Luonmtieb 1 - Yiesu Lɑbɑmɑnn Muɑl Ni

Fuonti

¹ Min Pɔul, wun nbɑ tie Yiesu *Klistu tuontunnɔ, k u yiin’n ɑ n tien u *tuomi k Yennu lukt’n ɑ n muɑnt u lɑbɑmɑnn.

² Yennu ponŋ din dɔnŋ senn u mɔsonn lɑbɑmɑnn mɑnŋ po e wɑɑ, k u sɔkniinbɑ din muɑntl u mɔsonn mɑnŋ, k l diɑn u tiɑɔnŋ lolkpel kɑdɑɑɔk ni.

³ Lɑbɑmɑnn mɑnŋ wɑnt u Bijɑ po e. Wɑɑ tien nisɑɑlk nɑ, b din mɑl’ɔ k u tie * Dɑɑfiid yɑɑbuonn e.

⁴ Foŋɑnm din wɑnn nɑn yiikuo nɑn u set tie Yennu Bijɑ u kuun fiilu ni. Ŋuɑ e tie Yonmdɑɑnɔ Yiesu Klistu.

⁵ Ŋuɑ pɑɑk e k Yennu ninbɑtinu be t pɑɑk k te k t tie u tuomiinbɑ ɑ tin jii u sɑnn k sɑɑn nibuolu kul buol ni, k te k bii sɑɑk u mɔb kii tie’u yɑdɑ,

⁶ k i mun be dɑɑnsiɑb nbɑ k Yennu yiin’m ɑ bii tie Yiesu Klistuyɑb nɑ kɑnn ni.

⁷ N dɑ kɑdɑɑɔk nɑ k tien yinm nbɑ be Luonm duo ni, yinm nbɑ k Yennu luon’i k yiin’i ɑ i tien u mɔnŋ niib nɑ. T Bɑɑ Yennu nɑn Yonmdɑɑnɔ Yiesu Klistu i mɔk ninkpɑbɑɔnŋ nɑn’i k biɑ tul’i mɑnu.

Pɔul tien Yennu niipuouk

⁸ Sinsinn, n tien Yennu niipuouk, Yiesu Klistu sɑnn ni, i kul ɑ pɑɑk, k mɑɑn tingbounŋ nɑ tieb kul gbiɑ i yɑdɑ po.

⁹ N wɑɑ Yennu nɑn n pɑl kul, k muɑntl u Bijɑ lɑbɑmɑnn nɑ. Ŋuɑ e tie n siɑlɑɑdɑɑnɔ k mi nɑn yuo kul n duki i kul ɑ po,

¹⁰ k mei’ɔ i pɑɑk yuo kul. N mei’ɔ ɑ l i tie u lonm i e l ji kɑn wei k n sɑɑ bɑɑl i buol,

¹¹ k mɑɑn n mɑntk luon k n lɑ’i k fit sonm’i k yin gɑɑl Foŋɑnm piinsiɑl nbɑ sɑɑ te k i mɔk pɑnŋ u sɔnu ni.

¹² K biɑ jen ɑ, n luon k mii be i sinsuuk ni ɑ tin cie lieb pɑlɑ, tɑɑ tien yɑdɑ nɑ pɑɑk.

¹³ N nɑɑ wɑɑs, n luon yin bɑnn nɑn n yɑbl nɑn tɑɑl munŋɑ nɑ wɑɑ, ɑ n bɑɑl k tɑn gɔn’i, ŋɑɑn k siɑl guɑl’n mɔkmɔk nɑn mɔtɑɑnɑ k n k fit gɔn’i ni. N luon k n tuonn n tun siɑl i sinsuuk ni nɑn lɑɑ din tun biɑnŋ nbɑ nilieb sinsuuk ni nɑ.

¹⁴ L kpɑɑ tɑlɑs k n sɑɑn niib kul buol ni, bin nbɑ mɔk nin-yentl nɑn bin nbɑ k mɔk nin-yentl, bin nbɑ mi kɑdɑɑɔk nɑn bin nbɑ k mi kɑdɑɑɔk.

¹⁵ L pɑɑk, k n ninbinn mɔn bonciɑnn ɑ n muɑnt lɑbɑmɑnn mɑnŋ k tul yinm nbɑ be Luonm duo ni nɑ.

Yiesu lɑbɑmɑnn mɔk yiikuo

¹⁶ Fei k mɔk’n nɑn k n muɑnt lɑbɑmɑnn mɑnŋ, k mɑɑn l tie Yennu yiikuo nbɑ fiel wun nbɑ kul tien yɑdɑ nɑ e. Sinsinn l tie *Suifnbɑ yɑl e, k mun biɑ tie bin nbɑ k tie Suifnbɑ nɑ kul yɑl.

¹⁷ Lɑbɑmɑnn mɑnŋ wɑnt biɑnŋ nbɑ k Yennu yet ɑ nilɔ tie niŋɑnɔ u tuɑnn e. L tie yɑdɑ nɑ pɑɑk e. L kul e nɑ, nɑn lɑɑ diɑn Yennu lolkpel kɑdɑɑɔk ni ɑ: «Wun nbɑ tien niŋɑnɔ Yennu buol, u yɑdɑ nɑ pɑɑk, l dɑɑnɔ sii mɔk mɔmɔnm mɑnfuol.»

Nifosɑɑli kul mɔk biit

¹⁸ Yennu wɑnn nifosɑɑli ɑ u donn wutuol b pɑɑk, k mɑɑn b tuun biit k k wɑɑ u sɔnu, k b biit sɔni mɑnŋ te k niib k bɑnt u bɑlmɔni.

¹⁹ Yennu donn wutuol, k mɑɑn nifosɑɑlk nbɑ sii fit mi lin nbɑ k jiin u po nɑ, ŋɑnn e fiit k be pɑɑnu ni, k mɑɑn ŋuɑ Yennu mɔnŋ mɔnŋ e fiit’l k wɑnn’b.

²⁰ Yuo nbɑ k Yennu din nɑn *dulnyɑ mɔkmɔk nɑn mɔtɑɑnɑ, u nɑɑmi mɑnŋ ni k b bɑnn u ŋɑnt nbɑ k nifosɑɑlk ninbinn k fit lɑɑt nɑ: ŋɑnn e tie u yiikuo nbɑ kɑɑ gbennu, nɑn wɑɑ tie Yennu bɑnnu nbɑ nɑ. L pɑɑk, k b ji k mɔk leku Yennu tuɑnn k sɑɑ yet ɑ b k mi b biit.

²¹ B mi Yennu, ŋɑɑn b k tien’ɔ bɑɑkl nbɑ k u yen nɑ, k biɑ k tien’ɔ niipuouk. B mɔk jɑt-dudukt, k b dudukt be bunbɔnn ni.

²² B yɑɑ ɑ b mɔk yɑn e, ŋɑɑn tie wɑɑtb.

²³ Bɑɑ bo sii jiɑntl Yennu nbɑ kɑɑ gbennu nɑ, b k sɑk, ŋɑɑn jiɑntl pɑtɑ nbɑ k niib nɑn’m k l nɑɑn nifosɑɑli nbɑ sɑɑ fit kpo nɑ, ɑmi nuɑni, ɑmi bonkobt, ɑmi bonfulinkɑ nbɑ fuln tinŋ ni.

²⁴ L pɑɑk, k Yennu nyik’b, ɑ bii tuun biit nbɑ k b pɑlɑ luon, k b dint b mɔnŋ fei b gbɑnɑnt tuonɑ ni nɑn b lieb.

²⁵ B jii lin nbɑ tie bɑlmɔni k jikt sɑɑ Yennu po nɑ k lu, ŋɑɑn sɑk fɑɑk, k lebt k jiɑntl lin nbɑ k Yennu nɑn, ŋɑɑn nyik Yennu mɔnŋ mɔnŋ, wun nbɑ yen pɑku kul mɔkmɔk nɑn yuo nbɑ kɑɑ gbennu. * Amenn.

²⁶ L pɑɑk, k Yennu nyik’b ɑ bii tuun b mɔnŋ lonbiiuk nbɑ mɔk fei, k b puob nyik bii duɑ nɑn jɑb ŋɑɑn ŋmɑt k duɑ nɑn b lieb.

²⁷ Nnɑ e mun k jɑb nyik bii duɑ nɑn puob ŋɑɑn k b niɑɔnŋ be b lieb ni bonciɑnn. Jɑb tie bonsiɑ nbɑ mɔk fei nɑn jɑlieb. L pɑɑk, k b lɑ tubdɑtu b gbɑnɑnt ni k l jɑnŋ nɑn b biit.

²⁸ Nifosɑɑli nbɑ din k luon k bin bɑnn Yennu, l pɑɑk e k Yennu nyik’b nɑn b dudukbiit, k b tuun tuonɑ nbɑ bi bonciɑnn.

²⁹ K biit kul be b ni, k b gbie nɑn biit nɑn niɑnciɑɔnŋ nɑn tonu nɑn nikpinu nɑn kunkɔnɑ nɑn fɑi nɑn dudukbiit, k biɑ tie sɑnjɑɑnjɑnnɑ,

³⁰ k piɑk biil b lieb, k tie Yennu dɑtɑi, k suki b lieb k mɔk gɑluk k dont b mɔnŋ, k biɑ ŋɑmi duki dudukbiit sɔni, k k sɑɑk b bɑɑnbɑ nɑn b nɑɑnbɑ mɔi.

³¹ B biɑ k mɔk yɑnsiɑn b ni. B k wɑɑ b mɔsonɑ biɑk. B k mɔk lonm nɑn b lieb k biɑ k tiin lieb ninbɑɑɔk.

³² B mi nɑn Yennu sennu wɑnn nɑn bin nbɑ tuun lin nbɑ nɑ buolu, b nyuɑt tie kuun e, ŋɑɑn b lek kpɑn tuun ŋɑnn e, k biɑ tɑɑ bin nbɑ tuun l tuonbuolu nɑ po.