Yoane 7 - Mɨkan wu Fi

Yeso bo bɨ Ɨbɔmbɨma ɨbyi bə Mbáŋnɨ́ ə

¹ Məzen a ghɨnə ntsá, Yeso a núm nkárɨ́ a mu Galili ə. A sé ndǒ ɨ num kárɨ́ a mu Yudiya, mbɨ́ʼ ngə́ bɨsáʼ bɨ ɨlaʼ bɨ bə Yuda ɨwu kə́ ndǒ njwitɨ zɨə.

² Nkfu Nɨdorɨ nɨ Mɨntaŋ ɨ tíʼ abó ə.

³ Ma lan, ɨbɔmbɨma bɨ Yeso bə mbáŋnɨ́ tíʼ sóŋ wəmbo ngə́, “Nyɛʼtɨ adiʼ zen ngɛn agho a Yudiya, taŋ á bɨyɛʼ ɨbo zen ɨnu tsa o ghɨnə ghe.

⁴ Mbɨ́ʼ ngə́ ka ŋwɔn tsɛrə a faʼə ayi a ndzum nkubə mbáʼ be a ndǒ ngə́ á bɨ zhinɨ ayi ɨ shiʼnɨ ə. Mbáʼ o ghɨnɨ ɨnu tsen lá, ghɨ á mbyi tsum zhi mbɨ́ʼ agho!”

⁵ Tsɛʼ ɨbɔmbɨma ɨbyi bə mbáŋnɨ́ sé mɨntəm ɨma a nye zɨ nɨŋə.

⁶ Yeso a sóŋ a mbó bo ngə́, “Nyom wa a kuʼnɨnɨ a mbó me a bvurɨ tɨ kuʼə. Nyom tsum a kuʼnɨ a mbó bɨŋ ə.

⁷ Atuəshe a chi keʼ awən bə̂, lá mbán aghan, mbɨ́ʼ ngə́ nkfu tsum ma soŋə a mbó bo ngə́ ngɨnɨ mɨnu ɨma bɨ́gɨ́ ə.

⁸ Nɨ ghɛn adiʼ a nɨdorɨ wa. Ka ma ngěn aghan adiʼ a nɨdorɨ nen, mbɨ́ʼ ngə́ nkfu za ɨ kuʼnɨnɨ a mbó me ɨ bvurɨ tɨ yiŋə.”

⁹ A sóŋ a məzen lá, ngɔ́ŋ ayi a Galili ə.

Yeso Adiʼ a Nɨdorɨ nɨ Mɨntaŋ ə

¹⁰ Ɨbɔmbɨma ɨbyi bə mbáŋnɨ́ ghɨnə ngɛ́n adiʼ a nɨdorɨ wa, Yeso a kɨ ndzɔŋ ngɛn ɨwu; lá wɛrə a ghɛ́n ɨwu be ndzum ndzum nkeʼ asaŋəsaŋ be.

¹¹ Bɨsáʼ bɨ ɨlaʼ bɨ bə Yuda kə́ númə́ ndǒ a wɛrə adiʼ a nɨdorɨ wa. Bo kə́ mbítə́ ngə́, “A mé le?”

¹² Ɨbɛn kə́ ntsumnə mbɨ́ʼ a Yeso a tɨtərɨ ɨnɔ wa be tɨsɨŋə. Bə tse kə́ sóŋə́ ngə́, “A nɨ ŋwɔn wu shiʼnɨ ə.” Bə tse soŋənə ngə́, “Ngáŋ, a tsagə ɨbɛn a mɨ́tfúŋ ə.”

¹³ Lá ŋwɔn tse a sé gham mbɨ́ʼ ayi asaŋəsaŋ, mbɨ́ʼ ngə́ bɨ kə́ mbɔ́gə́ bɨsáʼ bɨ ɨlaʼ bɨ bə Yuda ghe.

¹⁴ Nɨdorɨ na ghɛ́nə ntiʼə mbúʼnə́ mbáʼ Yeso a ghɛ́nɨ́ mbiʼnɨ ndiʼ ɨbɛn a Ndáŋwi zɨ Ngwi ə.

¹⁵ A kɨ́ʼnɨ́ bɨsáʼ bɨ ɨlaʼ bɨ bə Yuda be tɨ́sə́n bo soŋ ngə́, “Mba wen a tsa lá ɨ nə́ nji ndvuŋ ɨnu wen mbáʼ bɨ láʼnə mbvurɨ ayi tɨ diʼ lá le?”

¹⁶ Yeso a chwɨ́gɨ́ ngə́, “Anu za ma diʼnə lá, a se azan be, a lo be a mbó Ŋwi, zɨ wa a tságɨ́nɨ́ aghə.

¹⁷ Ŋwɔn tsum wa ntəm ɨyi kɔŋnɨ ngɨ anu za Ŋwi a lɔnə, a mɨ zhi ngə́ a lə anu za ma diʼnə a lo a mbó Ŋwi kə ma ghamə be nɨ mɨtən ɨmə.

¹⁸ Ŋwɔn wa a ghamnə nɨ ɨmyi mɨtən, a lǒ lá nɨfáŋ a mbó atuəmbəm azhi ɛ. Lá ŋwɔn wa a lɔnə nɨfáŋ a mbó ŋwɔn wa a tságɨ́nɨ́ ayi, a sǒŋ nkənu, ɨbəgɨrɨ ɨnu keʼ wə ɨnye chyɛ ə.

¹⁹ Mǒse a ghá a Nyɔngɔŋ a mbó bɨŋ ə, a sɨ lá be le? Lá ka táʼ ŋwɔn nɨbən wu tse a ndzúʼnə́ ayi a Nyɔngɔŋ ə. Nɨ lɔ́btɨ́ njwitɨ me lá ngə́ ke le?”

²⁰ Ɨnɔ ɨbɛn wa chwɨ́gɨ́ ngə́, “O tsi nɨ dzɨŋ a mu ɨnye ɨgho ghe! A lɔ́btɨ́ ɨwa a njwítɨ́ gho le?”

²¹ Yeso a chwɨ́gɨ́ ngə́, “Ma ghɨ́ a táʼ anu zə yerɨnɨ-yerɨnɨ, a kɨʼnɨ awən bɨtsum ə.

²² Mǒse a yén sóŋ ngə́ á nɨ ntsə̌ŋ ɨlagɨ ɨbɔ ɨbən bə mbáŋnɨ́ (a báʼtɨ́ nkeʼ wɛrə be, a bé bé bɨta ɨbən bə kɔ́ʼɔ́nguʼ ba bɨ bíʼnɨ́nɨ́ a zɛrə ghe), ma lan nɨ tsə̌ŋ alagɨ a mɔn mbáŋnɨ́ a Njwi Alaʼ Ŋwi ə.

²³ Be a be ngə́ bɨ tsə̌ŋ alagɨ a mɔn mbáŋnɨ́ a Njwi Alaʼ Ŋwi, taŋ á Nyɔngɔŋ Mǒse ɨ bvurɨ tɨkə bɨ fasɨ, nɨ tiʼə ndwǐ ntɔŋ a nye me mbɨ́ʼ ngə́ ma tsuʼ a ŋwɔn a shwetɨ ngɛn mɛtɨ a Njwi Alaʼ Ŋwi lá ngə́ ke le?

²⁴ A nɨ kyɛntɨ a sáʼ ɨbɛn a nye za nɨ zɛnɨ a nye bo abyɛn abyɛn, saʼnə awa ndzɔ̌ŋ nkənu ə.”

A lá Wa bɨ Zɔ́ʼnɨ́ wa le?

²⁵ Ɨbɛn bə tse a Yerosalɛm bítɨ́ ngə́, “Mba wen a se be ŋwɔn wa bɨ lɔnɨ njwitə lá le?

²⁶ Zɛnə! A wen mbáʼ a ghamnə asaŋəsaŋ, bɨ keʼ anu zə tsɛrə a sóŋə́ nkwə́nkə́ ayi ɨwu lan! A chi be ngə́ bo lanɨ nji ngə́ a nɨ Wa bɨ Zɔ́ʼnɨ́ wa le?

²⁷ Lá Wa bɨ Zɔ́ʼnɨ́ a ghɨ ngyén, muŋ ŋwɔn tse a mɨ keʼ zhi adiʼ za a lonɨ ɨwu ə. Lá bɨgɨnə bɨtsum zhi adiʼ za ŋwɔn wen a lonɨ ɨwu ə.”

²⁸ Adzaŋ za Yeso a kɨ́nə́ ndǐʼ ɨbɛn a mu Ndáŋwi zɨ Ngwi lá, a sóŋ nɨ nji zɨ ntən ngə́, “Nɨ lanɨ nji aghan nkɨ nji adiʼ za ma lonɨ ɨwu le? Ka ma yen aghan lá nɨ mɨtən ɨmə. Nkənu ɨ tsi a nye wɛrə wa a tságɨ́nɨ́ aghə; nɨ keʼ ayi kɨ njiɛ.

²⁹ Lá ma zhi ayi, mbɨ́ʼ ngə́ ma lo wəmbo, a kɨ ntsagɨ zɨ ntsagɨ aghə.”

³⁰ Ma lan, bo lɔ́btɨ́ a nkó zɨ, lá ŋwɔn tse a sé ayi nɨ abó mɔmtɨ, mbɨ́ʼ ngə́ nkfu wɛrə ɨ bvúrɨ́nə tɨ kuʼə.

³¹ Lá ɨbɛn bə ghaʼnɨ a tɨtərɨ ɨnɔ wa nɨ́ŋ mɨntəm ɨma a nye zɨ, ntiʼ mbitɨ ngə́, “Wa bɨ Zɔ́ʼnɨ́ a ghɨ ngyén, muŋ a mɨ ghɨ ɨnu tsɨ yerɨnɨ-yerɨnɨ tsa tsɨ tsanɨ a tsə ŋwɔn wen le?”

Bɨ Tsagɨ Bɨntsiŋ Ɨdiʼ bɨ Ndáŋwi zɨ Ngwi ngə́ á bɨ Yen Nko a Yeso ghe

³² Bə Farisao zúʼ ɨnu tsa ɨnɔ wa kɨ́nə́ ntsumtə mbɨ́ʼ a Yeso, ma lan, bo, nkwiʼtɨ bɨntumshe bə wi tíʼ tsagɨ bɨntsiŋ ɨdiʼ bɨ Ndáŋwi zɨ Ngwi ngə́ á bɨ yen nko ayi ɛ.

³³ Yeso a sóŋ ngə́, “Ma mɨ tsi bɨgɨnə a nye məbaŋtɨ, ɨ zɔŋtɨ ɨ lo ɨ ghɛn a mbó zɨ wa a tságɨ́nɨ́ aghə.

³⁴ Nɨ mɨ lɔn aghan, ɨ keʼ aghan zɛn, mbɨ́ʼ ngə́ nɨ mɨ chi keʼ yen adiʼ wa ma mɨ ghɨ tsi ɨwu ə.”

³⁵ Bɨsáʼ bɨ ɨlaʼ bə Yuda ghámnɨ́ a tɨtərɨ bo nɨbo ngə́, “A mɨ ghɛn lá ɨ ghé mbáʼ bɨgɨ chinɨ ghɨ keʼ ayi zɛn le? A mɨ ghɛn a mu ntáʼmbagə tsɨ wi bə Grikɨ tsa ɨbɛn ɨbɨgɨnə tsinɨ ɨwu, ɨ diʼ bə Grikɨ le?

³⁶ A soŋ ngə́ bɨgɨnə mɨ lɔn ayi lá ɨ keʼ ayi zɛn, ɨ chi keʼ kɨ ngɛn adiʼ wa zɨə ghɨnɨ chyɛ. Məzen a diʼ lá ngə́ ke le?”

Mɨndǒ mɨ Nkyi ma Nkyi ɨwa Ghánɨ́ Ntsi Ntɨŋ ə

³⁷ A ghɨnə mbé a ntsɨrɨ ndzum njwi za ɨ təntɨnɨ ntsa ɨtsum a mu nɨdorɨ na, Yeso a tɛm atɨ́ ɨ soŋ nɨ nji zɨ ntən ngə́, “Ŋwɔn tsum wa ntɔŋ ɨyi zomnkɨnɨ á yen a mbó me, a nkwiʼtə

³⁸ ŋwɔn tsum wa a nɨŋnɨ ntəm ɨyi a nye me a tsi nɨ ɨ no ghe. Tso mbáʼ aŋwaʼnɨ a Ŋwi a soŋnɨ ngə́, ‹Mɨndǒ mɨ nkyi mɨ ntsi ntən ghɨ tiʼə koŋə fuənə wə mu mɨntəm ɨma lá.› ”

³⁹ Yeso a kə́ ngamə lá mbɨ́ʼ Azhwi za ɨbɛn ba bɨ nɨ́ŋnɨ́ mɨntəm ɨma a nye zɨ bɨ ghɨnɨ kwárə́. A nkfu məwa bɨ bvúrɨ́ Azhwi tɨ gha, mbɨ́ʼ ngə́ bɨ bvúrɨ́nə a Yeso tɨ kɔʼsɨ a mu nɨfáŋ ə.

Ɨbɛn tsi Atú Atú Mbɨ́ʼ a Yeso ghe

⁴⁰ Ɨbɛn bə mɔʼɔ a tɨtərɨ ɨnɔ wa zúʼ anu za Yeso a sóŋnɨ́ ntiʼ soŋ ngə́, “Ŋwɔn wen a lanɨ mbe lá Ntom Ŋwi za!”

⁴¹ Bə mɔʼɔ sóŋ ngə́, “A lá Wa bɨ Zɔ́ʼnɨ́ ə!” Lá bə mɔʼɔ sóŋ ngə́, “Wa bɨ Zɔ́ʼnɨ́ a ghɨ keʼ lá a Galili fuə!

⁴² Aŋwaʼnɨ a Ŋwi a soŋ ngə́ Wa bɨ Zɔ́ʼnɨ́ a ghɨ be ŋwɔn ɨlə̌ Ɨfɔ Devidɨ, á bɨ kɨ njwi ayi a Bɛtrəʼɛm, adiʼ wa Ɨfɔ Devidɨ a kɨ́nə́ nchyɛ̌ ɨwu ə.”

⁴³ Ma lan, ɨbɛn tíʼ ntsi atú atú mbɨ́ʼ a Yeso ghe.

⁴⁴ Bə tse kə́ ndǒ nko zɨ lá ŋwɔn tse a sé ayi nɨ abó mɔmtə.

Bɨsáʼ bɨ Ɨlaʼ bɨ bə Yuda sé Mɨntəm ɨma a nye Yeso Nɨŋə

⁴⁵ Bɨntsiŋ ɨdiʼ bɨ Ndáŋwi zɨ Ngwi ba bənə nkwɛn, bɨntumshe bə wi bo bɨ bə Farisao bitɨ awa ngə́, “Nɨ lo nkeʼ nɨ wɛrə yen ngə́ ke le?”

⁴⁶ Bɨntsiŋ ɨdiʼ bɨ Ndáŋwi zɨ Ngwi ba chwɨ́gɨ́ ngə́, “Ka ŋwɔn tse a láʼnə ngam ayi tso ŋwɔn məwiŋ ə!”

⁴⁷ Bə Farisao bítɨ́ awa ngə́, “Njingə a chi nkɨ ntamtɨ awən wəbɔʼ le?

⁴⁸ Nɨ zhi a táʼ ɨsáʼ alaʼ kə a táʼ ŋwɔn bə Farisao wa a nɨŋnɨ ntəm ɨyi wə nye le?

⁴⁹ Ɨnɔ wen, ɨ se zhi a Nyɔngɔŋ Mǒse ghe, ma lan, Ŋwi a lɔʼɔ awa ghe!”

⁵⁰ Táʼ ŋwɔn bə Farisao adiʼ wa a bé Nɨkorɨmbo, ŋwɔn wa a kwɛ́nə ngɛn a mbó Yeso lá. A sóŋ a mbó abvuʼ a bə Farisao za a tɛ́mnɨ́ ɨwu ngə́,

⁵¹ “Ndzɔ̌ŋ a Nyɔngɔŋ ɨwɨgɨnə, bɨgɨnə chi keʼ soŋ ngə́ ŋwɔn a vwo ɨsáʼ tɨ zuʼ anu za a tsinɨ nɨ ɨ soŋə abɔʼnɨ ɨ kɨ tɔʼnɨ anu za a ghɨnə.”

⁵² Bo chwɨ́gɨ́ ngə́, “O kɨ ndo lá a Galili le? Yɛʼ Aŋwaʼnɨ a Ŋwi, o mɨ tiʼ zhi ngə́ ka ntom Ŋwi chi fu ayi a Galili ə.”