Roma 7 - Mɨkan wu Fi

Ka Nyɔngɔŋ a bə Mbvurɨ Ntsi ayi nɨ Mɨtən Atú Bɨgɨnə ghe

¹ Tsɛʼ a nkənu nə ɨbɔmbɨma ɨban, nɨ mɨ zuʼ kɨ zhi anu za ma lɔnɨ ɨ soŋə mbɨ́ʼ ngə́ bən bɨtsum nɨ zhi a nyɔngɔŋ Mǒse ghe. A nɨ tsɛʼ mbáʼ ɨbɛn tsinɨ atú ntən mbáʼ nyɔngɔŋ a tsinɨ nɨ mɨtən atú bo ghe.

² A bɨgɨnə lɔgɨ ngə́, nyɔngɔŋ a soŋ ngə́ mangye nɨzɔ́ʼ a tsi nɨ nghɔŋə a mu nɨzɔ́ʼ bo ndóm ɨyi ngɔŋ nkfu tsum za ndóm ɨyi a tsinɨ atú ntɨŋ ə; lá be ndóm ɨyi a kfo, ka nyɔngɔŋ nɨzɔ́ʼ a bvurɨ nchwa ayi a wɛrə a nye ndóm ɨyi wa.

³ Ma lan, be mangye a nɔŋ bo mbáŋnɨ́ zə daŋ mbáʼ ndóm ɨyi a bvurɨnɨ atú ntən muŋ bɨ mɨ tɔŋ ayi nɨ mangye achwurɨ ə; lá be ndóm ɨyi a kfo, nyɔngɔŋ nɨzɔ́ʼ a keʼ mbɨ́ŋə́ nchwǎ a mangye məwa. A tiʼ ndiʼ ngə́ ka wɛrə a bən mbe ayi mangye achwurɨ mbáʼ be a zɔ́ʼ a ŋwɔn daŋ ə.

⁴ Ɨbɔmbɨma, nə nɨ adzaŋ za nɨ tsinɨ nɨ nchyɛ ghe. Be bɨ ghángə́ bɨ ghamə mbɨ́ʼ a Nyɔngɔŋ, nɨ kɨnə nkɨ nkfo mbɨ́ʼ ngə́ nɨ nɨ bagɨ ɨnye Kristo ghe; tɨtsɔŋnɨ nɨ tiʼ ntsi lá a mbó zɨ wa bɨ zhwémnɨ́nɨ́ a mbó nɨvwo taŋ á bɨgɨnə chi tiʼ be ngaŋ afaʼ Ŋwi ə.

⁵ Mbɨ́ʼ ngə́ a nkfu wa bɨgɨnə kɨ́nə́ ngɨ̌ ɨnu tsa ɨnyam ɨnye lɔnə lá, Nyɔngɔŋ a kə́ shwɛbtɨ ɨkwaʼtɨ ngɨ ɨbvu tsa tsɨ tsínɨ́ a mu ɨnye ɨtsɨgɨnə, ɨnu ɨtsum tsa bɨgɨnə ghɨ́nɨ́, tsɨ tságɨ́nɨ́ awɨgɨnə a mbó nɨvwo ə.

⁶ Lá, tɨtsɔŋnɨ Ŋwi a kyɛtɨnə mɨnkɨ mɨ abuʼ ma Nyɔngɔŋ a kórɨ́nə́ awɨgɨnə ɨwu, mbɨ́ʼ ngə́ bɨgɨnə chigɨrɨ a mbó Nyɔngɔŋ məwen wa a láʼnɨ́ nkórɨ́ awɨgɨnə ndɛn tso ngaŋ atsáŋ lá. Ma lan, ka bɨgɨnə mbvúrə́ fáʼə awɨgɨnə a mbó Ŋwi lá a nye ndóm wu lvuŋ wu nyɔngɔŋ wa bɨ ŋwánɨ́nɨ́ lá, bɨgɨnə faʼə be a nye ndóm wu fi wa Azhwi zə Fɛmnɨ a fɨʼtɨnə ghe.

Nyɔngɔŋ a Ghɨə Bɨgɨnə zhi ngə́ Bɨgɨnə ghɨ Ɨbvu ə

⁷ A nə́ bɨgɨnə mɨ tiʼ soŋ ngə́ Nyɔngɔŋ zɨmboŋ a nɨ ɨbvu le? Kə́ kə́! Lá, a nɨ Nyɔngɔŋ məwen wa a ghɨ́nɨ́ ma zhi anu za ɨbvu nɨ wɛrə ghe. Nyɔngɔŋ a bá tú sóŋ ngə́, “Koʼ tɛgɨ ntəm ɨgho a nye azúm za a nɨ zə ŋwɔn adaŋ ə”, muŋ ma sá zhi ngə́ ntɛgɨ ntəm a nye azúm a ŋwɔn daŋ a nɨ ɨbvu ə.

⁸ Lá, ɨbvu ɨ tsá a ndzum ntɨgə ntsi nɨ abárɨ́ a ngɨə ngə́ á ma ndǒ nchyɛ nɨ ɨbə́ŋ ɨdzúm tsa ka ma tsi aghan nɨ nchyɛ nɨ tsɛrə ghe. Nyɔngɔŋ a bá tú bé muŋ ɨbvu kfónə́ ghe.

⁹ A nye nkfu zɨ tsɛrə ma tsí atú ntən mbáʼ nyɔngɔŋ wu tsɛrə a sé chyɛ, lá ma ghɨnə nji ntɨgə, ɨbvu tiʼ ntsi atú ntən, ma tiʼ nkfoə.

¹⁰ Ntɨgə za ɨ tsínɨ́ be nɨ ngɨə á ma tsi ntən, ɨ ghɨ́ ma baŋnɨ nkfo ɨ kfonə.

¹¹ Ɨbvu ɨ tsí nɨ abárɨ́, ntsa a ndzum ntɨgə ntamtɨ aghan nkɨ njwitɨ aghə.

¹² Ma lan, Nyɔngɔŋ zɨmboŋ a fɛm, ntɨgə kɨ fɛm, nkuʼnɨ nkɨ mbɔŋə.

¹³ Lá məzen a diʼ ngə́ anu zə shiʼnɨ a báŋnɨ́ ngɨ ma kfo le? Kə́ kə́! A nɨ ɨbvu mbáʼ ɨ ghɨ́nɨ́ ma kfo; ɨbvu ɨ tsá a ndzum anu zə shiʼnɨ ngyen nɨ nɨvwo a ɨnye me, taŋ á ngótɨ́ mbě ɨzhi tso ɨbvu tiʼ ntsi asaŋəsaŋ ə. Ma lan, a ntsǎ a ndzum ntɨgə, ɨbvu diʼ ngə́ zɨə bɨ́gɨ́ ntsa mbó ə.

Adzaŋ za Ɨbvu bo Ɨbɔŋ Shwuŋnɨnə a mu Ntəm Ŋwɔn Mɨsɔŋ a Ntsu ə

¹⁴ Bɨgɨnə zhi ngə́ Nyɔngɔŋ a nɨ azúm azhwi a Ŋwi; lá ma baŋnɨ mbe ŋwɔn mɨsɔŋ a ntsu wa a kfónə́, wa bɨ fenɨ tso abuʼ a mbó ɨbvu ə.

¹⁵ Ka ma ndzúʼə nkə́ njíɛ aghə anu za ma ghɨnə ghe; mbɨ́ʼ ngə́ ka ma ngɨə aghə anu za ma kɔŋnɨ ngɨə, lá ma ghɨə be anu za ma banə.

¹⁶ Tɨtsɔŋnɨ, be ma ngɨ̌ ɨnu tsa ma sa kɔŋ, a be ngə́ ma bem ngə́ nyɔngɔŋ a kuʼnə.

¹⁷ Ma lan, ka a lanɨ mbe ayi me wa a ghɨnɨ anu məziŋ ə; a baŋnɨ mbe be ɨbvu wa ɨ tsinɨ a mu ntəm ɨghə.

¹⁸ Ma zhi ngə́ ka ɨbɔŋ wu tse ɨ tsi ayi a mu ɨnye me ghe — ma sóŋə́ lá mbě ɨzan tso ŋwɔn mɨsɔŋ a ntsu ə. Mbɨ́ʼ ngə́, ma baʼtə ndǒ ngɨ anu zə kuʼnɨnɨ ɨ ghɨnɨ lá, ma chi kaʼ a zɛrə ghɨə.

¹⁹ Ka ma ngɨə aghə anu zə kuʼnɨnɨ za ma lɔnɨ ngɨə ghe; ma baŋnə ngɨə be ɨnu tsɨ tɔmnɨnɨ tsa ka ma ndǒ aghə ngɨə ghe.

²⁰ Be ma ngɨə anu za ma sa kɔŋ ngɨə, lá be ngə́ ka ma bvurɨ mbe aghan ŋwɔn wa a ghɨnə a zɛrə; a baŋnɨ mbe be ɨbvu wa ɨ tsinɨ a mu ntəm ɨghə.

²¹ Ma lan, ma zɛn ngə́ nyɔngɔŋ məwen a faʼə ghe: be ma ndǒ ngɨ anu za a bɔŋnɨ, ma kaʼ nɨ zə daŋ tsi ntsa ngɨ ɨnu tsɨ tɔmnɨnɨ ə.

²² A mu ɨsɔŋ me, ma tsi nɨ nɨdorɨ mbɨ́ʼ a nyɔngɔŋ Ŋwi ə.

²³ Lá nyɔngɔŋ wə daŋ a faʼnə a mu ɨnye me — nyɔngɔŋ wa a tǒkɨ́nə́ bo nyɔngɔŋ wa akwaʼtɨ azə a bémtɨ́nə́ ghe. A ghɨə ma be ngaŋ atsáŋ a mbó nyɔngɔŋ ɨbvu wa mbáʼ a tsinɨ afaʼ a mu ɨnye me ghe.

²⁴ Adzə́ŋnɨ a lanɨ ntsi a mu ntəm me be tɨsɨŋə! Ɨwa mɨ kwarɨ aghan a mbó ɨnyam ɨnye zen za ɨ shwuŋnə aghan ntsagə a mbó nɨvwo lá le?

²⁵ Mɨya a mbó Ŋwi, zɨ wa a faʼnə a məzen ntsǎ a ndzum Maʼmbyí Yeso Kristo ɨwɨgɨnə ghe! Lə nɨ mbe ɨzan tɨtsɔŋnɨ ngə́: nɨ me nɨ me ma chi len a nyɔngɔŋ Ŋwi tsɛʼ nɨ akwaʼtɨ azan, mbəmnye zə baŋnə ndzúʼnə́ be a nyɔngɔŋ ɨbvu ə.