1 Tiimuote 6 - Yiesu Lɑbɑmɑnn Muɑl Ni

¹ L kpɑɑ tɑlɑs ɑ bin nbɑ kul tie dɑɑbɑ nɑ ii tien b yonmdɑnm bɑɑkciɑɔnŋ, k suɑ dɑɑ piɑk biil Yennu sɑnn nɑn t tuntl.

² Bin nbɑ k b yonmdɑnm tie Klistuweilɑ nɑ dɑɑ fiɑkt b yonmdɑnm mɑnŋ, bɑɑ yi’b b nɑɑ wɑɑs nɑ pɑɑk, ŋɑɑn l kpɑɑ tɑlɑs k ŋɑnm e n mɑntk tun fɑnu, k mɑɑn b yonmdɑnm nbɑ gɑɑn b tuonɑ nyuɑt nɑ tien *Klistu yɑdɑ, k Yennu luon’m. I wɑnt’b kii kpɑɑn’m lɑbɑɑl nɑ po.

Wɑnnu nbɑ k tie bɑlmɔni lɑbɑɑl

³ Suɑ i wɑnt wɑngɑnu k k wei t Yonmdɑɑnɔ Yiesu Klistu mɔbonɑ nɑn Yennu sɔnu wɑnnu nɑ,

⁴ u mɔk jɑpɑɑt bonciɑnn e k k bɑn siɑl. K mɔniɑɔk nɑn kunkɔnɑ tie nɑn yiɑlu nɑ k wɑɑ’u, k l bɑɑt nɑn *funfunn, nɑn kunkɔnɑ, nɑn nisukt, nɑn mɑbiit,

⁵ nɑn mɔniɑɔk yuo kul, ɑ nibiit nbɑ k b dudukt k sonm fɑnu k b k mɔk bɑlmɔni nɑ sinsuuk ni nɑ. B duki nɑn Yennu sɔnu tie sɔnu nbɑ sɑɑ te k nilɔ n tien mɔktɔ e.

⁶ L i tie k nilɔ nunm gbuo wɑɑ mɔk lin nbɑ, u yɑdɑ nɑn Yennu set tie mɔktuk k tul’ɔ.

⁷ T din k bɑɑl nɑn siɑl tingbounŋ nɑ ni, k t biɑ tɑn kɑn nyi nɑn bonsiɑl tingbounŋ nɑ ni,

⁸ ŋɑɑn t i mɔk jiet nɑn tiɑt, l ŋɑn k t nunm n gbuo’l.

⁹ Bin nbɑ luon b i tie mɔktɑ, ŋɑnm e bɑɑ jinjɑnmi ni, nɑn bɑlt ni, nɑn jɑti nɑn dudukbiit nbɑ biil niib k bɑɑnt’b yɑnn nɑ ni,

¹⁰ k mɑɑn likli lonm e tie bonbiil kul jiinn. Nisiɑb ponŋ jii b mɔnŋ k tien liklonbiiuk nɑ ni. L pɑɑk, k b ji k tien Klistu yɑdɑ. Ŋɑnn e te k b lɑɑt pɑlbibuolu buolu.

Pɔul kpɑɑn Tiimuote

¹¹ Ŋɑɑn fin nbɑ tie Yennu nilɔ nɑ, l ŋɑn k ɑ ciɑl nyi lin nbɑ nɑ nbɑ kul ɑ ni, ŋɑɑn kii luon fii tie niŋɑnɔ Yennu buol ni, kii be binbenŋ nbɑ gbuot Yennu nunm nɑ ni, kii mɔk yɑdɑ nɑn lonm nɑn suklu, kii be suon nnɑ.

¹² A yɑdɑ pɑɑk kɔnin kunkɔnŋɑnn, k suol mɑnfuol nbɑ kɑɑ gbennu nbɑ k Yennu din yiin’ɑ ɑ fɑn gɑɑl yuo nbɑ k ɑ din nyinn ɑ mɔnŋ siɑlŋɑnn niib bonciɑnn nunm ni nɑ.

¹³ Mɑɑ be Yennu nbɑ tien bonsiɑl kul mɑnfuol nɑ tuɑnn, k be Yiesu Klistu nbɑ din nyinn u mɔnŋ yɑdɑ siɑlŋɑnn, Pɔns *Piilɑɑt nunm ni nɑ tuɑnn, n kpɑɑn’ɑ

¹⁴ ɑ fii diɑ wɑnnu nɑ bɑnnu nbɑ k suɑ k fit tɑɑl’ɑ l pɑɑk mɔkmɔk nɑn dɑɑl nbɑ k t Yonmdɑɑnɔ Yiesu Klistu nɑ tɑn sɑɑ dɔkt.

¹⁵ Yennu nbɑ k t piɑk’ɔ nɑ, wun nbɑ tie Yudɑɑnɔ, k biɑ tie kpɑnbɑlɑ kul Kpɑnbɑl, k biɑ tie yonmdɑnm kul Yonmdɑɑnɔ. Ŋuɑ e tɑn sɑɑ te k wun dɔkt yuo nbɑ jɑnŋ.

¹⁶ Ŋuɑ kuukuɑ e kɑn kpo. U be yentciɑɔnŋ nbɑ k nilɔ kɑn fit nɑkn ni. Ŋuɑ e k nisuɑ dɑɑ k mi lɑ’u ɑmi k sɑɑ fit lɑ’u. Ŋuɑ e yen bɑɑkl nɑn yiikuo yuo nbɑ kɑɑ gbennu. * Amenn.

¹⁷ A kpɑɑn tingbounŋ nɑ mɔktɑ nɑ, ɑ b dɑɑ mɔk dont-n-mɔnŋ ɑmi bin tien b dindɑnn mɔktuk nbɑ tie wounŋ nɑ ni, ŋɑɑn bin tien b dindɑnn kul Yennu ni, wun nbɑ tul’t bonsiɑl kul, ɑ t gɑɑl kii mɔk pɑlpienn.

¹⁸ A kpɑɑn’m, ɑ bii tuun tuonŋɑnɑ, k b tuonŋɑnɑ mɑnŋ ii yɑb, k b nii i yɑɑ nɑn piini tulu.

¹⁹ Nnɑ e k b sii mɔk mɔktuk yuo nbɑ bɑɑt k sɑɑ fit lɑ mɑnfuol nbɑ tie bɑlmɔni mɑnfuol.

²⁰ Tiimuote, ii guu lin nbɑ k b tien ɑ nuu ni nɑ. A nyik lɑbɑfɑɑnu nbɑ k mɔk nyuɑt k biɑ k tɑɑ nɑn lɑbɑmɑnn wɑnnu nɑ, k biɑ dɑɑ gbiin lin nbɑ k b yi’l bɑnnu ŋɑɑn k l k tie bɑnnu kɑɑ.

²¹ Nisiɑb yet ɑ b mɔk bɑnnu mɑnŋ, ŋɑɑn k l pɑɑk k b nyik lɑbɑmɑnn wɑnnu. Yennu ninkpɑbɑɔnŋ ii be nɑn’i.