Nkyɛʼə 22 - Mɨkan wu Fi

Yoane a Zɛn a Mɨzam wa a Ghánɨ́ Ntsi Ntɨŋ ə

¹ Mbáʼ Ntsendá Ŋwi za mɛ́tɨ́nɨ́ a ndiʼ ntáʼmbagə wu wi wu fi wa a mbó me, ɨ tíʼ nkɨ ndiʼ a mɨzam wu nkyi wa ɨ ghánɨ́ ntsi ntən lá, ɨ dzinkɨnə tso ntsəŋ ɨləŋ, ndǒ a nye abərɨ a Ŋwi bo Mɔn Mbyindzɨ wa

² nkóŋə́ shiʼə a ndzɔʼ kɔŋ ndóm ntáʼmbagə wu wi wa. A nye ngə́rɨ́ mɨzam tsa tsi bá, atɨ za a ghánɨ́ ntsi ntən a tɛ́m ɨwu, za a kónɨ́nə́ mɨntam nkfu nɨghúm ntsɔb bá atú alom, táʼ nkfu atú táʼ saŋ; ɨzəŋ ɨchi tsi a ntsúʼ ɨlaʼ ɨtsum lá.

³ Bɨ chi ghɨ keʼ azúm za Ŋwi a lɔʼnɨ zɛ́n a mu ntáʼmbagə wu wi wa. Abərɨ a Ŋwi abɔʼnɨ abərɨ a Mɔn Mbyindzɨ wa ghɨ tsí a mu ntáʼmbagə wu wi wa, á ngaŋ afaʼ Ŋwi ngúʼsə́ ayi ɛ.

⁴ Ngaŋ afaʼ tsa ghɨ zɛ́n ɨshi ɨyi, á bɨ ŋwaʼnɨ ɨkum ɨyi a mɨdzenɨ bo ghe.

⁵ Ɨtfúʼ ghɨ keʼ bə mbe, á bo keʼ mɨnkaʼ a ndó kə ntá nɨnyom, mbɨ́ʼ ngə́ Maʼmbyí Ŋwi a ghɨ be nkaʼ ɨwa, á bo tiʼə sáʼə tso bɨfɔ nɨnkoŋ nɨnkoŋ ə.

Ngyiŋ Yeso ghe

⁶ Ntsendá Ŋwi za tíʼ soŋ a mbó me ngə́, “Mɨgham miŋ nɨ nkənu, o chi kɨ nɨŋ ntəm ɨgho a nye mɛrə ghe. Maʼmbyí Ŋwi, zɨ wa a ghánɨ́ Azhwi azhi a mbó ntóm Ŋwi, a tsagɨ ntsendá Ŋwi ɨzhi ngə́ á ɨ diʼ anu za a mɨ zagɨ fu tsɛʼ a nye məkum a nkfu a mbó ngaŋ afaʼ ɨchi ɛ.”

⁷ Yeso a soŋ ngə́, “Zhwiʼtə! Mɨmboŋnɨ, ma mɨ yiŋə! Nɨdorɨ tsi a mbó bo ba bɨ zúʼnɨ́nɨ́ mɨgham men ma bɨ ŋwaʼnɨnɨ a mu aŋwaʼnɨ zen mɨ ghamnə mbɨ́ʼ a za a mɨ fu tɨtsɔŋnɨ abɔʼnɨ za a ghɨnɨ fú a nkfu ndzum lá!”

⁸ Me Yoane, ma zuʼnə nkɨ ndzɛn ɨnu tsiŋ ɨtsum ə. Mbáʼ ma mɛ́tɨ́nɨ́ a ndzúʼə ɨ kɨ́ zɛ́n a tsɛrə lá, ma vwó a ɨshe a mɨku ntsendá Ŋwi za ɨ díʼnɨ́ a tsɛrə a mbó me lá, ndǒ nguʼsɨ wɛrə ghe.

⁹ Lá wɛrə a sóŋ a mbó me ngə́, “Koʼ mə lá ghɨə! Bɔgə bɨtsum tɨ nɨ ngaŋ afaʼ nkwiʼtɨ ɨbɔmbɨma ɨbo ntóm Ŋwi abɔʼnɨ ɨbɛn bɨtsum ba bɨ zúʼnɨ́nɨ́ mɨgham men a mu aŋwaʼnɨ ziŋ ə. Ghuʼsɨ be a Ŋwi ə!”

¹⁰ Ntsendá Ŋwi za kwíʼ sóŋ a mbó me ngə́, “Koʼ lwɛʼ ɨnu tsen tsa Ŋwi a soŋnɨ a mu aŋwaʼnɨ zen ngə́ tsɨ ghɨ fú lá, mbɨ́ʼ ngə́ nkfu tiʼ abó mbáʼ ɨnu tsiŋ ɨtsum mɨ fuə.

¹¹ Ŋwɔn tsum wa a tɔmnɨnɨ a mɨ zagɨ ghěn nɨ mbyi ɨ ghɨnɨ ɨnu tsɨ tɔmnɨnɨ, á ŋwɔn tsum wa a shwenɨ a zagə ngěn nɨ mbyi a ngɨ ɨnu nɨshwe; ŋwɔn tsum wa a chinɨnɨ a zagə ngěn nɨ mbyi ngɨ̌ ɨnu tsɨ chinɨnɨ, á ŋwɔn tsum wa a fɛmnɨ a zagə ngěn nɨ mbyi a ngɨ ɨnu tsɨ fɛmnɨ ə.”

¹² Yeso a soŋ ngə́, “Zhwiʼtə! Mɨmboŋnɨ, ma mɨ yiŋə! Ma mɨ yen nɨ mɨtsɔʼnɨ mɨ afaʼ ɨman, a ngá a mbó ŋwɔn tsum, adzaŋ za a kuʼnɨnɨ a nye za a ghɨnə ghe.

¹³ Ma nɨ ntsambyi nkɨ mbe ntsɨrɨndzum, mbiʼnə nkɨ mbe ndwitə ghe.”

¹⁴ Nɨdorɨ tsi a mbó ɨbɛn ba bɨ sugɨnɨ ɨtsɛʼ ɨtsa tsɨ fɛm, ma lan, ntiʼ ntsi nɨ abárɨ́ a ndzɨ́ mɨntam mɨ atɨ ma mɨ lonɨ a nye atɨ za a ghánɨ́ ntsi ntən, ɨ kɨ tsi nɨ abárɨ́ a ntsǎ a mɨntsu mɨ abuʼ ɨ kon a mu ntáʼmbagə wu wi wa.

¹⁵ Lá abyɛn ntáʼmbagə wu wi wa, a tsi ɨbɛn ba bɨ ghɨnɨ ɨtumbəm ɨtsa tsɨ nyaʼnɨ, ngaŋ fuə abú, ngaŋ ntɔrɨ ɨlɛbɨ, ngaŋ njwítɨ́ ɨbɛn, ngaŋ ngúʼsɨ́ ɨbɔ bɨ abe abɔʼnɨ ngaŋ ɨchwenu tsa tsɨ chwɛ́nɨ́ ɨnu a nye mɨgham ɨma abɔʼnɨ ngɨnɨ mɨnu ɨma ghe.

¹⁶ “Me Yeso, ma tsagɨnə ntsendá Ŋwi ɨzan ngə́ á ɨ chwitɨ ɨnu tsiŋ ɨtsum a mbó bən a mu ndáŋwi ə. Ma fu a ɨlə̌ ndá Devidɨ; ma tsi lá tso fɨndzɔŋ fə tənjwi fa fɨ tánə́ ghe.”

¹⁷ Azhwi za abɔʼnɨ Mɨngən wa bɨ soŋ ngə́, “Yiŋə!” Ŋwɔn tsum wa a zuʼnɨ a məzen a mɨ kɨ zagɨ soŋ ngə́, “Yiŋə!” Ŋwɔn tsum wa nji nkyi záŋnə́ ayi, a kə ndǒ, á yen nkwarɨ nkyi wa ɨ ghánɨ́ ntsi ntən tso azúm zə ghanɨ ə.

Ndwɨgɨnə ghe

¹⁸ Me Yoane, ma kwantə a ŋwɔn tsum wa a zuʼnɨ anu za Ŋwi a soŋnɨ mu aŋwaʼnɨ zen mbɨ́ʼ ɨnu tsa tsɨ ghɨnɨ fú lá: be ŋwɔn tsɛrə a kwiʼtɨ anu zə tsɛrə atú mɛrə, Ŋwi a ghɨ kwiʼtɨ ɨnɨŋ ngɨ́ʼ ɨzhi za a nɨ ngɨ́ʼ tsa bɨ fɨʼtɨnɨ a mu aŋwaʼnɨ zen lá.

¹⁹ Be ŋwɔn tsɛrə a fɨgɨtɨ anu zə tsɛrə a nye ɨnu tsa Ŋwi a soŋnɨ a mu aŋwaʼnɨ zen mbɨ́ʼ ɨnu tsa tsɨ ghɨnɨ fú lá, Ŋwi a mɨ kwarɨ wəmbo azhi abárɨ́ a ndzɨ́ mɨntam mɨ atɨ mɨ atɨ za a ghánɨ́ ntsi ntən lá abɔʼnɨ azhi abárɨ́ a nkuŋə a mu ntáʼmbagə wu Wi wu Fɛmnɨ wa, ɨnu tsi bá tsa bɨ fɨʼtɨnɨ a mu aŋwaʼnɨ zen lá.

²⁰ Zɨ wa a chwitɨnɨ mɨnkən men mɨtsum, a sóŋə́ ngə́, “E, tsɛʼ nkənu, ma mɨ yen a nye məkum a nkfu ə!” A be lá. Yiŋə a Maʼmbyí Yeso!

²¹ A abɔŋəntəm a Maʼmbyí Yeso a tsi a mbó ŋwɔn tsum ə. A be lá.