Yoane 1 - Mɨkan wu Fi

Atú a Nɨgham za a Ghánɨ́ Ntsi Ntən ə

¹ A bé a mbiʼnə Atú a Nɨgham tsí ɨwu, Atú a Nɨgham a tsí bo Ŋwi, Atú a Nɨgham a bé Ŋwi ə.

² Wɛrə a tsí ɨwu a mbiʼnə bo Ŋwi;

³ bɨ káʼ azúm atsum ntsa lá a ndzum wɛrə, tɨ wɛrə bɨ kɨ chi keʼ azúm zə tsɛrə ghɨ za bɨ ghɨ́nə́.

⁴ Atú a Nɨgham a ghá ntsi mbyi, ntsi mbyi məzen yén nɨ nkaʼ a mbó ŋwɔn mɨsɔŋ a ntsu ə.

⁵ Nkaʼ wen ɨ baŋə a mu ndzumnɨ, ndzumnɨ láʼnə nkeʼ a wɛrə ghaʼə.

⁶ Ŋwi a tságɨ́ ntom ɨzhi, ŋwɔn tse wa ɨkum ɨyi bénɨ́ Yoane ghe.

⁷ A yén a fɨʼtɨ anu mbɨ́ʼ nkaʼ wa a mbó ɨbɛn, taŋ á ɨbɛn bɨtsum zuʼ nkən wa ɨ nɨŋ mɨntəm ɨma a nye Ŋwi a ntsǎ a ndzum nkaʼ wa.

⁸ Yoane zɨmboŋ a sé nkaʼ wa be, a yén a sóŋ anu a nkaʼ wa a mbó ɨbɛn ə.

⁹ Nə bé ngótɨ́ nkaʼ wa ɨ yénɨ́ a mu mbyi, mbaŋə a mu mɨntəm mɨ ŋwɔn mɨsɔŋ a ntsu tsum ə.

¹⁰ Atú a Nɨgham a tsí a mu mbyi ɛ. Ŋwi a báʼtɨ́ nkáʼ mbyi ntsa a ndzum wɛrə ɨ káʼnɨ́ lá, mbyi sé a wɛrə zhi tso mə lá.

¹¹ A yén alaʼ zɨ, lá ɨbɛn ɨbyi sé ayi kwarə.

¹² Lá bə tse kwárɨ́ ayi, nkɨ nɨŋ mɨntəm ɨma a nye zɨə; ma lan, wɛrə a ghá mɨtən a mbó bo a mbé ɨbɔ bɨ Ŋwi ə.

¹³ Bo sé bé ɨbɔ bɨ Ŋwi lá adzaŋ za ŋwɔn a bénə́ mɔn, lá be ngə́, bɨ sé jwi awa tso ɨbɔ bɨ tarɨ wu atuəshe; Ŋwi zɨmboŋ a bé Ta ɨwa ghe.

¹⁴ Atú a Nɨgham a bə́ŋ a ŋwɔn mɨsɔŋ a ntsu, ndon nɨ abɔŋəntəm abɔʼnɨ nkənu nkɨ ntsi a tɨtərɨ bɨgɨnə ghe. Bɨgɨ zé nɨfáŋ ɨni, nɨfáŋ na wɛrə a kwárɨ́nə́ a mbó Tarɨ tso Mɔn ɨyi ɨ nu tsɛʼ zɨzɨ ə.

¹⁵ Yoane a ghám mbɨ́ʼ ayi ɛ. Wɛrə a tɔ́nkɨ́ ngə́, “Nə nɨ zɨ wa ma kɨ́nə́ ngamə mbɨ́ʼ ayi a nkfu wa ma sóŋnɨ́ ngə́, ‹Zɨ wa a yenə a ndzum me a nɨ ŋwɔn wu ngwi ntsa aghan, mbɨ́ʼ ngə́ a tsí bɔŋ á bɨ jwi aghə.› ”

¹⁶ Mbɨ́ʼ abɔŋəntəm azhi za a tsinɨ a nɨ́lónɨ́, wɛrə a fɔgɨnə awɨgɨnə bɨtsum, ɨfɔgɨ ghěnə zɨ mɔʼɔ zɔŋənə ghe.

¹⁷ Ŋwi a ghá a nyɔngɔŋ ntsa lá a ndzum Mǒse, lá abɔŋəntəm abɔʼnɨ nkənu yén ntsa lá a ndzum Yeso Kristo ghe.

¹⁸ Ŋwɔn tse a láʼnə mbvurɨ tɨ zɛn a Ŋwi ə. Mɔn ɨyi wen zɨzɨ, wa a benɨ ndəŋndəŋ tso Ŋwi nkɨ mbə ntsi wə bagɨ abó, wɛrə a ghɨ bɨ zhi a Ŋwi ə.

Nkən Yoane Ngaŋ Nga Nkyi ɛ

¹⁹ Nkənu za Yoane a zhínɨ́ ɨ soŋ ɨ zɛnə, mbáʼ bɨkum bɨ bə Yuda tságɨ́nɨ́ bɨntumshe abɔʼnɨ ɨbɛn bɨ ɨlə̌ ndá Levi bɨ lo a Yerosalɛm ngyen bitɨ ayi ngə́, “O lá ɨwa le?”

²⁰ Yoane a sé tón ngǎ achwɨgə, lá a ghám asaŋəsaŋ, nɨgham ɨni lán ngə́, “Ka ma be aghan Wa bɨ Zɔ́ʼnɨ́ ə.”

²¹ Bɨ bítɨ́ ayi ngə́, “O tiʼ mbe ɨwa le? O nɨ Alaja le?” Yoane a chwɨ́gɨ́ ngə́, “Ngáŋ, ka ma be aghan wɛrə ghe.” Bo bítɨ́ ngə́, “O nɨ ntom Ŋwi za le?” Wɛrə a chwɨ́gɨ́ ngə́, “Ngáŋ.”

²² Bo tíʼ sóŋ ngə́, “Tiʼ lá soŋ awɨgɨ a ŋwɔn wa o nɨ wɛrə ghe. Bɨgɨ tsi nɨ ndɔgɨ achwɨgə ɨ bən nɨ zɛrə a mbó ɨbɛn ba bɨ tyigɨnɨ awɨgɨ ə. O soŋ ngə́ ke mbɨ́ʼ atuəmbəm azo le?”

²³ Yoane a chwɨ́gɨ́ awa nɨ za ntom Ŋwi Asaya ɨ sóŋnɨ́ ngə́: “Ma nɨ ‹nji ŋwɔn tse wa a tɔ́nkɨ́nə́ a mu mɨkɨghonɨ ngə́: Nɨ ghɨ ndómnji wu tɛmnɨnɨ a mbó Maʼmbyi a ntsǎ ɨwu ə!› ”

²⁴ Ntóm tsa bə Farisao tságɨ́nɨ́ lá,

²⁵ tíʼ mbítɨ́ a Yoane ngə́, “O tiʼ ntsa lá ɨ nə́ ngǎ nkyi a mbó ɨbɛn, mbáʼ be o tú be Wa bɨ Zɔ́ʼnɨ́ wa, kə Alaja, kə Ntom Ŋwi za le?”

²⁶ Yoane a chwɨ́gɨ́ a mbó bo ngə́, “Ma ghǎ nkyi a mbó ɨbɛn lá nɨ nkyi ngəŋ ə; lá a tɨtərɨ bən, ŋwɔn tse a tɛm ɨwu wa ka nɨ zhi awɨŋ ə.

²⁷ Wɛrə a yiŋə a ndzum me, lá tsɛʼ nkɨ ngobɨ ɨyi ma sa kuʼnɨ a nkyɛgə ghe.”

²⁸ Məzen a fú lá a Bɛtani, a ndaŋ ndzɨŋə Mɨzam Yorɨdan, adiʼ wa Yoane a kɨ́nə́ ngǎ nkyi ɨwu a mbó ɨbɛn ə.

Mɔn Mbyindzɨ Ŋwi ə

²⁹ Njwi zɨ mɔʼɔ bənə ndan, Yoane a zɛn a Yeso a yiŋənə a mbó zɨ, ntiʼ soŋ ngə́, “Mɔn Mbyindzɨ Ŋwi a yirɨ, zɨ wa a sugɨnə atuəshe a mbó mɨbvu ɨmyi ɛ!

³⁰ Lá nɨ ŋwɔn wa ma kɨ́nə́ sóŋə́ mbɨ́ʼ ayi ngə́, ‹Ŋwɔn tse a yiŋə a ndzum me, lá a nɨ ŋwɔn wu ngwi ntsa aghan, mbɨ́ʼ ngə́ a kwɛ́nə ntsi bɔŋ á bɨ jwi aghə.›

³¹ Me mboŋ, ma sá a ŋwɔn wa wɛrə a bénɨ́ zhi, lá ma ghǎ nkyi nɨ nkyi lá a ngɨə á ɨbɛn bə Izrai zhi ayi ɛ.”

³² Yoane a tíʼ sóŋ a za zɨə tsínɨ́ ɨwu nkɨ ndzɛ́n ngə́, “Ma zɛ́n Azhwi a shiʼ a nye bvugɨrə-fɨkon ndo a fɔməbvurə, ɨ shiʼ ngɔ́ŋ wə ɨnye ə.

³³ Ma sá zhi ngə́ a nɨ wɛrə ghe, lá Ŋwi, zɨ wa a tyígɨ́nɨ́ aghan a ngá nkyi nɨ nkyi, a sóŋ a mbó me ngə́, ‹O ghɨ zɛ́n á Azhwi a shiʼ ngɔ́ŋ a ɨnye ŋwɔn mbáŋnɨ́ wu tsɛrə ghe; nə nɨ ŋwɔn wa a ghánɨ́ nkyi nɨ Azhwi zə Fɛmnɨ ə.›

³⁴ Ma zɛnə a zɛrə ghe, ntíʼə nkə́ sóŋə́ a mbó bən ngə́ wɛrə a nɨ Mɔn Ŋwi ə.”

Bɨtsabɨmbyi bɨ Bɨyɛʼ bɨ Yeso

³⁵ Njwi zɨ mɔʼɔ bənə ndan, Yoane a bə nkwiʼ nkɨ ntɛm ɨwu bo bɨ bɨyɛʼ ɨbyi bi bɨbá,

³⁶ mbáʼ wɛrə a zɛ́nɨ́ a Yeso a tsanə ghe. Yoane a sóŋ ngə́, “Zɛnə, Mɔn Mbyindzɨ Ŋwi a yirɨ!”

³⁷ Bɨyɛʼ ɨbyi ba bi bɨbá zúʼ adzaŋ za a sóŋnɨ́ a məzen, ntiʼ ndzɔŋ a Yeso ghe.

³⁸ Yeso a bə́ŋ ayi, ndzɛn awa bo zɔŋənə ayi, mbitɨ awa ngə́, “Nɨ númə́ ndǒ lá ake le?” Bo chwɨ́gɨ́ wəmbo ngə́, “Rabai’ (ndiʼ lá ngə́ Ndiʼ Aŋwaʼnɨ), o chyɛ̌ lá ɨ ghé?”

³⁹ A chwɨ́gɨ́ a mbó bo ngə́, “Yen ndzɛnə azɨŋ ə.” (A bé lá tso bɨnyom bi nɨkwa a ndzəŋ nyom ə.) Ma lan, bo zɔ́ŋ ndzɛ́n adiʼ za a kɨ́nə́ nchyɛ̌ ɨwu; ntiʼ ntsi bo bo atú abvuʼ a njwi məza atsum ə.

⁴⁰ Táʼ a tɨtərɨ ba bɨbá ba bɨ zúʼnɨ́ Yoane a ghamnə bɨ tiʼ ndzɔŋ a Yeso lá, a bé Andɨrɨya, mɨma Samɔn Bita ghe.

⁴¹ A byí ntsɔ́ʼ aku a mɨma ɨyi Samɔn, ɨ soŋ wəmbo ngə́, “Bɨgɨ zɛnə a Wa bɨ Zɔ́ʼnɨ́ wa” (Atú a nɨgham məzen a diʼ lá ngə́ “Kristo” ghe.)

⁴² Wɛrə a tíʼ ndɔgɨ a Samɔn ngɛn nɨ zɨ a mbó Yeso ghe. Yeso a lén ayi, ɨ soŋ wəmbo ngə́, “Ɨkum ɨgho nɨ Samɔn mɔn Yoane wu mbáŋnɨ́, lá ɨkum ɨgho mɨ tiʼ Sɛfasɨ ə.” (Məwen ɨ be ndəŋndəŋ ngə́ Bita, ndiʼ lá ngə́ “aláŋsə́ ngɔʼ ə”.)

Yeso a Tɔŋ a Firɨbɔ bo Nataniɛ ghe

⁴³ Njwi zɨ mɔʼɔ bənə ndan, Yeso a tsɔʼ a mu ntəm zɨ a ngén a Galili ə. A zɛ́n a Firɨbɔ, ɨ soŋ wəmbo ngə́, “Zɔŋ aghə!”

⁴⁴ (Firɨbɔ a ló lá a Bɛtɨsaida, ntáʼmbagə wu wi wa Andɨrɨya bo Bita lónɨ́ ɨwu ə.)

⁴⁵ Firɨbɔ a zɛ́n a Nataniɛ, ɨ soŋ wəmbo ngə́, “Bɨgɨ zɛnə a ŋwɔn wa Mǒse a ŋwáʼnɨ́nɨ́ mbɨ́ʼ ayi a mu aŋwaʼnɨ a Nyɔngɔŋ, ntóm Ŋwi kɨ ndzɔŋ ŋwaʼnɨ mbɨ́ʼ ayi lá. Wɛrə nɨ Yeso mɔn Yosɛb wu mbáŋnɨ́, ŋwɔn bə Nazarɛ ghe.”

⁴⁶ Nataniɛ a bítɨ́ ayi ngə́, “Njingə be anu zə shiʼnɨ zə tse a fu a Nazarɛ le?” Firɨbɔ a chwɨ́gɨ́ ngə́, “Yen ndzɛn azo ə.”

⁴⁷ Mbáʼ Yeso a zɛ́nɨ́ Nataniɛ a yiŋənə a mbó zɨ lá, wɛrə a ghám mbɨ́ʼ ayi ngə́, “Nə nɨ ngótɨ́ ŋwɔn bə Izrai a wɛnə ghe; ɨbankɨ ɨnu se wə ɨnye chyɛ!”

⁴⁸ Nataniɛ a bítɨ́ ayi ngə́, “O tsa lá ɨ nə́ nji aghan le?” Yeso a chwɨ́gɨ́ wəmbo ngə́, “Bɔŋ á Firɨbɔ a ntɔŋə agho, mbáʼ a lonɨ ntsi a shwúrɨ́ atɨ a figɨ za lá, ma lo ndzɛn agho ə.”

⁴⁹ Nataniɛ a chwɨ́gɨ́ wəmbo ngə́, “Ndiʼ Aŋwaʼnɨ, o nɨ Mɔn Ŋwi ə! O nɨ Ɨfɔ bə Izrai ghe!”

⁵⁰ Yeso a sóŋ wəmbo ngə́, “O nɨŋ ntəm ɨgho a nye me lá tsɛʼ mbɨ́ʼ ngə́ ma soŋ a mbó gho ngə́ ma lo ndzɛ́n agho a shwúrɨ́ atɨ a figɨ za le? O ghɨ zɛ́n ɨnu tsɨ wi tsa tsɨ tsanɨ a məziŋ ə!”

⁵¹ A tíʼ sóŋ a mbó bo ngə́, “Tsɛʼ a nkənu, ma sǒŋ nkənu a mbó bɨŋ ə, nɨ ghɨ zɛ́n á fɔməbvurə ŋaʼnɨ, á ɨtsendá tsa tsɨ nɨ tsɨ Ŋwi nkɔ́ʼə nkə́ shíʼə a ɨnye Mɔn Ŋwɔn tso ngə́ wɛrə ni ɨkɔ́ʼ ə.”