Roma 3 - Mɨkan wu Fi

Ŋwi a Ghɨə Anu za Zɨə Kaʼnɨ a Ngɨə ghe

¹ Abi za bə Yuda tiʼnɨ ntsi nɨ zɛrə ntsa ɨbɛn bə mɔʼɔ a tiʼ mbe ake le? Kə ɨlɨŋ tse lanɨ ntsi ɨwu a ntsəŋ alagɨ le?

² Tsɛʼ a nkənu, zə wi a tsi ɨwu a nye mɨndóm mɨtsum ə! A ntsambyi, Ŋwi a nɨ́ŋ mɨgham ɨmyi lá mu mbó bə Yuda ghe.

³ Ake mɨ ghɨ mbáʼ be bə tse sé ghɨ ɨnu tsa bo tsínɨ́ nɨ ngɨə le? Məzen a diʼ lá ngə́ Ŋwi a mɨ keʼ bə ngɨ ɨnu tsa wɛrə a káʼnɨ́ a ngɨə le?

⁴ A chi keʼ lá be! Ŋwi a sóŋə́ tsɛʼ nkənu nkfu tsum, lá ŋwɔn mɨsɔŋ a ntsu tsum a be ngaŋ ɨchwenu ə. Tso mbáʼ bɨ ŋwáʼnɨ́nɨ́ a mu Aŋwaʼnɨ a Ŋwi ngə́, “Nkfu tsum za nɨ ghamnə, ŋwɔn tsum a tsi nɨ ndze nkənu a nye anu za nɨ sóŋnə́ ghe; o dzɨ̌ ɨsáʼ ɨgho tsɛʼ nkfu tsum ə.”

⁵ Lá be a be ngə́ ɨfənu ɨtsɨgɨnə baŋnə ndǐʼ adzaŋ za Ŋwi a chinɨnɨ, bɨgɨnə mɨ soŋ ngə́ ke le? Bɨgɨnə chi soŋ ngə́ Ŋwi a fə̌ anu mbáʼ be a nɨŋ ngɨ́ʼ tse a nye bɨgɨnə le? (Ma ghamə lá tso ŋwɔn mɨsɔŋ a ntsu ə)

⁶ A chi keʼ lá be! Be a be mə lan, Ŋwi a chi tiʼ sáʼ atuəshe zen lá ɨ nə́ le?

⁷ A mɨ be ɨ lə mbáʼ be a ntsǎ a ndzum ɨchwenu ɨtsan, nkənu Ŋwi tɛ́mə́ a ntáʼ asaŋəsaŋ a ngá nɨfáŋ a mbó wɛrə le? Bɨ chi tiʼ bə soŋ ngə́ ma vwo ɨsáʼ mbɨ́ʼ ngə́ ma nɨ ngaŋ ngɨ mɨbvu lá ngə́ ke le?

⁸ Bɨ tiʼ keʼ soŋ ngə́, “A bɨgɨnə ghɨ ɨbvu taŋ á ɨbɔŋ ɨ zɔŋ ɨwu ngə́ ke le”? A nkənu, ɨbɛn bə tse zɔmnə aghan, nkáŋə́ aghan ngə́ ma sǒŋ anu məziŋ ə! Bɨ ghɨ sóŋ ngə́ bo vwo ɨsáʼ tsɛʼ adzaŋ za bɨ bénɨ́ sóŋə́.

Ka Ŋwɔn Tse a Chinɨ ayi ɛ

⁹ Ma lan, bɨgɨ bə Yuda tsa a ba a se bə Yuda be a nye ndóm tse le? Kə́ kə́! Mbɨ́ʼ ngə́ ma kwɛnə soŋ ngə́ ɨbvu kubɨnɨ bə Yuda abɔʼnɨ ba a se bə Yuda be tsɛʼ bɨtsum ə.

¹⁰ Adzaŋ za Aŋwaʼnɨ a Ŋwi a soŋnɨ ngə́: “Ka ŋwɔn tse a chinɨ ayi a ɨshi ɨmɨgɨ Ŋwi,

¹¹ wu tse a keʼ nɨ zóŋ tsi kə ntsɔʼə aku a Ŋwi a ngúʼsɨ́ zɨə.

¹² Bɨtsum bɨ furɨ ndzum ɨza nga a mbó Ŋwi; bɨtsum bɨ fə̂; ka ŋwɔn tse a ngɨə ayi anu za a kuʼnɨnɨ, kə́ tsɛʼ táʼ ghe.

¹³ Ɨchwenu ɨtsa chi zhwitɨ ɨbɛn; mɨgham mɨ ntsu ɨma nɨ mə ɨbvu, mɨgham mɨ nkyesɨ ma mɨ fúnə́ a ntsu bo fi ndyíʼ ɨnyo;

¹⁴ anu atsum za bo ghamnə a nɨ ndɔʼ ɨbɛn abɔʼnɨ mɨgham mɨ mɨlwintɔŋ tɨbɔŋ ə.

¹⁵ Bo yǎŋ ɨnye a nchwirɨ alɛm;

¹⁶ adiʼ atsum za bo tsanɨ ɨwu, bo tsənkɨ ɨdiʼ adaŋədaŋə, ngɨə ɨbɛn zenɨ ngɨ́ʼə.

¹⁷ Ka bo ndáʼə nkwáʼtə́ awa mbɔnɨ,

¹⁸ ka bo nkə́ mbɔ́gɨ́tə́ awa a Ŋwi ə.”

¹⁹ Tɨtsɔŋnɨ bɨgɨnə zhi ngə́ anu atsum za bɨ ŋwáʼnɨ́nɨ́ a mu Nyɔngɔŋ a tsi a mbó ɨbɛn ba Nyɔngɔŋ wa a nɨ ɨwa, taŋ á ɨbɛn keʼ nɨ anu zə soŋnɨ tsi, ɨ ghɨ á ŋwɔn tsum a mu mbyi tsum a tɛm a ɨshi Ŋwi mbə́rɨ́ mɨto ɨmyi ɛ.

²⁰ Be ŋwɔn a ghɨ ɨnu tsa Nyɔngɔŋ a soŋnɨ, ka məza a diʼ ayi ngə́ wɛrə a chinɨ a ɨshi ɨmɨgɨ Ŋwi ə, lá Nyɔngɔŋ a ghɨə be ngə́ á ɨbɛn zhi ngə́ bo ghɨ mɨbvu a nye Ŋwi ə.

Adzaŋ za bɨ Ghɨnə Bɨgɨnə Tɛmnɨnə a Ɨshi Ɨmɨgɨ Ŋwi ə

²¹ Lá tɨtsɔŋnɨ Ŋwi a diʼnə ndóm wa ɨbɛn chinɨ tsa ɨwu ɨ chinɨ a ɨshi ɨmɨgɨ zɨə. Nyɔngɔŋ Mǒse abɔʼnɨ ntóm Ŋwi kɨ́ ngam mbɨ́ʼ ndóm məwiŋ ə.

²² Ŋwi a chísɨ́ ɨbɛn bo bo tsinə a mbúm ntsǎ lá a ndzum abeməntəm aza a nye Yeso Kristo ghe. Ŋwi a ghɨə a məzen a mbó ŋwɔn tsum wa a nɨŋnɨ ntəm ɨyi a nye Kristo, mbɨ́ʼ ngə́ ka líʼ a tsi ayi ɨwu tsɛʼ mɨnyiə ghe:

²³ mbɨ́ʼ ngə́ ŋwɔn tsum a ghɨnɨ ɨbvu nchi keʼ ghɛn fátɨ́ nɨfáŋ nɨ Ŋwi ə.

²⁴ Lá a ndzum azúm zə ghanɨ za a nɨ abɔŋəntəm a Ŋwi, Ŋwi a bem ngə́ ŋwɔn tsum a chinɨ a ɨshi ɨmɨgɨ zɨ ntiʼ ntsi bo zɨ ntsa a ndzum Kristo Yeso, zɨ wa a kyɛtɨnə mɨnkɨ mɨ abuʼ a nye bo lá.

²⁵ Ŋwi a ghá ayi ngə́, á alɛm azhi a tiʼ mbe ndómnji wa ɨbɛn tsanə ɨwu bɨ lɨgɨnɨnɨ mɨbvu ɨma ntsa a ndzum abeməntəm aza a nye Kristo ghe. Məzen a tsí lá a ndiʼə adzaŋ za Ŋwi a chinɨnɨ, mbɨ́ʼ ngə́ a mu nchigə ɨzhi tso Ŋwi, wɛrə a kə́ ngwágɨ́nə́ mɨbvu mɨ ɨbɛn a mbyi ɛ;

²⁶ lá tɨtsɔŋnɨ, ka wɛrə a mbvúrə́ ngwágɨ́nə́ ayi mɨbvu mɨ ɨbɛn, taŋ ɨ diʼ ngə́ zɨə chinɨ ə. Adzaŋ məwen Ŋwi a diʼə ngə́ zɨə chinɨ nkɨ mbem a ŋwɔn tsum wa abeməntəm azhi a tsinɨ a nye Yeso tso ɨbɛn ba bɨ chinɨnɨ a ɨshi ɨmɨgɨ zɨə.

²⁷ Bɨgɨnə chi tiʼə tɛrɨnə lá nɨ ake le? Kə́ kə́! Yentəzɔʼ a tiʼ mbe ake le? A be lá mbɨ́ʼ ngə́ bɨgɨnə lěn a Nyɔngɔŋ Ŋwi le? Ngáŋ, be mbɨ́ʼ ngə́ bɨgɨnə tsi nɨ abeməntəm ə.

²⁸ Mbɨ́ʼ ngə́ bɨgɨnə kwɛnə nji ngə́ Ŋwi a bémə́ ngə́ ŋwɔn a chinɨ a ɨshi ɨmɨgɨ zɨ be mbɨ́ʼ abeməntəm azhi nkeʼ be be ngə́ a lěn ɨnu tsa Nyɔngɔŋ a sóŋnə́ ghe.

²⁹ Kə Ŋwi a lá tsɛʼ wu bə Yuda le? A se Ŋwi ba a se bə Yuda be kɨ mbe le? Tsɛʼ a nkənu, Ŋwi a kɨ mbe Ŋwi ba a se bə Yuda be ə.

³⁰ Ŋwi a nɨ wi mɔ́ʼɔ́ ghe; wɛrə a mɨ bem ngə́ bə Yuda chinɨ a ɨshi ɨmɨgɨ zɨ mbɨ́ʼ abeməntəm aza ɨ kɨ bem ngə́ ba a se bə Yuda be chinɨ a ɨshi ɨmɨgɨ zɨ mbɨ́ʼ abeməntəm aza ghe.

³¹ Məzen a tiʼ ndiʼ lá ngə́ bɨgɨnə mɨ nyɛʼ a Nyɔngɔŋ Ŋwi mbɨ́ʼ abeməntəm məzen le? Ngáŋ, a se mə lá be; bɨgɨnə baŋnɨ ntsi nɨ nchwa Nyɔngɔŋ Ŋwi á təntɨ ə.