Hebluonbɑ 7 - Yiesu Lɑbɑmɑnn Muɑl Ni

Yennu mɑnntuɑ Melkiisedek lɑbɑɑl

¹ Melkiisedek mɑnŋ din tie Sɑɑlem tinŋ kpɑnbɑl e k biɑ din tie Yɑbnt Yennu mɑnntuɑ. Ablɑɑhɑɑnm nbɑ din tɑn nyii tɔb nbɑ k u din kɔn nyɑnn kpɑnbɑlɑ nɑ, Melkiisedek din cet’ɔ k yɑt yetŋɑnm u pɑɑk,

² k Ablɑɑhɑɑnm din nyinn bɔktu piik ni yenn kuɑ wɑɑ din kɔn fɑt bont nbɑ nɑ kul ni k tul’ɔ. (Melkiisedek sɑnn mɑnŋ pɑɑk tie ɑ: «kpɑnbɑl nbɑ tuun lin nbɑ ŋɑn,» k biɑ jen ɑ u din tie Sɑɑlenm kpɑnbɑl e k l pɑɑk u mun tie «mɑnu kpɑnbɑl.»)

³ Lɑbɑsiɑl k be k wɑnt Melkiisedek bɑɑ po ɑmi u nɑɑ po ɑmi u yejɑnm po. Lɑbɑsiɑl kɑɑ k wɑnt u mɑlu po ɑmi u kuun po. U nɑɑn nɑn Yennu Bijɑ nɑ e. U lek biɑ tun tie Yennu mɑnntuɑ e nɑn yuo nbɑ kɑɑ gbennu.

⁴ L pɑɑk, i lɑ wɑɑ din tie nijɑɑnn biɑnŋ nbɑ, k mɑɑn t yejɑsɑɑkuɑ Ablɑɑhɑɑnm lek din tɑn nyinn wɑɑ din kɔn fɑt bont nbɑ tɔb ni nɑ bɔktu piik ni yenn kuɑ k tul’ɔ.

⁵ Senni din wɑnn ɑ Liefi yɑɑbuonɑ nbɑ tie mɑnntieb nɑ, ɑ bin tuu gɑɑl b niib *Suifnbɑ nbɑ mɔk lin nbɑ l bɔktu piik ni yenn kuɑ, ŋɑɑn b niib mɑnŋ mun biɑ lek din tie Ablɑɑhɑɑnm yɑɑbuonɑ e.

⁶ Melkiisedek din k tie Liefi yɑɑbuonn kɑɑ, ŋɑɑn u din gɑɑl bonɑ bɔktu piik ni yenn kuɑ Ablɑɑhɑɑnm buol, k biɑ yɑt yetŋɑnm Ablɑɑhɑɑnm pɑɑk, wun nbɑ din gɑɑl Yennu mɔsonŋɑnɑ nɑ.

⁷ Mɔniɑɔk kɑɑ nɑn nisuɑ nbɑ yɑt yetŋɑnm e tie nijɑɑnn k gɑl wun nbɑ gɑɑn yetŋɑnm mɑnŋ.

⁸ Mɑnntieb nbɑ din tuu gɑɑn niib nbɑ mɔk lin nbɑ l bonɑ bɔktu piik ni yenn kuɑ nɑ din tie nisɑɑli k din tuu tɑn kpo, ŋɑɑn Melkiisedek wun nbɑ din gɑɑl Ablɑɑhɑɑnm bonɑ bɔktu piik ni yenn kuɑ nɑ ŋɑnin be, nɑn Yennu lolkpel kɑdɑɑɔk nbɑ wɑnn biɑnŋ nbɑ nɑ.

⁹ T sɑɑ fit yet ɑ yuo nbɑ k Ablɑɑhɑɑnm din nyinn u bont ni bonɑ bɔktu piik ni yenn kuɑ nɑ, u yɑɑbuonɑ *Liefiitnbɑ, bin nbɑ din tɑn gɑɑn bonɑ bɔktu piik ni yenn kuɑ mɑnŋ, mun din tul b bonɑ bɔktu piik ni yenn kuɑ Ablɑɑhɑɑnm ni,

¹⁰ k mɑɑn Melkiisedek nbɑ din cet Ablɑɑhɑɑnm yuo nbɑ nɑ, ŋuɑ Liefi din be Ablɑɑhɑɑnm gbɑnɑnt ni.

¹¹ Yennu din tul *Suifnbɑ *senni k wɑnn Liefiitnbɑ b mɑnnu tuonɑ nbɑ sii tie biɑnŋ nbɑ e. K Liefiitnbɑ mɑnntieb tuonɑ ii dinŋ ii fit te k nilɔ tie niŋɑnɔ Yennu buol ni, l din bo kɑn kpɑɑ tɑlɑs k mɑnntɔgɑnɔ wun nbɑ k set *Aɑlɔn setu ni, ŋɑɑn sie Melkiisedek setu ni nɑ n bɑɑl.

¹² K mɑɑn mɑnntieb *yudɑnt lebtu i bɑɑl, l mun tie k senni n lebt e.

¹³ K t Yonmdɑɑnɔ, wun nbɑ k mɔbonɑ nɑ piɑk u po nɑ, nyii buolgɑnu nbɑ ni k b suɑ din k mi tun mɑnntuɑ tuonn binbintl buol ni e.

¹⁴ Suɑ kul ponŋ mi nɑn Yonmdɑɑnɔ nyii Suudɑ nibuolu ni, nibuolu nbɑ k Muois din k mi pɑk siɑl b po k jikt sɑɑ mɑnntieb po.

Mɑnntɔluɑ nbɑ nɑɑn nɑn Melkiisedek nɑ lɑbɑɑl

¹⁵ Gotl lin nbɑ te k t mɑntk bɑnn mɑɑn mɑnŋ pɑɑk nbɑ tie lin nbɑ. Mɑnntɔgɑnɔ nbɑ nɑɑn nɑn Melkiisedek, din tɑn bɑɑl.

¹⁶ Ŋuɑ e tie mɑnntuɑ, k nisɑɑlk senni ni kɑɑ k u tien l mɑnntuɑ, ŋɑɑn l tie mɑnfuol nbɑ kɑɑ gbennu nɑ yiikuo ni e k u tien mɑnntuɑ.

¹⁷ K mɑɑn b din diɑn u po Yennu lolkpel kɑdɑɑɔk ni ɑ: «A tɑn sii tie mɑnntuɑ e nɑn yuo nbɑ kɑɑ gbennu, kii tie Melkiisedek pɑɑbu ni mɑnntuɑ.»

¹⁸ L pɑɑk, senkpelu nɑ ji din bɑkn e, k mɑɑn l din k mɔk pɑnŋ, k biɑ k mɔk nyuɑt,

¹⁹ k mɑɑn Muois senni mɑnŋ din k fit te k siɑl ŋɑn. Ŋɑɑn mɔtɑɑnɑ t ji mɔk lin nbɑ tul’t dindɑnn nbɑ cie nɑ, k l ni e k t cɑt nɑkn Yennu buol ni.

²⁰ K Yennu pol k set k pukn l pɑɑk. Yennu din tuu k puol k tien mɑnntɔlieb nɑ.

²¹ Ŋɑɑn Yiesu din tien mɑnntuɑ yuo nbɑ k Yennu din tɑn pol k yet’ɔ ɑ: «A Yonmdɑɑnɔ Yennu senn mɔsonn k ji kɑn lebt u dudukt, k yet ɑ: ‹Fin e sii tie mɑnntuɑ nɑn yuo nbɑ kɑɑ gbennu.› »

²² L pɑɑk, nnɑ e te k Yiesu tie wun nbɑ wɑnn nɑn *lol nbɑ cie nɑ kɑɑ lotu.

²³ Tɔn, yɑɑyuo ni mɑnntieb mɑnŋ din yɑb k mɑɑn b din tuu kpo e, k ji kii be b tuonn nɑ ni yuo kul.

²⁴ Ŋɑɑn Yiesu ŋɑnin sii tun be k tie mɑnntuɑ nɑn yuo nbɑ kɑɑ gbennu, k u tuonɑ nɑ kɑn mi nyi u nuu ni k suɑ n gɑɑl’l.

²⁵ L pɑɑk, bin nbɑ cɑt nɑkn Yennu, ŋuɑ Yiesu ni, u fit fiel’b mɔtɑɑnɑ nɑn yuo nbɑ kɑɑ gbennu, k mɑɑn u lek be u mɑnfuol ni yuo kul, k mei Yennu k tien’m.

²⁶ L pɑɑk, Yiesu e tie t mɑnntuɑ nbɑ jɑnŋ nɑn t sonml. Ŋuɑ e tie wun nbɑ penn Yennu pɑl ni, k u k mɔk biit, k suɑ k fit tɑɑl’ɔ siɑl pɑɑk. Biit dɑnm be b kuɑ k u mun biɑ be u kuɑ, k Yennu donn’ɔ k kuɑn’ɔ *Yendɔunŋ ni.

²⁷ *Mɑnntɔyudɑnlieb nɑ din tuu mɑnn *mɑlunŋ dɑɑl n tuu dɑɑl b tiɑɔnŋ biit pɑɑk sinsinn, k biɑ mɑnn *mɑlunŋ niib biit pɑɑk. Ŋuɑ Yiesu k tie nnɑ kɑɑ. U din jii u mɔnŋ k mɑnn mɑlunŋ yonm kuɑ e, k l jɑnŋ nɑn niib kul ɑ.

²⁸ Muois senni nɑ lukt nisɑɑli k tien’m mɑnntɔyudɑnm nbɑ k tie niŋɑnm Yennu buol ni e. Ŋɑɑn, wɑɑ din tul senni mɑnŋ puolpo nɑ k Yennu din pol k yet, ɑ u Bijɑ sii tie mɑnntɔyudɑɑnɔ nbɑ ŋɑn nɑn yuo nbɑ kɑɑ gbennu.