Efestieb 6 - Yiesu Lɑbɑmɑnn Muɑl Ni

Wɑɑs nɑn wɑdɑnm lɑbɑɑl

¹ Wɑɑs, yɑɑ wɑɑ *Klistu nɑ pɑɑk nɑ, ii sɑɑk i dɑnm mɔi, k mɑɑn ŋɑnn e tuok nɑn yin tun.

² Sinsinn sennu nbɑ k Yennu mɔsonn pukn l pɑɑk tie ɑ: «Bɑɑk ɑ bɑɑ nɑn ɑ nɑɑ,

³ k ɑ bont kul n sonm fɑnu, k ɑ mɑnfuol n fɔkt tingbounŋ nɑ ni.»

⁴ Bɑɑnbɑ, i dɑɑ diɑ i wɑɑs diɑbiiuk k dont b wutuol, ŋɑɑn kii wɑnt’b kii kpɑɑn’m Yonmdɑɑnɔ nbɑ luon biɑnŋ nbɑ.

Dɑɑbɑ nɑn b cɑnbɑɑnbɑ lɑbɑɑl

⁵ Dɑɑbɑ, ii sɑɑk i cɑnbɑɑnbɑ mɔi mɑn, kii tiin’m jɑŋmɑɑni, kii tuun tuonn kii tien’m nɑn i pɑlɑ kul ɑ nɑn yɑɑ bo sii tuun k tien Klistu biɑnŋ nbɑ nɑ.

⁶ I dɑɑ tuun lin nbɑ nɑ yuo nbɑ k b goli’i ɑ bin pɑk’i kuukuɑ kɑɑ, ŋɑɑn i jii i mɔnŋ tien Klistu dɑɑbɑ kii tuun lin nbɑ tie Yennu lonm nɑn i pɑlɑ kul ɑ.

⁷ I tuun i tuonɑ nɑn i pɑlɑ kul ɑ k lii tie nɑn i tuun k tien Yonmdɑɑnɔ tiɑɔnŋ o nɑ, k l k tie nisɑɑli kɑɑ,

⁸ kii tiɑn nɑn, l i tie dɑɑbl kuo wun nbɑ yen u mɔnŋ, suɑ kul sɑɑ lɑ u tuonŋɑnɑ pɑɑɔk Yonmdɑɑnɔ buol ni.

⁹ Cɑnbɑɑnbɑ, ii mun ii diɑ i dɑɑbɑ bonŋɑnn k dɑɑ diɑ’b nɑn ninmɔnn. Ii mun ii tiɑn nɑn yinm nɑn i dɑɑbɑ mɑnŋ kul ɑ tɑɑn mɔk Yonmdɑɑnɔ yenɔ kuɑ e *Yendɔunŋ ni, k u k mɔk luktn.

Jɑtiɑt nbɑ k Yennu tien nɑ lɑbɑɑl

¹⁰ Lin nbɑ juont tie nnɑ e, i cie i pɑlɑ Yonmdɑɑnɔ ni, kii mɔk yɑbint pɑnŋ nbɑ k u tul’i nɑ.

¹¹ I jii Yennu jɑtiɑt kul nɑ k liɑ, k lin te k yin fit nyɑnn *Sɑɑtɑn kpinkpɑnni.

¹² K mɑɑn t k kɔn nɑn wun nbɑ mɔk gbɑnɑnt nɑn sɔn kɑɑ, ŋɑɑn t kɔn nɑn nɑlnbiit e nɑn b yiikuo dɑnm, nɑn mɔtɑɑnɑ *dulnyɑ bunbɔnn ni yudɑnm, nɑn sɑnpɑɑpo nɑlnbiit.

¹³ L pɑɑk, i jii Yennu jɑtiɑt kul ɑ, nnɑ e k dɑbiil nbɑ tɑn sɑɑ bɑɑl nɑ dɑɑl, k i tɑn sɑɑ fit k kɔn k nyɑnn i dɑtɑɑk, k i tɑnŋ i kɔn k gbenn yuo nbɑ k yii sie fɑnu.

¹⁴ I set mɑn, k jii bɑlmɔni k bobn i sɑi ni, kii mɔk yentinu nbɑ tie nɑn *nɑɑgbɑnkɔnŋl nɑ,

¹⁵ k i tɑɑsɑɑt i tie lɑbɑmɑnn nbɑ tien niib mɑnu.

¹⁶ Lin nbɑ pukn nɑ pɑɑk, i jii i yɑdɑ k lii tie nɑɑgbɑnkɔnŋl nbɑ k i sɑɑ fit kii kpient Klistu dɑtɑɑk pieni nbɑ mɔk muu nɑ.

¹⁷ I jii i fielu k lii tie kut foklk, k Yennu mɑɑn mun i tie juk-bɑnjiɑk nbɑ k Foŋɑnm tien’i nɑ.

¹⁸ Ii tuun lin nbɑ nɑ kul miɑlu ni kii boi Yennu u sonml po. Ii mei Yennu mɑn yuo kul nɑn Foŋɑnm nbɑ wɑnn’i bɑnnu nbɑ. I cekn i mɔnŋ nɑn gbɑnkul kii mei Yennu yuo kul u niib kul pɑɑk.

¹⁹ I mun i mei Yennu kii tien’n k wun tul’n mɔbonɑ nbɑ ŋɑn yuo nbɑ k n sii piɑk, k n fit pɑk nɑn pɑlcienn k fit wɑnn niib lɑbɑmɑnn nɑ wuol ni lɑbɑɑl.

²⁰ Mɑɑ lek be dɑnsɑlk ni nɑ, ŋɑɑn n biɑ tie lɑbɑmɑnn mɑnŋ muɑnt-tuɑ e, ɑ mɑn fit k wɑnn niib lɑbɑmɑnn mɑnŋ. Ii mei Yennu mɑn k mii piɑk lɑbɑmɑnn mɑnŋ nɑn pɑlcienn nɑn lɑɑ kpɑɑ tɑlɑs biɑnŋ nbɑ nɑ.

Fuont juonti lɑbɑɑl

²¹ Mɔtɑɑnɑ, t nɑɑ bilonkɑk Tiikiik, wun nbɑ tie Yonmdɑɑnɔ tuontunnɔ nɑn bɑlmɔni nɑ, sɑɑ yet’i mɑɑ be biɑnŋ nbɑ nɑn lin nbɑ k n tuun.

²² L pɑɑk e k n tuun’ɔ i buol ni, ɑ wun wɑnn’i tɑɑ be biɑnŋ nbɑ k biɑ cie i pɑlɑ.

²³ Bɑɑ nɑn Yonmdɑɑnɔ Yiesu Klistu n tul t nɑɑ wɑɑs kul ɑ mɑnu nɑn lonm nbɑ nyii b yɑdɑ ni.

²⁴ Yennu ii mɔk ninkpɑbɑɔnŋ nɑn bin nbɑ kul luon t Yonmdɑɑnɔ Yiesu Klistu nɑn lonm nbɑ kɑɑ gbennu nɑ.