Nkyɛʼə 5 - Mɨkan wu Fi

Mɔn Mbyindzɨ wa a tsi nɨ ɨlɨŋ ə

¹ Ma zɛ́n aŋwaʼnɨ zə karɨnɨ zə tse a mu abó a maʼə a zɨ wa a shiʼtɨnɨ ntsi atú abərɨ za. Bɨ ŋwáʼnɨ́ atú aŋwaʼnɨ za bɨbagɨ bɨtsum, ntiʼ nkɨ nzum a zɛrə nɨ fɛnwu ɨdiʼ tsi samba ghe.

² Ma kwíʼ nkɨ́ ndzɛ́n ntsendá Ŋwi zɨ ntən zɨ tse za ɨ chwítɨ́nɨ́ nɨ nji zɨ ntən ngə́, “Ɨwa a tsi nɨ ɨlɨŋ a ntə́ntɨ́ ɨfɛnwu tsen ɨ ŋaʼ aŋwaʼnɨ zə karɨnɨ zen le?”

³ Lá ŋwɔn tse a sé ɨwu tsi a fɔməbvurə kə atuəshe kə a mbyishe wa a kɨ chinɨ ŋaʼ aŋwaʼnɨ zə karɨnɨ za ɨ lentɨ ɨmu ɨzhi ɛ.

⁴ Ma búgɨ́ tsɛʼ nɨvwo nɨvwo mbɨ́ʼ ngə́ bɨ kɨ chi keʼ zɛn a ŋwɔn tse wa a tsinɨ nɨ ɨlɨŋ wa be a ŋaʼ aŋwaʼnɨ zə karɨnɨ za kə ɨ lentɨ ɨmu ɨzhi ɛ.

⁵ Táʼ nkum wa wu mɔʼɔ a tíʼ sóŋ a mbó me ngə́, “Koʼ bugə. Ze azo! Afon za a funɨ a mu atsé zə wi zə Yudaʼ, ŋwɔn wu ngwi wu ɨlə̌ Devidɨ, a tokɨnə ntsi nɨ ayanguʼ məziŋ ə. Wɛrə a chi tiʼ təntɨ ɨfɛnwu tsa tsi samba ɨ tiʼ ŋaʼ aŋwaʼnɨ zə karɨnɨ za.”

⁶ Ma tíʼ ndzɛ́n a Mɔn Mbyindzɨ wu tse a tɛm a tɨtərɨ, atú abərɨ za, ɨdzúm tsɨ kaʼnɨ tsa tsi nɨkwa tsa tsɨ tsínɨ́ ntən abɔʼnɨ bɨkum ba karɨsɨ a zɛrə ghe. Mɔn Mbyindzɨ wa a fí tso bɨ zhwítɨnə a wɛrə ghe. A tsí nɨ mɨndɔ́ŋ mi samba nkɨ ntsi nɨ ɨmɨgɨ mi samba mbáʼ lá ɨzhwi tsa tsi samba tsa tsɨ faʼnə a mbó Ŋwi tsa bɨ tsagɨnə a mu mbyi tsum lá.

⁷ Mɔn Mbyindzɨ wa a ghɛ́n nkwárɨ́ aŋwaʼnɨ zə karɨnɨ za a mu abó a maʼə a zɨ wa a shiʼtɨnɨ ntsi atú abərɨ za.

⁸ Mbáʼ a ghɨ́nɨ́ mə lan lá, ɨdzúm tsɨ kaʼnɨ tsa tsi nɨkwa tsa tsɨ tsínɨ́ ntən abɔʼnɨ bɨkum ba mɨghúm mɨmbá nɨ ntsɔb nɨkwa vwó a ɨshe a ɨshi Mɔn Mbyindzɨ wa. Bo bɨtsum tsí nɨ mɨloŋ mɨ aŋantɨ abɔʼnɨ ɨkəbɨ ŋwaʼŋwaʼ tsa tsɨ lónɨ́ nɨ alyɛn, alyɛn za a lá ɨtsaʼtɨ Ŋwi ɨbɛn bɨ Ŋwi ə.

⁹ Bo zɔ́bɨ́ azɔbɨ a nkyi zə fi ngə́: “O tsi nɨ ɨlɨŋ a nkwárɨ́ aŋwaʼnɨ zə karɨnɨ za ɨ kɨ ŋaʼ ɨfɛnwu ɨchi ɛ. Mbɨ́ʼ ngə́ bɨ zhwítɨ́ agho, a ntsǎ a ndzum nɨvwo nɨ mɨtsuʼnɨ mɨ atú ɨno, o zón a ngá a mbó Ŋwi ɨbɛn bɨ ɨtsé tsɨ wi ɨtsum, ɨbɛn ba bɨ ghamnɨ mɨgham mɨtsum, ɨbɛn bɨ ɨlaʼ ɨtsum abɔʼnɨ ɨbɛn bɨ ngwəgɨ mɔn ŋwɔn tsum ə.

¹⁰ O ghɨnə awa bo be nɨfɔ na ɨbɛn bɨtsum ɨwu nɨ bɨntumshe ba bɨ faʼnə a mbó Ŋwi ɨwɨgɨnə, bo ghɨ bé bɨta bɨ ɨlaʼ bɨ atuəshe.”

¹¹ Ma kwíʼ nden, ndzuʼ ɨtsendá Ŋwi a nye nchwuʼ ɨtsa bo bɨ nkám ɨtsa ghe! Ɨtsendá Ŋwi mətsiŋ tɛ́m nkárɨ́sɨ́ abərɨ za, ɨdzúm tsɨ kaʼnɨ tsa tsi nɨkwa tsa tsɨ tsínɨ́ ntən abɔʼnɨ bɨkum ba,

¹² tíʼ ndzɔbɨ nɨ nji za ɨ kɔ́ʼnɨ́ atɨ́ ngə́: “Mɔn Mbyindzɨ wa bɨ zhwítɨ́nɨ́ lá a tsi nɨ ɨlɨŋ a nkwárɨ́ mɨtən, afuʼ, zóŋ abɔʼnɨ adaʼ, nkɔʼsə atɨ́, nɨfáŋ abɔʼnɨ mbontə ghe!”

¹³ Ma kwíʼ nkɨ́ ndzúʼ azúm zə kaʼnɨ atsum za a tsínɨ́ a fɔməbvurə, atuəshe, mbyishe, nkwiʼtɨ a sagɨrə wu ngwi — ɨdzúm tsɨ kaʼnɨ ɨtsum tsa tsɨ tsínɨ́ ntən a mu mbyi mbyi tsum — bo tiʼə ndzɔbə ngə́: “A mbó zɨ wa a shiʼtɨnɨ ntsi atú abərɨ za, nkɨ mbe a mbó Mɔn Mbyindzɨ wa, á bɨ bontɨ, nkɔʼsɨ atɨ́, nga nɨfáŋ abɔʼnɨ mɨtən a mbó bo nɨnkoŋ nɨnkoŋ ə!”

¹⁴ Ɨdzúm tsɨ kaʼnɨ tsa tsi nɨkwa tsa tsɨ tsínɨ́ ntən chwɨ́gɨ́ ngə́, “A be lá!” Bɨkum ba tíʼ ngvo a ɨshe nga nguʼsə ghe.