yennu e gɑnn bin nbɑ tɑn sɑɑ kɑl l kinkɑɑni pɑɑk »

⁴¹ K Yiesu puolpoweitelieb piik nɑ nbɑ gbɑt nnɑ yuo nbɑ, k b wutuol duo Sɑɑk nɑn Sɑn pɑɑk.

⁴² K Yiesu yiin b kul ɑ k lɑk’m u buol, ŋɑɑn yet’b ɑ: «I mɔnŋ mi nɑn bin nbɑ k b goli’b k b tie tingbounŋ nɑ ni yudɑnm nɑ diɑ’b nɑn ninmɔnn e, k nijɑɑnɑ mun gɑɑnt nɑn b yiikuo.

⁴³ Ŋɑɑn yinm ŋɑnin, l dɑɑ tie nnɑ kɑɑ i sinsuuk ni. I suɑ i luon wun tien nijɑɑnn, sie k wun tien u mɔnŋ suɑ kul ɑ tuontunnɔ,

⁴⁴ k wun nbɑ mun luon wun tien yudɑɑnɔ, sie k wun tien suɑ kul ɑ dɑɑbl,

⁴⁵ k mɑɑn Nisɑɑlk Bijɑ, k bɑɑl ɑ niib n tun tul’ɔ kɑɑ, ŋɑɑn u bɑɑl ɑ wun tun k tul niib e, k biɑ kpo ɑ wun fiel niib bonciɑnn.»

Yiesu nyuɑnt juɑnŋ

⁴⁶ Tɔn, k Yiesu nɑn u puolpoweitieb din bɑɑl Seliiko k tɑn nyii, k ŋɑnm nɑn nibulciɑɔnŋ tɔk sɑɑ, k juɑnsuɑ din be k tie miɑtɔ, k kɑl sɔnjokpinŋ, k u sɑnn yi Bɑɑltiime, wun nbɑ tie Tiime bijɑ nɑ.

⁴⁷ Wɑɑ tɑn gbɑt ɑ Yiesu wun nbɑ tie Nɑɑsɑɑlet nilɔ nɑ be yuo nbɑ, k u yikn sɑnpɑɑpo wɑɑ ɑ: «Yiesu, * Dɑɑfiid yɑɑbuonn, tin’n ninbɑɑɔk.»

⁴⁸ K niib bonciɑnn tiɑn u pɑɑk ɑ wun ŋmin, ŋɑɑn k u biɑ ŋɑnm yikn sɑnpɑɑpo wɑɑ ɑ: «Dɑɑfiid yɑɑbuonn, tin’n ninbɑɑɔk.»

⁴⁹ K Yiesu set k yet ɑ: «Yiint’ɔ nɑ mɑn » K b yiin’ɔ, k yet’ɔ ɑ: «Cien ɑ pɑl. U yi’ɑ. Fiit k set.»

⁵⁰ Ŋɑnn e k juɑnŋ mɑnŋ lu u liɑtfuouk, ŋɑɑn fiil k set, k bɑɑl Yiesu buol ni. K Yiesu boi’ɔ ɑ: «A luon k n tun bee k tul’ɑ ni?»

⁵¹ K juɑnŋ mɑnŋ jiin ɑ: «Cɑnbɑɑ, n luon k ɑ munt’n e.»

⁵² K Yiesu yet’ɔ ɑ: «Tɔn, ii sɑɑ. A yɑdɑ te k ɑ lɑ lɑɑfiɑ.» L tɑɑkpɑɑk ni k u ninbinɑ nyuɑnt, k u ji lɑɑt k wɑɑ Yiesu, k b sɑɑ.