Fiitu 5 - Yiesu Lɑbɑmɑnn Muɑl Ni

Kɑdɑpuɑbl nɑn Pebik lɑbɑɑl

¹ Ŋɑnn e, k n biɑ lɑ k suɑ kɑl nɑɑngbounŋ nɑ pɑɑk k diɑ kɑdɑpuɑbl u niidiitu ni, k kɑdɑɑɔk mɑnŋ mɔk diɑni l nunpo nɑn l puolpo, k b tɑbn l ŋmii boɑ ŋɑnlole ni.

² K n lɑ *mɑlɑkɑ nbɑ mɔk pɑnŋ k u muɑntl nɑn kunkɔsɑɑkɑl ɑ: «Ŋmee jɑnŋ nɑn wun pɔbt kɑdɑpuɑbl nɑ k tɑbt’l i?»

³ Ŋɑɑn k suɑ kɑɑ *Yendɔunŋ ni ɑmi tingbounŋ nɑ ni ɑmi kpientinŋ, k sɑɑ fit pɔbt kɑdɑpuɑbl nɑ k got l nuɑk ni.

⁴ L yuo k n bui nɑn nyin-nyuut k mɑɑn suɑ nbɑ kɑɑ k jɑnŋ nɑn wun pɔbt kɑdɑpuɑbl nɑ k got l nuɑk ni nɑ.

⁵ Ŋɑnn e k sɑɑkɑb nɑ yenɔ yet’n ɑ: «Dɑɑ bui. Gotl wun nbɑ tie Suudɑ buolu ni Yɑnbɔl nbɑ tie kpɑnbɑl * Dɑɑfiid yɑɑbuonn nɑ. Ŋuɑ nyɑnn nyɑnnu k fit tɑbt yiit ŋɑnlole nɑ k pɔbt kɑdɑpuɑbl mɑnŋ.»

⁶ K n lɑ Pebik k u sie nɑɑngbounŋ nɑ buol k bonfuɑ bɑnnɑ nɑ nɑn sɑɑkɑb nɑ sie k lint’ɔ. Pebik nɑ tie nɑn pebik nbɑ k b kpii’u nɑ e, k mɔk yinɑ ŋɑnlole nɑn ninbinɑ ŋɑnlole nbɑ tie Yennu sei ŋɑnlole nbɑ k u tun’m tingbounŋ nɑ kul ni nɑ.

⁷ K Pebik nɑ sɑɑn k sɑɑ gɑɑl kɑdɑpuɑbl nɑ dɑɑnɔ nbɑ kɑl nɑɑngbounŋ nɑ pɑɑk niidiitu ni.

⁸ Wɑɑ gɑɑl kɑdɑpuɑbl nɑ yuo nbɑ k bonfuɑ bɑnnɑ nɑ nɑn sɑɑkɑb piinle nɑn bɑnnɑ nɑ gbɑɑn u tuɑnn, k b kul ɑ diɑ biɑt nɑn sɑlmɑ kɔbi, k bonnunubt nbɑ k b tuu jokt muu k l tie Yennu niib miɑlu nɑ gbie kɔbi mɑnŋ ni.

⁹ K b yiin yɑnpɑɑnŋ k tien Pebik nɑ k yien ɑ: «A set jɑnŋ nɑn fɑn gɑɑl kɑdɑpuɑbl nɑ k tɑbt l yiit nɑ, k mɑɑn ɑ din kpo e k jii ɑ sɔn k dɑɑ niib k tul Yennu. Niib mɑnŋ nyii buolu kul ni, nɑn mɑbuolu kul ni, nɑn nibuolu kul ni, nɑn tini kul niib ni.

¹⁰ A biɑ te k b tie ɑ nɑɑn ni niib, bin nbɑ tie mɑnntieb, ɑ bin tun Yennu tuonɑ, k b sii yen tingbounŋ nɑ tieb.»

¹¹ L puolpo biɑk k n got k lɑ mɑlɑkɑɑnbɑ tusɑ tusɑ tusɑ, k biɑ gbɑt b kunkɔlɑ, k b ŋɑɑ lint nɑɑngbounŋ nɑ nɑn bonfuɑ bɑnnɑ nɑ nɑn sɑɑkɑb nɑ.

¹² K b yien nɑn kunkɔsɑɑkɑl ɑ: «Pebik nbɑ k b din kpii’u nɑ, ŋuɑ e jɑnŋ nɑn wun gɑɑl yiikuo nɑn mɔktuk nɑn yɑn nɑn pɑnŋ nɑn bɑɑkl nɑn dontl nɑn pɑku.»

¹³ K lin nbɑ kul k Yennu din nɑn nɑ, lin nbɑ be sɑnpɑɑpo nɑn lin nbɑ be tingbounŋ nɑ ni nɑn lin nbɑ be kpientinŋ nɑn lin nbɑ be mɔkgbenŋl ni, b kul yien ɑ: «Pɑku nɑn bɑɑkl nɑn dontl nɑn yiikuo kul ii be wun nbɑ kɑl nɑɑngbounŋ nɑ pɑɑk nɑ nɑn Pebik nɑ pɑɑk nɑn yuo nbɑ kɑɑ gbennu.»

¹⁴ K bonfuɑ bɑnnɑ nɑ sɑk k yet ɑ: «* Amenn.» K sɑɑkɑb nɑ kul gbɑɑn k jiɑntl’ɔ.