Hebluonbɑ 9 - Yiesu Lɑbɑmɑnn Muɑl Ni

Tingbounŋ nɑ ni Yenjiɑntu nɑn Yendɔunŋ ni Yenjiɑntu lɑbɑɑl

¹ Tɔn, Yennu nbɑ din *lol sinsinn lol k tul’b nɑ, u biɑ din tul’b *senni nbɑ wɑnt’b bɑɑ sii jiɑntl’ɔ biɑnŋ nbɑ, nɑn bɑɑ sii jiɑntl’ɔ siɑn nbɑ tinŋ nɑ pɑɑk.

² B din fɑɑ bonkobgbɑnt lɑnbounŋ o, k cincen juɑn k bɔkt’l munle. Sinsinn yɑl nbɑ k b din yi’l *siɑn nbɑ ŋɑn nɑ, b din senn fitl e, k tiebul sie lenŋ, k pɑɑnu nbɑ k b tien k l tie Yennu yɑl nɑ tuɑ l pɑɑk.

³ K cincen nbɑ juɑn nɑ linn po mun, k b yi lenŋ siɑn nbɑ mɑntk ŋɑn.

⁴ Sɑlmɑ binbintl din be, k b jokt wubt l pɑɑk, k Yennu senni lɑkl din be k b tɑbn sɑlmɑ l kul po, k sɑlmɑ bobl din be lɑkl nɑ ni nɑn jiet nbɑ k b yi’l mɑɑnn nɑ. K *Aɑlɔn pɑtu nbɑ din yinn puuk nɑ kpie lɑkl mɑnŋ ni, k tɑnɑ ŋɑnle nbɑ k b din kuol k senni diɑn l pɑɑk nɑ kpie l ni.

⁵ Selubɑnnbɑ din tuɑ lɑkl mɑnŋ pɑɑk k mɔk *yudɑnt bonciɑnn k wɑnt nɑn Yennu be, k b kpinkpɑnt bɑkn siɑn nbɑ k b din mɑnn biit nyikcɑbu *mɑlunŋ nɑ. Ŋɑɑn l k tie mɔtɑɑnɑ kɑɑ k t sɑɑ pɑk l po.

⁶ Bɑɑ din senn bonɑ kul ɑ nnɑ nɑ e, k mɑnntieb din tuu kuɑ Yenjiɑntu lɑnbounŋ mɑnŋ pɑk-luolu ni yuo kul k tuun Yenjiɑntu tuonɑ.

⁷ Ŋɑɑn mɑnntieb yudɑɑnɔ kuukuɑ e din tuu kuɑ lɑnbounŋ nɑ linn po yonm kuɑ binn nuɑk ni. U din tuu diɑ sɔn e k mɑnn mɑlunŋ k tul Yennu, u mɔnŋ biit pɑɑk, nɑn niib nbɑ din tuu kpet tun biit nɑ pɑɑk.

⁸ Nnɑ e k Foŋɑnm din wɑnt nɑn siɑn nbɑ tie Yennu yɑl nɑn bɑlmɔni nɑ dɑɑ k luot yuo nbɑ k sinsinn lɑnbounŋ mɑnŋ dɑɑ din sie nɑ.

⁹ Ŋɑnn e tie lin nbɑ wɑnn’t siɑl k jiin mɔtɑɑnɑ po. L wɑnt nɑn piini nbɑ k b din tuu tul Yennu, nɑn mɑlunŋ nbɑ k b din tuu mɑnn k tul’ɔ nɑ kul din k fit te k nilɔ nbɑ jiɑntl Yennu nnɑ nɑ tie niŋɑnɔ u buol ni.

¹⁰ Ŋɑnn din tuu tie jiet nɑn bon-nyu-nyuut nɑn gbɑnɑnt ŋɑnmu kuukuɑ e. Lin nbɑ nɑ kul din tie gbɑnɑnt senni e, ɑ bii wɑɑ’l mɔkmɔk nɑn yuo nbɑ k Yennu tɑn sɑɑ senn u senpɑɑnu.

¹¹ Ŋɑɑn *Klistu bɑɑl k tie bonŋɑnɑ nbɑ ponŋ be nɑ *mɑnntɔyudɑɑnɔ e. U din kuɑ lɑnbounŋ nbɑ tie lɑnbonjɑɑnn k biɑ sie fɑnu, k biɑ ŋɑn nɑ ni, k l k tie lin nbɑ k nisɑɑlk tien k biɑ k tie tingbounŋ nɑ ni yɑl.

¹² Klistu nbɑ din kuɑ siɑn nbɑ tie Yennu yɑl nɑn bɑlmɔni nɑ ni yonm kuɑ nɑ, u din k kuɑ nɑn bujɑi nɑn nɑɑjɑi sɔn kɑɑ k mɑnn mɑlunŋ, ŋɑɑn u din jii u mɔnŋ sɔn e k pɑ k gɑɑl fielu nbɑ kɑɑ gbennu k tul’t.

¹³ B din tuu jii bujɑi nɑn nɑɑjɑi sɔn e, k biɑ jii nɑɑsɑl k mɑnn k juo muu, ŋɑɑn jii l tɑnpent nɑ nɑn sɔn mɑnŋ k mii mii niib nbɑ din tuu mɔk biit k jiin b jɑɑnti senni nɑ po, ɑ lin wuul b biit nbɑ k nilɔ sɑɑ fit lɑ nɑ.

¹⁴ L tie k l tie mɔni i e, Klistu sɔn biɑ sii mɔk yiikuo k gɑl bonkobt sɔn nɑ. Bɑlmɔni, Foŋɑnm pɑnŋ ni, Klistu din yit u mɔnŋ sɑlk k tul Yennu, k l tie mɑlunŋ nbɑ ŋɑn. Nnɑ e k u sɑɑ wuul t pɑl nbɑ gbie nɑn tuonbiit nbɑ sɑɑ nɑn’t kuun ni nɑ. Ŋɑnn e sɑɑ te k tin fit k tun Yennu nbɑ fo nɑ tuonɑ.

¹⁵ L pɑɑk, Klistu e tie wun nbɑ te k *lolpɑɑnn gbie, ɑ bin nbɑ k Yennu yiin’m nɑ n lɑ yetŋɑnm nbɑ kɑɑ gbennu nbɑ k Yennu din senn mɔsonn k tul’b nɑ. Kuun nbɑ k Klistu din kpo nɑ fɑt niib biit nbɑ k b din tuun yuo nbɑ k b tuu wɑɑ lolkpel nɑ ni wɑɑ.

¹⁶ Tɔn, nilɔ ii diɑn u fɑdinu kɑdɑɑɔk l kpɑɑ tɑlɑs k bin wɑnn nɑn wun nbɑ diɑn fɑdinu kɑdɑɑɔk nɑ kpo wɑɑ.

¹⁷ Yuo nbɑ k wun nbɑ diɑn fɑdinu kɑdɑɑɔk mɑnŋ dɑɑ be u mɑnfuol ni nɑ, fɑdinu kɑdɑɑɔk mɑnŋ k mɔk nyuɑt. L nyuɑt be u kuun puolpo e wɑɑ.

¹⁸ L pɑɑk e te k sinsinn lol nɑ din mɔk nyuɑt sɔn mɑlunŋ puolpo nɑ kuukuɑ.

¹⁹ Yuo nbɑ k Muois din muɑnt Yennu senni kul nɑn lɑɑ diɑn biɑnŋ nbɑ nɑ k tul niib nɑ, u din jii dufɑtlɑi k lol nɑn pekobmɔnt k pɑk nɑɑjɑi nɑn bujɑi sɔn nbɑ ŋmɑt nɑn nyun nɑ, k mii mii’l senni kɑdɑɑɔk nɑn niib mɑnŋ kul pɑɑk,

²⁰ k yien’m ɑ: «Lol nbɑ k Yennu senn tul’i ɑ yin sɑk’l nɑ sɔn e nɑ.»

²¹ Muois biɑ din tuu mii sɔn mɑnŋ Yenjiɑntu lɑnbounŋ nɑ pɑɑk e, nɑn bonsiɑl kul nbɑ k b diɑ jiɑntl Yennu nɑ pɑɑk.

²² Bɑlmɔni e, Yennu senni wɑnnu ni, sɔn e din tuu ŋɑnm bont kul k l be fɑnu k k mɔk biit, k sɔn i kii nyii, Yennu kɑn nyik cɑb niib biit.

Klistu mɑlunŋ nɑ e kpient biit

²³ L pɑɑk, l din tuu kpɑɑ tɑlɑs e k bin mɑnn mɑlunŋ k ŋɑnm bonɑ nbɑ tie *Yendɔunŋ ni bonɑ ninnɑɔnŋ nɑ, ŋɑɑn mɑlunŋ nbɑ cie nisɑɑlk yɑl sɑɑ ŋɑnm Yendɔunŋ ni bonɑ tiɑɔnŋ.

²⁴ Klistu din k kuɑ jɑɑnti buol nbɑ k nisɑɑlk ŋɑnm, k l tie Yendɔunŋ ni bont nbɑ tie l bɑlmɔni nɑ ninnɑɔnŋ nɑ ni kɑɑ. Ŋɑɑn u din sɑɑn kuɑ Yendɔunŋ mɔnŋ mɔnŋ ni e, siɑn nbɑ k u be Yennu tuɑnn t pɑɑk nɑ.

²⁵ Suifnbɑ mɑnntieb yudɑɑnɔ nɑ tuu kuɑ nɑn bonkobt sɔn buol nbɑ tie Yennu yɑl nɑn bɑlmɔni nɑ ni yonm kuɑ e binn kul nuɑk ni, ŋɑɑn Klistu ŋɑnin din k kuɑ lenŋ tɑɑl fuunu munŋɑ kɑɑ wɑɑ, k jii u mɔnŋ k mɑnn mɑlunŋ.

²⁶ L ii dinŋ ii bo i tie nnɑ i e, ŋɑnn lɑɑ din nyii *dulnyɑ nɑmu pinpiik ni wɑɑ, u din bo sɑɑ di fɑlɑ tɑɑl bonciɑnn. Ŋɑɑn mɔtɑɑnɑ, yuo nbɑ ji tɑn pel juontu nɑ k u din dɔkt ɑ wun jii u mɔnŋ k mɑnn mɑlunŋ k kpien biit.

²⁷ Yennu senn ɑ sie k nilɔ kul n kpo yonm kuɑ, k l puolpo Yennu n bu u buut.

²⁸ Nnɑ e mun, Klistu din jii u mɔnŋ k mɑnn mɑlunŋ yonm kuɑ k nyinn nifosɑɑli bonciɑnn biit nɑ. U tɑn sɑɑ jen ɑ, ŋɑɑn l k tie u tɑn sɑɑ nyinn niib biit kɑɑ, ŋɑɑn u tɑn sɑɑ tul bin nbɑ guu’u nɑ fielu.