Efestieb 4 - Yiesu Lɑbɑmɑnn Muɑl Ni

Gbɑnɑn-yent kuɑ lɑbɑɑl

¹ Min nbɑ be dɑnsɑlk tuonɑ nbɑ k n tuun k tien Yonmdɑɑnɔ pɑɑk, n bɑln’mi e ɑ i ŋɑɑn k i binbenŋ i tie fɑnu nɑn Yennu nbɑ din luon k lii tie biɑnŋ nbɑ nɑ yuo nbɑ k u din yiin’i nɑ.

² I siknt i mɔnŋ, kii mɔk pɑlmɑɑsl nɑn suklu, kii di suklu nɑn lieb lonm pɑɑk.

³ Yɑɑ mɔk mɑnu nɑ pɑɑk, i yɑbl i mɔnŋ k biɑl mɔtɑɑɔk nbɑ k Foŋɑnm tul’i nɑ ni.

⁴ Gbɑnɑn-yent kuɑ e be, k Foŋɑn-yenɔ kuɑ mun be, nnɑ e k dindɑn-yenn kuɑ mun be k Yennu yiin’i l ni.

⁵ Yomdɑɑn-yenɔ kuɑ e be, k yɑdɑ yenn kuɑ be, k Yennu nyunwulu tie yenn kuɑ.

⁶ Yen-yenɔ be k tie nisɑɑli kul ɑ Bɑɑ, k biɑ tie suɑ kul ɑ Yonmdɑɑnɔ nbɑ tuun suɑ kul ni, k biɑ be siɑl kul ni.

⁷ *Klistu nbɑ tul’t lin nbɑ nɑ pɑɑk, suɑ kul ɑ gɑɑl u piini k l be l kuɑ,

⁸ nɑn lɑɑ ponŋ diɑn Yennu lolkpel kɑdɑɑɔk ni biɑnŋ nbɑ k yet ɑ: «Wɑɑ din duo sɑnpɑɑpo yuo nbɑ k u suol dɑnsɑli k duo nɑn’m, k tul nifosɑɑli piini.»

⁹ Tɔn, «U din duo sɑnpɑɑpo,» pɑɑk tie bee? L wɑnt nɑn sinsinn u din sik tingbounŋ nɑ ni e.

¹⁰ Ŋuɑ nbɑ din sik nɑ mɑnŋ e biɑ din duo sɑnpɑnɑɑgbenŋ nɑ, ɑ wun gbien Yennu nɑɑmi kul sɑɑk.

¹¹ Ŋuɑ e tul nisɑɑli piini, k gɑnn nisiɑb k tien’m tuomiinbɑ, k lieb mun tie sɔkniinbɑ, k yenm mun biɑ tien lɑbɑmɑnn muɑnt-tieb, k siɑb mun lek tie Klistu pɑstɑɑnbɑ nɑn wɑntieb.

¹² U tun lin nbɑ nɑ ɑ bin nbɑ tie Yennu niib kul ɑ n fit jɑnŋ u tuonɑ mɑnŋ e, k te k Klistu gbɑnɑnt n tɑnt,

¹³ nɑn yuo nbɑ k t sɑɑ tɑɑn tien yonm t yɑdɑ ni nɑn tɑɑ bɑnn Yennu Bijɑ biɑnŋ nbɑ, k t sɑɑ nyik t bisn k tien nikpelɑ, k gɑɑl Klistu binbenŋ nbɑ tie dede.

¹⁴ Ŋɑɑn t ji kii tie wɑɑs kɑɑ, k niib kpinkpɑnni wɑnnu sii diɑ’t lɑnŋ’t nɑn wounŋ nbɑ tuu lɑnŋ bulgbetl biɑnŋ nbɑ nɑ, k b fɑɑk wɑnnu te k lieb bɑɑ biit ni.

¹⁵ Ŋɑɑn t sii piɑk bɑlmɔni e nɑn lonm kii kpɑɑtl wun nbɑ tie gbɑnɑnt mɑnŋ yul nɑ ni, k ŋuɑ e tie Klistu.

¹⁶ Ŋuɑ e te k gbɑnɑnt bɔkɑ kul diɑ b lieb, k gbɑnɑnt mɑnŋ tuktɑ diɑ nɑn lieb. L kul ɑ i bo i tuun nɑn lieb cib cib, gbɑnɑnt mɑnŋ bo sii kpɑɑtl e nɑn lieb lonm ni.

T binbenpɑɑnŋ lɑbɑɑl

¹⁷ Gotl mɑn, lin nbɑ k n yien’i k biɑ wɑnt’i Yonmdɑɑnɔ sɑnn ni. I ji dɑɑ be nɑn bin nbɑ k mi Yennu, k b dudukt k mɔk nyuɑt nɑ.

¹⁸ B dudukt be bunbɔnn ni k b k pukn mɑnfuol nbɑ k Yennu yɑɑ wun tul niib nɑ ni, k mɑɑn b k mi siɑl i k biɑ k luon bin bɑnn siɑl.

¹⁹ B ji k tiin fei, k jii b mɔnŋ k tuun jɑknt tuonbuolu buolu kul, k k diɑ b mɔnŋ nɑn wɑɑnm-nnɑ wɑɑ.

²⁰ Ŋɑɑn yinm din k tumi ŋɑnn kɑɑ, k tɑn bɑnn Klistu.

²¹ I set din gbɑt u po wɑɑ, k yɑɑ tie u weilɑ nɑ, b din wɑnn’i bɑlmɔni nbɑ be u ni wɑɑ.

²² L pɑɑk, yɑbt i mɔnŋ mɑn k nyik i binbenkpelk nbɑ din te k i tuun lin nbɑ k i din tuu tuun nɑ. Binbenkpelk mɑnŋ nɑn niɑnbiiuk din te k i tɔkn sɔnu nbɑ sɑɑ biil’i.

²³ Ŋɑɑnt k i dudukt nɑn i pɑlɑ n ŋɑnm k pɑnt,

²⁴ kii mɔk binbenpɑɑnŋ nbɑ k Yennu tul’i nɑ, kii nɑɑn Yennu, kii be fɑnu, k yii tie niŋɑnm nɑn bɑlmɔni.

²⁵ L pɑɑk, ŋɑɑnt k i nyik fɑɑk, ŋɑɑn suɑ kul i piɑk bɑlmɔni kii tien u luɑ, k mɑɑn t tie gbɑnɑn-yent kuɑ e.

²⁶ L i tie k ɑ donn wutuol, ŋɑɑn ɑ dɑɑ tuun tuonbiit. A dɑɑ te k l do nɑn yenbɑɑk.

²⁷ k dɑɑ tien *Sɑɑtɑn yɑɑk.

²⁸ Wun nbɑ tuu jɑɑn, wun ji nyik jɑmu, ŋɑɑn tun tuonn nɑn u nii, k fit u mɔnŋ kii mɔk lin nbɑ k u sɑɑ sonm tɑlɑs-dɑnm.

²⁹ I dɑɑ te k mɔbonbiit nyi i mɔi ni, ŋɑɑn i te k i mɔbonɑ i mɔk nyuɑt, lin nbɑ sɑɑ sonm i lieb b yɑdɑ ni k sonm’b nɑn lin nbɑ siɑn, k biɑ ŋɑnm bin nbɑ gbiɑ i mɑɑn nɑ.

³⁰ I dɑɑ te k Foŋɑnm n lɑ pɑlbiil, k mɑɑn ŋuɑ e tie Yennu dɔuk i pɑɑk mɔkmɔk nɑn dɑɑl nbɑ k Yennu sɑɑ nyinn’i bonbiil kul ni.

³¹ I nyik tonu binbenŋ kul, nɑn wutuol. Suɑ ji dɑɑ mɔk kunkɔnciɑɔnŋ nɑn u luɑ, suɑ dɑɑ suki u luɑ, k biɑ nyik nɑnŋ dudukt kul ɑ i ni.

³² Ii tie bulcinm nɑn ninkpɑbɑɔnŋ dɑnm mɑn i lieb buol. Ii nyikt lieb biit kii cɑbt’b nɑn Yennu nbɑ nyikt i yɑlɑ k cɑbt’i biɑnŋ nbɑ Klistu pɑɑk nɑ.