Yoane 3 - Mɨkan wu Fi

Yeso bo Nɨkorɨmbo ghe

¹ Ŋwɔn bə Farisao tse a tsí ɨwu ɨkum ɨyi be Nɨkorɨmbo, a bé ntsagɨnɨ bə Yuda ghe.

² Ŋwɔn məwen a ghɛ́n a mbó Yeso nɨ ɨtfúʼ tse ɨ soŋ wəmbo ngə́, “Rabai, bɨgɨ zhi ngə́ o nɨ ndiʼ aŋwaʼnɨ wa a lonɨ a mbó Ŋwi; mbɨ́ʼ ngə́ ŋwɔn tsɛrə a chi keʼ ghɨ ɨnu tsɨ yerɨnɨ-yerɨnɨ tsen tsa o ghɨnə, tɨgha Ŋwi a tsi bo zɨə.”

³ Yeso a chwɨ́gɨ́ wəmbo ngə́, “Tsɛʼ a nkənu, tsɛʼ a nkənu, ma soŋ a mbó gho ghe, be bɨ tú a ŋwɔn bə kwiʼ jwi, a chi keʼ Nɨfɔ nɨ Ŋwi kuŋə.”

⁴ Nɨkorɨmbo a bítɨ́ a Yeso ngə́, “Bɨ chi jwi a ŋwɔn mbáʼ a lvuŋnə lá ɨ nə́ le? A chi bə kwiʼ kon a mɨto nɨmi ɨyi á bɨ jwi ayi a nye nkfu tsa tsɨ kuʼnɨ tsi bá le?”

⁵ Yeso a chwɨ́gɨ́ wəmbo ngə́, “Tsɛʼ a nkənu, tsɛʼ a nkənu, ma soŋ a mbó gho ghe, be bɨ tú a ŋwɔn bə jwi nɨ nkyi abɔʼnɨ Azhwi, a chi keʼ a mu nɨfɔ nɨ Ŋwi kuŋə.

⁶ A jwíə ŋwɔn mɨsɔŋ a ntsu njwiə a ŋwɔn mɨsɔŋ a ntsu, lá a jwíə Azhwi njwiə azhwi ə.

⁷ A keʼ agho kɨʼnɨ ngə́ ma soŋ a mbó gho ngə́ bɨ mɨ zagɨ kwiʼ jwi awən bɨtsum ə.

⁸ Kɨfɛrɨ a tsǎ lá adiʼ za a lɔnə, o zuʼnə nkom ɨzhi, lá o koʼ zhi adiʼ za a lonɨ ɨwu kə adiʼ za a ghɛnə ɨwu ə. Nə nɨ adzaŋ za a benɨ nɨ ŋwɔn wa Azhwi a jwinɨ ayi ɛ.”

⁹ Nɨkorɨmbo a bítɨ́ ayi ngə́, “Məzen a chi fu lá ɨ nə́ le?”

¹⁰ Yeso a chwɨ́gɨ́ ayi ngə́, “Njingə o lá ndiʼ aŋwaʼnɨ a Izrai, lá nkoʼ ɨnu tsen zhi le?

¹¹ Tsɛʼ a nkənu, tsɛʼ a nkənu, ma soŋ a mbó gho ghe: bɨgɨ ghamə lá a za bɨgɨ zhinə, nkə́ sóŋə́ lá a za bɨgɨ tsinɨ ɨwu nkɨ ndzɛn; lá nɨ keʼ mbémə́ a za bɨgɨ sóŋnə́ a mbó bɨŋ ə.

¹² Be a be ngə́ ma fɨʼtɨnə ɨnu atuəshe a mbó bən, nɨ keʼ mɨntəm ɨmən ɨwu nɨŋ, nɨ ghɨ tíʼ tsa lá ɨ nə́ ɨ nɨŋ mɨntəm ɨmən ɨwu mbáʼ be ma fɨʼtɨ awən nɨ tsɨ fɔməbvurə le?

¹³ Ka ŋwɔn tse a kɔ́ʼnə ngɛn ayi a fɔməbvurə ntsatɨ a Mɔn Ŋwɔn wa a lónɨ́ ɨwu ɨ shiʼ ngyiŋə.”

¹⁴ Tsɛʼ tso mbáʼ Mǒse a kɔ́ʼsɨ́nɨ́ ɨnyo za atɨ́ a mu mɨkɨghonɨ lá, ndəŋndəŋ bɨ mɨ kɨ zagɨ kɔʼsɨ a Mɔn Ŋwɔn atɨ́,

¹⁵ taŋ ŋwɔn tsum wa a nɨŋnɨ ntəm ɨyi wə ɨnye a chi kwarɨ ntsi ntən nɨnkoŋ ə.

¹⁶ Mbɨ́ʼ ngə́ Ŋwi a kɔ́ŋ atuəshe be tɨ́sə́n, wɛrə a tíʼ ngá a Mɔn ɨyi wu Mbáŋnɨ́ wa a núnɨ́ zɨzɨ, taŋ ŋwɔn tsum wa a nɨŋnɨ ntəm ɨyi a ɨnye zɨ, a mɨ keʼ kfo, lá ɨ tsi nɨ ntsi ntən nɨnkoŋ ə.

¹⁷ Ŋwi a sé tsagɨ a Mɔn ɨyi wu Mbáŋnɨ́ atuəshe lá a sáʼ atuəshe; a báŋnɨ́ ntsagɨ be ngə́ á yen ndoŋ a zɛrə ghe.

¹⁸ Ɨbɛn ba bɨ nɨŋnɨ mɨntəm ɨma wə ɨnye, bɨ mɨ keʼ soŋ ngə́ bo vwo ɨsáʼə; lá ba ka bɨ nɨŋ awa mɨntəm ɨma wə ɨnye bɨ binə soŋ ngə́ bo vwo ɨsáʼ, mbɨ́ʼ ngə́ ka bo nɨŋ awa mɨntəm ɨma a nye Mɔn Ŋwi wa a nunɨ zɨzɨ ə.

¹⁹ Nə nɨ adzaŋ za Ŋwi a sáʼnɨ́ mbyi ɛ, lá be ngə́, nkaʼ ɨ yenə a mu mbyi, lá ɨbɛn kɔŋ ndzumnɨ ntsa nkaʼ, mbɨ́ʼ ngə́ ngɨnɨ mɨnu ɨma nɨ mə tɔmnɨnɨ ə.

²⁰ Ŋwɔn tsum wa a ghɨnɨ ɨnu tsɨ tɔmnɨnɨ a bə̂ nkaʼ, ɨ keʼ kɨ ngyen a mu nkaʼ, mbɨ́ʼ ngə́ ka bo ndǒ awa ngə́ á ɨnu tsɨ tɔmnɨnɨ nɔŋ asaŋəsaŋ ə.

²¹ Lá ɨbɛn ba bɨ ghɨnɨ ɨnu nkənu yiŋə a mu nkaʼ, taŋ á nkaʼ diʼ ngə́ za bo ghɨ́nɨ́ lá, bo ghɨ́ a zɛrə a ndzúʼnɨ́ Ŋwi ə.

Yoane Ngaŋ Nga Nkyi a Gham mbɨ́ʼ a Yeso ghe

²² Məzen a ghɨnə ntsá, Yeso bo bɨ bɨyɛʼ ɨbyi ghɛn a mu mbuʼ Yudiya; adiʼ wa wɛrə a tsínɨ́ ɨwu bo bo atú ndvuŋ nkfu tse ngǎ nkyi ɛ.

²³ Yoane a kɨ chí kə́ ngǎ nkyi a ntáʼmbagə Enɔn wa ɨ fátɨ́nɨ́ ntáʼmbagə Salim mbɨ́ʼ ngə́ nkyi ɨ gháʼtɨ́ adiʼ məwa ə. Ɨbɛn kə́ ngěn ɨwu wɛrə a ghanɨ nkyi a mbó bo ghe.

²⁴ (Məzen a kə́ ndɔgə adiʼ lá, mbáʼ bɨ bvúrɨ́ tɨ nɨŋ a Yoane atsáŋ ə.)

²⁵ Bɨyɛʼ bɨ Yoane bə tse bíʼnɨ́ nkwənkə bo bɨ ŋwɔn bə Yuda wu tse mbɨ́ʼ anu a sugɨ ɨnye ɨ fɛm a mu mbɔm ə.

²⁶ Ma lan, bo ghɛ́n a mbó Yoane ɨ soŋ wəmbo ngə́, “Ndiʼ Aŋwaʼnɨ, o wáʼtə́ a ŋwɔn wa bɨŋ zɨ tsínɨ́ a ndaŋ ndzɨŋə Yorɨdan lá, ŋwɔn wa o ghámnɨ́ mbɨ́ʼ ayi lá le? Zɛn lá, wɛrə a ghǎ nkyi, ŋwɔn tsum a ghěn wəmbo ə!”

²⁷ Yoane a chwɨ́gɨ́ ngə́, “Ka ŋwɔn tse a chi tsi ayi nɨ azúm zə tse tɨgha Ŋwi a gha a zɛrə wəmbo ə.

²⁸ Bɨŋ mboŋ nɨ nɨ bətɛmə-ndzě ɨban ngə́ ma sóŋ ngə́, ‹Ka ma be aghan Wa Bɨ Zɔ́ʼnɨ́ wa, lá bɨ tsagɨ aghan ngə́ á ma tsa mbyi ɨzhi ɛ.›

²⁹ A nɨ ndóm mɨngən wa a tsinɨ nɨ mɨngən ə; lá ɨson ndóm mɨngən, wa a tɛmnɨ a mbyɛn ndzuʼ nji ɨzhi, a dórə́ tsɛʼ nkan mbɨ́ʼ nji ndóm mɨngən ə. Nə nɨ adzaŋ za nɨdorɨ ɨnə tsanɨ ntiʼ nkɔʼ ndon tɨtsɔŋnɨ ə.

³⁰ Wɛrə a tsi nɨ ɨ zagɨ ɨ kwiə kɔ́ʼtɨ́nə, á ma zagɨ ɨ shíʼtə́ ghe.”

Zɨ wa a Lonɨ a Fɔməbvurə ghe

³¹ Zɨ wa a lonɨ atɨ́ a tsi atú atsum ə. Zɨ wa a lonɨ atuəshe a tsi lá a mbó atuəshe, nkə́ ngǎm ɨnu atuəshe. Lá zɨ wa a lonɨ a fɔməbvurə a tsi atú atsum ə.

³² A ghamə mbɨ́ʼ ɨnu tsa zɨə zɛnə nkɨ ndzuʼə, lá ŋwɔn tse a keʼ nkən wɛrə a mbémə́ ghe.

³³ Lá ŋwɔn wa a bemnɨ nkən ɨyi a bemtɨ lá a zɛnə ngə́ Ŋwi a nɨ nkənu ə.

³⁴ Ŋwɔn wa Ŋwi a tsagɨnɨ lá, a ghamə lá mɨgham mɨ Ŋwi ə; mbɨ́ʼ ngə́ Ŋwi a ghǎ Azhwi azhi wəmbo tɨ ɨfɨʼ ə.

³⁵ Tarɨ a kɔŋ a Mɔn ɨyi wu Mbáŋnɨ́, wɛrə a kɨnə nkɨ nɨŋ atsum wə mu mbó ə.

³⁶ Ŋwɔn tsum wa a nɨŋnɨ ntəm ɨyi a nye Mɔn Mbáŋnɨ́ wa, a tsi nɨ ntsi ntən nɨnkoŋ ə; ŋwɔn tsum wa a tənɨ atú a mbó Mɔn Mbáŋnɨ́ wa, a láʼ keʼ kon a mu ntsi ntən nɨnkoŋ, lá Ŋwi a mɨ ghěn nɨ mbyi a nɨ́ŋ ngɨ́ʼ wə ɨnye ə.