Nkyɛʼə 6 - Mɨkan wu Fi

Ɨfɛnwu tsa

¹ Ma tíʼ ndzɛ́n a Mɔn Mbyindzɨ wa a ŋaʼ ntsambyi fɛnwu a tɨtərɨ tsa tsi samba, nkɨ ndzuʼ azúm zə kaʼnɨ a tɨtərɨ ɨdzúm tsɨ kaʼnɨ tsa tsi nɨkwa tsa tsɨ tsínɨ́ ntən a soŋ nɨ nji za ɨ fínɨ́ mbəŋ zɨ mbɨʼkɨnɨ ngə́, “Yiŋə!”

² Ma lén, ndze ɨnyamənkárə́ zɨ fú ə. Ŋwɔn wa a kɔ́ʼnɨ́ wətú a tíʼtɨ́ nkyɛ́rɨ́, bɨ gha ɨsáʼfɔ wəmbo ə. A kɔ́ʼ ɨnyamənkárə́ za ngěn tso ŋwɔn wa a tsínə́ nɨ ayanguʼ wa a ghɛnə a nchyɛ́ nɨ ayanguʼ ə.

³ Mɔn Mbyindzɨ wa a tíʼ ŋáʼ fɛnwu za ɨ zɔ́ŋtɨ́nə́; ma zúʼ ndzɔŋtɨ azúm zə kaʼnɨ za a tsínɨ́ ntən a soŋ ngə́, “Yiŋə!”

⁴ Ɨnyamənkárə́ zɨ mɔʼɔ fú abyɛn, mbe zɨ mbaŋnɨ ə. Bɨ ghá mɨtən a fɨ́gɨ́ mbɔnɨ atuəshe a mbó ŋwɔn wa a kɔ́ʼnɨ́ wətú, taŋ á ɨbɛn tiʼə njwítə́ awa ŋwɔn nɨ ŋwɔn ə. Bɨ ghá a təkɔʼ bɨ lumban wəmbo ə.

⁵ Mɔn Mbyindzɨ wa a tíʼ ŋáʼ fɛnwu za ɨ zɔ́ŋtɨ́nɨ́ a nye ɨdiʼ tsi tárə́ lá. Ma zúʼ azúm zə kaʼnɨ za a tsínɨ́ ntən za a zɔ́ŋtɨ́nɨ́ a nye ɨdiʼ tsi tárə́ lá a soŋ ngə́, “Yiŋə!” Ma lén, ndzɛ́n ɨnyamənkárə́ zɨ fɨŋnɨ ə. Ŋwɔn wa a kɔ́ʼnɨ́ wətú a tíʼtɨ́ azúm a fɨʼ ndɨtə a mu abó azhi ɛ.

⁶ Ma zúʼ azúm za a kómnɨ́ tso nji, ndo a tɨtərɨ ɨdzúm tsɨ kaʼnɨ tsa tsi nɨkwa tsa tsɨ tsínɨ́ ntən za ɨ sóŋnɨ́ ngə́, “Táʼ kilo mɨsaŋ atú nkáb afaʼ táʼ njwi a mu ɨshwom, bɨkilo bɨ nchwi mɨkárə́ za bɨ tɔ́ŋnə́ ngə́ bali bi bɨtárə́ atú nkáb afaʼ táʼ njwi a mu ɨshwom ə. Lá njimbɨʼ o tsənkɨ ɨtɨ tsa bɨ lɔgɨnə a tsɛrə ngɨ̌ mɨvwurɨ ɨwu abɔʼnɨ tsa bɨ lɔgɨnə ngɨ̌ mɨluʼ ɨwu ə!”

⁷ Mɔn Mbyindzɨ wa a tíʼ ŋáʼ fɛnwu za ɨ zɔ́ŋtɨ́nɨ́ a nye ɨdiʼ tsi nɨkwa lá; ma tíʼ ndzúʼ azúm zə kaʼnɨ za a tsínɨ́ ntən za a zɔ́ŋtɨ́nɨ́ a nye ɨdiʼ tsi nɨkwa lá a soŋ ngə́, “Yiŋə!”

⁸ Ma lén, ndzɛ́n ɨnyamənkárə́ za ɨ kyánkɨ́nɨ́ ə. Ŋwɔn wa a kɔ́ʼnɨ́ wətú ɨkum ɨyi bé Nɨvwo, Mbyi Ɨkfú Ɨbɛn fatɨnə ndzɔ́ŋə́ wə ndzum ə. Bɨ yɛ́btɨ́ mbyi ɨbagɨ nɨkwa nga mɨtən a mbó bo atú táʼ bagɨ, ngə́ á bo zhwitɨ ntsa a ndzum ntso, mɨchwinɨ, nɨghɔ, abɔʼnɨ ɨnyam mɨtsɛgɨ ə.

⁹ Mɔn Mbyindzɨ wa a tíʼ ŋáʼ fɛnwu za ɨ zɔ́ŋtɨ́nɨ́ a nye ɨdiʼ tsi tə̧̂ lá. Ma zɛ́n a shwúrɨ́ mɨkuʼ ma, bɨgharɨ bɨ ɨbɛn ba bɨ zhwítɨ́nɨ́ awa mbɨ́ʼ ngə́ bo chwítɨ́ nɨgham nɨ Ŋwi, nkɨ ngam mbɨ́ʼ abeməntəm aza nɨ táʼ ntəm ə.

¹⁰ Bo tɔ́nkɨ́ nɨ nji zɨ ntən ngə́, “Maʼmbyí Tamɨtən Mɨtsum wa a fɛmnɨ nkɨ mbe zɨ wa sóŋnɨ́ nkənu! A ghɨ lɔgɨ lá nkfu ake bɔŋ o sáʼ ɨbɛn bɨ atuəshe nkɨ nɨŋ ngɨ́ʼ a nye bo mbɨ́ʼ ngə́ bo chwírɨ́ alɛm azɨgɨ le?”

¹¹ Bɨ ghá a tɔgɨ wu fú a mbó ŋwɔn nɨbo tsum, ntiʼ soŋ a mbó bo ngə́ á bo kwiʼ njwiʼtɨ a nye məbaŋtɨ ɨ kɔʼ kuʼ nkfu za bɨ zhwitɨnə ngaŋ afaʼ ɨtsum tsɨ mɔʼɔ tsa bo bo faʼnə abɔʼnɨ ɨbɛn ba bo bo zɔŋnə a Kristo, tsɛʼ adzaŋ za bɨ kwɛ́nə njwítɨ́ awa lá.

¹² Ma tíʼ ndzɛn Mɔn Mbyindzɨ wa a ŋaʼ fɛnwu za ɨ zɔ́ŋtɨ́nɨ́ a nye ɨdiʼ tsi ntugə lá. Ɨshe nɛ́m tsɛʼ adaŋədaŋə, nɨnyom a tiʼ mbəŋ ayi ɨ fɨ́ŋə́ tsɛʼ fɨŋnɨ ngə́ tsɨŋ, saŋ a tiʼ mbəŋ ayi mbáŋə́ tso alɛm ə.

¹³ Mɨndzɔŋ vwó atuəshe, tsɛʼ tso mɨntam mɨ tɨ baŋ lo atú atɨ ngvokɨ a tɨshe mbáʼ kɨfɛrɨ wu ntən a chiʼnɨ a zɛrə ghe.

¹⁴ Nɨkaŋ kárɨ́kɨ́ ngɛn mbyé tso bɨ karɨ aŋwaʼnɨ zə karɨnɨ ndɔgɨ ngɛn nɨ zɛrə, nkɨ ntsɔʼ mbám tsum abɔʼnɨ adiʼ atsum za nkyi karɨsɨ nkwebtɨ ɨdiʼ ɨtsa ghe.

¹⁵ Bɨfɔ bɨ atuəshe, bɨta bɨ ɨlaʼ abɔʼnɨ bɨtantso, ngaŋ afuʼ zə wi nkɨ mbe ɨbɛn ba bɨ tsinɨ nɨ mɨtən abɔʼnɨ abvuʼ a ɨbɛn bɨtsum, ɨbuʼ abɔʼnɨ ba bɨ kyɛtɨnɨ mɨnkɨ mɨ abuʼ a nye bo tíʼ ndyɛmtɨ a mu mɨfúʼ abɔʼnɨ ɨ shwúrɨ́ mɨngɔʼ atú mbám ə.

¹⁶ Bo tɔ́nkɨ́ sóŋ a mbó mbám bo mɨngɔʼ ngə́, “Vwokɨnə ndwɛʼtɨ awɨgɨ a mbó ɨmɨgɨ mɨ zɨ wa a shiʼtɨnɨ ntsi atú abərɨ za, nkɨ mbe a mbó mɨlwi Mɔn Mbyindzɨ wa!

¹⁷ Njwi mɨlwi wu ntən, ɨ wa ɨ yenə ghe. Ɨwa chi tsi ɨwu wa a chinɨ tǒkɨ njwi məza le?”