1 Tiimuote 5 - Yiesu Lɑbɑmɑnn Muɑl Ni

Tiimuote tuonɑ nɑn Klistuweilɑ lɑbɑɑl

¹ L i tie k ɑ yɑɑ ɑ tɑɑl jɑkpelsuɑ, ɑ dɑɑ yɑki nɑn’ɔ, ŋɑɑn pɑk tul’ɔ nɑn ɑ mɔnŋ mɔnŋ bɑɑ nɑ. Ii be nɑn nɑɑsinm nɑn ɑ mɔnŋ mɔnŋ nɑɑ wɑɑs nɑ,

² kii be nɑn puokpelɑ nɑn b tie ɑ nɑɑnbɑ e nɑ, kii be nɑn puopɑɑni nɑn b tie ɑ niipuob e nɑ, kii be nɑn b kul ɑ bɑnnu nbɑ k suɑ kɑn fit tɑɑl’ɑ nɑn wɑɑn ɑ.

³ Ii tien pɑkɔi nbɑ be b kuukuɑ nɑ nibɑɑkl,

⁴ ŋɑɑn pɑkɔsuɑ nbɑ mɔk wɑɑs ɑmi yɑɑbuonɑ, u wɑɑs ɑmi u yɑɑbuonɑ n tun tuonŋɑnɑ nbɑ k b yɑdɑ nɑn *Klistu wɑnn’b nɑ sinsinn k tul b mɔnŋ ŋei ni. Nnɑ e k b dɑnm mun sɑɑ di b niwubt nyuɑt, k mɑɑn lin nbɑ k Yennu luon e nɑ.

⁵ Ŋɑɑn mɔmɔnm pɑkuɑk nbɑ kɑɑ suɑ nɑ, u dindɑnn be Yennu ni, k u mei Yennu sonml po yennu ni nɑn nyiɑɔk.

⁶ Ŋɑɑn pɑkuɑk nbɑ tuun gbɑnɑnt lonm, u ponŋ kpo e wɑɑ ŋɑɑn dɑɑ be mɑnŋ.

⁷ Tuln niib wɑnnu nɑ; k suɑ dɑɑ fit tɑɑl’b.

⁸ Wun nbɑ k goli u nikpiinm, ɑmi lin nbɑ mɑntk gɑl tie u kii fiin u mɔnŋ mɔnŋ ŋɑɑk niib po, l dɑɑnɔ ji yet u yɑdɑ wɑɑ, k wun nbɑ k tien Klistu yɑdɑ sɔ’u.

⁹ A dɑɑ kɑɑn pɑkuɑk nbɑ dɑɑ k kpet gɑl binɑ piinluob nɑ k kuɑnt pɑkɔi kɑnn ni. K biɑ jen ɑ, l ŋɑn k wuu tie puo nbɑ mi k kun jɑyenɔ kuɑ e,

¹⁰ kii mɔk sɑnŋɑnn u tuonŋɑnɑ pɑɑk, kii tie wun nbɑ wubl u wɑɑs fɑnu, k tuu gɑɑn sɑɑnm u ŋɑɑk ni, k tuu wu Klistuyɑb tɑɑ, k tuu sonmt tɑlɑs-dɑnm, k tuu tuun tuonŋɑnɑ buolu kul.

¹¹ Ŋɑɑn ɑ dɑɑ puki puopɑɑni nbɑ tie pɑkɔi b kɑnn ni, k mɑɑn b gbɑnɑnt lonm i nyɑnn b Klistuweiu, b tuu luon bin kun jɑb e,

¹² k ji pot b mɔsonn nbɑ k b din senn tul’ɔ sinsinn nɑ, k ji kuɑ biit ni l pɑɑk.

¹³ Lin nbɑ pukn, bɑɑ k mɔk tuonn nɑ, k b lin k luɑn ŋei, l k tie bɑɑ k mɔk tuonn kuukuɑ pɑɑk kɑɑ, ŋɑɑn b biɑ lin k piɑk mɑyɑnɑ k kuɑ lin nbɑ k lɑ’b ni, k piɑk bɑlkpiennɑ.

¹⁴ L pɑɑk, min bo sii luon k puopɑɑni nbɑ tie pɑkɔi nɑ n kun jɑb e k mɑl wɑɑs, k got b ŋei fɑnu, k t dɑtɑi dɑɑ lɑɑt yɑɑk k piɑk biit jiint t po,

¹⁵ k mɑɑn pɑkɔsiɑb ponŋ tunn wɑɑ *Sɑɑtɑn e.

¹⁶ Ŋɑɑn puosuɑ nbɑ tie Klistuweilɔ k pɑkɔi be u ŋɑɑk ni, l kpɑɑ tɑlɑs e nɑn wun got’b fɑnu, k dɑɑ jikt’b k jint Klistu mɔtɑɑɔk niib, k Klistu mɔtɑɑɔk niib n fit got pɑkɔi nbɑ be k k mɔk dɑnm nɑ.

¹⁷ Klistu mɔtɑɑɔk niib *sɑɑkɑb nbɑ diɑ’b fɑnu nɑ ŋɑn nɑn nibɑɑkl bonciɑnn, k bin nbɑ muɑntl Klistu lɑbɑɑl k wɑnt’b l pɑɑk, ŋɑnm e mɑntk ŋɑn nɑn nibɑɑkl,

¹⁸ k mɑɑn l diɑn Yennu lolkpel kɑdɑɑɔk ni ɑ: «Nɑɑb i tuun dijɑɑn-yuo, fɑɑ dɑɑ bobnt u mɔb,» k biɑ diɑn ɑ: «Tuontunnɔ ŋɑn k wun gɑɑl u pɑɑɔk.»

¹⁹ A dɑɑ ŋɑɑnt k b tɑɑl sɑɑkɑsuɑ, sie k b tie niib bɑnle ɑmi bɑntɑ.

²⁰ Bin nbɑ tuun biit nɑ, ii yɑki nɑn’m, niib ni, k bin nbɑ biɑl nɑ n tin jɑŋmɑɑni.

²¹ Yennu tuɑnn nɑn Yiesu Klistu tuɑnn nɑn mɑlɑkɑɑnbɑ tuɑnn po k n yien’ɑ nɑn ninmɔnn, ɑ fɑn sɑk wɑnnu nɑ k dɑɑ mɔk ningɑnsɑi ɑmi luktn k tien nisuɑ bonsiɑl kul ni.

²² A dɑɑ yiin ɑ nii suɑ pɑɑk yiɑn yiɑn, ɑ wuu tuun tuonsiɑl Klistu mɔtɑɑɔk niib sinsuuk ni. A dɑɑ kuɑnt ɑ nuu niib tuonbiit tumu ni, ŋɑɑn i diɑ ɑ mɔnŋ bɑnnu nbɑ k b k fit tɑɑl’ɑ l pɑɑk.

²³ A lɑɑfiɑ nbɑ k jɑnŋt’ɑ nɑ pɑɑk, ɑ dɑɑ nyu nyun kuukuɑ, ŋɑɑn ɑ tuu nyu dɑmunŋ wɑɑn k lin sonm ɑ nuɑk ni.

²⁴ Nisiɑb tuonbiit ponŋ duɑ pɑɑnu ni e yuo nbɑ k b dɑɑ k bu b buut, ŋɑɑn k nisiɑb tuonbiit mun sɑɑ nyi pɑɑnu b buut bunu puolpo e.

²⁵ Tuonŋɑnɑ mun biɑ tie nnɑ e, l yenn-nbɑ nyii pɑɑnu wɑɑ, k lin nbɑ lek k nyii pɑɑnu ni, ŋɑɑn l kɑn fit bɔl.