Nkyɛʼə 7 - Mɨkan wu Fi

Ɨbɛn bɨ Izrai ba 144,000 ba bɨ Lyígɨ́nɨ́ lá

¹ Mbáʼ məzen a tsánə, ma zɛ́n ɨtsendá Ŋwi tsi nɨkwa tsɨ tɛm a nye mɨbú mɨ atuəshe zen mi nɨkwa ghe. Bo wɛ́m bɨkɨfɛrɨ ba bi nɨkwa taŋ á kɨfɛrɨ wu tse a keʼ tsa atuəshe, kə ntsa a mu sagɨrə wu ngwi, kə ntsa a mu atɨ zə tsɛrə ghe.

² Ma kwíʼ ndzɛ́n ntsendá Ŋwi zɨ mɔʼɔ ɨ lo a sáʼnyom nkɔ́ʼə ngyiŋə nɨ alyigɨ a Ŋwi, zɨ wa a tsinɨ ntɨŋ ə. A tɔ́nkɨ́ nɨ nji zɨ ntən a mbó ɨtsendá Ŋwi tsa tsi nɨkwa tsa Ŋwi a ghánɨ́ adaʼ a mbó bo a ntsənkɨ atuəshe bo sagɨrə wu ngwi lá.

³ Ntsendá Ŋwi za sóŋ ngə́, “Njimbɨʼ nɨ tsənkɨ atuəshe, sagɨrə wu ngwi, kə ɨtɨ, ɨ kɔʼ kuʼ nkfu za bɨgɨ mɨ lyigɨ ngaŋ afaʼ Ŋwi ɨwɨgɨ nɨ alyigɨ a nɨdzenɨ bo ghe.”

⁴ Bɨ tíʼ sóŋ a mbó me ngə́ ndvuŋ ɨbɛn wa bɨ lyígɨ́nɨ́ nɨ alyigɨ a Ŋwi a mɨdzenɨ bo bé 144,000 ghe. Bo ló a mu ɨtsé tsɨ wi tsɨ bə Izrai tsa nɨghúm ntsɔb bá,

^5-8 nchwuʼ nɨghúm ntsɔb bá a mu táʼ atsé zə wi ə. Ɨtsé tsɨ wi tsa bé lá: Yudaʼ, Rubɛn, Gadɨ, Asha, Naftali, Manase, Simiɔn, Levi, Isaka, Zebulɔn, Yosɛb abɔʼnɨ Bɛnjamɛn ə.

Mɨkyaŋnɨ ma Ɨbɛn bɨ Ŋwi Ghɨnɨ tsí nɨ mɛrə ghe

⁹ Mbáʼ məzen a tsánə, ma lén ndzɛ́n ɨnɔ ɨnɔ ɨbɛn — ŋwɔn tse a kɨ chi keʼ awa bɨtsum kwaʼə. Bo ló a mu ngwəgɨ ŋwɔn mɨsɔŋ a ntsu tsum, ɨtsé tsɨ wi ɨtsum, ɨlaʼ ɨtsum nkɨ ndo a mbó ɨbɛn ba bɨ ghamnɨ mɨgham mɨtsum ə. Bo wə́gɨ́ bɨtɔgɨ bə fú, ntiʼtɨ ɨdzáŋ mbaŋ a mbó bo, ntɛm a ɨshi abərɨ za abɔʼnɨ Mɔn Mbyindzɨ wa.

¹⁰ Bo tɔ́nkɨ́ nɨ nji zɨ ntən ngə́, “Ɨloŋ ɨ lǒ lá a mbó Ŋwi ɨwɨgɨnə wa a shiʼtɨnɨ ntsi atú abərɨ za nkə́ ndǒ a mbó Mɔn Mbyindzɨ wa!”

¹¹ Ɨtsendá Ŋwi tsa ɨtsum ɨ tɛ́m nkárɨ́sɨ́ abərɨ za, nkwiʼtɨ bɨkum ba abɔʼnɨ ɨdzúm tsɨ kaʼnɨ tsa tsi nɨkwa tsa tsɨ tsínɨ́ ntən lá. Bo tíʼ ngvo a ɨshe nkubɨnɨ mɨshi ɨma a ɨshi abərɨ za, ntiʼ nguʼsɨ a Ŋwi,

¹² ɨ sóŋə́ ngə́, “A be lá! Mbontə, nɨfáŋ, zóŋ, ngǎ mɨya, nkɔʼsə atɨ́, mɨtən abɔʼnɨ adaʼ tsi a mbó Ŋwi ɨwɨgɨnə nɨnkoŋ nɨnkoŋ ə! A be lá!”

¹³ Táʼ nkum wa wu mɔʼɔ a bítɨ́ aghan ngə́, “Ɨbɛn ba bɨ wəgɨnɨ bɨtɔgɨ bə fú lá a nɨ bɨwa le, nkɨ ndo lá ɨ ghé le?”

¹⁴ Ma chwɨ́gɨ́ ngə́, “Tə̧, ka ma zhi aghə. A zhi gho ghe.” Wɛrə a sóŋ a mbó me ngə́, “Nə nɨ ɨbɛn ba bɨ loŋnɨ ɨ fu a mu ndɨgə zɨ ntən za. Bo sugɨnɨ bɨtɔgɨ ɨba nɨ alɛm a Mɔn Mbyindzɨ wa ngɨ a bɛrə bɨ fugɨnə ghe.

¹⁵ Nə nɨ anu za a ghɨnɨ bo tɛm a ɨshi abərɨ a Ŋwi ɨ fáʼə wəmbo nɨ njwi bo nɨ ɨtfúʼ a mu nɨshwim ɨni lá. Zɨ wa a shiʼtɨnɨ ntsi atú abərɨ za a mɨ kɨŋtɨ awa nɨ adzaŋ za a tsinɨ bo bo ghe.

¹⁶ Nji mɨdzɨ bo nji nkyi láʼ keʼ awa bə nkwiʼ ndzaŋ; nɨnyom kə ndǒm ɨdiʼ zɨ tse za ɨ tɔnə azúm chi keʼ tɔn awa,

¹⁷ mbɨ́ʼ ngə́ Mɔn Mbyindzɨ wa, zɨ wa a nɨ tɨtərɨ abərɨ za mɨ be ntsiŋ mɨnyam ɨwa, ɨ tsɨŋnɨnə awa ɨ tsagɨnə a mbó bɨnáŋə́bə́rə ba bɨ ghánɨ́ nkyi ntsi ntɨŋ ə. Ŋwi a mɨ tiʼ chiʼ nkyi nɨzɛʼ ɨtsum a ɨmɨgɨ bo ghe.”