1 Sɑn 3 - Yiesu Lɑbɑmɑnn Muɑl Ni

Yennu wɑɑs

¹ Lek gotl mɑn lonbuolu nbɑ k Bɑɑ Yennu mɑntk luon’t nɑ. U lonm mɑnŋ mɑntk ji sɑɑ yɑbt e, k u yi’t u wɑɑs, k t set tie u wɑɑs e. Tingbounŋ nɑ ŋɑɑtieb k mi’t, k mɑɑn b k mi ŋuɑ Yennu.

² N yuɑsnbɑ, mɔtɑɑnɑ t tie Yennu wɑɑs e, ŋɑɑn tɑɑ tɑn sii tie biɑnŋ nbɑ dɑɑ bɔl e. Ŋɑɑn tɑɑ mi lin nbɑ e nɑ: *Klistu i tɑnŋ i dɔkt, t tɑn sii tie nɑn ŋuɑ nɑ e, k mɑɑn t sɑɑ lɑ wɑɑ set tie biɑnŋ nbɑ.

³ Nilɔ kul nbɑ mɔk dindɑnn nɑn u jenu nɑ, k mɔk biit nɑn Yiesu nbɑ k mɔk biit biɑnŋ nbɑ nɑ.

⁴ Dɑɑnsuɑ kul nbɑ tuun biit biil Yennu *senni e. Setk nɑn mɔni, biit tie Yennu senni biilu e.

⁵ I mi nɑn Yiesu Klistu din bɑɑl tingbounŋ nɑ ni, ɑ wun nyinn t biit e, k biit kɑɑ u ni.

⁶ Wun nbɑ be u ni nɑ k tuun biit. Wun nbɑ tuun biit, k mi lɑ Yiesu k biɑ k mi’u.

⁷ N wɑɑs, i dɑɑ sɑɑk k suɑ n kpɑnn’i ni. Dɑɑnɔ nbɑ tuun lin nbɑ ŋɑn Yennu buol ni nɑ, mun tie niŋɑnɔ Yennu buol e nɑn Yiesu nbɑ tie Ŋɑnɔ u buol nɑ.

⁸ Wun nbɑ tuun biit, ŋuɑ e tie *Sɑɑtɑn yuɑ k mɑɑn Sɑɑtɑn din piin k tuun biit tingbounŋ pinpiik ninŋ e. Yennu Bijɑ Yiesu set din bɑɑl ɑ wun biil Sɑɑtɑn tuonɑ e.

⁹ Wun nbɑ tie Yennu bik, u ji k tuun biit, k mɑɑn yiikuo nbɑ nyii Yennu buol nɑ be u ni, k mɑɑn Yennu tie u Bɑɑ. L pɑɑk k u ji kɑn fit kii tuun biit.

¹⁰ Dɑɑnsuɑ nbɑ k tuun lin nbɑ ŋɑn k tie Yennu bik, k dɑɑnɔ nbɑ k luon u nɑɑ bik biɑ k tie Yennu bik kɑɑ. Nnɑ e k t mi bin nbɑ tie Yennu wɑɑs nɑn bin nbɑ tie Sɑɑtɑn wɑɑs.

T sii luon t lieb

¹¹ L ŋɑn k tii mɔk lonm nɑn t lieb. Ŋɑnn e tie mɑɑn nbɑ k i din gbɑt pinpiik ni nɑ.

¹² L k ŋɑn k tii tuun nɑn Kɑɑen nbɑ din tuun biɑnŋ nbɑ nɑ. Ŋuɑ din tie pol yuɑ e, k din kpii u wɑɑlɔ. Biɑ pɑɑk e te k u din kpii’u? U tiɑɔnŋ tuonɑ din bi ŋɑɑn k u wɑɑlɔ yɑl ŋɑn.

¹³ Tɔn, n nɑɑ wɑɑs, l i tie k tingbounŋ nɑ ŋɑɑtieb nɑn’i, i dɑɑ te k l tie’i bɑktnɔunŋ.

¹⁴ T mi nɑn t nyii kuun ni ŋɑɑn kuɑ mɑnfuol ni e, k mɑɑn t luon t nɑɑ wɑɑs. Wun nbɑ k mɔk lonm u pɑl ni nɑ be kuun ni e.

¹⁵ Wun nbɑ mun nɑn u nɑɑ bik nɑ, tie nikpiiluk o, k i mi nɑn mɑnfuol nbɑ kɑɑ gbennu kɑɑ u ni.

¹⁶ Gotl mɑn, Yiesu nbɑ din gɑɑl t pɑɑk k kpo nɑ e wɑnt’t lonm nbɑ tie lin nbɑ, k l kpɑɑ tɑlɑs k tii gɑɑn t nɑɑ wɑɑs pɑɑk kii kpenn.

¹⁷ Dɑɑnɔ nbɑ mɔk, ŋɑɑn lɑ u nɑɑ bik k u k mɔk siɑl, k u bɑkɑ kɑɑ u ni, nlee k u sɑɑ yet ɑ, Yennu lonm be u ni?

¹⁸ N wɑɑs, l k ŋɑn k t lonm i be t mɔi ni nɑn t mɔbonɑ ni kuukuɑ kɑɑ, ŋɑɑn k lii tie bɑlmɔni lonm nbɑ k nilɔ sɑɑ fit lɑ t tuonɑ ni.

T sii mɔk pɑlcienn Yennu buol

¹⁹ Gotl bɑnnu nbɑ k t sɑɑ bɑnn nɑn t wɑɑ bɑlmɔni, nɑn bɑnnu nbɑ k t mɔk pɑlmɑnn Yennu buol.

²⁰ L i tie k t dudukt tɑl’t, t mi nɑn Yennu cie t dudukt k biɑ mi bonsiɑl kul.

²¹ Tɔn, n yuɑsnbɑ, t dudukt i kii wɑnn’t nɑn t mɔk biit, t mɔk pɑlmɑnn Yennu buol,

²² k t lɑɑt lin nbɑ kul k t mei’ɔ l po k mɑɑn t sɑɑk u senni k tuun lin nbɑ pent u pɑl.

²³ Yennu nbɑ senn lin nbɑ e nɑ: ɑ t tien u Bijɑ Yiesu Klistu yɑdɑ kii luon t lieb nɑn wɑɑ din senn’t senni biɑnŋ nbɑ nɑ.

²⁴ Wun nbɑ sɑɑk Yennu senni nɑ be u ni k Yennu mun biɑ be u ni. Wɑɑ din tul’t Foŋɑnm nɑ pɑɑk k t mi nɑn u be t ni.