Roma 13 - Mɨkan wu Fi

Bɨgɨnə Tsi nɨ Ndzuʼnɨ Bɨsáʼ bɨ Ɨlaʼ ə

¹ A ŋwɔn tsum a ndzúʼnɨ́ ɨbɛn ba bɨ sáʼnə́, mbɨ́ʼ ngə́ ka nsáʼlaʼ wu tse a tsi ayi ɨwu tɨgha ayi ɨwu a nyɛʼtɨ Ŋwi ə. A chwem Ŋwi nchwem ɨbɛn ba bɨ sáʼnə́ tɨtsɔŋnɨ alaŋ ə.

² Ma lan, ŋwɔn wa a tənə atú a mbó ɨbɛn ba bɨ sáʼnə́, a tɨŋə atú lá a mbó ɨbɛn ba Ŋwi a ghanɨ mɨtən a mbó bo ghe. Be ŋwɔn tse a tən atú muŋ bɨ mɨ sáʼ ayi ɨ buʼ ɨfam atú zɨə.

³ Ka bɨta bɨ ɨlaʼ be awa nɨbɔgɨ nə tsɛrə a mbó ɨbɛn ba bɨ ghɨnɨ ɨbɔŋ ə. Bo be nɨbɔgɨ be a mbó ɨbɛn ba bɨ ghɨnɨ ɨnu tsɨ tɔmnɨnɨ ə. O mɨ kɔŋ nchyɛ tə́ mbɔ́gɨ́ ɨbɛn ba bɨ sáʼnə́ le? A ntiʼə ngɨə tsɛʼ ɨnu tsɨ shiʼnɨ ə, bo mɨ tiʼə bontɨnə agho ə.

⁴ Bɨta bɨ ɨlaʼ nɨ ngaŋ afaʼ Ŋwi tsa tsɨ faʼnə a mbó gho ghe. Lá be o ghɨ ɨnu tsɨ tɔmnɨnɨ muŋ o tsi nɨ nchyɛ nɨ nɨbɔgɨ, mbɨ́ʼ ngə́ bo tsi nɨ mɨtən a nɨ́ŋ ngɨ́ʼ a ɨnye gho ghe. Bo nɨ ngaŋ afaʼ Ŋwi nkə́ nɨ̌ŋ ngɨ́ʼ za Ŋwi a lɔnə atú ɨbɛn ba bɨ ghɨnɨ ɨnu tsɨ tɔmnɨnɨ ə.

⁵ Ka o tsi agho nɨ ndzuʼnɨ ɨbɛn ba bɨ sáʼnə́ lá tsɛʼ mbɨ́ʼ ngə́ bo mɨ nɨŋ ngɨ́ʼ za Ŋwi a lɔnə atú gho ghe, o tsi nɨ ngɨə ma lan lá mbɨ́ʼ ngə́ o mɔmtɨ ntəm ɨgho nji ngə́ a kuʼnɨ a ngɨə mə lá.

⁶ Nə nɨ anu za o tsinɨ nɨ ntfu ɨshɛbɨ mbɨ́ʼ ngə́ ɨbɛn ba bɨ sáʼnə́ lá ngaŋ afaʼ Ŋwi, nkə́ faʼə lá afaʼ a Ŋwi a nkfu za bo kwárɨ́nɨ́ ɨshɛbɨ ə.

⁷ A nɨ ntfǔ nkáb tsum a mbó ɨbɛn ba bɨ bítɨ́nə́ awɨŋ ə, ashɛbɨ a mbó ŋwɔn wa a kuʼnɨnɨ a ntfú ashɛbɨ wəmbo, nkáb atú ɨdzúm tsa o tsinɨ nɨ tsɛrə a mbó ŋwɔn wa a tsinɨ nɨ nkwarɨ nkáb məziŋ ə. A nɨ nkə́ ndǐʼ mbɔm zɨ shiʼnɨ a mbó ŋwɔn wa nɨ tsinɨ nɨ ndiʼ mbɔm zɨ shiʼnɨ wəmbo, nkɔ́ʼsə́ atɨ́ a ŋwɔn wa nɨ tsinɨ nɨ nkɔʼsə atɨ́ ə.

Ɨnu tsa Ŋwɔn a Tsinɨ nɨ Ngɨə a mbó Wu Mɔʼɔ Ŋwɔn

⁸ A nɨ keʼ nɨká nə tsɛrə a nchwǎ ntsatɨ ngə́ á nɨ nkɔŋə a ŋwɔn tsum ə; ŋwɔn wa a kɔŋnə a ŋwɔn tsum a lě lá a Nyɔngɔŋ wa.

⁹ Ntɨgə tsə tsɛrə tsa tsɨ soŋnɨ ngə́, “Koʼ chwurə, Koʼ zhwitɨ a ŋwɔn, Koʼ ze, Koʼ ghɨʼnɨ nchyɛ nɨ azúm za a se azo be,” abɔʼnɨ tsɨ mɔʼɔ ntɨgə zumtɨ anu atsum a nye táʼ ntɨgə wɛnə ngə́, “Kɔŋ a ŋwɔn nɨbarə ɨgho tsɛʼ adzaŋ za o kɔŋnɨ atuəmbəm azo ə.”

¹⁰ Ka akɔŋnɨ a ngɨə ayi anu a tɨbɔŋ zə tsɛrə a nye ŋwɔn nɨbarə ghe; be o nkɔ́ŋə́ a ŋwɔn wu mɔʼɔ, lá be ngə́ o lěn lá a Nyɔngɔŋ wa.

¹¹ Nɨ mɨ zagɨ ghɨ a məzen, mbɨ́ʼ ngə́ nɨ zhi ngə́ nkfu ɨ kuʼnə adzaŋ za nɨ mɨ vwukɨ a fɨlye. Mbɨ́ʼ ngə́, tɨtsɔŋnɨ, ɨloŋ tiʼ tsɛʼ abó ntsatɨ nkfu za bɨgɨnə fómnɨ́ nɨ́ŋ mɨntəm ɨmɨgɨnə a nye Kristo ghe.

¹² A tsi lá tso ngə́ ɨtfúʼ tiʼnə nkyɛ́nə́, njwi tiʼə ndə̌ ngyiŋə ghe. Bɨgɨnə mɨ zagɨ kyɛntɨ ngɨ ɨnu ndzumnɨ, ɨ baŋnɨ tiʼtɨ ɨdzúm ntso tsa bɨ tónə́ nɨ tsɛrə nəzhwɨgɨnɨ ə.

¹³ Bɨgɨnə tsi nɨ ɨ zagɨ ghɨnɨ ɨnu tsɛʼ adzaŋ za bɨ ghɨnɨ ɨnu, tso ɨbɛn ba bɨ tsinɨ a mu nkaʼ — nkeʼ nchyɛ̌ nɨ afágɨ́nɨ, nkeʼ nǒ mɨluʼ mbánə́, nkeʼ ntɔrɨ ɨlɛbɨ kə ngɨ̌ ɨtɨshwe ɨnu, nkeʼ ndzɔŋnə kə nghɨ́ʼnə́ ghe.

¹⁴ Lá, á nɨ tsi nɨ mbɔm Maʼmbyí Yeso Kristo, nkeʼ ɨtú ɨtsən tɛgɨ a nye ɨdzúm tsa mbəmnye lɔnə taŋ ɨ ghɨ ɨnu tsa mbəmnye lɔnə lá.