Mɑɑlk 1 - Yiesu Lɑbɑmɑnn Muɑl Ni

Sɑn Nyunwultuɑ muɑnti

¹ Yiesu *Klistu Yennu Bijɑ lɑbɑmɑnn piinu e nɑ.

² Yennu Sɔkni Esɑɑyi kɑdɑɑɔk ni l diɑn ɑ Yennu yet ɑ: «N tuomu e nɑ, k n yɑɑ n tun’ɔ ɑ wun dɔnŋ k gɑl ɑ tuɑnn, k ŋɑnm ɑ sɔnu k tul’ɑ.

³ Suɑ be muuk ni k huot k yɑɑ ɑ: ‹Ŋɑnmt mɑn Yonmdɑɑnɔ sɔnu k tul’ɔ k te k sɔni i tuok.› »

⁴ Sɑn din be muuk ni, k muɑntl k tien niib ɑ bin mɔ kuɑŋɑɑn k lebt binbenŋ k wun wul’b Yennu nyunwulu k Yennu n nyik cɑb b biit.

⁵ Suude tinŋ ni nɑn Selusɑɑlenm duo ni niib kul din bɑɑl Sɑn buol ni, k fiit b biit, k Sɑn wul’b Yennu nyunwulu, *Suulden kpenu ni.

⁶ Sɑn din liɑ yuyouk kobt liɑtfuouk o, k biɑ buob gbɑnn u siɑk ni, k u jiet din tie nɑɑsuut nɑn siɑt.

⁷ k u muɑntl k tien niib ɑ: «Nilɔ nbɑ yɑɑ wun tɑn wei n puol k bɑɑl nɑ cie’n, k n ponŋ k ŋɑn nɑn k n buɑn u tuɑnn ni k lot u tɑɑsɑɑŋmi.

⁸ Min wuul’i nɑn nyun e, ŋɑɑn ŋuɑ ŋɑnin tɑn sɑɑ wul’i nɑn Foŋɑnm.»

Sɑn wuul Yiesu Yennu nyunwulu

⁹ L yuo nɑ k Yiesu din nyii Nɑɑsɑɑlet duo nbɑ be Gɑɑliile tinŋ ni nɑ, k bɑɑl Sɑn buol, k Sɑn wul’ɔ Yennu nyunwulu *Suulden kpenu mɑnŋ ni.

¹⁰ Yiesu nbɑ din nyii nyun mɑnŋ ni k duo yuo nbɑ, l tɑɑkpɑɑk ni k u lɑ k sɑnpɑɑk luot, k Foŋɑnm sik tuɑn u pɑɑk k nɑɑn nɑn ŋmɑnn nɑ

¹¹ k u gbɑt kunkɔl sɑnpɑɑpo nɑ, k kunkɔl nɑ yet ɑ: «Fin e tie n Bilonkɑk. Fin e k n nunm gbuo.»

Sɑɑtɑn jɑnm Yiesu

¹² L tɑɑkpɑɑk ni k Foŋɑnm din te k Yiesu kuɑ muuk ni,

¹³ u din be muuk mɑnŋ ni k sɑɑ jɑnŋ dɑɑ piinnɑ, k *Sɑɑtɑn sɑɑ jɑnm’ɔ. Yiesu nɑn muuk ni bonkobt e din be, k Yennu *mɑlɑkɑɑnbɑ cɑntl’ɔ.

Yiesu yi jɑnsuoltieb bɑnnɑ

¹⁴ Tɔn, k b din tɑn suol Sɑn k kuɑn’ɔ dɑnsɑlk, k l puolpo k Yiesu sɑɑn Gɑɑliile tinŋ ni, k muɑntl Yennu lɑbɑmɑnn,

¹⁵ k yien ɑ: «Yuo bɑɑl ɑ, k Yennu nɑɑn pel nɑ. L pɑɑk i mɔ kuɑŋɑɑn k lebt binbenŋ mɑn k tien lɑbɑmɑnn mɑnŋ yɑdɑ.»

¹⁶ Yiesu nbɑ din sonm Gɑɑliile mɔkgbenŋl kpinŋ nɑ, k tɑn lɑ Siimɔn nɑn u ninjɑ Andle, k b lubn jɑnlɑɑɔnŋ mɔkgbenŋl nɑ ni, k mɑɑn b din tie jɑnsuolɑ e

¹⁷ K u yet’b ɑ: «Ii wɑɑ’n mɑn, k n sɑɑ te k yii so niib nɑn yɑɑ so jɑni nɑ.»

¹⁸ L tɑɑkpɑɑk ni k b nyik b jɑnlɑɑɔnŋ nɑ, ŋɑɑn k wɑɑ’u.

¹⁹ K u biɑ ji din sɑɑn tuɑnn po wɑɑnm-nnɑ k lɑ Sɑɑk nɑn u ninjɑ Sɑn, bin nbɑ din tie Sebede wɑɑs nɑ, k b din be b bulgbetl ni k ŋɑnmt b jɑnlɑɑnt.

²⁰ Yiesu nbɑ lɑ’b yuo nbɑ k u yiin’m, k b nyik b bɑɑ Sebede nɑn u tuontunnɑ bulgbetl mɑnŋ ni, ŋɑɑn wɑɑ’u.

Juɑ nbɑ k nɑlnbiiuk be u ni nɑ lɑbɑɑl

²¹ K Yiesu nɑn ŋɑnm din sɑɑn kuɑ digbɑnsiɑl ni k l sɑnn yi Kɑpelnɑunm, k *Fuondɑɑl tɑn bɑɑl, k b kuɑ *Suifnbɑ jɑɑnti dieok ni, k u piin k tumi niib.

²² K u tumiu mɑnŋ bɑkt’b bonciɑnn, k mɑɑn u din k tie nɑn *senniwɑntieb nɑ kɑɑ ŋɑɑn u din tumi’b nɑn minu e.

²³ K l yuo nɑ k juɑ nbɑ k nɑlnbiiuk be u ni nɑ be Suifnbɑ jɑɑnti dieok nɑ ni k yikn sɑnpɑɑpo k yien ɑ:

²⁴ «Fin Yiesu, Nɑɑsɑɑlet nilɔ nɑ, tinm nɑn fin nlee mɑntk i? A bɑɑl ɑ ɑ tɑn biil’t ee? N mi fɑɑ tie wun nbɑ. A tie Yennu Niŋɑnɔ nɑ e.»

²⁵ K Yiesu tiɑn u pɑɑk, k yet ɑ: «Ŋminin fuut, ŋɑɑn nyi u ni.»

²⁶ K nɑlnbiiuk nɑ fuun juɑ nɑ k tɑn lu’u k wɑɑ nyi u ni yuo nbɑ k u yikn sɑnpɑɑpo wɑɑ.

²⁷ K l din tien b kul yɑɑl-lituk, k b boi b lieb ɑ: «Bee nɑ? U wɑnn wɑnnsɑɑnn nɑn yiikuo e, k biɑ tien nɑlnbiit mɔb, k b sɑɑk.»

²⁸ L yuo ni k u sɑnn din muɑnt yiɑn ɑ k lin Gɑɑliile tinŋ ni kul ɑ.

Yiesu te k bɑɑtb bonciɑnn pɑɑk

²⁹ Yiesu nbɑ din nyii Suifnbɑ jɑɑnti dieok mɑnŋ ni nɑ, k ŋuɑ nɑn Sɑɑk nɑn Sɑn din sɑɑn kuɑ Siimɔn nɑn Andle ŋɑɑk ni.

³⁰ K Siimɔn diɑnpuok din duɑ k yiɑl k u gbɑnɑnt ton, k b yet Yiesu u yiɑlu mɑnŋ po.

³¹ K Yiesu din sɑɑn suol u nuu k fiin’ɔ, k u yiɑlu mɑnŋ gbenn, k u fiil k cɑnt’b.

³² L dɑɑl mɑnŋ dɑɑjonyiɑɔk, k niib din jii bɑɑtb nɑn bin nbɑ k nɑlnbiit be b ni nɑ, k bɑɑt nɑn’m Yiesu buol ni.

³³ K duo mɑnŋ ni niib kul ɑ din lɑkn k tɑn yiɑ dieok nɑ tɑnmɔb.

³⁴ K u te k nisiɑb bonciɑnn bin nbɑ yiɑl yiɑlbuolu kul ɑ nɑ pɑɑk, k biɑ nyint nɑlnbiit niib bonciɑnn ni, k k sɑk nɑlnbiit mɑnŋ n yet siɑl, k mɑɑn b din mi wɑɑ tie wun nbɑ.

Yiesu muɑntl lɑbɑmɑnn Gɑɑliile digbɑnɑ ni

³⁵ K Yiesu din dɔnŋ nyii k kojouk dɑɑ k mɔ, k kuɑ muuk ni k sɑɑ mei Yennu.

³⁶ K Siimɔn nɑn u lieb nɑ ji din lin k luon u buol,

³⁷ k bɑɑ sɑɑ lɑ’u yuo nbɑ k b yet’ɔ ɑ: «Suɑ kul luon fin e.»

³⁸ K Yiesu yet’b ɑ: «Ŋɑɑnt mɑn k tin sɑɑn digbɑnɑ nbɑ kpiɑt nɑ ni nɑ, k n sɑɑ muɑnt lɑbɑmɑnn nɑ lenŋ mun, k mɑɑn l pɑɑk e te k n bɑɑl.»

³⁹ K nnɑ e k u din lin Gɑɑliile tingbounŋ ni kul po, k muɑntl lɑbɑmɑnn mɑnŋ Suifnbɑ jɑɑnti diet ni, k biɑ nyint nɑlnbiit niib ni.

Yiesu te k gbɑɑtl pɑɑk

⁴⁰ Tɔn, k gbɑɑtsuɑ din bɑɑl Yiesu buol ni, k tɑn gbɑɑn u tuɑnn ni, k bɑln’mɔ ɑ: «L i tie k ɑ luon, ɑ sɑɑ fit te k n ŋɑɑɔk nɑ n gbenn.»

⁴¹ K ninbɑɑɔk din suol Yiesu k u tɑnt u nuu k sii’u, ŋɑɑn yet’ɔ ɑ: «N sɑk ɑ. A ŋɑɑɔk mɑnŋ n gbenn.»

⁴² L tɑɑkpɑɑk ni k juɑ mɑnŋ ŋɑɑɔk nɑ gbenn, k u gbɑnɑnt ji jen l bɑnnu ni.

⁴³ K Yiesu din yɑki nɑn’ɔ fɑnu wɑɑ, ŋɑɑn ji bel’ɔ k u sɑɑn ŋɑɑn yet’ɔ ɑ:

⁴⁴ «Ii mi k ɑ yet suɑ l mɑɑn. Ii sɑɑ k jii ɑ mɔnŋ k wɑnn Yennu mɑnntuɑ nɑ, k mɑnn mɑnnu nbɑ k *Yennu sɔkni Muois din senn k jiin gbɑɑtɑ pɑɑku po nɑ, k suɑ kul n bɑnn nɑn ɑ ŋɑɑɔk mɑnŋ set gbenn ɑ.»

⁴⁵ Ŋɑɑn k juɑ nɑ sɑɑn k muɑnt u pɑɑku mɑnŋ lɑbɑɑl lokl kul ɑ po. Ŋɑnn e din te k Yiesu k fit nyi pɑɑnu ni k kuɑ digbɑnsiɑl ni. U din tuu be digbɑnkpini e, ŋɑɑn k niib bonciɑnn din nyi lokl kul po k bɑɑt u buol ni.