Yoane 6 - Mɨkan wu Fi

Yeso a Dzɨgɨ Ɨbɛn tso Nchwuʼ tsi Tə̧̂ ghe

¹ Yeso a ghɨnə mɛ́tɨ́ a tsen ɨtsum, ndaŋ ntom ngɛn a ndzɨŋə Sagɨrə Galili zɨ mɔʼɔ (wa bɨ kɨ́nə́ ntɔ́ŋə́ ngə́ Sagɨrə Tibɛria ghe).

² Ɨnɔ ɨbɛn wu wi zɔ́ŋ ayi, mbɨ́ʼ ngə́ bo zɛ́nə ɨnu tsɨ yerɨnɨ-yerɨnɨ tsa a ghɨ́nɨ́ a ntsúʼ ɨbɛn ə.

³ Yeso a kɔ́ʼ ngɛn atú a ntáʼ wu tse, ɨ shiʼtɨ ntsi a tɨshe bo bɨyɛʼ ɨbyi ɛ.

⁴ Nkfu Nɨdorɨ nɨ Tsa-yɛʼnɨ ɨ tíʼ tsɛʼ abó ə.

⁵ Yeso a bíʼtɨ́ atú azhi ndzɛn ngə́ ɨnɔ ɨbɛn wu wi kə́ ngyiŋə a mbó zɨ ntiʼ mbitɨ a Firɨbɔ ngə́, “Bɨgɨnə chi zuŋ mɨdzɨ ma mɨ chinɨ kuʼnɨ a ndzɨ́gɨ́ ɨbɛn ben bɨtsum ɨwu lá ɨ ghé le?”

⁶ (Yeso a sóŋ a məzen lá a njwə́ŋtɨ́ Firɨbɔ ghe; wɛrə zɨmboŋ a kwɛ́nə nji anu za zɨə mɨ ghɨə.)

⁷ Firɨbɔ a chwɨ́gɨ́ ngə́, “A mbó ŋwɔn tsum a nchyɛ́ tsɛʼ nɨ mə atsə́bɨ́ azúm, a mɨ lɔgɨ nkáb ŋwɔn afaʼ tɨ abó afaʼ a nye bɨsaŋ bi nɨfə̧ a ndzúŋ abán za a mɨ kuʼnɨ a mbó ŋwɔn tsum ə.”

⁸ Andɨrɨya, ngyɛʼ ɨyi wu mɔʼɔ wa a bénɨ́ mɨma Samɔn Bita, a sóŋ ngə́,

⁹ “Mɔn mbáŋnɨ́ wu tse a tsi ɨghan wa a tsinɨ nɨ mbɛʼ abán tsi tə̧̂ abɔʼnɨ ɨshwú tsi bá ghe. Bɨ ghɨ́ abán za nɨ abə́ŋ a nchwi za bɨ tɔ́ŋnə́ ngə́ ‹bali› ə. Lá tsɛʼ a nkənu, tsɨ chi keʼ kuʼnɨ a mbó ɨbɛn ben bɨtsum ə.”

¹⁰ Yeso a sóŋ a mbó bo ngə́, “A nɨ ghɨ á ɨbɛn tsi a tɨshe.” (Kɨngvo ngyɛn ɨ tsí adiʼ wa tsɛʼ a nkə.) Ma lan, ɨbɛn bɨtsum shíʼtɨ́ ntsi a tɨshe; mbáŋnɨ́ bé tso nchwuʼ tsi tə̧̂ ghe.

¹¹ Yeso a lɔ́gɨ́ abán za ntsaʼtɨ a Ŋwi, ngyɛbtɨ a mbó ɨbɛn ba bɨ shíʼtɨ́nɨ́ ntsi ɨwu ə. A kɨ́ ngyɛbtɨ ɨshwú tsa tsɛʼ tso mbáʼ a yɛ́btɨ́nɨ́ abán za. Ŋwɔn tsum a dzɨ́ ndvuŋ wa a kɨ chínɨ́ dzɨə.

¹² Bo bɨtsum ghɨnə ndzɨ́ nzhwurɨ, Yeso a soŋ a mbó bɨyɛʼ ɨbyi ngə́, “Nɨ sɛʼ ɨbagɨ mɨdzɨ tsa tsɛʼ ɨtsum, á bɨgɨnə keʼ a mə tsɛrə nyɛʼnə.”

¹³ Ma lan, bo ghótɨ́ ɨbagɨ ɨbán tsa bɨ ghɨ́nɨ́ nɨ abə́ŋ a nchwi za bɨ tɔ́ŋnə́ ngə́ “bali” tsa ɨbɛn kfúrɨ́nɨ́ lá, ɨtsum ɨ lwɨgɨ nkye nɨghúm ntsɔb bá ghe.

¹⁴ Mbáʼ ɨbɛn ba ɨwu a bɨ zɛ́nɨ́ anu zə yerɨnɨ-yerɨnɨ za Yeso a ghɨ́nɨ́ lá, bo sóŋ ngə́, “Tsɛʼ a nkənu, nə nɨ Ntom Ŋwi za ɨ tsínɨ́ ɨ ghɨ yen atuəshe lá!”

¹⁵ Yeso a zhí ngə́ bo kə́ ndɔ́btɨ́ ɨ yen ko ayi nɨ adaʼ ɨ ghɛn ɨ ghɨ ayi a nye ɨfɔ nɨ adaʼ ə; ma lan, wɛrə a tíʼ ndo ngɛn atú mɨntáʼ tsɛʼ zɨzɨ ə.

Yeso a Tɛ́mə́ Ngěn Atú Nkyi ɛ

¹⁶ Nyom a ghɨnə ndzə́ŋ, bɨyɛʼ bɨ Yeso shiʼ ngɛn a sagɨrə wa,

¹⁷ nkon a mu abáŋ a nkyi, mbɨ́ŋə́ ntómə́ ngěn a ndóm Kabɛrɨnaum ə. Ɨtfúʼ ɨ fɨ́ŋ lá Yeso a bvurɨ tɨ yen nkwatɨ awa ghe.

¹⁸ A nyom məwa kɨfɛrɨ wu ntən wu tse a kə́ ntsǎ ngɨə nkyiɛ yiŋənɛmə ghe.

¹⁹ Bo ghɨnə ngɛ́n tso bɨmarɨ bi bɨtárə́ kə bi nɨkwa, ndzɛn Yeso a yiŋənə a mbyɛn abáŋ a nkyi za, ntɛ́mə́ atú nkyi wa. Nɨbɔgɨ chwá awa,

²⁰ lá Yeso a sóŋ a mbó bo ngə́, “A nɨ me ghe; á nɨ keʼ bɔgə.”

²¹ Nɨdorɨ tsí a mu mɨntəm ɨma, bo tiʼ nkwarɨ a Yeso a mu abáŋ a nkyi za. Abáŋ a nkyi za a byí ntiʼ ntsi be a ntáʼ, adiʼ wa bo kɨ́nə́ ngěn ɨwu ə.

Ɨbɛn Númə́ Ndǒ a Yeso ghe

²² Njwi zɨ mɔʼɔ ɨ lanə, ɨnɔ ɨbɛn wa ɨ tsínɨ́ a ndaŋ ndzɨŋə wa bo bɨ Yeso tsínɨ́ ɨwu lá zɛ́n ngə́ a tsí tsɛʼ táʼ abáŋ a nkyi ɨwu ə. Bo zhí ngə́ Yeso a sé kón a mu abáŋ a nkyi za bo bɨ bɨyɛʼ ɨbyi á bo bo ghen. Bo zhí ngə́ bɨyɛʼ bɨ Yeso nyɛ́ʼtɨ́ ayi a ndzum ə.

²³ Ɨbáŋ nkyi tsə mɔʼɔ ló a Tibɛria ngyen a ngə́rɨ́ sagɨrə wa, a kɨʼ adiʼ za ɨnɔ wa ɨ kfúrɨ́nɨ́ abán za Maʼmbyí a tsáʼtɨ́nɨ́ a Ŋwi ɨwu atú lá.

²⁴ Ɨnɔ ɨbɛn wa ghɨnə ndzɛ́n ngə́ Yeso a sé ɨwu tsi kə bɨyɛʼ ɨbyi, bo kón a mu ɨbáŋ nkyi tsa ngɛn a Kabɛrɨnaum ɨ númə́ ndǒ a Yeso ghe.

Yeso a nɨ Abán a Ntsi Ntɨŋ ə

²⁵ Ɨbɛn ba ghɨnə ndzɛ́n a Yeso a ndaŋ ndzɨŋə sagɨrə wa zɨ mɔʼɔ, mbitɨ wəmbo ngə́, “Ndiʼ Aŋwaʼnɨ, o yen ɨghan lá a nyom ake le?”

²⁶ Yeso a chwɨ́gɨ́ ngə́, “Tsɛʼ a nkənu ma soŋə awɨŋ ə: nɨ lǒ aghan lá mbɨ́ʼ ngə́ nɨ kɨ kfurɨ abán za nzhwurɨ ntiʼ ntsi nɨ atsum za nɨ kɨ chinə ndǒ, ka a be ayi be mbɨ́ʼ ngə́ nɨ kɨ zuʼ nkɨ nji ɨnu tsɨ yerɨnɨ-yerɨnɨ ɨtsan tsa.

²⁷ A nɨ keʼ faʼə a nchyɛ́ nɨ mɨdzɨ ma mɨ chinɨ bye; á nɨ báŋnə́ faʼə be a ndǒ mɨdzɨ ma mbáʼ nɨ dzɨ, nɨ tsi nɨ ntsi ntən nɨnkoŋ ə. Nə nɨ mɨdzɨ ma Mɔn Ŋwɔn a ghɨ ghá a mbó bən, mbɨ́ʼ ngə́ Ŋwi, zɨ wa a nɨ Tarɨ, a nɨŋnə alyigɨ azhi wə ɨnye za a diʼnɨ ngə́ zɨə bemtɨ ayi ɛ.”

²⁸ Bo tíʼ mbítɨ́ a Yeso ngə́, “Bɨgɨ mɨ zagɨ ɨ ghɨ lá ɨ nə́, taŋ ɨ ghɨ a za Ŋwi a lɔnə ngə́ á bɨgɨ ghɨ lá le?”

²⁹ Yeso a chwɨ́gɨ́ ngə́, “Anu za Ŋwi a lɔnə ngə́ á nɨ ghɨ, a nɨ ɨ nɨŋ mɨntəm ɨmən a nye me, wa zɨə tságɨ́nə́.”

³⁰ Bo chwɨ́gɨ́ ngə́, “O mɨ ghɨ lá a zɨŋ anu zə yerɨnɨ-yerɨnɨ taŋ á bɨgɨ chi zɛn ɨ tiʼ nɨŋ mɨntəm ɨmɨgɨ a nye gho le? O mɨ ghɨ lá ake le?

³¹ Bɨta ɨbɨgɨ bə kɔ́ʼɔ́nguʼ kfúrɨ́ a mana a mu mɨkɨghonɨ, tsɛʼ adzaŋ za aŋwaʼnɨ a Ŋwi a soŋnɨ ngə́, ‹Wɛrə a ghá abán za a lónɨ́ a fɔməbvurə a mbó bo ngə́ á bo kfurə.› ”

³² Yeso a sóŋ ngə́, “Tsɛʼ a nkənu ma soŋə awɨŋ ə, a sé Mǒse gha nga abán za a lónɨ́ a fɔməbvurə a mbó bɨŋ ə; a nɨ Ta ɨghan mbáʼ a ghánə́ nkasɨ abán za a lonɨ a fɔməbvurə ghe.

³³ Mbɨ́ʼ ngə́ abán za Ŋwi a ghánə́ a nɨ zɨ wa a lonə a fɔməbvurə ɨ shíʼə ngyíŋə́ ntiʼə ngǎ ntsi ntən a mbó atuəshe.”

³⁴ Bo sóŋ wəmbo ngə́, “Tə̧, gha awɨgɨ nɨ abán zen nkfu tsum ə.”

³⁵ Yeso a sóŋ a mbó bo ngə́, “Ma nɨ abán a ntsi ntɨŋ ə. Ŋwɔn tsum wa a yenɨ a mbó me a láʼ keʼ nɨ nji chyɛ; ŋwɔn wa a nɨŋnɨ ntəm ɨyi a nye me, nji nkyi láʼ keʼ ayi zaŋə.

³⁶ Lá, ma sóŋ a mbó bən ngə́ nɨ zɛnə aghə, lá nkeʼ mɨntəm ɨmən a nye me nɨŋə.

³⁷ Ŋwɔn tsum wa Ta ɨghan a ghanɨ a mbó me, a mɨ yen a mbó me ghe. Ma láʼ kaʼ a ŋwɔn wa a yenɨ a mbó me kəntɨ,

³⁸ mbɨ́ʼ ngə́ ma lo a fɔməbvurə ɨ shiʼ lá a ngɨ za ŋwɔn wa a tságɨ́nɨ́ aghan a lɔnə, nkeʼ be za ma lɔnə be.

³⁹ A nɨ za ŋwɔn wa a tságɨ́nɨ́ aghan a lɔnə ngə́ á ma kaʼ sam a wu tse wa zɨə ghanɨ a mbó me, mbaŋnɨ nzhwemnɨ awa bɨtsum a ntsi ntən a nye ndwɨgɨnɨ ndzum njwi ɛ.

⁴⁰ Mbɨ́ʼ ngə́ za Ta ɨghan a lɔnə a nɨ ngə́, ɨbɛn bɨtsum ba bɨ zɛ́nə́ a Mɔn Mbáŋnɨ́, nkɨ nɨŋ mɨntəm ɨma wə ɨnye, á bɨ tsi nɨ ntsi ntən nɨnkoŋ ə. Ma ghɨ zhwémnɨ́ awa a ntsɨrɨ ndzum njwi ɛ.”

⁴¹ Bə Yuda bíʼnɨ́ ntiʼə nzhwúʼnə́ mbɨ́ʼ a Yeso, mbɨ́ʼ ngə́ wɛrə a sóŋ ngə́, “Ma nɨ abán za a lonɨ a fɔməbvurə ɨ shiʼ ngyiŋə.”

⁴² Bo tíʼ mbitɨ ngə́, “Mba wen a nɨ Yeso mɔn Yosɛb wu mbáŋnɨ́ ə, a sɨ lá be le? Bɨgɨnə zhi a ta ɨyi bo nɨmi ɨyi ɛ. A tiʼ ntsa lá ɨ nə́ a soŋ ngə́ zɨə lo a fɔməbvurə ɨ shiʼ ngyen le?”

⁴³ Yeso a chwɨ́gɨ́ ngə́, “Kyɛntɨnə a nzhwuʼnə nɨ bən nɨ bɨŋ ə.

⁴⁴ Ka ŋwɔn tse a chi yen ayi a mbó me tɨgha Tarɨ, zɨ wa a tságɨ́nɨ́ aghan a shwuŋtɨ ayi a ɨnye me; á ma tiʼ nzhwemnɨ ayi a tsi ntən a ntsɨrɨ ndzum njwi ɛ.

⁴⁵ Ntóm Ŋwi ŋwánɨ́ ngə́, ‹Ŋwi a tsi nɨ ɨ ghɨ diʼ a ŋwɔn tsum ə.› Ŋwɔn tsum wa a zúʼnə́ a mbó Tarɨ nkə́ ngyɛ́ʼə wəmbo, a yiŋə a mbó me ghe.

⁴⁶ Ka məzen a diʼ ayi lá ngə́ ŋwɔn tse a zɛnə a Tarɨ ə; a nɨ ŋwɔn wa a lonɨ a mbó Ŋwi wa mbáʼ a nɨ tsɛʼ zɨzɨ wa a zɛnə a Tarɨ ə.

⁴⁷ Tsɛʼ a nkənu ma soŋə awɨŋ ə: ŋwɔn tsum wa a nɨŋnɨ ntəm ɨyi a nye me a tsi nɨ ntsi ntən nɨnkoŋ ə.

⁴⁸ Ma nɨ abán a ntsi ntɨŋ ə.

⁴⁹ Bɨta ɨbən bə kɔ́ʼɔ́nguʼ kfúrɨ́ a mana a mu mɨkɨghonɨ, lá nkfókə́.

⁵⁰ Lá abán za a lonɨ a fɔməbvurə ɨ shiʼ a nɨ abə́ŋ za ŋwɔn tsum wa a kfurɨnɨ a zɛrə a láʼ keʼ kfoə.

⁵¹ Ma nɨ abán za a ghánɨ́ ntsi ntən za a lónɨ́ a fɔməbvurə ɨ shiʼə. Be ŋwɔn a kfurɨ abán məzen, muŋ a mɨ tsi ntən nɨnkoŋ ə. Abán za ma mɨ ghɨ gha a mbó ɨbɛn bɨ atuəshe a nɨ ɨnyam ɨnye ɨzan za ma ghánə́ taŋ atuəshe a chi tsi atú ntɨŋ ə.”

⁵² Bə Yuda tíʼ nkón a mu ɨkwənkɨ mɨgham a mu alwɛntɔ́ŋ a tɨtərɨ bo nɨbo ghe. Bo bítɨ́ ngə́, “Mba wen a mɨ gha ɨnyam ɨnye ɨzhi á bɨgɨnə kfurɨ lá ɨ nə́ le?”

⁵³ Yeso a sóŋ a mbó bo ngə́, “Tsɛʼ a nkənu ma soŋə awɨŋ ə: be nɨ tú kfurɨ ɨnyam ɨnye Mɔn Ŋwɔn ɨ kɨ no alɛm azhi, nɨ mɨ keʼ tsi nɨ ntsi ntən a mu ɨnye ɨtsɨŋ ə.

⁵⁴ Ɨbɛn ba bɨ kfúrɨ́nɨ́ ɨnyam ɨnye ɨzan nkə́ nǒ alɛm azan, bo tsi nɨ ntsi ntən nɨnkoŋ, ma ghɨ kɨ́ zhwémnɨ́ awa a nye ntsɨrɨ ndzum njwi ɛ.

⁵⁵ Mbɨ́ʼ ngə́ ɨnyam ɨnye ɨzan a nɨ ngótɨ́ mɨdzɨ, alɛm azan a be ngótɨ́ azúm zə nonə.

⁵⁶ Ɨbɛn ba bɨ kfúrɨ́nɨ́ ɨnyam ɨnye ɨzan nkə́ nǒ alɛm azan chyɛ̌ a mu ɨnye me, ma kə nchyɛ̌ a mu ɨnye ɨtsa ghe.

⁵⁷ Tsɛʼ tso mbáʼ Tarɨ, zɨ wa a tsinɨ ntən a tságɨ́nɨ́ aghan lá, mbɨ́ʼ a wɛrə, ma kɨ ntsi ntɨŋ ə. Ndəŋndəŋ, ŋwɔn tsum wa a kfurɨnɨ ɨnyam ɨnye ɨzan, a mɨ tsi ntən mbɨ́ʼ aghə.

⁵⁸ Məzen a tiʼ mbe lá abán za a lónɨ́ a fɔməbvurə ɨ shiʼ; ka a be ayi tso abán za bɨta ɨbən bə kɔ́ʼɔ́nguʼ kfúrɨ́nɨ́, ngɨ́ mbə nkfó a nkfu ndzum lá. Ŋwɔn wa a kfurɨnɨ abán zen a ghɨ tsi ntən nɨnkoŋ ə.”

⁵⁹ Yeso a sóŋ a məzen lá mbáʼ a kɨ́nə́ ndiʼə ɨbɛn a mu ndáŋwi bə Yuda za ɨ tsínɨ́ a Kabɛrɨnaum ə.

Mɨgham mɨ Ntsi Ntən Nɨnkoŋ ə

⁶⁰ Nɨghaʼ ɨbɛn wa a kɨ́nə́ ndzɔŋə a Yeso zúʼ a məzen, mbitɨ ngə́, “Anu zen za a diʼnɨ lá a tən tɨsɨŋə. Ɨwa a chi bem anu məzen le?”

⁶¹ Ŋwɔn tse a sé a mbó Yeso soŋə, lá Yeso a zhí anu za bo kɨ́nə́ nzhwuʼnə mbɨ́ʼ a zɛrə ntiʼ soŋ a mbó bo ngə́, “Məzen a ghɨ mɨntɔŋ ɨmɨŋ lwinɨ le?

⁶² Nɨ ghɨ tíʼ soŋ ngə́ ke mbáʼ be nɨ zɛn a Mɔn Ŋwɔn a bə nkɔʼ ngɛn adiʼ wa a kwɛ́nɨ́ ntsí ɨwu a mbyi lá le?

⁶³ Azúm za a ghɨnə o ntsi ntən a nɨ Azhwi ə; ka adaʼ a ŋwɔn mɨsɔŋ a tsi ayi nɨ ɨlɨŋ tse, kə́ tsɛʼ mɨnyiə ghe. Mɨgham ma ma ghamnə a mbó bən lá, mɨ yiŋə nɨ Azhwi a ntsi ntən za a lonɨ a mbó Ŋwi ə.

⁶⁴ Lá bən bə tse, nɨ keʼ nɨŋ mɨntəm ɨmən a nye me ghe.” (Yeso a kwɛ́nə nji ɨ lɔgɨnɨ a mbiʼnə, ɨbɛn ba bɨ ghɨnɨ keʼ ntəm a nye zɨ nɨŋ abɔʼnɨ wa a ghɨnɨ dzɨ a mɨnaŋ atú ɨyi ɛ.)

⁶⁵ A tíʼ nkwiʼtɨ ngə́, “Nə nɨ anu za ma sóŋnɨ́ a mbó bən ngə́ ka ŋwɔn tse chi yen ayi a mbó me tɨkə Ta ɨghan a ghɨ ngə́ á ghɨ mə lə.”

⁶⁶ Mbɨ́ʼ a məzen, ɨbɛn bə ghaʼnɨ ba bɨ kɨ́nə́ ndzɔŋə a Yeso bə́n awa, nkeʼ ayi a mbɨ́ŋə́ ndzɔŋə ghe.

⁶⁷ Yeso a tíʼ mbítɨ́ bɨyɛʼ ɨbyi ba nɨghúm ntsɔb bá ngə́, “Ɨzɨŋ nkfu, nɨ mɨ kɔŋ ɨ kɨ lo awən le?”

⁶⁸ Samɔn Bita a chwɨ́gɨ́ wəmbo ngə́, “Maʼmbyí, bɨgɨ mɨ lo tiʼ ghɛn lá a mbó ɨwa le? O tsi nɨ mɨgham ma mɨ ghánɨ́ ntsi ntɨŋ ə.

⁶⁹ A nkwiʼtə, tɨtsɔŋnɨ, bɨgɨ nɨŋ mɨntəm ɨmɨgɨ a nye gho, nkɨ nji ngə́ o nɨ Wu Fɛmnɨ wa a lonɨ a mbó Ŋwi ngyiŋə.”

⁷⁰ Yeso a chwɨ́gɨ́ ngə́, “Ma tsɔ́ʼ awən nɨghúm ntsɔb bá ghe, kə ndé? Lá táʼ ŋwɔn nɨbən a nɨ dəbɨrɨ ə!”

⁷¹ Yeso kə́ ngamə lá mbɨ́ʼ a Yudasɨ, mɔn Samɔn Iskario ghe. Yudasɨ a báʼtɨ́ mbé bé táʼ a tɨtərɨ bɨyɛʼ ba nɨghúm ntsɔb bá lá, a tsí nɨ ɨ ghɨ dzɨ a mɨnaŋ atú Yeso ghe.