Yoane 2 - Mɨkan wu Fi

Nɨzɔ́ʼ na a Kana ghe

¹ A ghɨnə mbé a nye njwi tsa tsɨ kúʼnɨ́ tsi tárə́, nɨzɔ́ʼ nə tse tsi a mu ntáʼmbagə Kana a mu Mbuʼ Galili ə. Nɨmi bɨ Yeso a tsí ɨwu ə.

² Bɨ kɨ́ ngón a Yeso bo bɨ bɨyɛʼ ɨbyi a nɨzɔ́ʼ məna ə.

³ Mɨluʼ ghɨnə mí, nɨmi bɨ Yeso a soŋ a mbó Yeso ngə́, “Ka bo bə nkwiʼ ntsi a wa nɨ mɨluʼ ə.”

⁴ Yeso a chwɨ́gɨ́ wəmbo ngə́, “Mangye, azɔgə ɨwu a nɨ ake le? Nkfu ɨzə bvurɨ tɨ kuʼə.”

⁵ Nɨmo bɨ Yeso a sóŋ a mbó ngaŋ afaʼ tsa tsɨ tsínɨ́ adiʼ wa ngə́, “Ghɨnə tsɛʼ anu atsum za a soŋnɨ a mbó bɨŋ ə.”

⁶ Bə Yuda tsi nɨ mbɔm ɨ sugɨ ɨtumbəm ɨtsa ɨ fɛm a mu mbɔm ə. A sugɨ ɨtumbəm ɨtsa ɨ fɛm a mu mbɔm, bɨtɛrɨ bə wi ba bɨ tónɨ́ a mu mɨngɔʼ tɛ́mnkɨ́ adiʼ wa bi ntugə ghe. Táʼ tɛrɨ a kɨ chi tíʼtɨ́ bɨlita nkɨ wu fɨgɨnə.

⁷ Yeso a sóŋ a mbó ngaŋ afaʼ tsa ngə́, “Lwɨgɨnə bɨtɛrɨ ben nɨ nkyi ɛ.” Bo tíʼ ndwɨ́gɨ́ a bɛrə bɨ lunkɨ ndzabtɨ ə.

⁸ Yeso a tíʼ sóŋ a mbó bo ngə́, “Tɨtsɔŋnɨ, tutɨʼ nkyi wu tse, ngɛn nga a mbó fɨ́gɨ́ a ntaŋ adiʼ a nɨzɔ́ʼ wiŋ ə.” Bo túʼtɨ́ nkyi wa wu tse ngɛn nga wəmbo,

⁹ mbáʼ ɨ bə́ŋnə ntiʼ mɨluʼ, wɛrə a zhwiʼtɨ a mɛrə ghe. Wɛrə a sé zhi adiʼ za mɨ lónɨ́ ɨwu, (lá, a nkənu, ngaŋ afaʼ tsa tsɨ túʼnɨ́ nkyi wa zhyɛ́); fɨ́gɨ́ a ntaŋ adiʼ a nɨzɔ́ʼ wa a tíʼ ntɔ́ŋ a ndóm mɨngən

¹⁰ ɨ soŋ wəmbo ngə́, “Ŋwɔn tsum a fomə nɨ́ŋtə́ mɨluʼ mə shiʼnɨ ma, bɨghən ghɨ tagɨtɨ awa ɨ no, bɨ tiʼ ngyen nɨ ma ka mɨ nyɛtɨ mbɔŋ ayi lá. Lá o lɛn a mə shiʼnɨ mbaŋnɨ ngyen nɨ mɛrə be tɨtsɔŋnɨ ə!”

¹¹ Yeso a ghɨ́ a ntsambyi anu zə yerɨnɨ-yerɨnɨ zen lá a Kana a mu Galili; ɨwu wɛrə a kyɛ́ʼ nɨfáŋ ɨni, bɨyɛʼ ɨbyi tiʼ nɨŋ mɨntəm ɨma wə ɨnye ə.

¹² Məzen a tsanə, Yeso abɔʼnɨ nɨmi ɨyi, ɨbɔmbɨma ɨbyi bə mbáŋnɨ́, nkwiʼtɨ bɨyɛʼ ɨbyi ghɛn a Kabɛrɨnaum ntsi ɨwu atú njwi tsɨ tse ghe.

Yeso a Kɨŋ Ngaŋ Ntaŋ Mɨtan a Ndáŋwi zɨ Ngwi ə

¹³ Nɨdorɨ nɨ Tsa-yɛʼnɨ tíʼ abó, ma lan, Yeso a kɔ́ʼ ngɛn a Yerosalɛm ə.

¹⁴ A Ndáŋwi zɨ Ngwi, a kwátɨ́ ɨbɛn ba bɨ kɨ́nə́ fǐŋ bɨnkɔʼndzum, mbyindzɨ, bɨbvugɨrə-fɨkon abɔʼnɨ ngaŋ nkwebtɨ nkáb tsa tsɨ tsínɨ́ atú afaʼ bo ghe.

¹⁵ Ma lan, wɛrə a báʼ mɨnkɨ a nye ngwan, nkɨŋ ɨbɛn ba bɨtsum bɨ fukɨ a Ndáŋwi zɨ Ngwi, nkwiʼtɨ mbyindzɨ tsa abɔʼnɨ bɨnkɔʼndzum ba. Wɛrə a tíʼ mbənkɨ ɨtɛkɨ ngaŋ nkwebtɨ nkáb tsa atfúŋ atfúŋ, ndzagɨ nkáb atɨŋə ɨtsa ghe.

¹⁶ Wɛrə a sóŋ a mbó ɨbɛn ba bɨ kɨ́nə́ fǐŋ bɨbvugɨrə-fɨkon ba ngə́, “Lɔgɨnə ɨdzúm tsenə ntsa fukɨnə nɨ tsɛrə ɨghə! Nɨ kyɛntɨ a ngɨ ndá Ta ɨghan a nye adiʼ a mɨtan ə!”

¹⁷ Bɨyɛʼ ɨbyi wáʼtɨ́ ngə́ aŋwaʼnɨ a Ŋwi a soŋ ngə́, “O Ŋwi, nkɔŋə za ma kɔŋnɨ ndá ɨzo ɨ kɨ́ə tso ɨmugɨ a mu ɨnye me ghe.”

¹⁸ Bɨsáʼ bɨ ɨlaʼ bɨ bə Yuda chwɨ́gɨ́ nɨ abítɨ ngə́, “Anu zə yerɨnɨ-yerɨnɨ za o chinɨ ghɨ a ndiʼə ngə́ o tsi nɨ mɨtən a ngɨ məzen a nɨ zɨŋə le?”

¹⁹ Yeso a chwɨ́gɨ́ ngə́, “Kumnə Ndáŋwi zɨ Ngwi ziŋ ə, ma mɨ bə vwu a zɛrə wədiʼ atú njwi tsi tárə́ ghe.”

²⁰ Bo bítɨ́ ayi ngə́, “A lɔ́gɨ́ ɨlom mɨghúm mi nɨkwa nɨ ntsɔb ntugə a ngvwu Ndáŋwi zɨ Ngwi ziŋ ə, o mɨ vwu a zɛrə atú njwi tsi tárə́ le?”

²¹ Lá Ndáŋwi zɨ Ngwi za Yeso a kɨ́nə́ ngamə mbɨ́ʼ a zɛrə lá, ɨ bé mbəmnye ɨzhi ɛ.

²² Mbáʼ bɨ zhwémnɨ́nɨ́ ayi a mbó nɨvwo, bɨyɛʼ ɨbyi tíʼ ngwáʼtɨ́ ngə́ a sóŋnə a məzen; ntiʼ nɨŋ mɨntəm ɨma a nye aŋwaʼnɨ a Ŋwi abɔʼnɨ anu za Yeso a sóŋnə́.

Yeso a Zhi Mɨntəm mɨ Ŋwɔn Mɨsɔŋ a Ntsu Tsum ə

²³ Mbáʼ Yeso a bvúrɨ́nɨ́ ntsí a Yerosalɛm a nkfu nɨdorɨ nɨ Tsa-yɛʼnɨ na, bə ghaʼnɨ nɨ́ŋ mɨntəm ɨma wə ɨnye mbáʼ bo zɛ́nɨ́ ɨnu tsɨ yerɨnɨ-yerɨnɨ tsa a ghɨ́nə́.

²⁴ Lá Yeso a sé lɔgɨ anu aza tso azúm zə tse mbɨ́ʼ ngə́ wɛrə a zhí mɨntəm ɨma tsɛʼ mɨtsum ə.

²⁵ Anu zə tse a sé tsi ɨwu ngə́ á ŋwɔn tsɛrə a fɨʼtɨ a mbó zɨ mbɨ́ʼ a ŋwɔn mɨsɔŋ a ntsu, mbɨ́ʼ ngə́ wɛrə zɨmboŋ a zhí atsum za a tsínɨ́ a mu mɨntəm ɨma ghe.