Roma 16 - Mɨkan wu Fi

Baolo a tɔŋtɨ Ɨbɛn bə Roma ghe

¹ Ma soŋ a mbó bən ngə́ Febe mɨma ɨwɨgɨnə wa a kɨnɨ nkɨ nɨŋ ntəm ɨyi a nye Ŋwi tso bɨgɨnə, wa a faʼnə a mu ndáŋwi a Sɛnkre lá, a nɨ ŋwɔn wa a faʼnɨ ɨfaʼ tsɨ shiʼnɨ ə.

² A nɨ kwarɨ ayi nɨ ɨkum Maʼmbyí a nye mbon wa ɨ finɨ ɨbɛn bɨ Ŋwi ə. A nɨ gha akwatɨ atsum za wɛrə a lɔnə mbɨ́ʼ ngə́ wɛrə a ghɨ̌ ɨbɔŋ a mbó ɨbɛn bə ghaʼnɨ nkwiʼtɨ aghə.

³ A nɨ tɔŋtɨ a Briska abɔʼnɨ Akila a mbó me, ɨbɛn ba bɨgɨ bo faʼnə afaʼ a Kristo Yeso ghe.

⁴ Bo fánɨ́ mɨntɔŋ ɨma, mbɔm aghə. Ndáŋwi ba a se bə Yuda be abɔʼnɨ me gha anaʼachi zə wi a mbó bo ghe.

⁵ A nɨ tɔŋtɨ ndáŋwi za ɨ kónə́ a ndá bo lá. A nɨ kɨ ntɔŋtɨ a mbɔŋ ɨson ɨghan Ebanatusɨ wa a bénɨ́ ntsambyi ŋwɔn a mu Mbuʼ Esha a nɨ́ŋ ntəm ɨyi a nye Kristo lá.

⁶ A nɨ tɔŋtɨ a Mɛrɨ, zɨ wa a faʼnə nɨ adaʼ azhi atsum a mbó bən lá.

⁷ A nɨ tɔŋtɨ a Andɨrɨnɨkusɨ bo Yunaya bo ba a nɨ bə Yuda tso me, ba bɨ tsínɨ́ atsáŋ bɨgɨ bo lá; bɨ zhi awa tsɛʼ ɨ shiʼnɨ a tɨtərɨ ntóm Yeso ghe. Bo fóm nɨ́ŋ mɨntəm ɨma a nye Kristo tɨ me ghe.

⁸ A nɨ tɔŋtɨ Amblyatusɨ wa a nɨ mbɔŋ ɨson ɨghan a ndzum Maʼmbyí lá.

⁹ A nɨ tɔŋtɨ a Urɨbano, ŋwɔn wa bɨgɨnə bo faʼnə a mbó Kristo abɔʼnɨ Stakisɨ mbɔŋ ɨson ɨghə.

¹⁰ A nɨ tsaʼtɨ Abele wa bɨ bémtɨ́nə́ ayi asaŋəsaŋ adzaŋ za a faʼnə a mbó Kristo lá. Nɨ tɔŋtɨ ngwəgɨ Aristobulusɨ ə.

¹¹ Nɨ tsaʼtɨ a Ɛrɔdiɔnɨ ŋwɔn bə Yuda tso me ghe. Nɨ tsaʼtɨ ngaŋ ngwəgɨ Nasisusɨ tsa tsɨ nɨŋnɨ mɨntəm ɨma a nye Kristo lá.

¹² A nɨ tɔŋtɨ a Trɨfina abɔʼnɨ Trɨfosa, bo ba bɨ faʼnə a mbó Maʼmbyí lá. A nɨ tsaʼtɨ a Bəsisɨ mbɔŋ ɨson ɨghan wa a faʼnə nɨ adaʼ azhi atsum a mbó Maʼmbyí lá.

¹³ A nɨ tɔŋtɨ a Rufusɨ wa a faʼnə afaʼ zə wi a mbó Maʼmbyí bo nɨmi ɨyi wa a kɨnɨ nkɨ mbe tso nɨmi ɨghan lá.

¹⁴ A nɨ tsaʼtɨ Asinkritusɨ, Flɛgɔnɨ, Ɛməsɨ, Batorobasɨ, Ɛmasɨ abɔʼnɨ ɨbɛn bɨtsum ba bɨ nɨŋnɨ mɨntəm ɨma a nye Ŋwi a tɨtərɨ bo ghe.

¹⁵ A nɨ tsaʼtɨ a Filologusɨ bo Jurɨya, Nerusɨ abɔʼnɨ mɨma ɨyi wu mangye: á nɨ kɨ ntsaʼtɨ a Olimbasɨ abɔʼnɨ ɨbɛn bɨ Ŋwi ba bɨ tsinɨ bo bo ghe.

¹⁶ A nɨ tɔŋtɨ awən bən nɨ bən ɨ shiʼnɨ ɨ shiʼnɨ a nye ndóm wa ɨ diʼnɨ ngə́ nɨ nɨ ɨbɛn bɨ Ŋwi ə. Ndáŋwi Kristo tsum tsagə atsaʼtɨ a mbó bɨŋ ə.

Ndwɨgɨnɨ ndzum Atɨgɨtɨ ə

¹⁷ Ma nyíʼtə́ awɨŋ ə, ɨbɔmbɨma ɨban ngə́ á nɨ keʼ nɨ anu zə tse tsi bɨŋ bɨ ɨbɛn ba bɨ bvugɨnɨ ndum nkə́ ngyíŋə́ nɨ ngɨ́ʼ a nye abeməntəm azən nkə́ ngɨə nɨ furɨnɨ ndzum ɨtsən a mbó ɨnu tsa bɨ diʼnə awən nɨ tsɛrə lá. A nɨ baʼtɨ awa a nye mɨndóm mɨtsum ə.

¹⁸ Mbɨ́ʼ ngə́ ɨbɛn ba bɨ ghɨnɨ ɨbə́ŋ ɨnu mətsen se faʼə lá a mbó Kristo Maʼmbyí ɨwɨgɨnə ghe. Bo baŋnə ngɨə be ɨnu tsa tsɨ bɔŋnə tsɛʼ mɨfúʼ mɨ ntɔŋ ɨma ghe. Bo lɔgə mɨgham mɨ ndɛtɨ ɨbɛn abɔʼnɨ mɨgham mɨ ntám a shwuŋ ɨbɛn ba mɨntəm ɨma bɔrɨnɨ ɨ fɨgɨ a mu anu a Maʼmbyí ɛ.

¹⁹ Ŋwɔn tsum a zuʼnə adzaŋ za nɨ zúʼnɨ́nɨ́ nkən wu shiʼnɨ tsɛʼ a nkə. Mbɨ́ʼ a məzen ma tiʼə ndórə́ mbɨ́ʼ awɨŋ ə. Ma lǒ ngə́ á nɨ be ngaŋ zóŋ mbáʼ be a be anu mbɨ́ʼ ɨnu tsɨ shiʼnɨ, lá ɨ be bɨ mbuʼ a nye ɨnu tsɨ tɔmnɨnɨ ə.

²⁰ A nye ndóm məwen, Ŋwi, zɨ wa a ghánɨ́ mbɔnɨ a mɨ bɛʼtɨ a Satan ɨ tsagɨ a shwúrɨ́ mɨku bən a nye məkum a nkfu ə. A abɔŋəntəm a Maʼmbyí Yeso Kristo ɨwɨgɨnə a tsi a mbó bɨŋ ə.

²¹ Timotyo ŋwɔn wa bɨgɨ zɨ faʼnə a tɔ́ŋtə́ awən abɔʼnɨ Lushɔsɨ, Jasɨn nɨ Sosibata bo ba bo nɨ bə Yuda tso me lá.

²² Me Təshɔsɨ wa ma vwuŋnɨ aŋwaʼnɨ zen a tɨshe a nkfu Baolo, ma tsagə atsaʼtɨ a mbó bən nɨ ɨkum Maʼmbyí ɛ.

²³ Gayɔsɨ wa ma tsinɨ ɨ wə ndá, ndáŋwi kə́ nkúŋə́ ɨwu, a tɔ́ŋtə́ awɨŋ ə. Eratosɨ ndě nkáb a ntáʼmbagə wu wi bo mɨma ɨwɨgɨnə Kwatosɨ tɔ́ŋtə́ awɨŋ ə.

²⁴

Atsaʼtɨ Ŋwi a Baolo zə Ndwitə ghe

²⁵ A bɨgɨnə gha nɨfáŋ a mbó Ŋwi ə! Wɛrə a chi ghɨ o tɛm tə́ nchíʼnə́ a mu abeməntəm azo, ndzɔ̌ŋ Nkən wu Shiʼnɨ wa ma sóŋnə́ mbɨ́ʼ a Yeso Kristo, ndzɔ̌ŋ nkənu za ɨ tsinɨ a nkubə za bɨ tiʼnɨ ndɛn be asaŋəsaŋ lá. Bɨ lwɛ́ʼ anu a nkubə məzen nchwuʼnɨ a ngúʼə ngúʼə ghe.

²⁶ Lá tɨtsɔŋnɨ ɨnu tsa ntóm Ŋwi ŋwáʼnɨ́nɨ́ ghɨnə nkənu məziŋ tiʼ nɔŋ be asaŋəsaŋ; a ntsǎ a ndzum adzaŋ za Ŋwi, zɨ wa a nɨ wu ntsi ntən nɨnkoŋ a tɨgɨtɨnɨ, ɨlaʼ ɨtsum zhi nkənu məzen taŋ á ŋwɔn tsum a nɨŋ ntəm ɨyi a nye Ŋwi nkə́ ndzúʼnə́ a wɛrə ghe.

²⁷ A mbó Ŋwi, zɨ wa a nɨ tsɛʼ zɨzɨ wa a tsinɨ nɨ zóŋ, á nɨfáŋ tsi wəmbo ntsa a ndzum Yeso Kristo nɨnkoŋ ə! A be lá.