Fiitu 7 - Yiesu Lɑbɑmɑnn Muɑl Ni

Yennu niib

¹ L puolpo k n lɑ *mɑlɑkɑɑnbɑ bɑnnɑ k b sie tingbounŋ nɑ lokɑ ŋɑnnɑ nɑ ni, k diɑ wounŋ nbɑ nyi lokɑ kul nɑ ni, ɑ l dɑɑ dɑ tinŋ ni ɑmi mɔkgbenŋl ni ɑmi tisiɑk pɑɑk.

² L yuo k n lɑ mɑlɑkluɑ k u nyii yendopo k diɑ dɔuk nbɑ tie mɑnfodɑɑnɔ Yennu yɑl nɑ, k yikn nɑn kunkɔsɑɑkɑl k yien mɑlɑkɑɑnbɑ bɑnnɑ nbɑ k Yennu tul’b yiikuo ɑ bin biil tingbounŋ nɑn mɔkgbenŋl nɑ,

³ ɑ: «I dɑɑ biil tingbounŋ nɑn mɔkgbenŋl nɑn tiini mɑn, sie k b tɑn dɔk t Yennu niib b yugbiɑ pɑɑk sinsinn.»

⁴ K n gbɑt bin nbɑ k b dɔk’b nɑn Yennu dɔuk nɑ kɑnn, k b tie niib tusɑ kobk nɑn tusɑ piinnɑ nɑn tusɑ ŋɑnnɑ (144.000), bin nbɑ nyii Islɑɑel nibuolu kul ni:

⁵ k b dɔk Suudɑ buolu ni niib, tusɑ piik nɑn ŋɑnle (12.000), Luubenn buolu ni, tusɑ piik nɑn ŋɑnle (12.000), Gɑɑd buolu ni, tusɑ piik nɑn ŋɑnle (12.000),

⁶ Asel buolu ni, tusɑ piik nɑn ŋɑnle (12.000), Neftɑɑli buolu ni, tusɑ piik nɑn ŋɑnle (12.000), Mɑnɑɑse buolu ni, tusɑ piik nɑn ŋɑnle (12.000),

⁷ Siimeɔn buolu ni, tusɑ piik nɑn ŋɑnle (12.000), Leefi buolu ni, tusɑ piik nɑn ŋɑnle (12.000), Isɑɑkɑɑl buolu ni, tusɑ piik nɑn ŋɑnle (12.000),

⁸ Sɑɑbuulɔn buolu ni, tusɑ piik nɑn ŋɑnle (12.000), Suosiɑf buolu ni, tusɑ piik nɑn ŋɑnle (12.000), Bensɑɑmen buolu ni mun k b dɔk niib tusɑ piik nɑn ŋɑnle (12.000).

Nibulciɑɔnŋ nbɑ lɑkn nɑ lɑbɑɑl

⁹ L puolpo e k n got k lɑ nibulciɑɔnŋ k b kɑɑ kɑnn, k nyii tini kul ni, nɑn buolu kul ni, nɑn nibuolu kul ni, nɑn mɑbuolu kul ni, k b sie nɑɑngbounŋ nɑ nɑn Pebik nɑ tuɑnn po k liɑ liɑtfopieni, k diɑ diɑ biɑbfɑɑt b nii ni,

¹⁰ k b yikn nɑn kunkɔsɑɑkɑlɑ k yien ɑ: «T fielu nyi t Yennu nbɑ kɑl nɑɑngbounŋ nɑ pɑɑk nɑ nɑn Pebik nɑ buol e.»

¹¹ K mɑlɑkɑɑnbɑ nɑ kul set k lint nɑɑngbounŋ nɑ nɑn sɑɑkɑb nɑ nɑn bonfuɑ bɑnnɑ nɑ, k bɑɑ finfɑbɑ nɑɑngbounŋ nɑ tuɑnn k jiɑntl Yennu,

¹² k yien ɑ: «* Amenn, pɑku nɑn dontl nɑn yɑn nɑn niipuouk tulu nɑn bɑɑkl nɑn yiikuo nɑn pɑnŋ tie Yennu yɑl e mɔkmɔk nɑn yuo nbɑ kɑɑ gbennu. Amenn.»

¹³ K sɑɑkɑb nɑ yenɔ boi’n ɑ: «K bin nbɑ liɑ liɑtfopieni nɑ tie lɑnm e, k b nyii lee?»

¹⁴ K n jiin k yet’ɔ ɑ: «N Yonmdɑɑnɔ, fin e mi.» K u yet’n ɑ: «Niib nɑ nyii fɑlgbenŋl nɑ ni e, k b wuul b liɑtfɔkt nɑ Pebik nɑ sɔn ni k l ji pien.

¹⁵ L pɑɑk e, k b sie Yennu nɑɑngbounŋ nɑ tuɑnn k tuun tien’ɔ nyiɑɔk nɑn yennu ni u jɑɑnti ŋɑsɑɑkɑk nɑ ni, k ŋuɑ Yennu nbɑ kɑl nɑɑngbounŋ nɑ pɑɑk nɑ sii be nɑn’m, k biɑ sii guu’b,

¹⁶ ɑ k kon nɑn nyun-nyuklu kɑn mi suol’b, k yennu tonu ɑmi tongbeŋsiɑl kɑn mi k tonŋ b gbɑnu.

¹⁷ K mɑɑn Pebik nbɑ be nɑɑngbounŋ nɑ buol nɑ sii tie b pekpɑɑlk, k sɑɑ ciɑn’m sɑɑn nɑn’m nyunbuul nbɑ tien mɑnfuol nɑ ni, k Yennu sɑɑ fiɑl b nyin-nyuut kul.»