Gɑɑlɑɑt-tieb 5 - Yiesu Lɑbɑmɑnn Muɑl Ni

T diɑ t yent-n-mɔnŋ nɑn ninmɔnn

¹ Yiesu *Klistu ponŋ fɑt tinm ɑ, k tii mɔk yent-n-mɔnŋ e. L pɑɑk, i dɑɑ te k siɑl ji diɑ’i k i tie l dɑɑbl.

² Gbiintl mɑn! Min Pɔul n yien’i ɑ l i tie k i pot i punɑ, l wɑnt nɑn Klistu k mɔk nyɔsiɑt tul’i ni.

³ N ŋɑnmt yien nifosuɑ nbɑ wɑɑ *punpotu sɔnu nɑ e, nɑn l kpɑɑ tɑlɑs e k wun wei *senni kul ɑ.

⁴ Yinm nbɑ yɑbi ɑ Yennu n yet ɑ i tie niŋɑnm u buol senni weiu pɑɑk nɑ, i bɔkt i mɔnŋ nɑn Klistu, k biɑ nyinn i mɔnŋ Yennu ninkpɑbɑɔnŋ ni.

⁵ Ŋɑɑn tinm ŋɑnin i e, Foŋɑnm nbɑ be t ni tien tinm yɑdɑ. T mɔk dindɑnn k guu yuo nbɑ k Yennu tɑn sɑɑ yet, ɑ t tie niŋɑnm.

⁶ K mɑɑn t i be Yiesu Klistu ni, t i lek i pot t punɑ ɑmi t i kii pot, l k siɑn. Lin nbɑ siɑn tie t yɑdɑ nɑn Klistu nbɑ te k b lɑɑt nɑn t mɔk lonm nɑn lieb nɑ e.

⁷ Ŋɑɑn i din sɑɑ fɑnu nɑ, k ŋmee tɑn luon’i sɔnu k i nyik bɑlmɔni sɑku?

⁸ Yennu nbɑ yiin’i nɑ kɑɑ tun lin nbɑ nɑ.

⁹ Kpɑnjɑnsiɑn be k yien ɑ: «* Dɑtinŋ wɑɑnm-nnɑ e te k pɑɑnu fiktl piil.»

¹⁰ Ŋɑɑn Yonmdɑɑnɔ pɑɑk, n biɑ mɔk yɑdɑ ɑ i sii mɔk dudukyent nɑn’n, ŋɑɑn Yennu sɑɑ dɑt dɑɑnɔ nbɑ ŋmɑt i dudukt nɑ tubl ɑ, wɑɑ lek tie wun nbɑ kul.

¹¹ N nɑɑ wɑɑs, l i tie mɔni nɑn n muɑntl ɑ niib ii poli b punɑ, bee te k b biɑ sii muks’n i? L i bo i tie bɑlmɔni e k n muɑntl punpotu po nɑn mɑɑ muɑntl dɑpunpunn po nɑ, ŋɑnn l bo kii mɔk muksuk.

¹² Min bo sunmɑn k bin nbɑ ŋmɑt i dudukt nɑ n nyik punpotu e, ŋɑɑn tuɑ b mɔnŋ lɑnɑ.

¹³ N nɑɑ wɑɑs, Yennu yiin’i ɑ yii mɔk yent-n-mɔnŋ e, ŋɑɑn i dɑɑ te k i yent-n-mɔnŋ n ŋɑɑn k i nisɑɑlk lonm n nyɑnn’i. Ŋɑɑn i ŋɑɑn k i lonm n te k i sonm i lieb mɑn.

¹⁴ K mɑɑn senni kul be sennu yenn kuɑ nɑ ni e: «Ii luon *ɑ luɑ nɑn fɑɑ luon ɑ mɔnŋ biɑnŋ nbɑ nɑ.»

¹⁵ Suot i mɔnŋ mɑn, l i tie k i tie nɑn muuk ni bonkobt nɑ k tien lieb dɑni k biɑ tie lieb tonu, i set sɑɑ biil i lieb ɑ.

Foŋɑnm nɑn nisɑɑlk binbenŋ lɑbɑɑl

¹⁶ Ŋɑɑn n yien’i e, ŋɑɑnt k Foŋɑnm ii diɑ i binbenŋ mɑn, k dɑɑ te k i niɑɔnŋ tuun nisɑɑlk lonm.

¹⁷ Nisɑɑlk lonm kɔn nɑn Foŋɑnm yɑl, k Foŋɑnm lonm mun kɔn nɑn nisɑɑlk yɑl. L pɑɑk, i kɑn fit tun yɑɑ luon lin nbɑ.

¹⁸ L i tie k Foŋɑnm ŋmɑktl’i sɔnu ni, senni ji k diɑ’i ni.

¹⁹ Nisɑɑlk lonm nbɑ wɑnt l mɔnŋ lin nbɑ ni tie boncuncontuonɑ e, nɑn jɑknt tuonɑ, nɑn puoweiu nɑn jɑweiu,

²⁰ nɑn pɑtmɑnnu, nɑn nyɔkdinu, nɑn dɑtɑɑl, nɑn kunkɔnɑ, nɑn funfunbiiuk, nɑn wutuol, nɑn nɑɑniɑɔk, nɑn bɔktu, nɑn kɑn gbɑt lieb mɑɑn

²¹ nɑn niɑnbiiuk, nɑn dɑyibu, nɑn jedicɑɑɔnŋ, k biɑ jii bonliɑ nbɑ nɑɑn nnɑ k pukn. N ponŋ yet’i e nɑn mɑɑ din yet’i biɑnŋ nbɑ nɑ, bin nbɑ tuun lin nbɑ nɑ kɑn mi di Yennu nɑɑn.

²² Ŋɑɑn Foŋɑnm te k nilɔ mɔk lonm, nɑn pɑlpienn, nɑn mɑnu, nɑn suklu, nɑn bulcint, nɑn ŋɑnm, nɑn yɑdɑ,

²³ nɑn sikn-n-mɔnŋ, nɑn mɔnŋdiɑnu. Sennsɑu kɑɑ k yɑɑ bonɑ nɑ kuɑ.

²⁴ Bin nbɑ tie Klistuyɑb kpɑɑ b nisɑɑlk lonm nɑn l lonbiit kul ɑ dɑpunpunn pɑɑk ɑ.

²⁵ L i tie k t be Foŋɑnm ni, ŋɑɑnt mɑn k wuu ŋmɑktl’t t binbenŋ ni.

²⁶ T dɑɑ mɔk jɑpɑɑt, ɑmi k fiint t lieb wutuol, ɑmi k mɔk funfunbiit nɑn t lieb.