Tɨ́tósɨ 3 - Mɨkan wu Fi

Mbɔm za Ɨbɛn ba bɨ Zɔŋnə a Kristo Tsinɨ Nchyɛ nɨ zɛrə ghe

¹ Kwemtɨ a mbó ɨbɛn ɨbo ngə́ á bo ndzúʼnɨ́ bɨta bɨ ɨlaʼ abɔʼnɨ bɨsáʼ bɨ ɨlaʼ ə. A bo ndzúʼnə́ awa, nkɨ nkyaŋtɨ ɨnye ɨtsa a ngɨ ɨbɔŋ a nye mɨndóm mɨtsum ə.

² Soŋ a mbó bo ngə́ á bo keʼ ngǎm ɨnu tsɨ tɔmnɨnɨ mbɨ́ʼ a ŋwɔn tse, lá á bo tsi nɨ mbɔnɨ nkə́ ngɨ̌ bɨson bo bɨ ɨbɛn bə mɔʼɔ, nkə́ ndǐʼ mbɔm zɨ mbɔnɨnɨ a mbó ŋwɔn tsum nkfu tsum ə.

³ Mbɨ́ʼ ngə́ bɨgɨnə mboŋ, a bé a nkfu tse lá bɨgɨnə dzɨŋtɨ, ntɨŋə atú nkə́ fə̌ ghe. Bɨgɨnə bé ɨbuʼ a mbó ɨnu tsa mbəmnye lɔnə abɔʼnɨ ɨbə́ŋ ɨnu ɨtsum tsa tsɨ ghɨnə ɨnye ŋwɔn bɔŋənə ghe. Bɨgɨnə lén ntsi mbyi ɨzɨgɨnə tsum tsɛʼ a nye abɨgəntəm abɔʼnɨ aghɨʼnɨ; ɨbɛn bə mɔʼɔ bán awɨgɨnə, bɨgɨnə kɨ mban awa ghe.

⁴ Lá a nkfu za Ŋwi Ndoŋ ɨwɨgɨnə a díʼnɨ́ ngɨ ɨbɔŋ abɔʼnɨ akɔŋnɨ azhi a mbó bɨgɨnə,

⁵ wɛrə a lóŋ awɨgɨnə ghe. A sé bé lá mbɨ́ʼ ngɨnɨ mɨnu mə shiʼnɨ mə tse ma bɨgɨnə mboŋ ghɨ́nɨ́, lá a bé lá mbɨ́ʼ akômɨlɨŋnɨ azhi mbáʼ a lóŋnɨ́ awɨgɨnə, ntsa a ndzum Azhwi zə Fɛmnɨ za a sugɨnə awɨgɨnə, bɨ tiʼə njwiə awɨgɨnə a nye ɨbɛn bə fi ntiʼə nkə́ nchyɛ̌ nɨ ntsi ntən zɨ fi lá.

⁶ Ŋwi a chwírɨ́ Azhwi zə Fɛmnɨ tɨ ghɨʼtɨ atú bɨgɨnə ntsa a ndzum Yeso Kristo Ndoŋ ɨwɨgɨnə,

⁷ taŋ, a ntsǎ a ndzum abɔŋəntəm azhi, bɨgɨnə chi tiʼ chinɨ a ɨshi ɨmɨgɨ Ŋwi ɨ kɨ tsi nɨ ntsi ntən nɨnkoŋ za bɨgɨnə tsenə nɨ mɨntəm ɨmɨgɨnə mɨtsum lá.

⁸ Zen za bɨ sóŋnə́ lá a nɨ nkənu ə. Ma lǒ ngə́ o nyəmtɨ ɨnu tsenə tsɛʼ nkan, taŋ á ɨbɛn ba bɨ nɨŋnɨ mɨntəm ɨma a nye Ŋwi chi tɛgɨ ɨtú ɨtsa a ngɨ ɨnu tsɨ shiʼnɨ, ɨnu tsɨ shiʼnɨ tsa tsɨ bɔŋnɨ nkɨ ntsi nɨ afaʼ a mbó ŋwɔn tsum lá.

⁹ Lá baʼtɨ ɨlɨʼkɨ ɨdzɨŋtɨ, mɨnkaŋ mɨ bə kɔ́ʼɔ́nguʼ mɨ tə́ ndwitə, azɔŋ, abɔʼnɨ ashwuŋnɨ mbɨ́ʼ a Nyɔngɔŋ ə. Tsɨ nɨ ɨnu adaŋədaŋə nkeʼ nɨ abi kɨ nchyɛ.

¹⁰ Kwantɨ ɨbɛn ba bɨ ghɨnə ayɛbtɨ a tɨtərɨ ɨbɛn, be ndvuŋ nkfu kɨ́gɨ́ a be nkfu tsi bá, a kwiʼ ngɨ anu zə mɔʼɔ, o koʼ nɨ anu bɨŋ bo bə nkwiʼ nchyɛ.

¹¹ O zhi ngə́ ɨdzaŋ ɨbɛn mətsa nɨ ngaŋ nkobɨ, mɨbvu ɨma kə́ ndiʼə ngə́ bo fə̌.

Ɨtɨgɨtɨ a Ndwɨgɨnə ghe

¹² Be ma tsagɨ Atɛmasɨ kə a Taichikusɨ a mbó gho, ghɨ atsum a mu adaʼ azo ɨ yen kwatɨ aghan a Naikobolisɨ, mbɨ́ʼ ngə́ ma tsɔʼnə a mu ntəm me a nchyɛ́ ɨwu a nye nkfu ɨfɛgɨ wu tən za.

¹³ Ghɨ atsum a mu adaʼ azo a ngá akwatɨ a mbó Zɛnasɨ, ɨsáʼ mɨsáʼ wa, abɔʼnɨ Abolo á bo biʼnɨ nɨyen ɨna ghe. Kɨ ndzɛn ngə́ o ghɨ bo tsi nɨ atsum za bo lɔnə ghe.

¹⁴ Ɨbɛn ɨbɨgɨnə tsi nɨ ɨ zagɨ yɛʼ a ngɨ ɨbɔŋ, taŋ ɨ chi ghanə akwatɨ za bɨ fárɨ́sɨ́nə́ ndǒ, ɨ kɨ tsi nɨ ntsi mbyi za ɨ tsinɨ nɨ ɨlɨŋ ə.

¹⁵ Ŋwɔn tsum wa a tsinɨ bɨgɨ zɨ a tsagə atɔ́ŋtɨ ə. Tsagɨ atɔ́ŋtɨ azɨgɨ a mbó ba bɨ kɔŋnɨ awɨgɨnə, ba bɨgɨnə bo tsinɨ a mu abeməntəm za. A abɔŋəntəm a Ŋwi a tsi a mbó bən bɨtsum ə.