Roma 4 - Mɨkan wu Fi

Abeməntəm Abraʼm ə

¹ Bɨgɨnə mɨ soŋ lá ngə́ ke mbɨ́ʼ Abraʼm ta ɨwɨgɨnə wu bə kɔ́ʼɔ́nguʼ a mu ɨnyam ɨnye le? Ake a fú wə ɨnye le?

² Be a be ngə́ a chínɨ́ a ɨshi ɨmɨgɨ Ŋwi mbɨ́ʼ ɨnu tsa wɛrə a ghɨ́nɨ́, muŋ a tsi nɨ anu zə tsɛrə a ntɛrə mbɨ́ʼ a zɛrə ghe — lá nkeʼ be a ɨshi Ŋwi be.

³ Aŋwaʼnɨ a Ŋwi soŋ ngə́, “Abraʼm a nɨ́ŋ ntəm ɨyi a nye Ŋwi ə. Mbɨ́ʼ abeməntəm azhi, Ŋwi a bém a wɛrə ngə́ wɛrə a chínɨ́ a ɨshi ɨmɨgɨ zɨə.”

⁴ Ɨbɛn ba bɨ faʼnə bɨ kwárə́ mɨtsɔʼnɨ mɨ afaʼ ɨma ghe. Lá ka bɨ ndɔ́gə́ ayi mɨtsɔʼnɨ mɨ afaʼ məmen a nye azúm zə ghanɨ ə; a nɨ mɨtsɔʼnɨ mɨ afaʼ mɨ ŋwɔn wu wu ma a faʼnɨ nɨ adaʼ azhi ɛ.

⁵ Lá ɨbɛn ba bɨ zɛʼtɨnɨ awa a nye abeməntəm nkeʼ be a nye abó afaʼ be, bo ba bɨ nɨŋnɨ mɨntəm ɨma a nye Ŋwi, zɨ wa a sóŋnə́ ngə́ ɨbɛn ba bɨ ghɨnɨ ɨbvu se bə mbvurɨ mbe ngaŋ ngɨ mɨbvu, a nɨ abeməntəm məzen za Ŋwi a lɔgɨnə ngɨə bo tɛmnɨnə a ɨshi ɨmɨgɨ zɨə.

⁶ Nə nɨ anu za a diʼnɨ mbáʼ Devidɨ a ghámnɨ́ mbɨ́ʼ ɨfɔgɨ ŋwɔn wa Ŋwi a lɔgɨnɨ ayi tso ŋwɔn wa a chinɨnɨ a ɨshi ɨmɨgɨ zɨ, ɨ nyɛʼtɨ anu za ŋwɔn məwa a ghɨnə ghe:

⁷ “Ɨfɔgə ɨ tsi a mbó ɨbɛn ba bɨ lɨgɨnɨnɨ ɨfənu ɨtsa, ɨbɛn ba bɨ nyɛʼnɨ mɨbvu ɨma ghe!

⁸ Ɨfɔgə ɨ tsi a mbó ŋwɔn wa Maʼmbyí a mɨ keʼ mbvúrə́ nkwaʼə mɨbvu ɨmyi ɛ!”

⁹ Ɨfɔgə wen wa Devidɨ a ghámnɨ́ mbɨ́ʼ a wɛrə lá ɨ tsi lá tsɛʼ a mbó ŋwɔn wa bɨ tsəŋnɨ alagɨ azhi le? Kə́ kə́! Ɨ kɨ ntsi a mbó wa bɨ se alagɨ azhi tsəŋə. Mbɨ́ʼ ngə́ aŋwaʼnɨ a Ŋwi soŋ ngə́, “Abraʼm a nɨ́ŋ ntəm ɨyi a nye Ŋwi ə; mbɨ́ʼ abeməntəm azhi Ŋwi a lɔ́gɨ́ ayi tso ŋwɔn wa a chinɨnɨ ə.”

¹⁰ Məzen a lɔ́gɨ́ adiʼ lá a nyom ake le? A bé lá a nkfu za bɨ tsə́ŋnə alagɨ Abraʼm kə mbáʼ bɨ bvúrɨ́ tɨ tsəŋ le? A bé lá a nkfu za bɨ bvúrɨ́ tɨ tsəŋə.

¹¹ Bɨ tsə́ŋ alagɨ a wɛrə tso alɨgɨ kə fɛnwu za ɨ díʼnɨ́ ngə́ wɛrə a chínə́. Nchinə ɨzhi məzen a tsí nɨ zɛrə ntsa lá a ndzum abeməntəm a nkfu za bɨ bvúrɨ́ tɨ tsəŋ alagɨ azhi ɛ. Anu za a ghɨ́nɨ́ a fu adzaŋ məwen lá a nɨ ngə́ á wɛrə be ta bɨ ɨbɛn ba bɨ nɨŋnɨ mɨntəm ɨma a nye Ŋwi tɨgha bɨ tsəŋ ɨlagɨ ɨtsa taŋ á bɨ tiʼ nkɨ soŋ ngə́ bo nɨ ɨbɛn ba Ŋwi a ghɨ́nɨ́ bo chinɨ ə.

¹² Wɛrə a kɨ mbe tá bɨ ɨbɛn ba bɨ tsəŋnɨ ɨlagɨ ɨtsa ghe. Bɨ sé ɨlagɨ məbiŋ ɨbɛn tsəŋ lá tsɛʼ tsəŋnə, bo kɨ́ ntsí nɨ abeməntəm a nye Ŋwi tsɛʼ tso mbáʼ Abraʼm a tsínɨ́ nɨ abeməntəm a nye Ŋwi bɔŋ á bɨ tsəŋ alagɨ azhi lá.

Bɨ Kwárə́ Akaʼ Ŋwi Ntsǎ lá Tsɛʼ a Ndzum Abeməntəm ə

¹³ Ŋwi a káʼ Abraʼm abɔʼnɨ ɨlə̌ ɨyi ɨtsum ngə́ atuəshe zen a ghɨ tsí a mbó bo ghe. Ŋwi a sé ghɨ mə lan ntsa lá a ndzum adzaŋ za wɛrə a kɨ́nə́ ndzúʼnə́ a Nyɔngɔŋ ə, lá a nɨ mbɨ́ʼ ngə́ wɛrə a nɨ́ŋ ntəm ɨyi a nye Ŋwi, Ŋwi a kɨ mbemtɨ ngə́ wɛrə a chínə́.

¹⁴ Mbɨ́ʼ ngə́ be a be ngə́ a nɨ ɨbɛn ba bɨ zúʼnɨ́nə́ a Nyɔngɔŋ ba bɨ mɨ tsi nɨ akaʼ a Ŋwi muŋ abeməntəm a nɨ anu adaŋədaŋə, akaʼ a Ŋwi za keʼ nɨ ɨlɨŋ nkɨ nchyɛ.

¹⁵ Mbɨ́ʼ ngə́ Nyɔngɔŋ a ghɨə Ŋwi a lwɛnɨ ntɔŋə, lá be nyɔngɔŋ a tú be muŋ ŋwɔn ntsɛrə a mɨ keʼ kɨ fasɨ a nyɔngɔŋ ə.

¹⁶ Ma lan, ɨbɛn chyɛ̌ nɨ akaʼ a Ŋwi ntsǎ lá a ndzum abeməntəm taŋ á akaʼ a Ŋwi a mbó ɨlə̌ Abraʼm ɨtsum, za a zɛʼtɨnɨ a nye abɔŋəntəm tiʼ mbe mɨntɨ ma bɨ bɛʼnɨ ngə́ zɨə ghɨ lɛn akaʼ azhi ɛ — nkeʼ tsɛʼ a mbó ba bɨ lɛnə a Nyɔngɔŋ be, lá nkɨ nkwiʼtɨ a ba bɨ tsinɨ nɨ abeməntəm tso za Abraʼm a tsínɨ́ nɨ zɛrə, mbɨ́ʼ ngə́ wɛrə a nɨ ta ɨwɨgɨnə wu kɔ́ʼɔ́nguʼ, ɨwɨgɨnə bɨtsum ə.

¹⁷ Aŋwaʼnɨ a Ŋwi a soŋ ngə́, “Ma ghɨ agho a nye ta bɨ ɨtom tsɨ ghaʼnə” — a ɨshi Ŋwi, zɨ wa wɛrə a nɨ́ŋnɨ́ ntəm ɨyi wə ɨnye, wa a ghánɨ́ ntsi ntən a mbó bɨkfú nkə́ ngɨə ɨdzúm tsa tsɨ kwɛ́nɨ́ keʼ tsi, á tsɨ chyɛ.

¹⁸ Abraʼm a nɨ́ŋ ntəm ɨyi a nye Ŋwi nkə́ ntsíŋə́ nɨ ntəm ɨyi ɨtsum lá mbáʼ anu zə tse a sé ɨwu tsi a ntsiŋə nɨ ntəm ɨyi ɨtsum, ma lan, wɛrə a tíʼ mbe “Ta bɨ ɨtom ɨtsum atuəshe.” Tsɛʼ adzaŋ za aŋwaʼnɨ a Ŋwi soŋnɨ ngə́, “Ɨbɛn bɨ ɨlə̌ ɨgho ghɨ gháʼ ɨ be tso mɨndzɔŋ ə.”

¹⁹ Abeməntəm azhi a sé abɨŋ fɨʼrɨ, a nkfu za wɛrə a kwáʼtɨ́nɨ́ ngə́ ɨnye ɨzhi lvúŋ a nye ndóm wa wɛrə a kɨ́nə́ nkwaʼtə ngə́ zɨə chi kfoə. Wɛrə a bé tso ɨlom nkɨ wu fɨgɨnɨ ə. Ɨ bə kwiʼtɨ, abeməntəm azhi a sé abɨŋ fɨʼrɨ, a nkfu za wɛrə a kwáʼtɨ́nɨ́ ngə́ Sara a lvúŋnə́ ntsa ɨfɨʼ njwiə ghe.

²⁰ Abeməntəm azhi a sé abɨŋ fɨʼrə. Wɛrə a zhí tsɛʼ ɨ shiʼnɨ ngə́ anu za Ŋwi a káʼnɨ́ ayi nɨ zɛrə lá a ghɨ fuə, ma lan, abeməntəm azhi a lwɨ́gɨ́ ayi nɨ mɨtən, wɛrə a bontɨ a Ŋwi,

²¹ nji a shwi a mu ntəm zɨ ngə́ anu za Ŋwi a káʼnɨ́ ayi ɨwu lá a ghɨ fuə.

²² Ma lan, a nɨ abeməntəm azhi məzen za a ghɨ́nɨ́ ngə́ á Ŋwi a lɔgɨ Abraʼm tso ŋwɔn wa a chínɨ́nɨ́ ə.

²³ Bɨ sé ŋwaʼnɨ mɨgham mɛnə ngə́, “Ŋwi a lɔ́gɨ́ ayi tso ŋwɔn wa a chinɨnɨ” lá tsɛʼ mbɨ́ʼ Abraʼm zɨzɨ ə.

²⁴ Bɨ kɨ́ ŋwaʼnɨ a mɛrə lá a mbó bɨgɨnə ba bɨ tsinɨ nɨ ndɔgɨ bɨgɨnə tso ba bɨ chinɨnɨ, mbɨ́ʼ ngə́ bɨgɨnə nɨŋ mɨntəm ɨmɨgɨnə a nye zɨə. A nɨ zɨ wa a zhwémnɨ́nɨ́ a Yeso Maʼmbyí ɨwɨgɨnə a mbó nɨvwo ə.

²⁵ Mbɨ́ʼ mɨbvu ɨmɨgɨnə, bɨ ghá a wɛrə a mbó nɨvwo, nkɨ ntiʼ nzhwemnɨ ayi ngə́ á tsi ntən taŋ ɨ ghɨ á Ŋwi a bem ngə́ bɨgɨnə chinɨ a ɨshi ɨmɨgɨ zɨə.