Efestieb 3 - Yiesu Lɑbɑmɑnn Muɑl Ni

Pɔul tuun k tien bin nbɑ k tie Suifnbɑ

¹ Lin nbɑ nɑ pɑɑk e k min Pɔul wun nbɑ be dɑnsɑlk mɑɑ tuun *Klistu tuonn k tien yinm nbɑ k tie *Suifnbɑ nɑ pɑɑk, n mei Yennu.

² N k bils nɑn i ponŋ gbɑt ɑ Yennu tul’n tuonsiɑl u ninkpɑbɑɔnŋ pɑɑk ɑ n tun k tul’i.

³ U din fiit u wuol ni lɑbɑɑl k wɑnn’n nɑn mɑɑ ponŋ diɑn l po wɑɑnm-nnɑ nɑ.

⁴ L i tie k i lii mɑɑ diɑn lin nbɑ, i sɑɑ bɑnn nɑn n mi siɑl k jiin Klistu wuol ni lɑbɑɑl po,

⁵ lin nbɑ k u din k wɑnn niib siɑn yuo, ŋɑɑn mɔtɑɑnɑ Foŋɑnm ni e k Yennu wɑnn u tiɑɔnŋ tuomiinbɑ nɑn sɔkniinbɑ.

⁶ U wuol ni lɑbɑɑl tie nɑ e: lɑbɑmɑnn pɑɑk e k bin nbɑ k tie Suifnbɑ nɑn Suifnbɑ nɑ ji fit tɑɑn lɑ bonŋɑnɑ nbɑ k Yennu senn k tul u niib nɑ. B bɑnle ji tɑɑn tie gbɑnɑn-yent kuɑ k mɔsonn nbɑ k Yennu din senn Yiesu Klistu ni ji tie b yɑl.

⁷ Yennu ninkpɑbɑɔnŋ pɑɑk k u din tul’n yɑɑk, ɑ n tien u tuontunnɔ, kii muɑntl u lɑbɑmɑnn u yiikuo ni.

⁸ Yennu niib sinsuuk ni, min e tɑn juont wun nbɑ k be kɑnn ni, ŋɑɑn u ninkpɑbɑɔnŋ pɑɑk, k Yennu cɑb’n ɑ n muɑnt muɑnti k tul bin nbɑ k tie Suifnbɑ k wɑnn’b bɑnnu nbɑ k Klistu luon wun tul’t bonŋɑnɑ nbɑ kɑɑ pɑɑk,

⁹ k biɑ te k niib kul nuni n yent k bin bɑnn biɑnŋ nbɑ k Yennu wuol ni lol mɑnŋ tuun k gbient. Yɑɑyuo ni e wɑɑ, k Yennu nbɑ din nɑn bonsiɑl kul nɑ, din diɑ’l wuol ni,

¹⁰ ɑ k Klistu mɔtɑɑɔk niib pɑɑk bonɑ nbɑ kul mɔk yiikuo k be sɑnpɑɑpo n tɑn bɑnn u yɑnciɑɔnŋ nbɑ tie bɑnnu nbɑ.

¹¹ T Yonmdɑɑnɔ Yiesu Klistu ni e, k u din tun lin nbɑ nɑ nɑn u lol nbɑ kɑɑ piinu nɑn gbennu nɑ nbɑ tie biɑnŋ nbɑ.

¹² Tɑɑ tien Klistu yɑdɑ k be u ni nɑ pɑɑk, sɔnu ji be k t sɑɑ fit bɑɑl Yennu buol ni nɑn pɑlcienn.

¹³ L pɑɑk, n bɑln’mi e ɑ i dɑɑ te k i pɑlɑ n biil nɑn mɑɑ di fɑlɑ i pɑɑk nɑ, k mɑɑn l kul tie i nyuɑt pɑɑk e.

Klistu lonm lɑbɑɑl

¹⁴ Lin nbɑ nɑ pɑɑk, k n gbɑɑ n dunɑ pɑɑk Bɑɑ tuɑnn po,

¹⁵ wun nbɑ yɑɑ buol ni, k *Yendɔunŋ ni, nɑn tingbounŋ nɑ ni nibuolu kul gɑɑn b yejɑnm mɑɑlu ni sɑnɑ.

¹⁶ N mei’ɔ ɑ u dontl nbɑ yɑb bonciɑnn nɑ, ɑ wun nuɑb u yiikuo Foŋɑnm ni k pukn’i pɑnŋ i pɑlɑ ni,

¹⁷ ɑ k Klistu n jii i pɑlɑ k tien u binbebuol i yɑdɑ pɑɑk. N biɑ mei’ɔ ɑ wun te k i fit set cib, k bɑɑ jiinɑ k fɔkn fiɑkl, lonm ni,

¹⁸ ɑ k yinm nɑn Yennu niib kul n fit bɑnn Klistu lonm yɑlimu, nɑn l fɔknt, nɑn l sumiu nbɑ jɑn biɑnŋ nbɑ,

¹⁹ k i fit bɑnn Klistu lonm nbɑ gɑl siɑl kul k nilɔ sɑɑ fit gbɑt l pɑɑk, k biɑ gbie nɑn Yennu benu nɑ.

²⁰ Yennu wun nbɑ yɑɑ yiikuo tuun t ni nɑ pɑɑk, sɑɑ fit tun bonsiɑl kul nbɑ kɑɑ pɑɑk yuo nbɑ k t mei Yennu kuo yuo nbɑ k t duki siɑl pɑɑk.

²¹ Ŋuɑ e yen dontl Klistu mɔtɑɑɔk niib sinsuuk ni nɑn Yiesu Klistu ni yuo kul nɑn yuo nbɑ kɑɑ gbennu. * Amenn.