1 Tiimuote 2 - Yiesu Lɑbɑmɑnn Muɑl Ni

Klistuweilɑ jɑɑnti lɑbɑɑl

¹ L pɑɑk, sinsinn n wɑnn’ɑ nɑn l ŋɑn k niib ii mei Yennu, kii boi’ɔ bonɑ po, kii tien’ɔ niipuouk niib kul ɑ pɑɑk.

² Ii mei Yennu kpɑnbɑlɑ nɑn bin nbɑ kul tie yiikuo dɑnm nɑ pɑɑk, ɑ tin fit kii be nɑn lɑɑfiɑ nɑn mɑnu, kii tie Yennu yɑb cɑin, kii mɔk binbenŋ nbɑ k niib k fit tɑɑl’t l pɑɑk.

³ Ŋɑnn e ŋɑn k pent t Fietuɑ Yennu pɑl ni,

⁴ wun nbɑ luon k suɑ kul n lɑ fielu k tɑn bɑnn bɑlmɔni nbɑ tie lin nbɑ,

⁵ k mɑɑn Yen-yenɔ kuɑ e be, k sindɑntinnɔ tie yenɔ kuɑ k be Yennu nɑn nisɑɑlk sinsuuk ni. L dɑɑnɔ e tie juɑ nbɑ tie Yiesu *Klistu

⁶ wun nbɑ din jii u mɔnŋ k pɑ suɑ kul pɑɑk, ɑ wun nyinn’b dɑɑbs ni. Ŋɑnn e din tie *siɑlɑ yuo nbɑ k Yennu luon.

⁷ L pɑɑk k Yennu lukt’n k n tien Klistu tiɑɔnŋ *tuomi k wɑnn bin nbɑ k tie *Suifnbɑ lin nbɑ tie yɑdɑ nɑn lin nbɑ tie bɑlmɔni. N k fɑ fɑɑk kɑɑ. L tie bɑlmɔni e.

⁸ N luon k jɑb ii mei Yennu siɑn nbɑ kul k bin donn b nii kii mei Yennu k siɑl ɑ jɑknt dɑɑ be b pɑlɑ ni k mɔniɑɔk nɑn wutuol biɑ dɑɑ be b sinsuuk ni.

⁹ N biɑ luon k puob ii liɑ tiɑt nɑn sikn-n-mɔnŋ nɑn bɑnnu nbɑ k niib kɑn fit tɑɑl’b l pɑɑk nɑ. B dɑɑ loln yut nɑn jɑpɑɑt, k dɑɑ piil sɑlnbɑnɑ k biɑ dɑɑ tuu sɑlmɑ tuutuutɑ k biɑ dɑɑ liɑ liɑnt nbɑ dɑɑɔk pɑɑl,

¹⁰ ŋɑɑn kii tuun tuonŋɑnɑ nɑn puob nbɑ wɑnn b mɔnŋ nɑn b cɔln Yennu nɑ.

¹¹ Puob ii ŋmin kii gɑɑn wɑnnu nɑn cɔlnt kul ɑ.

¹² N k cɑb puo ɑ wun jii wɑnnu k tul juɑ ɑmi wuu mɔk yiikuo juɑ pɑɑk. Sie k wuu ŋmin.

¹³ K mɑɑn Yennu din dɔnŋ nɑn Adɑn e sinsinn, k l puolpo wɑɑ, k u nɑn Ef.

¹⁴ L din k tie Adɑn kɑɑ k *Sɑɑtɑn kpɑnn’ɔ, ŋɑɑn u din kpɑnn puo e k u din biil Yennu *senni.

¹⁵ Ŋɑɑn puo sɑɑ lɑ fielu, wɑɑ mɑl wɑɑs bɑnnu nbɑ nɑ ni, l i tie k u tien Yiesu yɑdɑ, k luon niib, k be binbenŋ nbɑ k niib k fit tɑɑl’ɔ l pɑɑk nɑ ni.