Nkyɛʼə 4 - Mɨkan wu Fi

Adzaŋ za bɨ Ghúʼsɨ́nə́ a Ŋwi a Fɔməbvurə ghe

¹ Mbáʼ məzen a tsánə, ndzɛm nəzhwɨgɨnɨ zɨ mɔʼɔ kwíʼ ndyé aghan, ma zɛn ntsu ndá wu tse wa ɨ tɛ́mnɨ́ ɨ dzɨ́gɨ́ a fɔməbvurə ghe. Nji za ɨ fínɨ́ zɨ ntaŋ za ma fómnɨ́ ndzúʼ ɨ ghamnə a mbó me lá, ɨ sóŋ ngə́, “Kɔʼ ngyen ɨghan, ma mɨ tiʼ diʼ agho nɨ anu za a tsinɨ ɨ zagɨ fu mbáʼ zen a tsanə ghe.”

² Tsɛʼ a nyom məwa, Azhwi a zúmtɨ́ aghə. Ɨwu a fɔməbvurə, abərɨ a tsí ɨwu, ŋwɔn tse a ŋaŋnɨ wu atú ə.

³ Ŋwɔn wa a shíʼtɨ́nɨ́ ntsi ɨwu a kə́ ntá tso ngɔʼ atɨŋndvuŋ tsɨ ŋwenɨnɨ tsa ɨkum ɨyi nɨ jasɨba bo Kanelian, tánɨ́mɨ́shigɨ wa a kɨ́nə́ ntǎ tso ɛmɛradɨ a kárɨ́sɨ́ abərɨ za.

⁴ Ɨbərɨ mɨghúm mɨmbá nɨ ntsɔb nɨkwa kárɨ́sɨ́ abərɨ za, bɨkum mɨghúm mɨmbá nɨ ntsɔb nɨkwa shiʼtɨ ntsi atú tsɛrə ghe. Bo wə́gɨ́ bɨtɔgɨ bə fú, nkɨ nchwubtɨ ɨsáʼfɔ ŋwaʼŋwaʼ ghe.

⁵ Azhwibtɨ a mbəŋ a kə́ ŋwankə fuə a nye abərɨ za, mbəŋ kə nkumə nkə́ mbɨ́ʼkə́ fuə ɨwu ə. Bɨ chwúʼ mɨnkaʼ mi samba a ɨshi abərɨ za, mɨ bé lá ɨzhwi Ŋwi tsa tsi samba tsa tsɨ faʼnə a mbó Ŋwi lá.

⁶ A nkwiʼtə, a ɨshi abərɨ za azúm zə tse a nɔ́ŋ ɨwu tso sagɨrə wu ngwi wa a bénɨ́ be ntsəŋ ɨləŋ, nkə́ ŋwenə tso malum wa o lenə ndzě ndzum zɨ mɔʼɔ ghe. A nkárɨ́sɨ́ abərɨ za a nye bɨbagɨ ɨbyi bɨtsum bi nɨkwa, ɨdzúm tsɨ kaʼnɨ tsa tsɨ tsínɨ́ ntən tsi nɨkwa tsí ɨwu nɨ ɨmɨgɨ a ɨshi bo ndzum ə.

⁷ Zə ntsambyi a fí afon; za a zɔ́ŋtɨ́nɨ́ a fí nkɔʼndzum zɨ mbáŋnɨ́; za a zɔ́ŋtɨ́nɨ́ a nye ɨdiʼ tsi tárə́ a tsí nɨ ɨshi wa ɨ fínɨ́ wu ŋwɔn mɨsɔŋ a ntsu; za a zɔ́ŋtɨ́nɨ́ a nye ɨdiʼ tsi nɨkwa a fí azám za a línə́ ghe.

⁸ Azúm zə kaʼnɨ za atsum za a tsínɨ́ ntən a tɨtərɨ tsa tsi nɨkwa a tsí nɨ mɨbabɨnɨ mi ntugə ghe. Ɨmɨgɨ lón a nye mbəmnye ɨtsa ɨtsum nkwiʼtɨ ɨshwúrɨ́ mɨbabɨnɨ ma. Nɨ njwi nɨ ɨtfúʼ, ka bo nkyɛ́ntə́ awa a ndzɔbə ngə́: “Maʼmbyí Ŋwi Tamɨtən Mɨtsum o fɛm, ɨ fɛm, ɨ fɛm, gho wa o bénɨ́, wa o benɨ, nkɨ mbe wa a lo láʼ yen lá.”

⁹ Ɨdzúm tsɨ kaʼnɨ tsa tsi nɨkwa tsa tsɨ tsinɨ ntən zɔbɨ mɨnkyi mɨ nɨfáŋ, mə nkɔ́ʼsə́ atɨ́ abɔʼnɨ mə mɨya a mbó zɨ wa a shiʼtɨnɨ ntsi atú abərɨ za, zɨ wa ntsi ntɨŋ ɨzhi ghɔŋnɨ nɨnkoŋ nɨnkoŋ lá. Nkfu tsum za bo zɔbɨnɨ mɨnkyi mɨ nɨfáŋ,

¹⁰ bɨkum ba mɨghúm mɨmbá nɨ ntsɔb nɨkwa vwo a ɨshe a ɨshi zɨ wa a shiʼtɨnɨ ntsi atú abərɨ za lá, nguʼsɨ a zɨ wa ntsi ntɨŋ ɨzhi ghɔŋnɨ nɨnkoŋ nɨnkoŋ lá nkɨ maʼnɨ ɨsáʼfɔ ɨtsa a ɨshe a ɨshi abərɨ za ntiʼ soŋ ngə́:

¹¹ “Maʼmbyí ɨwɨgɨ nkɨ mbe Ŋwi ɨwɨgɨ! O tsi nɨ ɨlɨŋ a nkwárɨ́ nɨfáŋ, nkɔʼsə atɨ́ abɔʼnɨ mɨtən ə. Mbɨ́ʼ ngə́ o káʼ ɨdzúm ɨtsum, a ntsǎ a ndzum adzaŋ za o kɨ́nə́ ndǒ, taŋ á tsɨ tsi ɨwu nkɨ tsi nɨ ntsi ntɨŋ ə.”