Luonmtieb 10 - Yiesu Lɑbɑmɑnn Muɑl Ni

¹ N nɑɑ wɑɑs, n luon nɑn n pɑl kul k mei Yennu ɑ wun fiel n mɔnŋ buolu, *Suifnbɑ.

² N mi k tien *siɑlɑ nɑn b wɑɑ Yennu nɑn ninmɔnn, ŋɑɑn b ninmɔnn mɑnŋ k yent.

³ B k mi sɔnu nbɑ te k Yennu yet ɑ niib tie niŋɑnm u buol, ŋɑɑn luon b mɔnŋ sɔnu, k l pɑɑk, b k jii b mɔnŋ k lol nɑn Yennu sɔnu nɑ.

⁴ K mɑɑn, Yiesu tun k gbien Muois *senni nɑ wɑɑ. K mɔtɑɑnɑ, Yennu yi bin nbɑ tien *Klistu yɑdɑ nɑ niŋɑnm u buol ni.

Fielu tie bin nbɑ kul tien Yonmdɑɑnɔ yɑdɑ yɑl e

⁵ Muois din diɑn k jiin bɑnnu nbɑ k nilɔ sii tie niŋɑnɔ senni weiu ni ɑ: «Wun nbɑ tuun lin nbɑ k senni nɑ senn nɑ, u sɑɑ lɑ mɑnfuol l pɑɑk ɑ.»

⁶ Ŋɑɑn nɑ e tie bɑɑ yet lin nbɑ k jikt sɑɑ bɑnnu nbɑ k Yennu yet ɑ niib tie niŋɑnm u tuɑnn b yɑdɑ nɑ pɑɑk nɑ ɑ: «A dɑɑ duki ɑ pɑl ni ɑ: ‹Ŋmee tɑn sɑɑ do *Yendɔunŋ ni?› » (L pɑɑk tie ɑ: «Ŋmee sɑɑ do Yendɔunŋ ni k te k Klistu n sik i?»)

⁷ «A biɑ dɑɑ boi ɑ: ‹Ŋmee tɑn sɑɑ sik tinpuɑl ni?› » (L pɑɑk tie ɑ: «Ŋmee sɑɑ sik k te k Klistu n fiil kuun ni?»)

⁸ Yennu yet ɑ bee? L yet ɑ: «Mɑɑn nɑ kpiɑ’ɑ. L be ɑ mɔb ni nɑn ɑ pɑl ni.» Lɑbɑmɑnn mɑnŋ tie yɑdɑ lɑbɑɑl nbɑ k t muɑntl nɑ.

⁹ L i tie k ɑ set pɑk k sɑt nyinn ɑ mɔb ni k yet ɑ: «Yiesu tie Yonmdɑɑnɔ,» k biɑ tien yɑdɑ ɑ pɑl ni nɑn Yennu set fiin’ɔ kuun ni, ɑ sɑɑ lɑ fielu wɑɑ.

¹⁰ K mɑɑn nilɔ set tien Yiesu yɑdɑ e u pɑl ni, k Yennu yet ɑ u tie niŋɑnɔ u tuɑnn, k l set nyii u mɔb ni e k u yet nnɑ, k l pɑɑk e k u lɑ fielu.

¹¹ L diɑn Yennu lolkpel kɑdɑɑɔk ni ɑ: «Dɑɑnɔ nbɑ tien’ɔ yɑdɑ, u kɑn mi di fei.»

¹² Bɔktu kɑɑ Suifnbɑ nɑn bin nbɑ k tie Suifnbɑ sinsuuk ni, Yennu kuukuɑ nɑ e tie b kul Yonmdɑɑnɔ, k bin nbɑ kul mei’ɔ, u sonmt’b nɑn bulcintuk.

¹³ K mɑɑn, l diɑn Yennu lolkpel kɑdɑɑɔk ni ɑ: «Wun nbɑ kul mei Yonmdɑɑnɔ sonml po, u sɑɑ lɑ fielu.»

¹⁴ Tɔn, niib i kii tien’ɔ yɑdɑ, b sɑɑ tien nlee k miɑl’ɔ sonml po? K b i kii gbɑt lɑbɑmɑnn mɑnŋ, b sɑɑ tien nlee k tien’ɔ yɑdɑ? K b i kii muɑnt u lɑbɑmɑnn mɑnŋ, nlee k niib sɑɑ gbɑt u po?

¹⁵ K b i kii tun tuomiinbɑ, nlee k lɑbɑmɑnn mɑnŋ sɑɑ muɑnt i? L diɑn Yennu lolkpel kɑdɑɑɔk ni ɑ: «Bin nbɑ lin k muɑntl lɑbɑmɑnn mɑnŋ, b bɑɑlu ŋɑn bonciɑnn.»

¹⁶ Ŋɑɑn niib kul kɑɑ sɑk lɑbɑmɑnn mɑnŋ, k mɑɑn Esɑɑyi yet ɑ: «N Yonmdɑɑnɔ, ŋmee tien yɑdɑ nɑn t lɑbɑmɑnn nɑ?»

¹⁷ L pɑɑk, nilɔ i gbiɑ lɑbɑmɑnn mɑnŋ, l bɑɑt nɑn yɑdɑ e, k lɑbɑmɑnn nyi niib nbɑ muɑntl Klistu mɑɑn nɑ ni e.

¹⁸ Ŋɑɑn n boi k lɑɑn niib k gbɑt lɑbɑmɑnn mɑnŋ ɑmi? Mɔmɔnm, b gbɑt ɑ. L diɑn Yennu lolkpel kɑdɑɑɔk ni ɑ: «Niib gbɑt b kunkɔlɑ tingbounŋ lokl kul po, k b mɑɑn yɑt nɑn *dulnyɑ kul.»

¹⁹ N yɑɑ n ŋɑnm k boi e k lɑɑn Islɑɑeltieb din k bɑnn l pɑɑk ɑmi? Muois tiɑɔnŋ o din dɔnŋ jiin sinsinn, ɑ Yennu din yet Islɑɑeltieb ɑ: «N sɑɑ te k i mɔk *funfunn nɑn niib nbɑ k mɔk buolu nɑ pɑɑk, k te k i wutuol n do buolu nbɑ tie jɑtt nɑ pɑɑk.»

²⁰ K Esɑɑyi mɔk pɑl k yet ɑ Yennu yɑɑ ɑ: «Niib nbɑ k fiin n po nɑ, b tɑn lɑ’n ɑ, k niib nbɑ k boi n po nɑ, k n jii n mɔnŋ k fiit wɑnn’b.»

²¹ Ŋɑɑn k u yet Islɑɑeltieb po ɑ: «N tɑnt n nuu yennu ni nɑn nyiɑɔk ɑ n gɑɑl’b, ŋɑɑn k b tie tubkɑngbɑtɑ k k sɑɑk n mɔb.»