Roma 1 - Mɨkan wu Fi

¹ Aŋwaʼnɨ zen a lo a mbó me, Baolo ŋwɔn afaʼ Kristo Yeso ghe. Ma nɨ ntom Yeso za Ŋwi a tsɔʼnɨ ntyigɨ a sóŋ Nkən wu Shiʼnɨ ə.

² Ŋwi a káʼ Nkən wu Shiʼnɨ məwen a ngúʼə ngúʼə ntsa lá a ndzum ntóm Ŋwi, adzaŋ za bɨ ŋwaʼnɨnɨ a mu Aŋwaʼnɨ a Ŋwi zə Fɛmnɨ ə.

³ Nkən wu Shiʼnɨ məwen, ɨ lá mbɨ́ʼ a Mɔn ɨyi, Maʼmbyí ɨwɨgɨnə Yeso Kristo: wa bɨ jwínɨ́ ayi tso ŋwɔn mɨsɔŋ a ntsu a nye ŋwɔn ɨlə̌ Devidɨ ə.

⁴ A ndzum Azhwi zə Fɛmnɨ, bɨ zhwémnɨ́ ayi a mbó nɨvwo, a tiʼ ndiʼ ngə́ wɛrə a nɨ Mɔn Ŋwi wa a tənɨ ə.

⁵ A ntsǎ a ndzum Yeso Kristo, Ŋwi a gha abɔŋəntəm azhi a mbó bɨgɨ nkɨ ngɨ awɨgɨ a nye ntóm Yeso taŋ mbɨ́ʼ atú a Kristo, á ɨbɛn ba bɨ se be bə Yuda nɨŋ mɨntəm ɨma a nye Kristo nkə́ ndzúʼnə́ a wɛrə ghe.

⁶ Məzen a kɨ nkwiʼtɨ awən wa nɨ tsinɨ alaʼ Roma ba Ŋwi a tɔŋnɨ ngə́ á nɨ be ɨbɛn bɨ Yeso Kristo lá.

⁷ Ma tiʼə ŋwaʼnə a mbó bən bɨtsum alaʼ Roma ghe. Ŋwi a kɔŋ awən nkɨ ntsɔʼ awən ngə́ á nɨ be ɨbɛn ɨbyi: A Ŋwi, zɨ wa a nɨ Ta ɨwɨgɨnə abɔʼnɨ Maʼmbyí Yeso Kristo gha abɔŋəntəm abɔʼnɨ mbɔnɨ a mbó bɨŋ ə.

Atsaʼtɨ a Ŋwi a Ngǎ Mɨya ghe

⁸ A mbyigɨ mbyi, ma gha a mɨya a mbó Ŋwi ɨghan mbɨ́ʼ awən bɨtsum ntsa a ndzum Yeso Kristo, mbɨ́ʼ ngə́ mbyi tsum ɨ zǔʼ nkərɨ mbɨ́ʼ abeməntəm azən a nye Yeso ghe.

⁹ Ŋwi a nɨ atɛmə-ndzě ɨghan ngə́ ma kwémtə́ awən nkfu tsum za ma tsaʼtɨnə a Ŋwi ə. Ŋwi, zɨ wa ma faʼnə wəmbo nɨ ntəm ɨghə ɨtsum a ntsǎ a ndzum ɨ sǒŋ Nkən wu Shiʼnɨ mbɨ́ʼ a Mɔn ɨyi lá.

¹⁰ Ma tsaʼtə a Ŋwi ngə́ be a be anu za wɛrə a lɔnə, muŋ nkfu ɨ kuʼ á ma yen ngantɨ awən tɨtsɔŋnɨ,

¹¹ mbɨ́ʼ ngə́ ma lǒ tsɛʼ a nkan a ndzé bən, taŋ ɨ chi ghɨ á nɨ kɨ ntsi nɨ azum zə ghanɨ za a lonɨ a mbó azhwi za a mɨ tiʼ ghɨ á nɨ tɨŋə.

¹² Anu za ma sóŋnə́ lá a nɨ ngə́ bɨgɨnə bɨtsum mɨ kwatɨ ɨ wɔŋtɨ a ŋwɔn nɨ ŋwɔn ə. Abeməntəm azan a mɨ kwatɨ ɨ wɔŋtɨ awən, á abeməntəm azən a kɨ nkwatɨ ngwɔtɨ aghə.

¹³ Ɨbɔmbɨma ɨban, ma lǒ ngə́ á nɨ zhi ngə́ a nye nkfu tsə ghaʼnɨ ma kwaʼtɨnə a ngántɨ́ bɨŋ ə, lá azúm zə tse a gháʼə nkɨ́ŋə́ aghan a ngyiŋə ghe. Ma lǒ ɨ kɨ tsi nɨ ɨbɛn ba bɨ bəŋnɨ mɨntəm ɨma ɨ nɨŋ a nye Yeso a tɨtərɨ bən tso mbáʼ ma tsinə nɨ bɛrə a tɨtərɨ ba a se bə Yuda be bə mɔʼɔ lá.

¹⁴ Ma tsi nɨ anu za ma mɨ zagɨ ghɨ a mbó ɨbɛn bɨtsum, a mbó ba ɨmɨgɨ ɨma ŋaʼnɨnɨ abɔʼnɨ ba bɨ bvúrɨ́nə́ ntsɛ́gə́ tso ɨnyam mɨbaʼ, a mbó ɨbɛn ba bɨ yigɨnɨnɨ abɔʼnɨ ɨdzɨŋtɨ ə.

¹⁵ Ma lan, ɨmugɨ tse ɨ kɨə a mu ntəm me ngə́ á ma kɨ soŋ Nkən wu Shiʼnɨ a mbó bən ba nɨ tsinɨ a Roma lá.

Mɨtən mɨ Nkən wu Shiʼnɨ ə

¹⁶ Ka ma ndɨrə aghə atú a nye nkən wu shiʼnɨ ə; ɨ lá mɨtən mɨ Ŋwi a ndoŋ ŋwɔn tsum wa a nɨŋnɨ ntəm ɨyi a nye zɨ, a ntsambyi, bə Yuda, ntiʼ ndzɔŋtɨ nɨ ba a se bə Yuda be ə.

¹⁷ Mbɨ́ʼ ngə́ nkən wu shiʼnɨ ɨ kyɛʼə adzaŋ za Ŋwi a ghɨnə ɨbɛn chinɨnə a ɨshi ɨmɨgɨ zɨ; ɨ zɛ́ʼtə́ lá a nye abeməntəm a mbiʼnə ɨ ghɛn fu a ndwitə ghe. Aŋwaʼnɨ a Ŋwi soŋ ngə́, ‘‘Ŋwɔn wa a chinɨnɨ a ɨshi ɨmɨgɨ Ŋwi ntsa a ndzum abeməntəm a mɨ tsi ntɨŋ ə.’’

Ŋwɔn Mɨsɔŋ a Ntsu tsum a Vwo Ɨsáʼə

¹⁸ Ŋwi a kyɛʼə a mɨlwi ɨyi wa a lonə a fɔməbvurə a nye ɨnu tsa ka tsɨ mbémnə́ ayi bo zɨ abɔʼnɨ ɨnu tsɨ tɔmnɨnɨ ɨtsum tsɨ ɨbɛn ba mɨndómɨnji mə tɔmnɨnɨ ɨma kɨ́ŋnɨ́ nkənu ngə́ á bɨ keʼ a zɛrə zhyɛ.

¹⁹ Ŋwi a lwǐ ntɔŋ a nye bo, mbɨ́ʼ ngə́ anu za ɨbɛn chinɨ zhi mbɨ́ʼ ayi a nɔŋ asaŋəsaŋ a ɨshi bo, mbɨ́ʼ ngə́ Ŋwi zɨmboŋ a ghɨ a nɔŋ asaŋəsaŋ ə.

²⁰ Ndɔgɨnɨ mbáʼ Ŋwi a káʼnɨ́ mbyi, ɨnu tsa tsɨ diʼnə ngə́ wɛrə nɨ Ŋwi tsa ka bɨ ndzě ayi, tso mɨtən ɨmyi ma a nɨ mə nɨnkoŋ abɔʼnɨ mbě ɨzhi tso Ŋwi, bɨ kyɛʼə a tsɛrə asaŋəsaŋ a mbó bɨgɨnə ghe: bɨ zě a tsɛrə lá a nye ɨdzúm tsa wɛrə a kaʼnə. Ma lan, ka ndómnji tse ɨ tsi ayi ɨwu wa be bo soŋ ngə́ a lo nkuʼnɨ a mbó bo a ngɨ ɨnu mətsiŋ ə.

²¹ Bo zhi a Ŋwi ə, lá nkeʼ nkɔ́ʼsə́ a Ŋwi atɨ́ adzaŋ za bo benɨ kɔʼsɨ, nkeʼ nkə́ ngǎ a mɨya wəmbo ə. Ɨkwaʼtɨ ɨtsa baŋnɨ mbə ndon be nɨ ɨnu adaŋədaŋə, ndzumnɨ ɨ lwɨgɨ ɨtú ɨtsa tsa tsɨ tsinɨ ndzobɨnɨ lá.

²² Bo sóŋə́ ngə́ bo tsi nɨ zóŋ lá mbaŋnə mbɨŋə mbě ɨbərɨ;

²³ ngúʼsɨ́ ɨbɔ bɨ abe ba bɨ ghɨnɨ bɨ be tso ɨbɛn bɨ mɨsɔŋ a ntsu ba bɨ kfókɨ́nə́ kə bɨsɨ́ŋ kə ɨnyam mɨbaʼ kə bɨkóŋə́she, mbaŋnɨ nyɛʼtɨ a ngúʼsɨ́ Ŋwi, zɨ wa a tsinɨ nɨ nɨfáŋ nkeʼ nkə́ nkfǒ lá.

²⁴ Ma lan, Ŋwi a nyɛʼtɨ awa ngə́ á bo ghɨ ɨtɨshwe ɨnu tsa mɨntəm ɨma lɔnə, tsa tsɨ shwɨgɨnɨ ɨnye ɨtsa, ŋwɔn bo mɨma ɨyi ɛ.

²⁵ Bo kwébtɨ́ nkənu mbɨ́ʼ a Ŋwi nɨ ɨchwenu; bo ghúʼsə́ nkə́ fáʼə a mbó ɨdzúm tsa Ŋwi a ghɨnɨ; mbaŋnɨ nkeʼ ngúʼsə́ nkə́ fáʼə a mbó zɨ wa a káʼnɨ́ ɨdzúm ɨtsum, zɨ wa bɨ tsinɨ nɨ mbontə nɨnkoŋ ə! A be lá.

²⁶ Mbáʼ ɨbɛn ghɨnə adzaŋ məwen lá, Ŋwi a nyɛʼtɨ awa bo ghɨnɨ ɨnu adɨrətú tsa bo kɔŋnɨ be tɨsɨŋə, tsɛʼ bəngye kə́ nɔ́ŋə́ nɨ bə mɔʼɔ, nkeʼ ndzɔ́ŋə́ adzaŋ za Ŋwi a káʼnɨ́ awa ngə́ á bo be.

²⁷ Ndəŋndəŋ mbáŋnɨ́ túŋə́ awa a nɔŋə nɨ bəngye mbaŋnə nkfǒ ndzúʼə nɨ ɨmugɨ wa ɨ lomnə a ɨnye bo ngə́ á bo nɔŋ bo nɨbo ghe. Mbáŋnɨ́ ghɨ̌ ɨnu adɨrətú bo bɨ bə mɔʼɔ, adzaŋ məwen, bo tɔ̌ŋ ɨnɨŋ ngɨ́ʼ za bo tsinɨ nɨ nchyɛ nɨ zɛrə a ngɨ ɨnu mətsen a nye bo ghe.

²⁸ Tso mbáʼ ɨbɛn məba tonɨ awa a nɨ́ŋ ɨnu nkənu tsa bo tsinɨ nɨ njiɛ mbɨ́ʼ a Ŋwi a mu ɨtú ɨtsa lá, wɛrə a nyɛʼtɨ awa a mbó ɨkwaʼtɨ nkobɨ ɨtsa ngə́ á bo tiʼə ngɨ̌ ɨnu tsa bo benɨ keʼ ngɨə ghe.

²⁹ Bo lon nɨ mbúŋ abɨgəntəm atsum, ɨnu tsɨ tɔmnɨnɨ, mbe amiɛnɨngám abɔʼnɨ ɨnu tɨbɔŋ ə; bo lon nɨ aghɨʼnɨ, bo zhwítə́ a bə mɔʼɔ, ntókə́, ntámtə́ a bə mɔʼɔ nkə́ nkwáʼtɨ́ ɨnu tɨbɔŋ a nye bə daŋ ə. Bo tǎŋ fɨnkərɨ

³⁰ ɨ sǒŋ ɨnu tɨbɔŋ mbɨ́ʼ a ŋwɔn nɨ ŋwɔn; mbán a Ŋwi, ndyíŋə́ a bə mɔʼɔ nkeʼ ndzě, ɨ ŋǔʼ ndzum ɨtsa nkə́ ntɛ́rə́; nkwáʼtɨ́ mɨndóm mə ghaʼnɨ a ngɨ ɨnu tsɨ tɔmnɨnɨ; nkeʼ bɨta ɨba bo bɨ bɨnɨmi ɨba a ndzúʼnə́;

³¹ mbe ɨdzɨŋtɨ; nkeʼ ngɨ̌ ɨnu tsa bo soŋnɨ ngə́ bo mɨ ghɨ, nkeʼ akɔŋnɨ a ndiʼə kə nkǒ a mɨlɨŋnɨ a nye ɨbɛn bə mɔʼɔ ghe.

³² Bo zhi ngə́ nyɔngɔŋ Ŋwi a soŋ ngə́ a kuʼnɨ a mbó ɨbɛn ba bɨ ghɨnɨ ɨdzaŋ ɨnu tso mətsen a nkfó ghe. Lá ka bo ngěn awa tsɛʼ nɨ mbyi a ngɨ ɨnu mətsen, bo bémtə́ ngə́ á bə mɔʼɔ kə́ ngɨə a tsɛrə ghe.