1 Tiimuote 1 - Yiesu Lɑbɑmɑnn Muɑl Ni

Fuonti

¹ Min Pɔul tie Yiesu *Klistu *tuomi, k mɑɑn t Fietuɑ Yennu nɑn Yiesu Klistu wun nbɑ tie t dindɑnn nɑ tul’n mɔb.

² Min e dɑ kɑdɑɑɔk nɑ k tien fin Tiimuote, wun nbɑ tie n bimɔnŋ, yɑdɑ tienu ni nɑ. Yennu wun nbɑ tie Bɑɑ nɑn t Yonmdɑɑnɔ Yiesu Klistu ii mɔk ninkpɑbɑɔnŋ nɑn nyikcɑbu nɑn’ɑ, k biɑ tul’ɑ mɑnu.

Fɑɑk wɑnnu lɑbɑɑl

³ Ii be Efes nɑn mɑɑ ponŋ din yet’ɑ biɑnŋ nbɑ yuo nbɑ k n din sɑɑ Mɑɑseduɑnn nɑ, ɑ ɑ te k nisiɑb nbɑ wɑnt wɑnbuolgɑnu nɑ n nyik’l

⁴ k dɑɑ fiin b yejɑnm ni bɑlkpelɑ nbɑ tie fɑɑk nɑ po nɑn b yejɑnm sɑnɑ kɑnu po. Ŋɑnn e bɑɑt nɑn mɔniɑɔk k k sonmt nilɔ k u bɑnt Yennu nbɑ lol, ɑ niib n lɑ fielu bɑnnu nbɑ nɑ. Yɑdɑ pɑɑk e te k b bɑnn’l.

⁵ N kpɑɑni mɑnŋ pɑɑk tie lin fiin nilɔ pɑl ni lonm nbɑ nyuɑn bon-yenn kuɑ, nɑn *dudukŋɑnt nɑn mɔmɔnm yɑdɑ.

⁶ Nisiɑb nyik lin nbɑ nɑ wɑɑ, ŋɑɑn bot kuɑ jɑt-lɑbɑfɑɑnu ni.

⁷ B luon bii tie Yennu *senniwɑntieb e, ŋɑɑn k k mi b mɔnŋ mɔnŋ mɔbonɑ pɑɑk, k biɑ k mi bɑɑ piɑk lin nbɑ po mɑnŋ pɑɑk, ŋɑɑn b yien ɑ l tie bɑlmɔni e.

⁸ T mi nɑn *senni mɑnŋ ŋɑn, l i tie k nilɔ tuun nɑn’n Yennu nbɑ luon bɑnnu nbɑ nɑ.

⁹ I tiɑn nɑn senni k sie bin nbɑ tie niŋɑnm Yennu buol ni nɑ pɑɑk kɑɑ, ŋɑɑn l sie bin nbɑ tie mɔyetdɑnm nɑ pɑɑk e, nɑn bin nbɑ k tiin Yennu, nɑn biitdɑnm pɑɑk, nɑn jɑknt dɑnm, nɑn bin nbɑ k tien Yennu nibɑɑkl pɑɑk, nɑn bin nbɑ kpi b bɑɑnbɑ nɑn b nɑɑnbɑ, nɑn nikpiilɑ,

¹⁰ nɑn boncunconɑ pɑɑk, nɑn bin nbɑ mɔk niɑɔnŋ k duɑ nɑn b jɑlieb, nɑn bin nbɑ tie dɑɑbɑ kpinkpounŋ, nɑn bin nbɑ tie fɑɑk dɑnm, nɑn bin nbɑ tuu senn mɔsonɑ ŋɑɑn tɑn kɑn gbien nɑ, nɑn lin nbɑ kul k wɑɑ bɑlmɔni wɑnnu pɑɑk.

¹¹ Bɑlmɔni wɑnnu mɑnŋ nyii Klistu lɑbɑmɑnn nbɑ k Yennu din tul’n ɑ n muɑnt nɑ ni e, lɑbɑmɑnn mɑnŋ piɑk Yennu nbɑ ŋɑn nɑn dontl kul, k tie wun nbɑ tul’t bonŋɑnɑ kul nɑ po.

Yennu ninbɑtinu lɑbɑɑl

¹² N tien t Yonmdɑɑnɔ Yiesu Klistu wun nbɑ tul’n pɑnŋ, ɑ mɑn tun u tuonɑ niipuouk, k mɑɑn ŋuɑ e yet ɑ n jɑnŋ nɑn u tuonɑ mɑnŋ, k te k n tuun tien’ɔ,

¹³ mɑɑ lek din piɑk bonbiil k jiin u po k muks’ɔ k suki’ɔ nɑ, ŋɑɑn u din tin’n ninbɑɑɔk k mɑɑn n din k tien yɑdɑ k biɑ k mi mɑɑ din tuun lin nbɑ.

¹⁴ T Yonmdɑɑnɔ din tɑn tin’n ninbɑɑɔk nbɑ yɑb k kɑɑ biknu, k tul’n yɑdɑ nɑn lonm nbɑ k t mɔk Yiesu Klistu ni nɑ pɑɑk.

¹⁵ Gotl mɑn, lɑbɑɑl nbɑ tie bɑlmɔni k ŋɑn nɑn niib kul n gɑɑl’l e nɑ: Yiesu Klistu din bɑɑl tingbounŋ nɑ ni, ɑ wun tɑn fiel biitdɑnm e, k min e bi k gɑl b kul ɑ.

¹⁶ Ŋɑɑn lin nbɑ nɑ pɑɑk k Yennu din tin’n ninbɑɑɔk, ɑ min nbɑ tie biitdɑnm yudɑɑnɔ nɑ ni, Yiesu Klistu n fit wɑnn u suklu nbɑ kɑɑ pɑɑk k tul bin nbɑ sii tie’u yɑdɑ bii mɔk mɑnfuol nbɑ kɑɑ gbennu.

¹⁷ Tɔn, k mɔtɑɑnɑ Kpɑnbɑl nbɑ kɑɑ gbennu, k kɑn mi kpo, k suɑ k lɑɑt’ɔ, k u kuukuɑ tie Yennu, ŋuɑ e ŋɑn nɑn sɑnn nɑn dontl nɑn yuo nbɑ kɑɑ gbennu. * Amenn.

¹⁸ N bik Tiimuote, n jikt kpɑɑni mɑnŋ k tie ɑ nuu ni, k l tɑɑ nɑn sɔkniinbɑ nbɑ din pɑk ɑ po siɑn yuo nbɑ gɑl nɑ. Jiin mɑɑn mɑnŋ k tien’l ɑ jɑtiɑt k kɔn kunkɔnŋɑnn,

¹⁹ kii diɑ ɑ yɑdɑ nɑn tuntŋɑnn nbɑ k suɑ k fit tɑɑl’ɑ l pɑɑk. Nisiɑb yet lin nbɑ nɑ, k ŋɑɑn k b yɑdɑ biil.

²⁰ B siɑb e tie Hiimene nɑn Aleksɑndl, k n dɑɑn jii’b tien’m *Sɑɑtɑn nuu ni, ɑ bin bɑnn nɑn l ŋɑn bin nyik bɑɑ tuu piɑk biil bɑnnu nbɑ k jiin Yennu po.