Roma 11 - Mɨkan wu Fi

Mɨlɨŋnɨ Ŋwi a nye bə Izrai ghe

¹ Ma tiʼ mbitɨ ngə́: njingə Ŋwi a tsɔ́ʼ mbó a nye ɨbɛn ɨbyi le? Kə́ kə́! Tsɛʼ me mboŋ, ma nɨ ŋwɔn bə Izrai a nye ɨlə̌ Abraʼm, wa a funɨ a mu atsé zə wi zə Bɛnjamɛn ə.

² Ka Ŋwi a tsɔʼ ayi mbó ɨmyi a nye ɨbɛn ɨbyi ɛ. Bo nɨ ɨbɛn ba wɛrə a tsɔ́ʼnɨ́ ndɔgɨnɨ a tete ghe. Nɨ se zhi anu za aŋwaʼnɨ a Ŋwi a soŋnɨ mbɨ́ʼ adzaŋ za Alaja a buʼnɨ mbó a mbó Ŋwi tsɛʼ nɨ ntəm ɨyi ɨtsum ngə́ á wɛrə a furɨ ndzum ɨzhi a nye bə Izrai lá le? Alaja a sóŋ ngə́:

³ “Maʼmbyí, bɨ zhwitɨnə ntóm Ŋwi nkɨ ndzagɨ ɨtú mɨkuʼ ɨtso; a kɨ nti mbvurɨ tsɛʼ me me ghe. Tɨtsɔŋnɨ bɨ lǒ ɨ kɨ zhwitɨ aghə.”

⁴ Lá Ŋwi a chwɨ́gɨ́ a mbó zɨ ngə́ ke le? “Ma len ɨbɛn nchwuʼ tsi samba ba bɨ bvurɨ tɨ vwotɨ a tɨshe nguʼsɨ a mɔn abe wa bɨ tɔ́ŋnə́ ngə́ Bal lá.”

⁵ Ndəŋndəŋ, tɨtsɔŋnɨ: bə tse a nɨ́sháŋnɨ́ bvurɨ ntsi ɨwu ba Ŋwi a tsɔʼnɨ a mu abɔŋəntəm azhi ɛ.

⁶ Ŋwi a tsɔʼə ntsǎ la a ndzum abɔŋəntəm azhi, nkeʼ be be mbɨ́ʼ a za bo ghɨnə ghe. Mbɨ́ʼ ngə be a be ngə́ Ŋwi a tsɔ́ʼə ɨbɛn ntsǎ lá a ndzum anu za bo ghɨnɨ muŋ abɔŋəntəm a mɨ keʼ ngótɨ́ zɛrə be.

⁷ A tiʼ mbe ngə́ ke le? Bə Izrai sé nɨ anu za bo kɨ́nə́ ndǒ chyɛ. Lá ba Ŋwi a tsɔ́ʼnɨ́ bɨ tsí nɨ zɛrə ghe, abvuʼ mɨntəm ɨma tənɨ tso mɨngɔʼ

⁸ tso mbáʼ aŋwaʼnɨ a Ŋwi a soŋnɨ ngə́, “Ŋwi a ghá awa nɨ atú za a dzɨŋtɨnɨ, ɨmɨgɨ ɨma chi keʼ ɨdiʼ zɛn, ɨtoŋnɨ ɨchi keʼ ɨnu zuʼ ɨ kɔʼ kuʼ sɨŋə ghe.”

⁹ Devidɨ a soŋ ngə́, “A nɨdorɨ ɨna be ndab bo makyɛn, ɨdzúm á bo nkɔ́mnkə́ ɨwu, ɨ kɨ nɨŋ ngɨ́ʼ a nye bo ghe.

¹⁰ A Ŋwi a ghɨ á ɨmɨgɨ ɨma fɨŋ á bo chi keʼ ɨdiʼ zɛn, á Ŋwi a gha ɨbyɛʼ á bo byɛʼ á ndzum ɨtsa ŋəmnkɨ á bo tiʼ bɨ mbyirɨndzum nɨnkoŋ ə.”

¹¹ Ma tiʼə mbítə́ ngə́ bo kɔ́mnkɨ́ ngvo lá taŋ ɨ ghɔŋ a tɨshe le? Kə́ kə́! Mbɨ́ʼ ngə́ bo ghɨ́ mɨbvu, ɨloŋ ɨ yen a mbó ba a se bə Yuda be, taŋ á bə Izrai tiʼə nghɨʼnə awa ghe.

¹² Ɨbvu bə Yuda yén nɨ ɨfɔgə wu wi a mbó abvuʼ a ɨbɛn atuəshe, afúm aza a mu azhwi a kɨ́ ngyen nɨ ɨfɔgə wu wi a mbó ba a se bə Yuda be ə. Ɨfɔgə wa ɨ ghaʼnɨ ngɛn nɨ mbyi ghɨ tiʼ tsi mbáʼ bɨ ghɨ kwiʼtɨ bə Yuda bɨtsum a nkwárɨ́ ɨloŋ ə!

A ba a se bə Yuda be keʼ Ntɛrə mbɨ́ʼ Ɨloŋ wa bo Tsinɨ nɨ Wɛrə ghe

¹³ Tɨtsɔŋnɨ, ma tiʼə ngamə lá a mbó bɨŋ ɨbɛn ba nɨ se bə Yuda be ə. Mbáʼ ma nɨ ntom Yeso a mbó ba a se bə Yuda be lá, ma mɨ ŋuʼ ɨnye mbɨ́ʼ afaʼ azə.

¹⁴ Aghagɨ a tsɛrə ma chi ghɨ á ɨbɛn ɨban (bə Yuda) tsi nɨ aghɨʼnɨ, a nye ndóm məwen, nchi tiʼ loŋ awa bə tse ghe.

¹⁵ Mbɨ́ʼ ngə́ mbáʼ bɨ tsɔ́ʼnɨ́ mbó a nye bo lá, abvuʼ a ɨbɛn bɨ atuəshe bɨtsum a kwébtɨ́ a nye ngaŋ kɨban Ŋwi ntiʼ bɨson ɨbyi ɛ. A ghɨ tíʼ be lá ɨ nə́ mbáʼ be bɨ bə nkwarɨ awa, bə Yuda, wədiʼ le? A ghɨ bé ntsi ntən a mbó bɨkfú ə!

¹⁶ Be bɨ gha ntsambyi mbɛʼ abán a mbó Ŋwi, lá be ngə́ abán za atsum a nɨ zə wɛrə ghe; be bɨ kɨ nga mɨngaŋ mɨ atɨ a mbó Ŋwi, lá be ngə́ mbó ɨmyi a kɨ mbe ɨmyi ɛ.

¹⁷ Bɨ chwántɨ́ mbó mɨ atɨ a olif za bɨ binɨ mə mɔʼɔ, ntiʼ nchwuʼsɨ abó atɨ a olif wu ɨmu mɨbaʼ ɨwu ə. Bɨŋ ba a se bə Yuda be fi abó atɨ a olif zə ɨmu mɨbaʼ za, tɨtsɔŋnɨ nɨ tiʼə nchyɛ̌ nɨ nkyi a nye mɨngaŋ mɨ atɨ a olif za bɨ bínɨ́ lá.

¹⁸ Ma lan, koʼ a ntɛ́rə́ ngə́ o tsa mbó ma bɨ lónɨ́ nchwántɨ́ lá. Be o tsi nɨ ntɛrə, fom ngwaʼtɨ ngə́ ka o be agho mɨngaŋ ma mɨ twɛ́mtɨ́nə́ atɨ za — a twɛ́mtɨ́ mɨngaŋ mɨ atɨ za ntwɛ́mtə́ agho.

¹⁹ O mɨ soŋ ngə́, “Bɨ ló nchwántɨ́ mbó ma lá taŋ ɨ chi chwuʼsɨ aghə.”

²⁰ Tsɛʼ a nkənu ə. Bɨ ló nchwántɨ́ mbó ma lá mbɨ́ʼ ngə́ bo sé nɨŋ mɨntəm ɨma a nye Ŋwi ə, lá o chwuʼnɨ ntən ɨ shiʼnɨ lá mbɨ́ʼ ngə́ o nɨŋ ntəm ɨgho a nye Ŋwi ə. Koʼ ntiʼə ŋǔʼ ɨnye, baŋnɨ ntsi be nɨ abɔgɨtɨ ə.

²¹ Mbɨ́ʼ ngə́, be a be ngə́ Ŋwi a sé nyɛʼtɨ bə Yuda ba bɨ benɨ mbó mɨ olif wa bɨ binɨ lá, tɨ nɨŋ ngɨ́ʼ a nye bo, wɛrə a ghɨ keʼ kɨ nyɛʼtɨ awən tɨ nɨŋ ngɨ́ʼ a nye bɨŋ ə.

²² A nɨ ze adzaŋ a nchyɛ nɨ ntəm ngɨ ɨbɔŋ za Ŋwi a tsinɨ nɨ zɛrə abɔʼnɨ ntɛgɨ nɨdɨgɨ ɨzhi ɛ: wɛrə a tɛgɨ nɨdɨgɨ a nye ɨbɛn ba bɨ kɔmnkɨnɨ ngvo, lá nchyɛ̌ nɨ ntəm ngɨ ɨbɔŋ mbáʼ be nɨ ghɔŋ a mu ntəm ngɨ ɨbɔŋ məwiŋ ə; a tú lá be, wɛrə a mɨ kɨ chwántɨ́ awən ɨ nyɛʼə.

²³ Lá be bə Yuda nyɛʼ anu a tɨnɨŋ ntəm ɨwa a nye Ŋwi, Ŋwi a mɨ bə chwuʼsɨ awa wədiʼ ə; mbɨ́ʼ ngə́ Ŋwi a chi ghɨ á fuə.

²⁴ Bɨŋ ɨbɛn ba nɨ se bə Yuda be tsi lá tso mbó mɨ olif mɨbaʼ ma bɨ chwánɨ́ ɨ nchwuʼsɨ a nye olif wa bɨ binɨ, mbáʼ ka a kwɛ ntsi ayi nɨ mbe mə lá. Bə Yuda be lá tso mbó mɨ olif wa bɨ binɨ lá; a ghɨ tiʼ waŋnɨ a mbó Ŋwi ɨ bə chwuʼsɨ mbó ma bɨ chwántɨ́nɨ́ wədiʼ ə.

Ŋwi a Kǒ a Mɨlɨŋnɨ a Nye Ŋwɔn tsum ə

²⁵ Ɨbɔmbɨma ɨban, ma lǒ ngə́ á nɨ zuʼ nkɨ nji a məziŋ nkənu za ɨ tsinɨ a nkubə lá, mbɨ́ʼ nɨ kwaʼtɨ ngə́ nɨ tsi nɨ zóŋ be tɨsɨŋə. Ɨ nɨ ngə́, atɨŋətú a bə Yuda mɨ keʼ ghɔŋ nɨnkoŋ ə, a mɨ tsi ɨ kɔʼ kuʼ tsɛʼ a nkfu za ba a se bə Yuda be bɨtsum mɨ yen a mbó Ŋwi ə.

²⁶ Ma lan, nə nɨ adzaŋ za Ŋwi a mɨ loŋ bə Izrai bɨtsum ə; tso mbáʼ bɨ ŋwaʼnɨnɨ a mu aŋwaʼnɨ a Ŋwi ngə́, “Ndoŋ wa mɨ lo a Zayɔn, ɨ yen fɨgɨ abɨgəntəm atsum a nye ɨbɛn bɨ ɨlə̌ Yakɔb ə.

²⁷ Ma mɨ ghɨ akan məzen bɨgɨ bo a nkfu za ma sugɨnɨ mɨbvu ɨma ghe.”

²⁸ Mbɨ́ʼ ngə́ bo tón awa Nkən wu Shiʼnɨ wa, bə Yuda tíʼ mbé ngaŋ kɨban Ŋwi, mbɨ́ʼ atú azɨŋ ɨbɛn ba nɨ se bə Yuda be ə. Lá mbɨ́ʼ adzaŋ za a zarɨnɨ Ŋwi, wɛre a kɔŋ bə Izrai mbɨ́ʼ akan za wɛrə a nɨ́ŋnɨ́ bo bɨ bɨta ɨba bə kɔ́ʼɔ́nguʼ ə.

²⁹ Mbɨ́ʼ ngə́ ka Ŋwi a nkwébtə́ ayi ntəm ɨyi a nye ŋwɔn wa a tsɔʼnɨ kə ɨfɔgɨ ayi ɛ.

³⁰ Bɨŋ ɨbɛn ba nɨ se bə Yuda be, nɨ tə́n atú a mbó Ŋwi a mbyi ɛ; lá tɨtsɔŋnɨ Ŋwi a konə a mɨlɨŋnɨ a nye bən, mbɨ́ʼ ngə́ bə Yuda tə́n atú ə.

³¹ Ndəŋndəŋ, mbɨ́ʼ a mɨlɨŋnɨ məwen wa Ŋwi a kónɨ́ a nye bən lá, bə Yuda tiʼə tɨŋə atú a mbó Ŋwi taŋ á bo chi kɨ tiʼ tsi nɨ mɨlɨŋnɨ Ŋwi tɨtsɔŋnɨ ə.

³² Mbɨ́ʼ ngə́ Ŋwi a fɨŋ a ŋwɔn mɨsɔŋ a ntsu tsum a mu atsáŋ atɨŋətú, taŋ ɨ tiʼ ko a mɨlɨŋnɨ ɨwa bɨtsum ə.

A Bɨgɨnə Bontɨ a Ŋwi ə

³³ Afuʼ a Ŋwi a ghaʼ be tɨsɨŋə! Zóŋ ɨyi bo azhyɛ azhi shwi be tɨsɨŋə. Ɨwa chi fɨʼtɨ ɨnu tsa wɛrə a tsɔ́ʼnə́ a mu ntəm zɨ le? Ɨwa ŋwɔn chi zhi ngɨnɨ mɨnu ɨmyi le?

³⁴ Adzaŋ za aŋwaʼnɨ a Ŋwi a soŋnɨ ngə́: “Ɨwa zhi ɨnu tsa Maʼmbyí a kwaʼtɨnə a mu atú azhi le? Ɨwa a chi tɨgɨtɨ ayi le?

³⁵ Ɨwa a láʼnə nga azúm zə tsɛrə a mbó Ŋwi, taŋ á wɛrə a kɨ ntiʼ ntfu ayi le?”

³⁶ Mbɨ́ʼ ngə́ ɨdzúm ɨtsum a káʼ wɛrə, ɨdzúm ɨtsum tsa tsɨ tsinɨ, tsɨ tsi ntsa lá a ndzum wɛrə, ɨdzúm ɨtsum kɨ mbe lá tsə wɛrə ghe. A nɨfáŋ tsi a mbó Ŋwi nɨnkoŋ ə! A be lá.