Tɨ́tósɨ 1 - Mɨkan wu Fi

¹ Aŋwaʼnɨ zen a lo a mbó me Baolo wa ma benɨ ngaŋ afaʼ Ŋwi, nkɨ mbe ntom Yeso zɨ Yeso Kristo lá. Bɨ tsɔ́ʼ aghan ntsagɨ ngə́ á ma kwatɨ ntintɨ abeməntəm a ɨbɛn bɨ Ŋwi ba bɨ tsɔ́ʼnɨ́, á ngěn nɨ mbyi, ɨ kɨ tsagɨnɨ awa á bo ghɛn nkon a mu nkənu za ndóm wa bɨgɨnə zhinɨ a Ŋwi ɨ diʼnə,

² ndóm məwen wa bɨgɨnə zhinɨ a Ŋwi a nɨ wɛrə wa ɨ ghɨnə bɨgɨnə tsinə nɨ ntsiŋə nɨ ntəm tsum ngə́ bɨgɨnə ghɨ tsí nɨ ntsi ntən nɨnkoŋ ə. Ŋwi, zɨ wa a se ɨnu a nchwě, a káʼ awɨgɨnə nɨ ntsi ntən məzen bɔŋ á Ŋwi a káʼ atuəshe ə.

³ Nkfu za ɨ kuʼnɨnɨ ghɨnə nkúʼ, wɛrə a kyɛʼ a zɛrə a mu nkən ɨyi ɛ. Bɨ nɨ́ŋ a zɛrə a mu mbó me, ma tiʼə nkə́ nchwítə́ a zɛrə lá adzaŋ za Ŋwi, ndoŋ ɨwɨgɨnə a soŋnɨ ngə́ á ma chwitə.

⁴ Ma ŋwaʼnə aŋwaʼnɨ zen a mbó gho Tɨ́tósɨ, ngótɨ́ mɔn ɨghan wa bɨgɨ zɨ tsinɨ a mu ndəŋndəŋ abeməntəm ə. A Ŋwi, zɨ wa a benɨ Tarɨ abɔʼnɨ Kristo Yeso ndoŋ ɨwɨgɨnə gha abɔŋəntəm abɔʼnɨ mbɔnɨ a mbó gho ghe.

Afaʼ a Tɨ́tósɨ a Kritɨ ə

⁵ Ma nyɛ́ʼtɨ́ agho a Kritɨ lá taŋ o kyaŋtɨ ɨnu tsa tsɨ tsínɨ́ ngə́ á bɨ mɛtɨ nkyaŋtɨ, ɨ kɨ núm tsɔʼtɨ ɨtú ndáŋwi a mu ntáʼmbagə ɨtsum ə. Waʼtɨ ɨtɨgɨtɨ ɨtsan ngə́:

⁶ atú a ndáŋwi a tsi nɨ nchyɛ tɨ ɨfərɨ; a tsi nɨ nchyɛ tsɛʼ nɨ táʼ mangye, ɨbɔ ɨbyi tsi nɨ mbe ɨbɛn ba bɨ nɨŋnɨ mɨntəm ɨma a nye Kristo, ɨ keʼ nɨ mbɔm mɨtsɛgɨ kə zɨ atɨŋətú chyɛ.

⁷ Mbɨ́ʼ ngə́, mbáʼ atú a ndáŋwi tso məza a lánə́ atú a nye afaʼ a Ŋwi lá, a tsi nɨ nchyɛ tɨ ɨfərɨ ə. A tsi nɨ ɨ zagɨ tsi tɨ atságɨ́ kə ɨ keʼ a ngwáŋnə́ ndwi ntɔŋ, kə ɨ be abarə mɨluʼ kə ɨ be ŋwɔn wa a bvugɨnɨ ndum kə amiɛnɨngám a nye ɨnu nkáb ə.

⁸ A tsi nɨ ɨ zagɨ kwarɨnɨ ɨbɛn a ndá zɨ, ɨ kɨ kɔŋ anu za a bɔŋnɨ ə. A tsi nɨ ɨ zagɨ chwátɨ́nə ɨnye ɨzhi, ɨ chinɨ a nye ngɨnɨ mɨnu ɨmyi, ɨ fɛm, ɨ kɨ be ŋwɔn nɨ akyaŋtɨ ə.

⁹ A tsi nɨ ɨ zagɨ tiʼtɨ nkən wa ɨ shiʼnɨ, mbáʼ ɨ lá wɛrə wa bɨ chinɨ nɨŋ ntəm ɨwu, mbáʼ ɨ kɨ́nə́ nkə́ mbémnə́ bo bɨ mbɔm ndzɔŋ anu a Ŋwi lá. A nye ndóm məwen, wɛrə a mɨ chi wɔŋtɨ ɨbɛn bə mɔʼɔ nɨ aŋwaʼnɨ za bɨ diʼnə a be zə nkənu lá, ɨ kɨ diʼ akɔkɨ anu a ɨbɛn ba bɨ kwənkɨnə a zɛrə ghe.

¹⁰ Bə ghaʼnɨ tsi ɨwu, tɨ́sə́n tɨ́sə́n ba bɨ bəŋnɨ mɨntəm ɨma ɨ fɨgɨ a mɛrə a nye mbɔm nguʼsɨ Ŋwi bə Yuda, ba bɨ tənə atú, nkə́ ntámtɨ́ ɨbɛn ə.

¹¹ Bɨ tsi nɨ ɨ soŋə á bo kyɛntɨ ɨbə́ŋ mɨgham ɨma məmen, mbɨ́ʼ ngə́ bo tɔ́bɨ́ ɨtú ɨbɛn bɨtsum a mu ngwəgɨ tsɨ tse nɨ adzaŋ za bo diʼnɨ ɨnu tsa bo se tsi nɨ ndiʼə lá. Məziŋ atsum a tsi lá mbɨ́ʼ akyaŋtɨ adɨrətú zə nchyɛ nɨ nkáb ə.

¹² Táʼ ŋwɔn nɨ bo, ŋwɔn bə Kritɨ zɨmboŋ, mbe táʼ ntom Ŋwi ɨwa wu mɔʼɔ a sóŋ nkənu zen ngə́, “Nkfu tsum, bə Kritɨ bɨtsum nɨ ngaŋ ɨchwenu, mbe tso ɨnyam mɨbaʼ, nkɨ ndzɔŋ mbe ɨnarɨ tsa tsɨ nónɨ́ nɨdzɨ ə.”

¹³ Ma lan, o tsi nɨ ngamtɨ bo ɨ shəgɨnə, taŋ á bo chi tən a nye abeməntəm aza,

¹⁴ ɨ keʼ bə ntɛgɨ ɨtú ɨtsa a nye njalaʼ tsɨ kɔ́ʼɔ́nguʼ tsə bə Yuda abɔʼnɨ ntɨgə ŋwɔn mɨsɔŋ a ntsu tsa tsɨ lonɨ a mbó ɨbɛn ba bɨ tonɨ awa nkənu za lá.

¹⁵ Ɨnu ɨtsum fɛm a mbó ɨbɛn ba bo mboŋ kɨnɨ nkɨ fɛm; lá ka anu zə tsɛrə a fɛm ayi a mbó ɨbɛn ba bɨ shwiʼnɨ awa, bo keʼ kɨ nɨŋ mɨntəm ɨma a nye Kristo, tsɛʼ ɨkwaʼtɨ ɨtsa abɔʼnɨ mɨntəm ɨma, bɨ kɨnə nkɨ shwiʼ a tsɛrə ghe.

¹⁶ Bo sóŋə́ ngə́ bo zhi a Ŋwi, lá ntúŋə́ awa ayi a nye ngɨnɨ mɨnu ɨma ghe. Bo lon nɨ kɨban, nkɨ mbe ngaŋ atɨŋətú, nkeʼ kuʼnɨ a ngɨ anu zə shiʼnɨ zə tsɛrə ghe.