Hebluonbɑ 1 - Yiesu Lɑbɑmɑnn Muɑl Ni

Yennu tul’t u mɑɑn u Bijɑ Yiesu ni

¹ Siɑn-yuo, Yennu din jii sɔni bonciɑnn k te k sɔkniinbɑ pɑk tul t yejɑnm k l tien tɑɑl munŋɑ wɑɑ,

² ŋɑɑn mɔtɑɑnɑ u jii mɑɑn k tul u Bijɑ e k u pɑk nɑn tinm. Yennu din lukt’ɔ ɑ wuu yen bonsiɑl kul k biɑ din te k u nɑn *dulnyɑ kul.

³ Bijɑ mɑnŋ ni e k t lɑ yentsɑɑkɑl nbɑ nyii Yennu *yudɑnt ni, k ŋuɑ mɑnŋ e tie Yennu mɔnŋ mɔnŋ ninnɑɔnŋ, k diɑ dulnyɑ kul nɑn u mɑɑn nbɑ mɔk yiikuo nɑ. Wɑɑ din tun lin nbɑ te k niib mɔk nyikcɑbu b biit pɑɑk nɑ puolpo, k u ji kɑl Yɑbnt Yennu niidiitu po *Yendɔunŋ ni.

Yennu Bijɑ mɑnŋ pɑnŋ lɑbɑɑl

⁴ Bijɑ mɑnŋ nbɑ din cie mɑlɑkɑɑnbɑ nɑ, Yennu din pul’ɔ sɑnn nbɑ gbenŋ bonciɑnn k cie b yɑl.

⁵ Setk nɑn mɔni Yennu k mi yet mɑlɑksuɑ ɑ: «Fin e tie n Bijɑ, k lɑɑ nyii dinnɑ min e tie ɑ Bɑɑ.» Yennu biɑ k mi yet mɑlɑksuɑ po ɑ: «N tɑn sii tie ɑ Bɑɑ, k ɑ mun tie n Bijɑ.»

⁶ K Yennu nbɑ din tɑn yɑɑ wun tun u Bijɑkpel tingbounŋ nɑ ni yuo nbɑ, k u yet ɑ: «L kpɑɑ tɑlɑs k Yennu mɑlɑkɑɑnbɑ kul ɑ n jiɑnt’ɔ.»

⁷ Mɑlɑkɑɑnbɑ po, Yennu din yet ɑ: «U te k u mɑlɑkɑɑnbɑ tie wounŋ, k biɑ te k u tuontunnɑ tie mupienu.»

⁸ Ŋɑɑn l yet u Bijɑ nɑ po ŋɑnin ɑ: «Yennu, ɑ nɑɑn nɑ sii be nɑn yuo nbɑ kɑɑ gbennu. K ɑ nɑɑn dɑnml nɑ tie bɑlmɔni dɑnml e.

⁹ A luon lin nbɑ tuok, ŋɑɑn nɑn biit, l pɑɑk te k Yennu, wunbɑ tie ɑ Yennu, nɑ lukt’ɑ, k muɑn pɑlpienn kpɑn ɑ yul pɑɑk, k nyik ɑ tɔk-nɑn-lieb ŋɑɑn lukt’ɑ.»

¹⁰ U biɑ yet ɑ: «N Yonmdɑɑnɔ, fin e din nɑn tingbounŋ nɑ pinpiik ni wɑɑ, k nɑn sɑnpɑɑk nɑn ɑ mɔnŋ nii.

¹¹ Lin nbɑ nɑ kul tɑn sɑɑ gɑl ɑ, ŋɑɑn fin lek sii tun be e. Sɑnpɑɑk nɑn tinŋ tɑn sɑɑ kpet e k cɑt cɑt nɑn cincenn nɑ.

¹² A tɑn sɑɑ pɔbn’m nɑn bɑɑɔnŋ nɑ e, k b tɑn sɑɑ lebt nɑɑn nɑn tiɑt nɑ. Ŋɑɑn fin ŋɑnin kpɑn sii tun tie yonm e k ɑ mɑnfuol nɑ kɑɑ juontu.»

¹³ Tɔn, Yennu dɑɑ k mi yet mɑlɑksuɑ ɑ: «Kɑln n niidiitu po nnɑ nɑ mɔkmɔk k mɑn tɑn jii ɑ dɑtɑi nɑ k tien’m ɑ tɑɑkpɑktɑ.»

¹⁴ L pɑɑk, mɑlɑkɑɑnbɑ tie bee? B kul tie sei nbɑ jiɑntl Yennu e, k ŋuɑ Yennu tuun’m ɑ bii sonmt niib nbɑ sɑɑ lɑ fielu nɑ.