Hebluonbɑ 13 - Yiesu Lɑbɑmɑnn Muɑl Ni

Tuonɑ nbɑ pent Yennu pɑl ni lɑbɑɑl

¹ Yɑɑ tie *Klistu niib nɑ pɑɑk, ii luon i lieb mɑn yuo kul.

² I dɑɑ tɑnmt sɑɑnm gɑɑlu po, k mɑɑn nisiɑb din tɑn gɑɑl mɑlɑkɑɑnbɑ sɑɑɔnŋ, ŋɑɑn k mi ɑ b tie mɑlɑkɑɑnbɑ e.

³ Ii tiɑn bin nbɑ be dɑnsɑli ni nɑ po nɑn yinm nɑn ŋɑnm e lɑkn be l ni, kii tiɑn bin nbɑ lɑɑt muksuk nɑ po nɑn yinm nɑn ŋɑnm e lɑkn lɑɑt muksuk mɑnŋ nɑ.

⁴ Ii bɑɑkt i puokuɑnt nɑn i jɑkunt k dɑɑ conm, k mɑɑn Yennu tɑn sɑɑ dɑt boncunconɑ tubɑ.

⁵ Ii nyinn i niɑɔnŋ nɑn liklonm, ŋɑɑn te k i nunm n gbuo nɑn yɑɑ mɔk lin nbɑ, k mɑɑn Yennu yet ɑ: «N kɑn mi k nyik’ɑ ni; n biɑ kɑn mi k ŋɑɑn’ɑ ni.»

⁶ L pɑɑk, k t mɔk pɑlcienn k yet ɑ: «T Yonmdɑɑnɔ tie n sonmtuɑ, n kɑn tin jɑŋmɑɑni, nisɑɑlk sɑɑ tien’n bee?»

⁷ Ii tiɑn mɑn i yudɑnm nbɑ din piɑk Yennu mɑɑn k tien’i nɑ po, kii duki b mɑnfuol nbɑ din tɑn juont bɑnnu nbɑ kii toki b yɑdɑ.

⁸ Yiesu Klistu nbɑ won tie biɑnŋ nbɑ wonn nɑ, u biɑ tie nnɑ e dinnɑ nɑ, k u biɑ sii tie nnɑ e nɑn yuo nbɑ kɑɑ gbennu.

⁹ I dɑɑ ŋɑɑnt k wɑnnsɑɑnɑ buolu buolu n te k i bot, k i tɑn sɑɑ mɑnn tut sɔnŋɑnu mɑnŋ. L ŋɑn k Yennu ninbɑtinu n tul nilɔ pɑnŋ u pɑl ni. Jiet *senni weiu kɑn tul’ɔ pɑnŋ. Nisiɑb nbɑ diɑ jiet *senni nɑ k lɑɑt somsiɑl l ni.

¹⁰ Tɔn, bin nbɑ mɑnn mɑnnu *Suifnbɑ Yenjiɑntu buol ni nɑ k mɔk yiikuo ɑ bii di lin nbɑ be t *mɑnnu binbintl nɑ pɑɑk.

¹¹ Suifnbɑ mɑnntieb yudɑɑnɔ tuu kuɑ nɑn bonkobt sɔn Yennu dieok ni, buol nbɑ tie Yennu yɑl nɑn bɑlmɔni nɑ ni, k mɑnn *mɑlunŋ biit pɑɑk, ŋɑɑn juo bonkobt mɑnŋ nɑnt muu b duo nɑ kpinŋ po.

¹² L pɑɑk, k Yiesu mun din kpo duo nɑ kpinŋ po, ɑ wun nyinn niib biit ni, u mɔnŋ sɔn pɑɑk.

¹³ L pɑɑk, ŋɑɑnt k tin nyi k sɑɑn u buol ni mɑn, k sɑk fedinu nɑn wɑɑ din dii fei biɑnŋ nbɑ nɑ.

¹⁴ K mɑɑn duo nbɑ sɑɑ biɑl kɑɑ tingbounŋ nɑ ni, dosɑu nbɑ bɑɑt nɑ e k t guu’l.

¹⁵ Ŋɑɑnt k tii dontl Yennu sɑnn yuo kul Yiesu sɑnn ni, k lii nɑɑn nɑn mɑlunŋ nɑ k tul’ɔ, k pɑku nbɑ nyi t mɔi ni nɑ dɑɑ mɔk gbennu.

¹⁶ I dɑɑ nyikt tuonŋɑnɑ tumu, kii centl yɑɑ mɔk lin nbɑ nɑn i lieb, k mɑɑn l mɑnbuolu e pent Yennu pɑl ni.

¹⁷ Ii sɑɑk i yudɑnm mɔi k sikn i mɔnŋ k tul’b. B bɑkɑ be i benu ni, k mɑɑn b tɑn sɑɑ wɑnn Yennu b tuonɑ nbɑ k b din tuun nɑ. Ii sɑɑk b mɔi k bii fit kii tuun b tuonn nɑn pɑlpienn k pɑlbiil dɑɑ be lenŋ k mɑɑn nnɑ k mɔk nyuɑt k tul’i ni.

¹⁸ Ii mei Yennu mɑn t pɑɑk. T k mɔk dudukbisiɑt t tuonɑ ni, k mɑɑn t luon k tii tuun lin nbɑ tuok e yuo kul.

¹⁹ Ŋɑɑn n mɑntk bɑln’mi e bonciɑnn, ii mei Yennu mɑn k tul’n k wun te k n jen i buol ni mɔtɑɑnɑ.

Yenmiɑljuontk lɑbɑɑl

²⁰ Yennu nbɑ tien mɑnu nɑ din fiin t Yonmdɑɑnɔ Yiesu kuun ni. Ŋuɑ Yiesu e tie Pekpɑɑjɑɑnn nbɑ kpɑɑl pei k mɑɑn u din kpo, k u sɔn ŋɑnm Yennu *lol nbɑ sii sie yuo nbɑ kɑɑ gbennu nɑ.

²¹ Yennu nbɑ tien’t mɑnu nɑ n te k i fit kii tuun tuonŋɑnɑ kul, k fit tun lin nbɑ k u luon. K Yiesu Klistu pɑɑk, wun tun t ni lin nbɑ pent u pɑl. Ŋuɑ Yiesu e mɔk *yudɑnt nɑn yuo nbɑ kɑɑ gbennu. * Amenn.

Bɑljuonti lɑbɑɑl

²² N nɑɑ wɑɑs, n bɑln’mi e, i di suklu k gbiint kpɑɑni nɑ, k mɑɑn mɑɑ diɑn kɑdɑɑɔk nbɑ tul’i nɑ k fɔk.

²³ N luon k i bɑnn nɑn b nyinn t nɑɑ bik Tiimuote dɑnsɑlk ni wɑɑ. L i tie k u sɑɑ bɑɑl n buol ni mɔtɑɑnɑ, min nɑn ŋuɑ sɑɑ tɔk bɑɑl i buol ni.

²⁴ I fuont i yudɑnm kul ɑ nɑn Yennu niib nɑ kul ɑ k tul’t. T nɑɑ wɑɑs nbɑ nyii Itɑɑli tinŋ ni nɑ fuont’i.

²⁵ Yennu ninkpɑbɑɔnŋ ii be nɑn i kul.