Nkyɛʼə 9 - Mɨkan wu Fi

¹ Ntsendá Ŋwi za ɨ zɔ́ŋtɨ́nɨ́ a nye ɨdiʼ tsi tə̧̂ tɔ́ŋ ɨzhi ntaŋ ə. Ma zé fɨndzɔŋ fa fɨ kwɛ́nə ndo a fɔməbvurə ngvo atuəshe, bɨ ghá akugɨ abɨ́ a kfúrɨ́mándzó za wəmbo ə.

² Fɨndzɔŋ fa ŋáʼ abɨ́ a kfúrɨ́mándzó za, fɨndyiʼ fu wə mu, tso fɨndyiʼ fa fɨ fúnə́ a mu aghəm alam zə wi; fɨndyiʼ fa fɨ fúnɨ́ a mu abɨ́ a kfúrɨ́mándzó za kúbɨ́nɨ́ ntsu nyom, ɨdiʼ ɨtsum tiʼə fɨ́ŋə́ ghe.

³ Ngwemnɨ fú a mu fɨndyiʼ fa ɨ shiʼ ngyen atuəshe. Bɨ ghá adaʼ za bəngámshe tsinɨ nɨ zɛrə a mbó bo ghe.

⁴ Bɨ sóŋ a mbó bo ngə́ á bo keʼ gha ngɨ́ʼ a mbó ngyɛn kə ɨtɨ kə ɨdzúm tsɨ mɔʼɔ ɨtsum tsa tsɨ kwínə́; bɨ sóŋ ngə́ á bo gha ngɨ́ʼ tsɛʼ a mbó ɨbɛn ba bɨ se tsi nɨ fɛnwu Ŋwi za a mɨdzenɨ bo ghe.

⁵ Bɨ sé bém ngə́ á ngwemnɨ tsa zhwitɨ ɨbɛn ben, tsɨ tsí tsɛʼ nɨ ndiʼ ngɨ́ʼ a mbó bo atú bɨsaŋ bi bɨtə̧̂ ghe. Ndzaŋə za ndiʼ ngɨ́ʼ za záŋnə́ tsi lá tsɛʼ tso ndzaŋə ɨshwe angámshe.

⁶ Atú bɨsaŋ ba bi bɨtə̧̂ bo mɨ bitɨ nɨvwo lá ɨ keʼ ze; bo mɨ lonɨ nkfǒ, lá á nɨvwo lɛʼ awa ghe.

⁷ Ngwemnɨ tsa fí ɨnyamənkárə́ tsa bɨ kyáŋtɨ́nɨ́ a ntó ntso; a nye ɨtú ɨtsa ɨdzúm tsɨ tse tsí ɨwu tso ɨsáʼfɔ ŋwaʼŋwaʼ, mɨshi ɨma fi mɨshi mɨ ŋwɔn mɨsɔŋ a ntsu ə.

⁸ Ɨnyɔŋ ɨtú ɨtsa fí ɨnyɔŋ ɨtú bəngye, mɨsɔŋ ɨma fi mɨsɔŋ mɨ ɨfon ə.

⁹ Bɨ kɨ́ŋtɨ́ mɨgǒ ɨma nɨ ɨdzúm tsa tsɨ fínɨ́ ngobɨ ntso mɨgǒ ɨtɨŋə ghe. Nji za ɨ kɨ́nə́ fúə a nye mɨbabɨnɨ ɨma fí nji za ɨnyamənkárə́ tsɨ ghaʼnɨ shwuŋnə ɨbáŋ nkɨə ngěn nɨ tsɛrə a ntso ghe.

¹⁰ Bo tsi nɨ mɨnkon abɔʼnɨ ɨshwe tso mə bəngámshe. Bo tsi nɨ mɨtən a ntágɨ́ ɨbɛn atú bɨsaŋ bi bɨtə̧̂ lá nɨ mɨnkon ɨma ma.

¹¹ Bo tsi nɨ ɨfɔ wa a sáʼnə́ awa, mbe ntsendá Ŋwi za ɨ lə́ŋtɨ́nə́ abɨ́ a kfúrɨ́mándzó za. Ɨkum ɨyi a nye nɨgham nɨ bə Ɛbal nɨ Abadɔn; a nye nɨgham nɨ bə Grikɨ ɨ nɨ Abolyɔn (ndiʼ lá ngə́ “Ntsənkɨ wa”).

¹² Ngɨ́ʼ zɨ ngwi zɨ ntsambyi za ɨ minə ghe; mbáʼ məzen ɨ tsanə, ngɨ́ʼ tsɨ wi tsi bá bvúrə́ ndzɔŋə ghe.

¹³ Ntsendá Ŋwi za ɨ zɔ́ŋtɨ́nɨ́ a nye ɨdiʼ tsi ntugə tɔ́ŋ ɨzhi ntaŋ ə. Ma zúʼ nji zɨ tse ɨ lo a nye mɨbú mi nɨkwa mɨ mɨkuʼ mɨ ŋwaʼŋwaʼ ma mɨ tɛ́mnɨ́ a ɨshi Ŋwi lá.

¹⁴ Nji za sóŋ a mbó ntsendá Ŋwi za ɨ zɔ́ŋtɨ́nɨ́ a nye ɨdiʼ tsi ntugə lá ngə́, “Shwe ɨtsendá Ŋwi tsa tsi nɨkwa tsa Ŋwi a korɨnɨ a mɨzam wu ngwi Yufretisɨ lá!”

¹⁵ Ma lan, bɨ shwɛ́n ɨtsendá Ŋwi tsa tsi nɨkwa mbáʼ bɨ kwɛ́nə nkyaŋtɨ awa a nye nkfu zen, njwi zen, saŋ wen abɔʼnɨ alom zen á bo zhwitɨ a táʼ adiʼ mbáʼ bɨ yɛbtɨnɨ a ŋwɔn mɨsɔŋ a ntsu ɨdiʼ tsi tárə́ ghe.

¹⁶ Bɨ sóŋ ndvuŋ bɨgwe ba bɨ kɔ́ʼnɨ́ atú ɨnyamənkárə́ a mbó me; ɨ bé nkám nkɨ tsi bá ghe (200,000,000).

¹⁷ A mu ndzɛm nəzhwɨgɨnɨ za ɨ lyénɨ́ aghan lá ma zɛ́n ɨnyamənkárə́ tsa abɔʼnɨ ɨbɛn ba bɨ kɔ́ʼnɨ́ a tsɛrə ghe. Bo tsí nɨ ngobɨ ntso nɨgǒ tsa tsɨ kɨ́nə́ mbaŋə tso ɨmugɨ, ɨ fɨ́ŋə́ tso ngɔʼ zɨ fɨŋnɨ zɨ tse bɨ tɔŋə ngə́ safaya nkə́ mbaŋə tso azúm zə tse bɨ tɔŋə ngə́ sɔlfɔ ghe. Ɨtú ɨnyamənkárə́ tsa fí ɨtú ɨfon ə. Ɨmugɨ, fɨndyiʼ abɔʼnɨ sɔlfɔ kə́ fúə a mu mɨntsu ɨma ghe.

¹⁸ Ngɨ́ʼ tsɨ wi tsa tsi tárə́ zhwítɨ́ a táʼ adiʼ mbáʼ bɨ yɛbtɨnɨ a ŋwɔn mɨsɔŋ a ntsu a nye ɨdiʼ tsi tárə́; ɨmugɨ wa, fɨndyiʼ fa abɔʼnɨ sɔlfɔ wa tsɨ kɨ́nə́ fúə a mɨntsu ɨnyamənkárə́ tsa lá.

¹⁹ Mbɨ́ʼ ngə́ adaʼ ɨnyamənkárə́ tsa tsi lá a mɨntsu bo abɔʼnɨ mɨnkon ɨma ghe. Mɨnkon ɨma be tso mɨnyo ntsi nɨ ɨtú, bo lɔgɨnə a tsɛrə ntágə́ ɨbɛn ɨwu ə.

²⁰ Abvuʼ a ŋwɔn mɨsɔŋ a ntsu, bo bɨtsum ba ngɨ́ʼ tsɨ wi tsiŋ sé awa zhwitɨ, bɨ sé bəŋ mɨntəm ɨma a nye ɨdzúm tsa bo mboŋ nyɛ́tɨ́nə́. Bo sé kyɛntɨ a ngúʼsɨ́ bɨdzɨŋ, kə ɨbɔ bɨ abe bɨ ŋwaʼŋwaʼ, bə tsə́ŋtsə́ŋ, bə broŋsɨ, bə ngɔʼ bo bɨ bə ɨtɨ, ɨdzúm tsa ka tsɨ ndzě awa ɨdiʼ, ndzǔʼ ɨnu kə ntɛ́mə́ lá.

²¹ Bo sé kɨ mbəŋ mɨntəm ɨma a njwítɨ́ ɨbɛn, a nye abú aza, ɨnu ntɔrɨ ɨlɛbɨ ɨtsa kə ɨzɛrə ɨwa ghe.