1 Tiimuote 4 - Yiesu Lɑbɑmɑnn Muɑl Ni

Bin nbɑ muɑntl fɑɑk wɑnnu lɑbɑɑl

¹ Tɔn, Foŋɑnm pɑk k yent’t ɑ: dɑjuonti dɑɑ ni, nisiɑb sɑɑ nyik b yɑdɑ nɑn *Klistu nɑ wɑɑ, ŋɑɑn sɑk wɑɑ nɑlnbiit nbɑ kpɑnn’b nɑ, k biɑ wɑɑ nɑlnbiit wɑnnu.

² L dɑnm bot kpinkpɑni dɑnm mɑnŋ pɑɑk ɑ. K kpinkpɑni dɑnm mɑnŋ yɑn ni ji kpo k kɑb nɑn bɑɑ tuu jii kut-tont k fiɑ bonn nɑ.

³ L nibuolu wɑnt, ɑ jɑkunt nɑn puokuɑnt k ŋɑn, ɑ k jesiɑt biɑ k ŋɑn nɑn dinu. Ŋɑɑn tinm nbɑ tien Klistu yɑdɑ k biɑ mi l bɑlmɔni nɑ, mi nɑn Yennu din nɑn jebuolu kul ɑ, ɑ niib n tuu tul’ɔ niipuouk l pɑɑk e ŋɑɑn di.

⁴ Bonsiɑl kul nbɑ k Yennu din nɑn nɑ ŋɑn. T tuu tul’ɔ niipuouk l pɑɑk ŋɑɑn gɑɑl’l, k dɑɑ yien siɑl,

⁵ k mɑɑn Yennu mɑɑn nɑn yenmiɑlu pɑɑk e te k l ŋɑn Yennu buol ni.

Yiesu Klistu tuontunŋɑnɔ lɑbɑɑl

⁶ L i tie k ɑ jii wɑnnu nbɑ nɑ k tul t nɑɑ wɑɑs nɑ, ɑ sii tie Klistu tuontunŋɑnɔ nbɑ dint u mɔnŋ nɑn Klistu lɑbɑmɑnn mɔbonɑ nɑn bɑlmɔni wɑnnu nbɑ k ɑ wɑɑ fɑnu nɑ e.

⁷ Ŋɑɑn yet fɑɑk lɑbɑɑl nbɑ sɑɑ te k ɑ yɑdɑ n bɑɑ. Yɑbt ɑ mɔnŋ pɑɑk kii be bɑnnu nbɑ sii gbuot Yennu nunm.

⁸ Lin nbɑ k nilɔ tuun k be lɑɑfiɑ ni mɔk nyuɑt wɑɑnm-nnɑ e, ŋɑɑn lin nbɑ k u tuun k be binbenŋ nbɑ gbuo Yennu nunm nɑ mɔk nyuɑt bonɑ kul ni, k sonmt’ɔ mɔtɑɑnɑ nɑn yuo nbɑ bɑɑt nɑ.

⁹ Lin nbɑ nɑ tie bɑlmɔni e, k l ŋɑn nɑn niib kul n gɑɑl’l.

¹⁰ L pɑɑk e te k t gbɑɑ k tuun nɑn ninmɔnn k mɑɑn t mɔk dindɑnn Yennu nbɑ fo ni, wun nbɑ tie suɑ kul Fietuɑ, k u set sɑɑ tul bin nbɑ tien’ɔ yɑdɑ nɑ fielu wɑɑ.

¹¹ Wɑnt’b k kpɑɑn’m lin nbɑ nɑ kul ɑ.

¹² Dɑɑ te k suɑ n siɑn’ɑ k mɑɑn fɑɑ pɔ nɑ pɑɑk, ŋɑɑn te k ɑ pinpɑɔk nɑn ɑ binbenŋɑnŋ, nɑn ɑ lonm, nɑn ɑ yɑdɑ, nɑn fɑɑ wei Yennu *senni bɑnnu nbɑ nɑ, n wɑnn Klistuweilɑ bɑɑ bo sii be biɑnŋ nbɑ.

¹³ Jiin ɑ yuo k lii Yennu lolkpel kɑdɑɑɔk k tul’b k biɑ wɑnn’b l pɑɑk, kii muɑntl Klistu mɑɑn mɔkmɔk nɑn yuo nbɑ k n tɑn sɑɑ bɑɑl.

¹⁴ Dɑɑ tɑnmt Foŋɑnm piini nbɑ be ɑ ni k ɑ din gɑɑl’l sɔkniinbɑ mɑɑn pɑɑk yuo nbɑ k *sɑɑkɑb din yii b nii ɑ pɑɑk nɑ.

¹⁵ Ii tuun lin nbɑ nɑ nɑn ninmɔnn, k suɑ kul n lɑ ɑ puknu.

¹⁶ Ii mi ɑ mɔnŋ nɑn ɑ wɑnnu po. Ii wɑki l kul ni. Setk nɑn mɔni, ɑ i tuun nnɑ ɑ sɑɑ lɑ fielu ɑ mɔnŋ k bin nbɑ gbiintl ɑ mɑɑn nɑ mun sɑɑ lɑ fielu wɑɑ.